ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 30-10-2019

518 30 ຕ.ລ. 2019 ຫົວຂໍ້ຂ່າວອື່ນໆ

    ບົດ​ປະ­ຈຳ​ວັນ​ນີ້ ຈະ​ໃຫ້​ທ່ານ​ຜູ້​ອ່ານ​ຮູ້​ກ່ຽວ​ກັບ​ແຜນ​ຂອງ​ອັງ­ກິດ ໃນ​ການ​ດຶງ​ດູດ​ນັກ­ວິ­ທະ­ຍາ­ສາດ​ຕ່າງ­ປະ­ເທດ​ລະ­ດັບ​ຫົວ​ສະ­ໝອງ ເລື່ອງ​ມາດ​ຕະ­ການ​ຄວບ​ຄຸມ​ໂມງ​ເຮັດ​ວຽກ ໃນ ສ ເກົາ­ຫຼີ ແລະ ເລື່ອງ​ຍີ່­ປຸ່ນ​ວາງ​ແຜນ​ຜະ­ລິດ​ລົດ​ທີ່​ໃຊ້​ພະ­ລັງ­ງານ​ໄຟ­ຟ້າ.

    ທີ່ ອັງ­ກິດ: ໃນ​ການ​ກະ­ກຽມ​ເພື່ອ​ຮັບ​ມື​ກັບ​ບາງ​ບັນ­ຫາ​ທີ່​ເກີດ​ຂຶ້ນ ພາຍ­ຫຼັງ​ອັງ­ກິດ​ຖອນ​ຕົວ​ອອກ​ຈາກ​ສະ­ຫະ­ພາບ​ເອີ​ຣົບ​ນັ້ນ ທ່ານ ໂບ​ຣິດ ຈອນ​ສັນ ນາ­ຍົກ­ລັດ­ຖະ­ມົນ­ຕີ​ອັງ­ກິດ ໄດ້​ເປີດ­ເຜີຍ​ລະ­ບົບ​ອອກ​ວີ​ຊາ​ແບບ​ໃໝ່​ທີ່​ວ່ອງ­ໄວ​ທັນ​ການ ເພື່ອ​ດຶງ​ດູດ​ເອົາ​ຍອດ​ສະ­ໝອງ​ລະ­ດັບ​ຫົວ​ກະ­ທິ ໃນ​ຂະ­ແໜງ​ວິ­ທະ­ຍາ­ສາດ​ຈາກ​ຕ່າງ­ປະ­ເທດ ເຂົ້າ​ໄປ​ຮ່ວມ​ພັດ­ທະ­ນາ​ຂະ­ແໜງ​ວິ­ທະ­ຍາ­ສາດ​ອັງ­ກິດ ໃຫ້​ຈະ­ເລີນ​ງອກ​ງາມ ໃນ​ແຜນ​ປະ­ຕິ​ຮູບ​ລະ­ບົບ​ຄຸ້ມ​ຄອງ​ຄົນ​ເຂົ້າ​ເມືອງ​ຄັ້ງ​ສຳ­ຄັນ​ນີ້ ທ່ານ​ນາ­ຍົກ­ລັດ­ຖະ­ມົນ­ຕີ​ອັງ­ກິດ ຕ້ອງ­ການ​ໃຫ້​ລະ­ບົບ​ສາ­ມາດ​ດຶງ​ດູດ​ນັກ­ວິ­ທະ­ຍາ­ສາດ​ຕ່າງ­ປະ­ເທດ​ທີ່​ເກ່ງ​ທີ່​ສຸດ​ເຂົ້າ​ປະ­ເທດ ໂດຍ​ໄດ້​ແນະ­ນຳ​ໃຫ້​ຫ້ອງ­ການ​ກິດ­ຈະ­ການ​ພາຍ​ໃນ​ຫ້ອງ­ການ​ທຸ­ລະ​ກິດ ແລະ ໜ່ວຍ​ງານ​ຮັບ­ຜິດ­ຊອບ​ຍຸດ​ທະ​ສາດ​ດ້ານ​ພະ­ລັງ­ງານ ແລະ ອຸດ­ສາ­ຫະ­ກຳ ເຮັດ​ວຽກ​ຮ່ວມ​ກັບ​ຂະ­ແໜງ​ວິ­ທະ­ຍາ­ສາດ ເພື່ອ​ພັດ­ທະ­ນາ​ແນວ­ທາງ​ໃໝ່​ໃນ​ການ​ອອກ​ວີ​ຊາ ຊຶ່ງ​ລັດ­ຖະ­ບານ​ອັງ­ກິດ​ມີ​ເປົ້າ​ໝາຍ​ຈັດ​ຕັ້ງ​ປະ­ຕິ­ບັດ​ໃນ​ທ້າຍ​ປີ​ນີ້​ເອງ.

    ທີ່ ສ ເກົາ­ຫຼີ: ບັນ­ຫາ​ສຳ­ຄັນ​ໜຶ່ງ​ທີ່​ການ​ນຳ​ຂອງ ສ ເກົາ­ຫຼີ ມີ​ຄວາມ​ມຸ່ງ​ໜັ້ນ​ແກ້​ໄຂ​ໃຫ້​ຕົກ​ນັ້ນ ກໍ​ຄື ໄພ​ວ່າງ​ງານ​ໃນ​ໝູ່​ຊາວ​ໜຸ່ມ ສະ­ຖິ­ຕິ​ໃນ​ເດືອນ​ມີ­ນາ ປີ 2017 ສະ­ແດງ​ໃຫ້​ເຫັນ​ວ່າ ໄວ​ໜຸ່ມ​ເກົາ­ຫຼີ​ທີ່​ມີ​ອາ­ຍຸ​ລະ­ຫວ່າງ 15-29 ປີ ນັ້ນ​ວ່າງ​ວຽກ​ໃນ​ອັດ­ຕາ​ສູງ (ຂ່າວ​ຕ່າງ­ປະ­ເທດ ວັນ​ທີ 23 ພຶດ­ສະ­ພາ 2018-ວຽງ​ຈັນ​ໃໝ່) ທ່ານ ມູນ​ເຈ-ອິນ ປະ­ທາ­ນາ­ທິ­ບໍ­ດີ ສ ເກົາ­ຫຼີ ອອກ­ປາກ​ເຕືອນ​ກ່ຽວ​ກັບ​ບັນ­ຫາ​ຊາວ​ໜຸ່ມ​ວ່າງ​ງານ​ວ່າ: “ອັດ­ຕາ​ສ່ວນ​ຄົນ​ວ່າງ​ງານ​ສູງ ໃນ​ໝູ່​ຊາວ​ໜຸ່ມ​ເປັນ​ສິ່ງ​ທ້າ​ທາຍ​ຮ້າຍ​ແຮງ​ຕໍ່​ພື້ນ­ຖານ​ເສດ­ຖະ­ກິດ...” ຍ້ອນ​ແນວ​ນີ້​ເອງ ກະ­ຊວງ​ການ​ເງິນ ສ ເກົາ­ຫຼີ ຈິ່ງ​ແຈ້ງ​ໃຫ້​ຮູ້ ເມື່ອ​ວັນ​ທີ 21  ພຶດ­ສະ­ພາ 2018 ວ່າ ຈະ​ເພີ່ມ​ບ້ວງ​ເງິນ​ງົບ­ປະ­ມານ ເພື່ອ​ຊ່ວຍ​ສ້າງ​ວຽກ​ເຮັດ​ງານ​ທຳ​ແກ່​ຊາວ​ໜຸ່ມ ແລະ ຊ່ວຍ­ເຫຼືອ​ຂົງ­ເຂດ​ອຸດ­ສາ­ຫະ­ກຳ​ທີ່​ຕ້ອງ​ໄດ້​ຫຼຸດ­ຜ່ອນ​ໜ້າ​ວຽກ​ລົງ​ຢ່າງ​ຫຼວງ­ຫຼາຍ ຂ່າວ​ຍັງ​ໃຫ້​ຮູ້​ຕື່ມ​ວ່າ ສະ­ພາ​ແຫ່ງ​ຊາດ ສ ເກົາ­ຫຼີ ໄດ້​ຮັບ­ຮອງ​ເອົາ​ງົບ­ປະ­ມານ​ເພີ່ມ​ຕື່ມ ຈຳ­ນວນ 3.830 ຕື້​ວອນ (ປະ­ມານ 3,54 ຕື້​ໂດ​ລາ​ສະ­ຫະ­ລັດ) ຕາມ​ການ​ສະ­ເໜີ​ຂອງ​ລັດ­ຖະ­ບານ ພູດ​ໃຫຍ່ໆ​ຂອງ​ງົບ­ປະ­ມານ​ນີ້ ມີ​ເປົ້າ​ໝາຍ​ໃຊ້​ເພື່ອ​ຈ້າງ​ແຮງ​ງານ​ປະ­ຈຳ​ສຳ­ລັບ​ຂະ­ແໜງ​ວິ​ສາ​ຫະ​ກິດ​ຂະ ໜາດ​ນ້ອຍ ແຮງ​ງານ​ໃໝ່ ແລະ ຈຳ­ນວນ​ເງິນ​ສ່ວນ​ເຫຼືອ​ນັ້ນ​ໃຊ້​ເພື່ອ​ອຸດ​ໜູນ​ຜູ້​ທີ່​ສູນ​ເສຍ​ວຽກ​ເຮັດ​ງານ​ທຳ.

    ທີ່ ຍີ່­ປຸ່ນ: ອີງ​ຕາມ​ແຫຼ່ງ​ຂ່າວ ໂຢ​ມິ​ອຸ​ຣິ ຊິມ​ບູນ (ວຽງ​ຈັນ​ທາມ 28 ກໍ­ລະ­ກົດ 2018) ພວກ​ເຮົາ​ຊາບ​ວ່າ ລົດ​ທີ່​ໃຊ້​ເຄື່ອງ​ຈັກ​ທຸກໆ​ຄັນ​ທີ່​ແລ່ນ​ຢູ່​ຕາມ​ຖະ­ໜົນ​ປະ­ເທດ​ຍີ່­ປຸ່ນ ພາຍ​ໃນ​ປີ 2050 ຈະ​ໃຊ້​ພະ­ລັງ­ງານ​ໄຟ­ຟ້າ​ຂັບ​ເຄື່ອນ ຊຶ່ງ​ເປັນ​ພະ­ລັງ­ງານ​ທາງ​ເລືອກ​ທີ່​ສະ­ອາດ ແລະ ເປັນ​ມິດ​ກັບ​ສິ່ງ­ແວ­ດລ້ອມ ແລະ ໃນ​ປີ 2050 ນີ້​ເອງ ຍີ່­ປຸ່ນ​ໄດ້​ວາງ​ແຜນ​ໃຫ້​ສາ­ມາດ​ຫຼຸດ​ການ​ປ່ອຍ​ກາກ​ບອນ​ໄດ​ໂອ​ໄຊ ລົງ​ໃນ​ລະ­ດັບ 80% ຂອງ​ລະ­ດັບ​ປີ 2010 ນອກ­ຈາກ​ເພື່ອ​ເປົ້າ​ໝາຍ​ຕໍ່­ສູ້​ກັບ​ບັນ­ຫາ​ໂລກ​ຮ້ອນ​ແລ້ວ ການ​ຜະ­ລິດ​ລົດ­ຍົນ​ທີ່​ແລ່ນ​ດ້ວຍ​ພະ­ລັງ­ງານ​ໄຟ­ຟ້າ ຍັງ​ຈະ​ຊ່ວຍ​ເພີ່ມ​ຄວາມ​ອາດ​ສາ­ມາດ​ໃນ​ການ​ຄອງ​ຕະ­ຫຼາດ​ລົດ­ຍົນ​ຂອງ​ໂລກ​ອີກ​ດ້ວຍ ເພາະ­ວ່າ​ບັນ ດາ​ປະ­ເທດ​ທີ່​ຜະ­ລິດ​ລົດ­ຍົນ​ທັງ​ໝົດ ລ້ວນ​ວາງ​ແຜນ​ຜະ­ລິດ​ລົດ​ທີ່​ໃຊ້​ພະ­ລັງ­ງານ​ສະ­ອາດ ຕົວ­ຢ່າງ ປະ­ເທດ​ອັງ­ກິດ ແລະ ຝຣັ່ງ ນັ້ນ​ກໍ​ມີ​ແຜນ​ຢຸດ​ຢ່າງ​ຂາດ​ຕົວ​ການ​ຜະ­ລິດ ແລະ ຂະ­ຫຍາຍ​ລົດ­ຍົນ​ທີ່​ໃຊ້​ນ້ຳ­ມັນ​ແອດ​ຊັງ ແລະ ນ້ຳ­ມັນ​ກາ​ຊວນ ພາຍ​ໃນ​ປີ 2040.

ຂ່າວທີ່ກ່ຽວຂ້ອງ