ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 29-10-2019

565 29 ຕ.ລ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ໄດ້​ສັງ​ລວມ​ເອົາ​ຂ່າວ​ກ່ຽວ​ກັບ​ບົດ­ຮຽນ​ຂອງ​ປະ­ເທດ​ຣວນ​ດາ ໃນ​ບັ້ນ​ຮົບ​ຕ້ານ​ຖົງ​ຢາງ​ຕໍ່​ໃສ່​ມາດ​ຕະ­ການ ຄວບ​ຄຸມ​ມົນ​ລະ​ພິດ​ທາງ​ອາ­ກາດ ໜ້າ­ດິນ ແລະ ນ້ຳ ໃນ​ຢູ​ນານ ສປ ຈີນ ແລະ ເລື່ອງ​ພັນ­ທະ​ກ່ຽວ​ກັບ​ສິດ­ທິ​ມະ­ນຸດ​ທີ່​ເນ​ປານ​ຕ້ອງ​ໄດ້​ປະ­ຕິ­ບັດ.

    ທີ່ ຣວນ​ດາ: ໃນ​ສະ­ໜາມ­ຮົບ​ຕ້ານ​ການ​ໃຊ້​ຖົງ​ປຼັສ​ຕິກ​ນັ້ນ​ວ່າ​ກັນ​ວ່າ ຣວນ​ດາ ທີ່​ອາ​ຟຣິ​ກາ ເປັນ​ປະ­ເທດ​ອອກ​ໜ້າ​ພາ​ທາງ​ທີ່​ມີ​ມາດ​ຕະ­ການ​ເດັດໆ​ອອກ​ມາ​ໃຊ້ ຕົວ­ຢ່າງ ທາງ​ການ​ຂອງ​ປະ­ເທດ​ນີ້ ໄດ້​ກຳ­ນົດ​ໃຫ້­ການ​ໃຊ້​ຖົງ​ຢາງ​ເຮັດ​ດ້ວຍ​ວັດ­ຖຸ​ທີ່​ບໍ່​ສາ­ມາດ​ລະ­ລາຍ​ໄດ້ ເປັນ​ການ​ກະ­ທຳ​ທີ່​ຜິດ​ກົດ­ໝາຍ ໃນ​ປີ 2008 ໃນ​ຂະ­ນະ​ທີ່​ມີ​ບໍ່​ພໍ​ເທົ່າ­ໃດ​ປະ­ເທດ​ກຳ­ລັງ​ພິ­ຈາ­ລະ­ນາ ໃຊ້​ມາດ​ຕະ­ການ​ເກັບ​ພາ­ສີ​ຖົງ​ຢາງ ເພື່ອ​ເປົ້າ​ໝາຍ​ຫຼຸດ­ຜ່ອນ​ການ​ໃຊ້​ຖົງ​ຢາງ​ນັ້ນ ປະ­ເທດ​ຣວນ​ດາ ໄດ້​ປະ­ກາດ​ຫ້າມ​ໃຊ້​ຖົງ​ຢາງ​ຢ່າງ​ເດັດ­ຂາດ​ໃນ​ທົ່ວ​ປະ­ເທດ ແລະ ການ​ຫ້າມ​ດັ່ງ­ກ່າວ​ກໍ​ປະ­ສົບ​ຜົນ­ສຳ­ເລັດ ເຖິງ​ຂັ້ນ​ມີ​ຫຼາຍໆ​ປະ­ເທດ​ຖອດ​ເປັນ​ບົດ­ຮຽນ​ໄປ​ນຳ​ໃຊ້​ເພື່ອ​ຈຳ­ກັດ ແລະ ກຳ​ຈັດ­ການ​ໃຊ້​ຖົງ​ຢາງ ໃນ​ນັ້ນ ກໍ​ມີ​ປະ­ເທດ​ຕັງ​ຊາ​ນີ ປະ­ເທດ​ຣວນ​ດາ ໄດ້​ວາງ​ວິ­ໄສ​ທັດ ປີ 2020 ໃນ​ການ​ຫັນ​ປະ­ເທດ​ໃຫ້​ກາຍ­ເປັນ​ປະ­ເທດ​ທີ່​ມີ​ລາຍ​ໄດ້​ປານ​ກາງ​ທີ່​ຍືນ​ຍົງ ການ​ຫ້າມ​ໃຊ້​ຖົງ​ຢາງ ແມ່ນ​ໜຶ່ງ​ໃນ​ບັນ­ດາ​ອົງ​ປະ­ກອບ​ສຳ­ຄັນ​ຂອງ​ວິ­ໄສ​ທັດ​ດັ່ງ­ກ່າວ ດັ່ງ­ນັ້ນ ຈຶ່ງ​ໄດ້​ອອກ​ກົດ­ໝາຍ​ທີ່​ເຮັດ​ໃຫ້­ການ​ໃຊ້​ຖົງ​ຢາງ​ເປັນ​ການ​ລະ­ເມີດ​ກົດ­ໝາຍ ວ່າ​ດ້ວຍ​ການ​ປົກ​ປ້ອງ​ສິ່ງ­ແວ­ດລ້ອມ ເພື່ອ​ເຮັດ​ໃຫ້​ບັນ­ດາ​ຕົວ​ເມືອງ​ສະ­ອາດ​ງາມ​ຕາ ເພື່ອ​ປ່ຽນ​ແທນ​ການ​ໃຊ້​ຖົງ​ຢາງ​ນັ້ນ ລັດ­ຖະ­ບານ​ຣວນ​ດາ ໄດ້​ແນະ­ນຳ​ໃຫ້​ທຸກ​ຄົນ​ໃຊ້​ຖົງ​ທີ່​ເຮັດ​ດ້ວຍ​ເຈ້ຍ​ແທນ.

    ທີ່ ສປ ຈີນ: ມີ​ຂ່າວ​ທີ່​ເວົ້າ​ເຖິງ​ຄວາມ​ພະ­ຍາ­ຍາມ​ຂອງ​ທາງ​ການ​ແຂວງ​ຢູ​ນານ ສປ ຈີນ ໃນ​ການ​ສົ່ງ­ເສີມ​ຄຸນ​ນະ​ພາບ​ຂອງ​ສິ່ງ­ແວ­ດລ້ອມ ສຳ­ລັບ​ແຜນ​ຄວບ​ຄຸມ​ມົນ​ລະ​ພິດ​ທາງ​ອາ­ກາດ​ນັ້ນ ທາງ​ແຂວງ​ໄດ້​ເນັ້ນ​ບັນ­ດາ​ວຽກ​ຕົ້ນ­ຕໍ ຄື: ຄວບ​ຄຸມ​ມົນ​ລະ​ພິດ​ທາງ​ອາ­ກາດ​ທີ່​ເກີດ​ຈາກ​ຂະ­ແໜງ​ອຸດ­ສາ­ຫະ­ກຳ ຝຸ່ນ​ລະ­ອອງ​ທີ່​ເປັນ​ພິດ​ໃນ​ເຂດ​ຕົວ​ເມືອງ ແລະ ອາຍ​ພິດ​ທີ່​ມາ​ກັບ​ຄວັນ​ຈາກ​ລົດ­ຍົນ ໂດຍ​ໄດ້​ທຳ­ລາຍ​ລົດ​ທີ່​ປ່ອຍ​ຄວັນ​ພິດ​ຫຼາຍ ແລະ ລົດ​ເກົ່າ ຈຳ­ນວນ 136.000 ຄັນ ມາດ​ຕະ­ການ​ນີ້​ໄດ້​ເຮັດ​ໃຫ້ 16 ຕົວ​ເມືອງ​ຂອງ​ແຂວງ​ໄດ້​ພົບ​ກັບ​ອາ­ກາດ​ດີ ມີ​ຄຸນ​ນະ​ພາບ ໃນ​ອັດ­ຕາ 98,3% ຂອງ​ບັນ­ດາ​ວັນ​ໃນ 1 ປີ (ສະ­ຖິ­ຕິ ປີ 2017 ຊຶ່ງ​ລື່ນ​ປີ­ຜ່ານ­ມາ 1%) ໃນ​ເບື້ອງ​ການ​ປ້ອງ​ກັນ​ມົນ​ລະ​ພິດ​ທາງ­ນ້ຳ​ນັ້ນ ທາງ​ແຂວງ​ໄດ້​ລົງ­ທຶນ​ເຂົ້າ​ໃສ່​ແຜນ​ປະ­ຕິ­ບັດ​ງານ​ຕ່າງໆ​ເປັນ​ຈຳ­ນວນ​ເງິນ 5.338 ຕື້​ຢວນ ໂດຍ​ໄດ້​ມອບ​ໃຫ້​ແຕ່​ລະ​ເມືອງ ສ້າງ​ແຜນ​ງານ ແລະ ຮັບ­ຜິດ­ຊອບ​ຜັນ​ຂະ­ຫຍາຍ​ເອົາ​ເອງ ໝາກ­ຜົນ​ສຳ­ຄັນ​ທີ່​ໄດ້​ຮັບ ກໍ​ຄື ໄດ້​ກໍ່­ສ້າງ​ໂຄງ­ການ​ສຳ­ຄັນ​ເພື່ອ​ປົກ​ປັກ​ຮັກ­ສາ​ໜອງ​ໃຫຍ່ ຈຳ­ນວນ 9 ແຫ່ງ​ຂອງ​ແຂວງ ໃນ​ວຽກ​ປ້ອງ​ກັນ​ມົນ​ລະ​ພິດ​ທີ່​ດິນ​ນັ້ນ ທາງ​ແຂວງ​ໄດ້​ປະ­ຕິ­ບັດ​ໂຄງ­ການ​ທົດ​ລອງ 5 ໂຄງ­ການ​ໃຫຍ່ ໂດຍ​ເນັ້ນ​ການ​ຟື້ນ​ຟູ​ທີ່​ດິນ​ໃຫ້​ຄືນ​ສູ່​ສະ­ພາບ​ປົກ­ກະ­ຕິ ຂ່າວ​ນີ້​ຖອດ​ຈາກ ໜັງ­ສື​ພີວ​ວຽງ​ຈັນ​ທາມ ສະ­ບັບ​ວັນ​ທີ 7 ເມ­ສາ 2017.

    ທີ່ ເນ​ປານ: ແຫຼ່ງ​ຂ່າວ​ຈາກ​ໜັງ­ສື­ພິມ ກັດ​ມັນ​ດູ​ພົດ ໃຫ້​ຮູ່​ວ່າ ຄະ­ນະ​ກຳ­ມະ­ການ​ສິດ­ທິ​ມະ­ນຸດ​ຂອງ​ອົງ­ການ​ສະ­ຫະ​ປະ­ຊາ​ຊາດ ໄດ້​ສະ­ເໜີ​ໃຫ້​ລັດ­ຖະ­ບານ ເນ​ປານ ຮັບ­ປະ­ກັນ​ສິດ­ທິ​ຂອງ​ພົນ­ລະ­ເມືອງ​ເນ​ປານ ທີ່​ຕົກ​ເປັນ​ເຫຍື່ອ​ການ​ໃຊ້​ແຮງ​ງານ​ແບບ​ບັງ­ຄັບ ກໍ​ຄື ການ​ທໍ­ລະ­ມານ ສາ­ມາດ​ມີ​ສິດ​ຮ້ອງ­ທຸກ​ຂໍ​ຄວາມ​ເປັນ​ທຳ ແລະ ຂໍ​ໃຫ້​ກຳ­ນົດ​ໃຫ້­ການ​ທໍ­ລະ­ມານ​ເປັນ​ອາ​ຊະ​ຍາ​ກຳ.

ຂ່າວທີ່ກ່ຽວຂ້ອງ