ຂ່າວຫຼ້າສຸດ

ປັນຈັກສີລັດລາວ ພ້ອມສົ່ງ 12 ນັກກີລາ ເຂົ້າຮ່ວມຊີງໄຊໃນຊີເກມ

750 29 ຕ.ລ. 2019 ວົງຈອນກີລາ
ປັນຈັກສີລັດລາວ ພ້ອມສົ່ງ 12 ນັກກີລາ ເຂົ້າຮ່ວມຊີງໄຊໃນຊີເກມ

    ທ່ານ ຮ້ອຍ​ໂທ ທິບ​ພົງ​ພັດ ມາ​ນິ​ວົງ ເລ­ຂາ­ທິ­ການ​ສະ­ຫະ­ພັນ​ກີ­ລາປັນ​ຈັກ​ສີ​ລັດ​ແຫ່ງ​ຊາດ​ລາວ ແຈ້ງ​ໃຫ້​ຊາບ​ເມື່ອ​ບໍ່​ດົນ​ມາ​ນີ້ວ່າ: ກີ­ລາປັນ​ຈັກ​ສີ​ລັດ ຄັດ​ເລືອກ​ໄດ້​ນັກ­ກີ­ລາ 12 ຄົນ ຍິງ 2 ຄົນ ກຽມ​ເຂົ້າ​ຮ່ວມແຂ່ງ­ຂັນ​ໃນ​ງານ​ມະ​ຫະ​ກຳ​ກີ­ລາ​ຊີ­ເກມ ຄັ້ງ​ທີ 30 ຢູ່​ປະ­ເທດ​ຟີ​ລິບ​ປິນ ເຊິ່ງ​ນັກ­ກີ­ລາ​ດັ່ງ­ກ່າວ ປັດ­ຈຸ­ບັນ​ໄດ້​ເກັບ​ຕົວ​ເຝິກ­ຊ້ອມ​ຢູ່ ສສ ຫວຽດນາມ.

    ນາງ ນ້ອຍ​ອ້ອຍ ວົງ​ພັກ­ດີ ນັກ­ກີ­ລາ​ປັນ​ຈັກ​ສີ​ລັດທີມ​ຊາດ​ລາວ ເຈົ້າ​ຂອງ​ຫຼຽນ​ເງິນ​ກີ­ລາເອ​ຊຽນ​ເກມ ປີ 2018 ຢູ່​ປະ­ເທດ​ອິນ​ໂດ​ເນ​ເຊຍ ລາຍ​ງານ​ວ່າ: ຕົນ​ຮູ້­ສຶກ​ເສຍ­ດາຍ​ທີ່​ບໍ່​ສາ­ມາດ​ຊ່ວຍ​ທັບ​ນັກ­ກີ­ລາ​ທີມຊາດ​ລາວ ເຂົ້າ​ຮ່ວມ​ຊີ­ເກມ​ຄັ້ງ​ນີ້ ແຕ່​ຈະ​ສືບ­ຕໍ່​ເຝິກ­ຝົນ​ຕົນ​ເອງ ແລະ ຈະ​ພະ­ຍາ­ຍາມ​ເກັບ​ກ່ຽວ​ປະ­ສົບ​ການ​ໃຫ້​ຫຼາຍ​ກວ່າ​ເກົ່າ ໂດຍ​ສະ­ເພາະ ການ​ໄດ້​ມາ​ເຝິກ­ຊ້ອມ​ຢູ່ ສສ ຫວຽດ­ນາມ ຮ່ວມ​ກັບ​ນັກ­ກີ­ລາ​ທີມ​ຊາດ ຮຸ່ນ​ເອື້ອຍ-ອ້າຍ ທັງ​ລາວ ແລະ ຫວຽດ­ນາມ ເຊິ່ງ​ເປັນ​ປະ­ສົບ​ການ​ທີ່​ດີ ເພື່ອ​ກຽມ​ຕໍ່​ຍອດ​ໃຫ້​ຕົນ ເຂົ້າ​ຮ່ວມ​ມະ​ຫະ​ກຳ​ກີ­ລາແຫ່ງ​ຊາດ ຄັ້ງ​ທີ Xl ຢູ່​ແຂວງ​ຊຽງ​ຂວາງ ວັນ​ທີ 22 ມີ­ນາ-1 ເມ­ສາ 2020 ແລະ ງານມະ­ຫາ­ວິ­ທະ­ຍາ­ໄລ​ອາ​ຊຽນ ຢູ່​ປະ­ເທດ​ມາ​ເລ​ເຊຍ ໃນ​ປີ 2020.

    ສຳ­ລັບ​ນັກ­ກີ­ລາ​ລາວ ທີ່​ຈະ​ສົ່ງ​ເຂົ້າ​ຮ່ວມ​ຊີ­ເກມ​ຄັ້ງ​ນີ້ ມີ 9 ລາຍ­ການ ຄື: ປະ­ເພດ​ຕໍ່­ສູ້​ຊາຍ ຮຸ່ນ​ນ້ຳ­ໜັກ 50 ກິ​ໂລ ຮຸ່ນ​ນ້ຳ­ໜັກ 55 ກິ​ໂລ ແລະ ຮຸ່ນ​ນ້ຳ­ໜັກ 60 ກິ​ໂລ ສ່ວນ​ປະ­ເພດ​ຍິງ ມີ ຮຸ່ນ​ນ້ຳ­ໜັກ 50 ກິ​ໂລ ແລະ ຮຸ່ນ​ນ້ຳ­ໜັກ 55 ກິ​ໂລ ນອກ​ນັ້ນ ກໍ​ຍັງ​ມີ​ປະ­ເພດ​ຟ້ອນ​ດ່ຽວ​ຍິງ-ຊາຍ ທີມ​ຊາຍ ແລະ ທີມ​ຊາຍ.

ຂ່າວທີ່ກ່ຽວຂ້ອງ