ກອງ​ປະຊຸມ​ສຸດ​ຍອດ​ຂະ​ບວນ​ການ​ບໍ່​ຮ່ວມ​ກຸ່ມ​ຄັ້ງ​ທີ 18 ​ຈັດ​ຂຶ້ນ​ຢູ່​ນະຄອນຫຼວງ​ບາ​ກູ

448 29 ຕ.ລ. 2019 ຂ່າວຕ່າງປະເທດ
ກອງ​ປະຊຸມ​ສຸດ​ຍອດ​ຂະ​ບວນ​ການ​ບໍ່​ຮ່ວມ​ກຸ່ມ​ຄັ້ງ​ທີ 18 ​ຈັດ​ຂຶ້ນ​ຢູ່​ນະຄອນຫຼວງ​ບາ​ກູ

   ກອງ​ປະຊຸມ​ສຸດ​ຍອດ​ຂອງ​ຂະ​ບວນ​ການ​ບໍ່​ຮ່ວມ​ກຸ່ມ​ຄັ້ງ​ທີ 18 ໄດ້​ໄຂ​ຂຶ້ນ​ເມື່ອ​ວັນ​ທີ 25 ຕຸລາ​ທີ່​ຜ່ານ​ມາ ຢູ່​ນະຄອນຫຼວງ​ບາ​ກູ ຂອງ​ອາ​ແຊກ​ໄບ​ຊານ ໂດຍ​ໄດ້​ດຳເນີນ​ງານ​​​ເປັນ​ເວລາ 2 ວັນ.

    ທ່ານ ອິນ​ຮາມ ອາລີ​ແຢບ ປະທານາທິບໍດີ​ອາ​ແຊກ​ໄບ​ຊານ ທີ່​ເປັນ​ປະເທດ​ໝູນວຽນ​ຂອງ​ກອງ​ປະຊຸມ​ສຸດ​ຍອດ​ຄັ້ງ​ນີ້ ໄດ້​ກ່າວ​ປາ​ໄສ​ຢູ່​ໃນ​ພິທີ​ໄຂ​ກອງ​ປະຊຸມ​ດັ່ງກ່າວ​ວ່າ ອາ​ແຊກ​ໄປ​ຊານ ຈະ​ສຸມ​ໃສ່​ຊຸກຍູ້​ການ​ພັດທະນາ​ຂະ​ບວນ​ການ​ບໍ່​ຮ່ວມ​ກຸ່ມ​ດ້ວຍ “ນ້ຳໃຈ ບັນ​ດຸງ". ໃນ​ຂະນະ​ດຽວ​ກັນ ທ່ານ​ກໍ​ໄດ້​ຮຽກຮ້ອງ​ໃຫ້​ປະເທດ​ຕ່າງໆ​ຮ່ວມ​ກັນ​ສຸມ​ທຸກ​ຄວາມ​ພະຍາຍາມ ເພື່ອ​ຮັບປະກັນ​ໃຫ້​ຫຼັກການ​ພື້ນຖານ​ຂອງ​ກົດໝາຍ​ສາກົນ​ໄດ້​ຮັບ​ການ​ເຄົາລົບ ແລະ ປະຕິບັດ​ຢ່າງ​ແທ້​ຈິງ ເພີ່ມ​ທະວີ​ບົດບາດ​ຂອງ​ອົງການ​ສະຫະ​ປະຊາ​ຊາດ ໂດຍ​ຜ່ານ​ການ​ປະຕິ​ຮູບ.

    ກອງ​ປະຊຸມ​ສຸດ​ຍອດ​ຄັ້ງ​ນີ້ ມີ​ຜູ້ຕາງໜ້າ​ຈາກ​ຫຼາຍ​ກວ່າ 160 ປະເທດ ແລະ ອົງ​ການຈັດຕັ້ງ​ສາກົນ​ເຂົ້າ​ຮ່ວມ ໂດຍ​ຈັດ​ຂຶ້ນ​ພາຍ​ໃຕ້​ຫົວຂໍ້ “ຢຶດ​ໝັ້ນ​ນ້ຳໃຈ​ບັນ​ດຸງ ຕັ້ງໜ້າ​ຮັບ​ມື​ກັບ​ສິ່ງ​ທ້າ​ທາຍ​ຂອງ​ໂລກ​ໃນ​ປັດຈຸບັນ”.

    ຂະ​ບວນ​ການ​ບໍ່​ຮ່ວມ​ກຸ່ມ​ມີ 120 ປະເທດ ເປັນ​ສະມາຊິກ ຊຶ່ງ​ສ່ວນ​ຫຼາຍ​ແມ່ນ​ປະເທດ​ທີ່​ກຳລັງ​ພັດທະນາ​ຂອງ​ທະວີບອາຊີ ອາ​ຟະ​ຣິກ​ກາ ແລະ ອາ​ເມ​ຣິ​ກາ ລາ​ຕິນ ທີ່​ມີ​ລັກສະນະ​ຕົວ​ແທນ​ຢ່າງ​ກວ້າງຂວາງ​ໃນ​ປະຊາ​ຄົມ​ໂລກ.

ຂ່າວທີ່ກ່ຽວຂ້ອງ