ກຳລັງ​ການ​ຜະລິດ​ພະລັງງານ​ໝູນວຽນ​ທົ່ວ​ໂລກ ຈະ​ເພີ່ມ​ຂຶ້ນ 50%

350 29 ຕ.ລ. 2019 ຂ່າວຕ່າງປະເທດ
ກຳລັງ​ການ​ຜະລິດ​ພະລັງງານ​ໝູນວຽນ​ທົ່ວ​ໂລກ ຈະ​ເພີ່ມ​ຂຶ້ນ 50%

   ໃນ​ບົດ​ລາຍ​ງານ​ປະຈຳ​ປີ​ກ່ຽວ​ກັບ​ພະລັງງານ​ໝູນວຽນ​ໃນ​ທົ່ວ​ໂລກ​ນັ້ນ ອົງການ​ພະລັງງານ​ສາກົນ (IEA) ໃຫ້ການ​ຄາດ​ຄະເນ​ວ່າ ກຳລັງ​ການ​ຜະລິດ​ພະລັງງານ​ໝູນວຽນ​ໃນ​ທົ່ວ​ໂລກ ຈະ​ເພີ່ມ​ຂຶ້ນ 50% ພາຍ​ໃນ 5 ປີ​ຕໍ່ໜ້າ ຍ້ອນ​ໄດ້​ຈາກ​ການ​ຕິດ​ຕັ້ງ​ບັນດາ​ລະບົບ​ໄຟຟ້າ​ແສງ​ຕາເວັນ ຢູ່​ເທິງ​ຫຼັງຄາ​ເຮືອນ​ຢູ່ ບັນດາ​ອາຄານ​ການ​ຄ້າ ແລະ ໃນ​ພາກ​ອຸດສາຫະກຳ.

    ຍອດ​ກຳລັງ​ການ​ຜະລິດ​ໄຟຟ້າ ຈາກ​ບັນດາ​ແຫຼ່ງ​ພະລັງງານ​ໝູນວຽນ ຈະ​ເພີ່ມ​ຂຶ້ນ 1,2 Terawatt (TW) ພາຍ​ໃນ​ປີ 2024 ຈາກ​ລະດັບ 2,5 TW ຂອງ​ປີ 2018 ຫຼື​ເທົ່າ​ກັບ​ຍອດ​ກຳລັງ​ການ​ຜະລິດ​ໄຟຟ້າ​ທີ່​​ຕິດ​ຕັ້ງ​ໃນ​ປັດຈຸບັນ ຂອງ ສ ອາ​ເມ​ຣິ​ກາ.

    ບົດ​ລາຍ​ງານ​ຂອງ IEA ຊີ້​ໃຫ້​ເຫັນ​ວ່າ ໄຟຟ້າ​ແສງ​ຕາເວັນ​ຈະ​ກວມ​ເອົາ​ເກືອບ 60% ຂອງ​ລະດັບ​ຄວາມ​ເຕີບ​ໂຕ​ດັ່ງກ່າວ ແລະ ໄຟຟ້າ​ແຮງ​ລົມ​ຢູ່​ເທິງ​ຝັ່ງ ຈະ​ກວມ​ເອົາ 25%. ລະດັບ​ການ​ປະກອບສ່ວນ​ຂອງ​ພະລັງງານ​ໝູນວຽນ ຢູ່​ໃນ​ການ​ຜະລິດ​ໄຟຟ້າ ຄາດ​ວ່າ​ຈະ​ເພີ່ມ​ຂຶ້ນ 30% ພາຍ​ໃນ​ປີ 2024 ຈາກ​ລະດັບ 26% ໃນ​ປັດຈຸບັນ.

   ທ່ານ ຟາ​ຕີ ບີ​ໂຣນ ຜູ້​ອຳນວຍ​ການ​​ຝ່າຍ​ບໍລິຫານ​ຂອງ IEA ເຫັນ​ວ່າ​ພະລັງງານ​ໝູນວຽນ ໄດ້​ກາຍເປັນ​ແຫຼ່ງ​ພະລັງງານ​ໃຫຍ່​ເປັນ​ອັນ​ດັບ​ສອງ ແຕ່​ວ່າການ​ພັດທະນາ​ແຫຼ່ງ​ພະລັງງານ​ນີ້ ຍັງ​ຄົງ​ຕ້ອງ​ໄດ້​ຊຸກຍູ້​ເພື່ອ​ໃຫ້​ບັນລຸ​ເປົ້າ​ໝາຍ​ອັນ​ຍາວ​ນານ ກ່ຽວ​ກັບ​ດິນ​ຟ້າ​ອາກາດ ຄຸນະພາບ​ອາກາດ ແລະ ການ​ເຂົ້າ​ເຖິງ​ພະລັງງານ.

 

ຂ່າວທີ່ກ່ຽວຂ້ອງ