ຈີນ ​ປະ​ກາດ​ໃຊ້​ກົດ​ລະ​ບຽບ​ກ່ຽວ​ກັບ​ການ​ປັບ​ປຸງ​ສະ​ພາບ​ແວດ​ລ້ອມ​ດ້ານ​ການ​ດຳ​ເນີນ​ທຸ​ລະ​ກິດ​

1.696 25 ຕ.ລ. 2019 ຂ່າວຕ່າງປະເທດ
ຈີນ ​ປະ​ກາດ​ໃຊ້​ກົດ​ລະ​ບຽບ​ກ່ຽວ​ກັບ​ການ​ປັບ​ປຸງ​ສະ​ພາບ​ແວດ​ລ້ອມ​ດ້ານ​ການ​ດຳ​ເນີນ​ທຸ​ລະ​ກິດ​

     ຫວ່າງ​ມໍ່ໆມານີ້ ທ່ານ ຫຼີ​ເຄີ້​ສຽງ ນາຍົກລັດຖະມົນຕີ​ຈີນ ໄດ້​ເຊັນ​ລັດ​ຖະ​ດຳລັດ​ໂດຍ​ປະກາດ​ໃຊ້​ກົດ​ລະບຽບ ກ່ຽວ​ກັບ​ການ​ປັບປຸງ​ສະພາບ​ແວດ​ລ້ອມ​ດ້ານ​ການ​ດຳເນີນ​ທຸລະ​ກິດ​ໃຫ້​ດີ​ຂຶ້ນ ຊຶ່ງ​ຈະ​ເລີ່ມ​ມີ​ຜົນ​ສັກສິດ​ນັບ​ແຕ່​ວັນ​ທີ 1 ມັງກອນ​ປີ 2020 ເປັນຕົ້ນ​ໄປ.

    ກົດ​ລະບຽບ​ດັ່ງກ່າວ ໄດ້​ສະຫຼຸບ​ບົດຮຽນ ແລະ ວິທີ​ການ​ຕ່າງໆ ທີ່​ຈີນ​ນຳ​ໃຊ້​ໃນ​ການ​ປັບປຸງ​ສະພາບ​ແວດ​ລ້ອມ​ດ້ານ​ການ​ດຳເນີນ​ທຸລະ​ກິດ​ໃຫ້​ດີ​ຂຶ້ນ ໃນ​ຊຸມ​ປີຜ່ານມາ​ຢ່າງ​ລະອຽດ ແລະ ກຳນົດ​ມາດ​ຕະການ​ການ​ປະຕິ​ຮູບ​ທີ່​ໄດ້​ຮັບ​ການ​ຢັ້ງຢືນ​ຈາກ​ພຶດຕິ​ກຳ​ຕົວ​ຈິງ​ວ່າ​ມີ​ປະ​ສິດທິ​ຜົນ ປະຊາຊົນ​ມີ​ຄວາມ​ເພິງ​ພໍໃຈ ແລະ ໄດ້​ຮັບ​ການ​ຍອມຮັບ​ຈາກ​ພາກສ່ວນ​ເສດຖະກິດ​ຕ່າງໆ​ໃນ​ຕະຫຼາດ ຕົ້ນຕໍ​ແມ່ນ​ແນໃສ່​ແກ້​ໄຂ​ຂໍ້​ຂັດຂ້ອງ ແລະ ຄວາມ​ຫຍຸ້ງຍາກ ທີ່​ພາກສ່ວນ​ເສດຖະກິດ​ຕ່າງໆ​ໃນ​ຕະຫຼາດ​ມີ​ຄວາມ​ເຫັນ​ຫຼາຍ ກໍ​ຄື​ຂໍ້​ຂາດ​ຕົກ​ບົກ​ຜ່ອງ​ຕົ້ນຕໍ​ດ້ານ​ສະພາບ​ແວດ​ລ້ອມ​ການ​ດຳເນີນ​ທຸລະ​ກິດ​ຂອງ​ຈີນ ເພື່ອ​ໃຫ້​ສອດຄ່ອງ​ກັບ​ລະດັບ​ໃນ​ສາກົນ ໂດຍ​ໄດ້​ວາງ​ຂໍ້​ກຳນົດ​ທີ່​ກ່ຽວຂ້ອງ​ເພື່ອ​ປັບປຸງ​ກົນ​ໄກ ແລະ ລະບົບ​ໃຫ້​ດີ​ຂຶ້ນ.

    ຂໍ້​ກຳນົດ​ຕ່າງໆ​ດັ່ງ​​​ກ່າວ ປະກອບ​ດ້ວຍ ການ​ຢືນຢັນ​ຫຼັກການ ແລະ ທິດ​ທາງ​ໃນ​ການ​ປັບປຸງ​ສະພາບ​ແວດ​ລ້ອມ​ດ້ານ​ການ​ດຳເນີນ​ທຸລະ​ກິດ​ໃຫ້​ດີ​ຂຶ້ນ; ເພີ່ມ​ທະວີ​ການ​ປົກ​ປັກ​ຮັກສາ​ອົງ​ກອນ​ເສດຖະກິດ​ຕ່າງໆ​ໃນ​ຕະຫຼາດ; ປັບປຸງ​ສະພາບ​ແວດ​ລ້ອມ​ຂອງ​ຕະຫຼາດ​ໃຫ້​ດີ​ຂຶ້ນ; ຍົກ​ລະດັບ​ແລະ ຄວາມ​ສາມາດ​ດ້ານ​ການ​ບໍລິການ​ຂອງ​ພາກ​ລັດ​ໃຫ້​ສູງ​ຂຶ້ນ; ສ້າງ​ລະບຽບ​ແບບແຜນ ແລະ ປະດິດ​ສ້າງ​ໃໝ່​ດ້ານ​ການ​ຕິດຕາມ​ຄຸ້ມ​ຄອງ​ການ​ປະຕິບັດ​ກົດໝາຍ; ແລະ ເພີ່ມ​ທະວີ​ການ​ຮັບປະກັນ​ດ້ານ​ການ​ປະຕິບັດ​ກົດໝາຍ.

ຂ່າວທີ່ກ່ຽວຂ້ອງ