​ສປຊ ຍົກ​ເວັ້ນ​ການ​ປິດ​ລ້ອມ​ໂຄງການ​ສະໜອງ​ນ້ຳ​ສະອາດ​ຢູ່​ໃນ ​ສປປ ​ເກົາຫຼີ

1.483 25 ຕ.ລ. 2019 ຂ່າວຕ່າງປະເທດ
​ສປຊ ຍົກ​ເວັ້ນ​ການ​ປິດ​ລ້ອມ​ໂຄງການ​ສະໜອງ​ນ້ຳ​ສະອາດ​ຢູ່​ໃນ ​ສປປ ​ເກົາຫຼີ

    ເວບ​ໄຊ​ຂອງ ສະຫະ​ປະຊາ​ຊາດ (​ສປຊ) ມີ​ແຈ້ງ​ການ​ອອກ​ມາ​ເມື່ອ​ວັນ​ທີ 22 ຕຸລາ​ນີ້​ວ່າ ສະພາ​ຄວາມ​ໝັ້ນຄົງ​ຂອງ ​ສປຊ ໄດ້​ປະກາດ​ໃຊ້​ຂໍ້​ຕົກລົງ ກ່ຽວ​ກັບ​ການ​ຍົກເວັ້ນ​ການ​ປິດ​ລ້ອມ​ຕໍ່​ໂຄງການ​ໜຶ່ງ ຂອງ​ອົງການ​ກາແດງ​ສາກົນ ເພື່ອ​ການ​ສະໜອງ​ນ້ຳ​ສະອາດ ແລະ ແກ້​ໄຂ​ຄຸນ​ນະ​ພາບ ດ້ານ​ອະນາໄມ​ຢູ່​ໃນ ​ສປປ ເກົາຫຼີ.

    ແຈ້ງ​ການ​ດັ່ງກ່າວ​ໃຫ້​ຮູ້​ວ່າ ອົງການ​ກາແດງ ແລະ ຊີກ​ວົງ​ເດືອນ​ແດງ​ສາກົນ (IRFC) ໄດ້​ຮັບ​ຂໍ້​ຕົກລົງ​ຍົກເວັ້ນ​ການ​ປິດ​ລ້ອມ ຕໍ່​ວັດຖຸ​ດິບ ແລະ ອຸປະກອນ​ທີ່​ຈຳເປັນ ເພື່ອ​ຮັບ​ໃຊ້​ວຽກ​ງານ​ຊ່ວຍເຫຼືອ​ມະນຸດສະທຳ​ສຸກ​ເສີນ ໃນ​ການເຄື່ອນໄຫວ​ສະໜອງ​ນ້ຳ​ສະອາດ ແລະ ແກ້​ໄຂ​ຄຸນ​ນະ​ພາບ​ດ້ານ​ອະນາໄມ​ຢູ່​ໃນ ​ສປປ ເກົາຫຼີ. ໃນ​ການ​ຕົກລົງ​ນັ້ນ ແມ່ນ​ນຳ​ໃຊ້​ສຳລັບ ວັດຖຸ​ດິບ ແລະ ອຸປະກອນ 11 ປະເພດ ລວມ​ມູນ​ຄ່າ 4.880 ເອີ​ໂຣ (ເທົ່າ​ກັບ 5.442 ໂດ​ລາ​ສະຫະລັດ) ໃນ​ຂະນະ​ທີ່​ຄ່າ​ໃຊ້​ຈ່າຍ​ໃຫ້​ແກ່​ການ​ຂົນສົ່ງ ຕໍ່​ວັດຖຸ​ດິບ ແລະ ອຸປະກອນ ຈາກ​ພາກ​ຕາເວັນ​ອອກ​ຂອງ​ຈີນ ເຂົ້າ​ໄປ​ຍັງ​ນະຄອນ ຊີ​ນູ​ຈູ (ພາກ​ເໜືອ ​ສປປ ເກົາຫຼີ) ຢູ່​ທີ່ 4.000 ເອີ​ໂຣ. ຂໍ້​ຕົກລົງ​ດັ່ງກ່າວ ມີ​ຜົນ​ບັງຄັບ​ໃຊ້ ພາຍ​ໃນ​ເວລາ 6 ເດືອນ ນັບ​ແຕ່​ວັນ​ທີ 11 ຕຸລາ​ເປັນຕົ້ນ​ໄປ.

    ອີກ​ດ້ານ​ໜຶ່ງ ຂ່າວສານ ຢອນ​ຮັບ ຂອງ ສ ເກົາຫຼີ ລາຍ​ງານ​ວ່າ ຂໍ້​ມູນ​ຈາກ​ຫ້ອງການ​ປະສານ​ງານ ກ່ຽວ​ກັບ​ບັນຫາ​ມະນຸດສະທຳ (OCHA) ​ສປຊ ຊຶ່ງ​ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 22 ຕຸລາ​ນີ້ ໃຫ້​ຮູ້​ວ່າ ສ ເກົາຫຼີ ໄດ້​ກາຍເປັນ​ປະເທດ​ຜູ້​ໃຫ້ການ​ອຸ​ຖຳ​ດ້ານ​ການ​ເງິນ​ລາຍ​ໃຫຍ່​ສຸດ ໃຫ້​ແກ່ ​ສປປ ເກົາຫຼີ ໃນ​ເມື່ອ ສ ເກົາຫຼີ ປະກອບສ່ວນ 9 ລ້ານ​ໂດ​ລາ​ສະຫະລັດ ໃຫ້​ແກ່​ບັນດາ​ອົງການ​ຊ່ວຍເຫຼືອ​ຂອງ​ສາກົນ ເພື່ອ​ປະຕິບັດ​ໂຄງການ​ຕ່າງໆ​ຢູ່​ໃນ ​ສປປ ເກົາຫຼີ ໃນ​ປີ 2019.

    ຂໍ້​ມູນ​ຂອງ OCHA ໃຫ້​ຮູ້​ວ່າ ຍອດ​ຈຳນວນ​ເງິນ​ທີ່ ສ ເກົາຫຼີ​ປະກອບສ່ວນ​ນັ້ນ ກວມ​ເອົາ  29,5% ໃນ​ຈຳນວນ 30,55 ລ້ານ​ໂດ​ລາ​ສະຫະລັດ ທີ່​ໄດ້​ປະກອບສ່ວນ​ໃຫ້​ແກ່ ​ສປຊ ແລະ ບັນດາ​ອົງການ​ຊ່ວຍເຫຼືອ​ອື່ນໆ​ໃນ​ທົ່ວ​ໂລກ​ພາຍ​ໃນ​ປີ​ນີ້ ເພື່ອ​ຜັນ​ຂະຫຍາຍ​ໂຄງການ​ຕ່າງໆ​ຢູ່​ໃນ ​ສປປ ເກົາຫຼີ.  ໃນ​ນັ້ນ ສ ເກົາຫຼີ ໄດ້​ປະກອບສ່ວນ 8 ລ້ານ​ໂດ​ລາ​ສະຫະລັດ ໃຫ້​ແກ່​ໂຄງການ​ອາຫານ​ໂລກ  (WFP) ແລະ ກອງ​ທຶນ​ສຳລັບ​ເດັກນ້ອຍ​ຂອງ ​ສປຊ ເມື່ອ​ເດືອນ​ມິຖຸນາ ສຳລັບ​ບັນດາ​ໂຄງການ​ຊ່ວຍເຫຼືອ​ຂອງ​ອົງການ​ເຫຼົ່ານັ້ນ ຢູ່​ໃນ ​ສປປ ເກົາຫຼີ. ໃນ​ເດືອນ​ມິຖຸນາ​ເຊັ່ນ​ດຽວ​ກັນ ນະຄອນ ເຊ​ອູນ ຂອງ ສ ເກົາຫຼີ ກໍ​ໄດ້​ປະກອບສ່ວນ 1 ລ້ານ​ໂດ​ລາ​ສະຫະລັດ ໃຫ້​ແກ່ WFP.

    ຮອງ​ລົງ​ມາ​ເປັນ​ອັບ​ດັບ​ສອງ ທີ່​ໃຫ້ການ​ຊ່ວຍເຫຼືອ​ດ້ານ​ການ​ເງິນ​ໃຫ້​ແກ່ ​ສປປ ເກົາຫຼີ ກໍ​ແມ່ນ​ສະ​ວິດ ໂດຍ​ປະກອບສ່ວນ​ເປັນ​ມູນ​ຄ່າ 8,03 ລ້ານ​ໂດ​ລາ​ສະຫະລັດ ຖັດ​ລົງ​ມາ​ອີກ​ກໍ​ແມ່ນ​ຊູ​ແອດ ແລະ ຣັດ​ເຊຍ ທີ່​ໄດ້​ປະກອບສ່ວນ 5,12 ລ້ານ​ໂດ​ລາ​ສະຫະລັດ ແລະ  4 ລ້ານ​ໂດ​ລາ​ສະຫະລັດ ຕາມ​ລຳດັບ./.

 

ຂ່າວທີ່ກ່ຽວຂ້ອງ