ໄຂ​ກອງ​ປະຊຸມ​ລະດັບ​ລັດຖະມົນຕີ​ຂອງ​ຂະ​ບວນ​ການ​ບໍ່​ຮ່ວມ​ກຸ່ມ

1.477 25 ຕ.ລ. 2019 ຂ່າວຕ່າງປະເທດ
ໄຂ​ກອງ​ປະຊຸມ​ລະດັບ​ລັດຖະມົນຕີ​ຂອງ​ຂະ​ບວນ​ການ​ບໍ່​ຮ່ວມ​ກຸ່ມ

   ກອງ​ປະຊຸມ​ລະດັບ​ລັດຖະມົນຕີ ຂອງ​ຂະ​ບວນ​ການ​ບໍ່​ຮ່ວມ​ກຸ່ມ ໄດ້​ໄຂ​ຂຶ້ນ​ເມື່ອ​ວັນ​ທີ 23 ຕຸລາ​ນີ້ ທີ່​ນະຄອນຫຼວງ ບາ​ກູ ຂອງ​ອາ​ແຊກ​ໄບ​ຊານ ພາຍ​ໃຕ້​ການ​ເປັນ​ປະທານ​ຂອງ​ທ່ານ ແອ​​ລ​ມາ ມາ​ມາ​ເດຍ​ຣອບ ລັດຖະມົນຕີ​ການ​ຕ່າງປະເທດ ອາ​ແຊກ​ໄບ​ຊານ.

    ກອງ​ປະຊຸມ​ດັ່ງກ່າວ ສຸມ​ໃສ່​ການ​ແລກປ່ຽນ​ຄວາມ​ເຫັນ​ກ່ຽວ​ກັບ​ບັນດາ​ບັນຫາ​ຂອງ​ສາກົນ ແລະ ພາກ​ພື້ນ ກໍ​ຄື​ການ​ກະກຽມ​ໃຫ້​ແກ່​ກອງ​ປະຊຸມ​ຂັ້ນ​ສູງ​ຂອງ​ຂະ​ບວນ​ການ​ບໍ່​ຮ່ວມ​ກຸ່ມ​ຄັ້ງ​ທີ 18 ຊຶ່ງ​ຈັດ​ຂຶ້ນ​ແຕ່​ວັນ​ທີ 25-26 ຕຸລາ​ນີ້ ທີ່​ນະຄອນຫຼວງ​ບາ​ກູ. 

    ທ່ານ ແອ​​ລ​ມາ ມາ​ມາ​ເດຍ​ຣອບ ກ່າວ​ໄຂ​ກອງ​ປະຊຸມ​ໃນ​ເທື່ອ​ນີ້ ໂດຍ​ໄດ້​ຍົກ​ສູງ​ບົດບາດ​ອັນ​ສຳຄັນ​ຂອງ​ຂະ​ບວນ​ການ​ບໍ່​ຮ່ວມ​ກຸ່ມ ໃນ​ການ​ຮັກສາ​ສັນຕິພາບ ແລະ ຄວາມ​ໝັ້ນຄົງ​ສາກົນ ພ້ອມ​ທັງ​ເນັ້ນ​ໜັກ​ວ່າ ຂະ​ບວນ​ການ​ບໍ່​ຮ່ວມ​ກຸ່ມ ຄວນ​ສືບຕໍ່​ການ​ປ່ຽນແປງ​ໃໝ່ ເພື່ອ​ຕອບ​ສະໜອງ​ຕາມ​ຄວາມ​ມຸ່ງ​ຫວັງ ແລະ ຄວາມ​ຕ້ອງການ​ຂອງ​ບັນດາ​ປະເທດ​ສະມາຊິກ.

    ຂະ​ບວນ​ການ​ບໍ່​ຮ່ວມ​ກຸ່ມ ໄດ້​ຮັບ​ການ​ສ້າງຕັ້ງ​ເມື່ອ​ປີ 1961 ມາ​ຮອດ​ເວລາ​ນີ້ ມີ 120 ປະເທດ​ເປັນ​ສະມາຊິກ ແລະ  17 ປະເທດ​ເປັນ​ຜູ້​ສັງເກດ​ການ ຊຶ່ງ​ກາຍເປັນ​ອົງການ​ທີ່​ມີ​ປະລິມານ​ສະມາຊິກ​ຫຼາຍ​ເປັນ​ອັນ​ດັບ​ສອງ​ຂອງ​ໂລກ ຖັດ​ຈາກ​ອົງການ​ສະຫະ​ປະຊາ​ຊາດ.

ຂ່າວທີ່ກ່ຽວຂ້ອງ