ຂ່າວຫຼ້າສຸດ

ເລື່ອງເລົ່າການຢ່າຮ້າງ

2.430 25 ຕ.ລ. 2019 ນານາສາລະ

    ພວກ​ເຮົາ​ຈະ​ໄດ້​ຍິນ​ຄຳ​ເວົ້າ​ທີ່​ວ່າ: ມີ​ບວດ ກໍ​ມີ​ສິກ ມີ​ເອົາ​ກໍ​ມີ​ປະ​ໝາຍ​ຄວາມ​ວ່າ ການ​ແຕ່ງ­ງານ ທີ່​ນຳ​ພາ­ໃຫ້​ຊີ­ວິດ​ໂສດ​ຂອງ​ຄົນ​ສອງ​ຄົນ​ມາ​ຢູ່​ຮ່ວມ​ກັນ​ເປັນ​ຊີ­ວິດ​ຄູ່ ຜົວ-ເມຍ ນັ້ນ ສ່ວນ​ໃຫຍ່​ຍ່ອມ​ເກີດ​ຈາກ​ຄວາມ​ພໍ­ໃຈ​ຂອງ​ບ່າວ-ສາວ ແຕ່​ບາງ​ກໍ­ລະ­ນີ​ຂອງ​ຊີ­ວິດ​ຄູ່​ທີ່​ປະ­ຄອງ​ກັນ​ບໍ່​ເຖິງ​ຝັ່ງ ອາດ​ເກີດ​ມາ​ຈາກ​ຫຼາຍ​ສາ­ເຫດ ເຊິ່ງ​ເລື່ອງ​ຄອບ­ຄົວ​ນີ້ ຍ່ອມ​ເປັນ​ເລື່ອງ​ລະ­ອຽດ​ອ່ອນ ເພາະ​ບາງ​ຄັ້ງ​ປົມ​ຂອງ​ບັນ­ຫາ​ມັນ​ສະ​ສົມ​ເທື່ອ​ລະ​ນ້ອຍ ຈົນ​ກາຍ­ເປັນ​ເລື່ອງ​ໃຫຍ່ ເມື່ອ​ເວ­ລາ​ຜ່ານ​ໄປ ບາງ​ກໍ­ລະ­ນີ​ຈະ​ກັບ​ມາ​ແກ້​ໄຂ ກໍ​ສາວ​ຫາ​ປົມ​ບັນ­ຫາ​ຫຍຸ້ງ­ຍາກ​ພໍ​ສົມ­ຄວນ ຄະ­ດີ​ຢ່າ​ຮ້າງ​ຢູ່​ບ້ານ​ເຮົາ ບາງ​ຄົນ​ອາດ​ຍັງ​ບໍ່​ຮັບ​ຮູ້​ວ່າ​ມັນ​ມີ​ທ່າ​ອ່ຽງ​ສູງ​ຂຶ້ນ​ກວ່າ​ຄະ­ດີ​ອື່ນໆ ເຊິ່ງ​ບັນ­ຫາ​ສະ​ຖາ​ບັນ​ຄອບ­ຄົວ​ບໍ່​ຄວນ​ເບິ່ງ​ຂ້າມ.

    ເປັນ​ຫຍັງ​ຂ້າ­ພະ­ເຈົ້າ​ຈຶ່ງ​ບອກ​ວ່າ: ສະ​ຖາ​ບັນ​ຄອບ­ຄົວ​ບໍ່​ຄວນ​ເບິ່ງ​ຂ້າມ ໃນ​ການ​ພັດ­ທະ­ນາ​ສັງ­ຄົມ ເພາະ­ວ່າ​ຄອບ­ຄົວ​ເປັນ​ສະ​ຖາ​ບັນ​ຫຼັກ​ຂອງ​ສັງ­ຄົມ ບາງ​ຄູ່​ບາງ​ຊີ­ວິດ​ຄອບ­ຄົວ​ມີ​ຄວາມ​ສະ­ຫງົບ​ສຸກ​ໝັ້ນ­ຄົງ ກໍ​ສົ່ງ​ຜົນ​ຕໍ່­ໜ້າ​ທີ່​ວຽກ​ງານ​ກ້າວ­ໜ້າ ແຕ່​ບາງ​ກໍ­ລະ­ນີ​ຄອບ­ຄົວ​ມີ​ບັນ­ຫາ ກໍ​ສາ­ມາດ​ເຮັດ​ໃຫ້​ຜູ້­ກ່ຽວ​ຝ່າຍ​ໃດ​ໜຶ່ງ​ລົ້ມ​ເຫຼວ​ໃນ​ໜ້າ­ທີ່​ການ​ງານ​ໄດ້ ການ​ຢ່າ​ຮ້າງ​ຂອງ​ຫຼາຍ​ຄູ່​ຜົວ-ເມຍ ຍ່ອມ​ມີ​ທີ່​ມາ​ແຕກ​ຕ່າງ​ກັນ ບາງ​ຄູ່​ເກີດ​ຈາກ​ຄວາມ​ຮຸນ​ແຮງ​ຂອງ​ພຶດ­ຕິ​ກຳ​ທີ່​ເກີດ​ຂຶ້ນ​ໃນ​ຄອບ­ຄົວ ເຊັ່ນ: ຜົວ​ມັກ​ດື່ມ​ເຫຼົ້າ ເມົາ​ມາ​ເຮືອນ​ແລ້ວ​ເກີດ​ທະ​ເລາະ​ວິ­ວາດ ມີ​ປາກ​ສຽງ ເຖິງ​ຂັ້ນ​ລົງ­ມື​ຕົບ​ຕີ​ກັນ​ກໍ​ມີ ບາງ​ຄູ່​ຢ່າ​ຮ້າງ​ກັນ​ຍ້ອນ​ບັນ­ຫາ​ເສດ­ຖະ­ກິດ ຫຼື ຄ່າ​ນິ­ຍົມ​ທີ່​ບໍ່​ກົງ​ກັນ ບໍ່​ສາ­ມາດ​ໄປ​ຄຽງ​ຄູ່​ກັນ​ໄດ້ ຫຼື ຈະ​ໃຊ້​ພາ­ສາ​ຮິດ​ຕິດ​ປາກ ກໍ​ແມ່ນ​ສິນ​ບໍ່​ສະ­ເໝີ​ກັນ ຄື​ເລື່ອງ​ຄ່າ​ນິ­ຍົມ ຄວາມ​ຄິດ ການ​ໃຫ້​ກຽດ​ເຄົາ­ລົບ​ເຊິ່ງ​ກັນ ແລະ ກັນ...

    ບາງ​ຄູ່​ຢ່າ​ຮ້າງ​ກັນ​ຍ້ອນ​ໃຊ້​ອາ­ລົມ​ຫຼາຍ​ກວ່າ​ເຫດ­ຜົນ ບາງ​ຄູ່​ກໍ​ອ້າງ​ແຕ່​ກົດ­ໝາຍ ໂດຍ​ບອກ​ວ່າ​ຕົນ​ເອງ​ບໍ່​ໄດ້​ຜິດ​ລະ­ບຽບ​ກົດ­ໝາຍ ເຊິ່ງ​ເບິ່ງ​ຄື​ວ່າ​ຖືກ​ບາງ​ສ່ວນ ເພາະ​ອີກ​ສ່ວນ​ທີ່​ສຳ­ຄັນ​ສຳ­ລັບ​ສັງ­ຄົມ ລາວ​ເຮົາ​ບໍ່​ຄວນ​ລືມ​ເລື່ອງ​ຮີດ­ຄອງ​ປະ­ເພ­ນີ ຮີດ​ຜົວ ຄອງ​ເມຍ ສຳ­ລັບ​ບາງ​ຄູ່​ທີ່​ເອີ້ນ​ວ່າ ສາຍ​ເມົາ​ນຳ​ກັນ ກໍ​ອາດ​ໄປ​ດ້ວຍ​ກັນ​ໄດ້ ແຕ່​ບາງ​ຄູ່​ຜົວ ຫຼື ເມຍ​ມັກ​ເມົາ​ນີ້ ກໍ​ໜ້າ​ຄິດ ເພາະ​ຢ່າ​ລືມ​ວ່າ ວົງ​ເຫຼົ້າ​ເບຍ ສຸ­ລາ​ຢາ​ເມົາ ຖ້າ​ຂາດ​ສະ­ຕິ ກໍ​ອາດ​ເລີຍ​ເຖີດ​ໃຫ້​ມື​ທີ​ສາມ​ມາ​ແຊກ​ແຊງ ການ​ທີ່​ສັງ­ຄົມ​ຂາດ​ສິນ​ລະ​ທຳ ຄື​ກອບ​ທາງ​ໃຈ​ຄຸ້ມ​ຄອງ​ກໍ​ໜ້າ​ຈະ​ແມ່ນ​ສາ­ເຫດ​ໜຶ່ງ​ຂອງ​ການ​ຢ່າ​ຮ້າງ ເຊິ່ງ​ບໍ່​ຄວນ​ດີ­ໃຈ​ວ່າ ກົດ­ໝາຍ​ທີ່​ມີ​ນັ້ນ ຈະ​ຄ້ຳ­ປະ­ກັນ​ໄດ້​ຖ້າ­ວ່າ​ໃຈ​ຄົນ​ເຮົາ​ມັນ​ຂາດ​ຈິດ​ສຳ­ນຶກ​ຂອງ​ຄວາມ​ຮັບ­ຜິດ­ຊອບ​ດີ­ງາມ.

    ຄຳ​ວ່າ ສິນ​ບໍ່​ສະ­ເໝີ​ກັນ ຈຶ່ງ​ເຮັດ​ໃຫ້​ຜູ້​ຂຽນ​ຄິດ​ເຫັນ​ຄຳ​ສອນ​ຂອງ​ພະ­ພຸດ­ທະ­ເຈົ້າ​ເລື່ອງ​ຄູ່​ຄອງ​ທີ່­ຢູ່​ຮ່ວມ​ກັນ ໃຫ້​ຕ່າງ​ຝ່າຍ​ເຮັດ​ໜ້າ­ທີ່​ຕໍ່​ກັນ​ມີ 4 ຂໍ້ ດັ່ງ­ນີ້: (1) ສັດ­ຈະ ຄື: ຜົວ​ເມຍ​ຕ້ອງ​ຖື​ສຳ­ຄັນ​ຄວາມ​ຈິງ​ໃຈ​ຕໍ່​ກັນ ເຊິ່ງ​ຄວາມ​ຈິງ​ໃຈ​ນຳ​ມາ​ເຊິ່ງ​ຄວາມ​ໄວ້​ວາງ­ໃຈ (2) ທຳ​ມະ ຄື: ການ​ຂົ່ມ​ໃຈ​ເຝິກ​ນິດ​ໄສ ປັບ­ປຸງ​ໃສ່​ກັນ (3) ຂັນ​ຕິ ຄື: ຄວາມ​ອົດ­ທົນ​ຕໍ່​ບັນ­ຫາ​ອົດ­ທົນ​ຟັງ​ເຫດ­ຜົນ​ບໍ່​ຫວັ່ນ­ໄຫວ​ງ່າຍ (4) ຈາ­ຄະ ຄື: ເສຍ­ສະ­ຫຼະ ໃຈ­ກວ້າງ ພ້ອມ​ທີ່​ຈະ​ຮັບ​ຟັງ​ອີກ​ຝ່າຍ ເພື່ອ​ເປັນ​ການ​ຫາ​ທາງ​ອອກ​ຮ່ວມ​ກັນ ໂດຍ​ບໍ່​ຄວນ​ປ່ອຍ​ໃຫ້​ບັນ­ຫາ​ມັນ​ທັບ​ຖົມ​ຍາວ​ນານ ຈົນ​ກາຍ­ເປັນ​ດິນ​ພອກ​ຫາງ​ໝູ ທຳ​ມະ 4 ຂໍ້​ນີ້ ເອີ້ນ​ວ່າ ຫຼັກ​ທຳ ສຳ­ລັບ​ການ​ຄອງ​ເຮືອນ​ຂອງ​ຄູ່​ຜົວ-ເມຍ.

    ສັງ​ລວມ​ໄດ້​ວ່າ: ການ​ຢ່າ​ຮ້າງ​ເຖິງ​ແມ່ນ​ວ່າ ບາງ​ຄູ່​ເຮັດ​ໄດ້ ປະ​ໄດ້ ແຕ່​ຢ່າ​ລືມ​ວ່າ ບັນ­ຫາ​ສັງ­ຄົມ​ອື່ນໆ​ຈະ​ຕາມ​ມາ ເຊັ່ນ: ຄວາມ​ອົບ​ອຸ່ນ​ຂອງ​ລູກ ຫຼື ຄອບ­ຄົວ ຫຼາຍ​ກໍ­ລະ­ນີ​ລູກ​ຂາດ​ທີ່​ເພິ່ງ ເຊິ່ງ​ລາມ​ໄປ​ເຖິງ​ບັນ­ຫາ​ການ​ລ້ຽງ​ດູ-ການ​ແບກ​ຮັບ​ພາ­ລະ​ສ່ວນ​ຕົວ ຜູ້​ຂຽນ​ຈຶ່ງ​ເຫັນ​ວ່າ ເຮົາ​ບໍ່​ຄວນ​ເບິ່ງ​ຂ້າມ ຫຼື ຖື​ເບົາ ຄ່າ​ນິ­ຍົມ​ບາງ​ປະ­ການ​ທີ່​ຊັກ​ນຳ​ໃຫ້​ຄອບ­ຄົວ​ແຕກ​ແຍກ ບາງ​ຄົນ​ເກ່ງ​ນອກ​ບ້ານ​ກັບ​ມາ​ເຮືອນ​ເຈິ​ະ​ແມ່​ບ້ານ​ເກ່ງ​ຄືນ ຄ້າຍ​ວ່າ​ເຫຼັກ​ກ້າ​ເຈິ​ະ​ຫີນ​ຊາ​ກໍ​ມີ.

    ສະ­ເໜີ​ແລກ­ປ່ຽນ

ຂ່າວທີ່ກ່ຽວຂ້ອງ