ຂ່າວຫຼ້າສຸດ

ສຸກອາພອນ ອຳລາ ໄຊນາດ ຍ້າຍຮ່ວມພີທີປະຈວບ

1.018 25 ຕ.ລ. 2019 ວົງຈອນກີລາ
ສຸກອາພອນ ອຳລາ ໄຊນາດ ຍ້າຍຮ່ວມພີທີປະຈວບ

    ອີງ​ຕາມ​ຂໍ້​ມູນ​ຈາກ​ເວັບ​ໄຊ​ສະ­ຫຍາມ​ສະ­ປອດ ສື່​ກີ­ລາ​ຊື່​ດັງ​ຂອງ​ປະ­ເທດ​ໄທ ລາຍ​ງານ​ວັນ​ທີ 22 ຕຸ­ລາ 2019 ວ່າ: ສະ­ໂມ­ສອນ ພີ​ທີ​ປະ­ຈວບ ເອັຟ​ຊີ ທີມ​ອັນ​ດັບ 9 ຂອງ​ການ​ແຂ່ງ­ຂັນ​ເຕະ­ບານ​ໄທ​ລີກ I ລະ­ດູ​ການ 2019 ຂອງ​ປະ­ເທດ​ໄທ ແລະ ແຊັມ​ການ​ແຂ່ງ­ຂັນ​ເຕະ­ບານ ໂຄ​ໂຢ​ຕ້າ​ລີກ​ຄັບ 2019 ໄດ້​ມີ​ການ​ເສີມ​ໃນ​ໂກ​ຕ້າ​ອາ​ຊຽນ ເພື່ອ​ກະ­ກຽມ​ທີມ​ການ​ແຂ່ງ­ຂັນ​ເຕະ­ບານ​ໄທ​ລີກ I ລະ­ດູ​ການ 2020 ຫຼ້າ​ສຸດ ປະ­ກາດ​ຄວ້າ​ຕົວ ສຸກ​ອາ­ພອນ ວົງ​ຈຽງ​ຄຳ ກອງ​ໜ້າ​ທີມ​ຊາດ​ລາວ ຈາກ​ສະ­ໂມ­ສອນ​ໄຊ​ນາດ​ຮອນ​ບິວ ເອັຟ​ຊີ ເຂົ້າ​ຮ່ວມ​ທີມ​ເປັນ​ທີ່​ຮຽບ​ຮ້ອຍ.

    ສຳ­ລັບ ສຸກ​ອາ­ພອນ ວົງ​ຈຽງ​ຄຳ ຜ່ານ​ມາ​ເຄີຍ​ຮ່ວມ​ທີມ​ໃນ​ລີກ​ຂອງ​ປະ­ເທດ​ໄທ​ຢ່າງ​ຫຼວງ­ຫຼາຍ ເປັນ­ຕົ້ນ ສະ­ໂມ­ສອນ ບີ​ອີ​ຊີ ເທ​ໂຣ ສະ­ໂມ­ສອນ ກຣະ​ບີ່ ເອັຟ​ຊີ ສະ­ໂມ­ສອນ ພິດ​ສະ​ນຸ​ໂລກ ເອັຟ​ຊີ ສະ­ໂມ­ສອນ ສະ​ຣະ​ບູ​ລີ ເອັຟ​ຊີ ສະ­ໂມ­ສອນ ສີ­ສະ​ເກດ ເອັຟ​ຊີ ແລະ ໃນ​ລະ­ດູ​ການ 2019 ແຂ່ງ​ກັບ​ສະ­ໂມ­ສອນ ໄຊ​ນາດ​ຮອນ​ບິວ ລົງ​ສະ­ໜາມ 15 ນັດ ຍິງ​ໄປ 1 ປະ­ຕູ ແລະ ບໍ່​ສາ­ມາດ​ຊ່ວຍ​ໃຫ້​ທີມ​ໜີ​ການ​ຕົກ​ຊັ້ນ​ໄດ້ ກ່ອນ​ຈະ​ເລືອກ​ເຊັນ​ສັນ­ຍາ​ກັບ​ສະ­ໂມ­ສອນ​ພີ​ທີ​ປະ­ຈວບ ເພື່ອ​ຊ່ວຍ​ທີມ​ໄລ່​ລ່າ ຄວາມ​ສຳ­ເລັດ​ໃນ​ລະ­ດູ​ການ​ໜ້າ ນອກ​ນັ້ນ ສຸກ​ອາ­ພອນ ຍັງ​ມີ​ປະ­ສົບ​ການ​ອີກ​ຫຼາກ​ຫຼາຍ​ກັບ​ສະ­ໂມ­ສອນ​ໃນ ສປປ ລາວ ເຊັ່ນ: ສະ­ໂມ­ສອນ ເອ​ສຣາ​ເອັຟ​ຊີ ສະ­ໂມ­ສອນ​ນະ­ຄອນ­ຫຼວງ​ວຽງ​ຈັນ ເອັຟ​ຊີ ສະ­ໂມ­ສອນ ລ້ານ​ຊ້າງ​ຢູ​ໄນ​ເຕັດ ແລະ ສະ­ໂມ­ສອນ​ນະ­ຄອນ­ຫຼວງ​ຢູ​ໄນ​ເຕັດ ຂະ­ນະ​ທີ່​ທີມ​ຊາດ​ລາວ​ຕິດ​ທີມ​ຊາດ​ມາ​ຕັ້ງ­ແຕ່​ຊຸດ​ເຍົາ­ວະ​ຊົນ ແລະ ທີມ​ຊາດ​ຊຸດ​ໃຫຍ່​ໃນ​ປັດ­ຈຸ­ບັນ.

    ສຳ­ລັບ​ການ​ເປີດ​ຕົວ​ຂອງ ສຸກ​ອາ­ພອນ ວົງ​ຈຽງ​ຄຳ ກັບ​ຕົ້ນ​ສັງ­ກັດ ໃໝ່​ສະ­ໂມ­ສອນ​ພີ​ທີ​ປະ­ຈວບ ຈະ​ມີ​ຂຶ້ນ​ໃນ​ການ​ແຂ່ງ­ຂັນ​ນັດ​ສຸດ​ທ້າຍ​ຂອງ​ສະ­ໂມ­ສອນ​ພີ​ທີ​ປະ­ຈວບ​ໃນ​ລະ­ດູ​ການ​ນີ້ ເປີດ​ບ້ານ​ຕ້ອນ­ຮັບ​ການ​ມາ​ຢາມ​ຂອງ​ສະ­ໂມ­ສອນ ຣາ​ຊະ​ບູ​ລີ​ເອັບ​ຊີ ໃນ​ວັນ​ທີ 26 ຕຸ­ລາ 2019 ເວ­ລາ 18:00 ໂມງ.

ຂ່າວທີ່ກ່ຽວຂ້ອງ