ນາຍົກ ຕ້ອນຮັບປະທານສະຫະພັນບານເຕະສາກົນ

977 22 ຕ.ລ. 2019 ຂ່າວໜ້າ​ໜຶ່ງ
ນາຍົກ ຕ້ອນຮັບປະທານສະຫະພັນບານເຕະສາກົນ

    ວັນ​ທີ 19 ຕຸ­ລາ 2019 ທີ່​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ໄດ້​ໃຫ້​ກຽດ​ຕ້ອນ­ຮັບ​ການ​ເຂົ້າ​ຢ້ຽມ​ຄຳ­ນັບ​ຂອງ​ທ່ານ Gianni Infantino ປະ­ທານ​ສະ­ຫະ­ພັນ​ບານ­ເຕະ​ສາ­ກົນ ຫຼື FIFA ພ້ອມ​ຄະ­ນະ ໃນ​ໂອ­ກາດ​ເດີນ­ທາງ​ມາ​ຢ້ຽມ­ຢາມ ແລະ ເຮັດ​ວຽກ​ຢູ່​ລາວ.

    ໂອ­ກາດ​ນີ້ ທ່ານ​ນາ­ຍົກ­ລັດ­ຖະ­ມົນ­ຕີ​ໄດ້​ສະ­ແດງ​ຄວາມ​ຕ້ອນ­ຮັບ ແລະ ຍ້ອງ­ຍໍ​ຊົມ­ເຊີຍ​ຕໍ່​ທ່ານ​ປະ­ທານ​ສະ­ຫະ­ພັນ​ບານ­ເຕະ​ສາ­ກົນ ພ້ອມ​ດ້ວຍ​ຄະ­ນະ​ທີ່​ໄດ້​ເດີນ­ທາງ​ມາ​ຢ້ຽມ­ຢາມ​ລາວ​ຄັ້ງ​ນີ້ ພາຍ­ຫຼັງ​ທີ່​ທ່ານ​ໄດ້​ຖືກ​ເລືອກ​ໃຫ້​ເປັນ​ປະ­ທານ FIFA ຄົນ​ໃໝ່ ແລະ ກໍ​ເປັນ​ຄັ້ງ​ທຳ​ອິດ​ທີ່​ເດີນ­ທາງ​ມາ​ຢ້ຽມ­ຢາມ​ລາວ ເຊິ່ງ​ເປັນ​ການ​ປະ­ກອບ­ສ່ວນ​ອັນ​ສຳ­ຄັນ​ໃນ​ການ​ພົວ­ພັນ​ຮ່ວມ​ມື​ທີ່​ດີ ລະ­ຫວ່າງ​ສະ­ຫະ­ພັນ​ບານ­ເຕະ​ສາ­ກົນ ແລະ ລາວ ເວົ້າ​ລວມ ເວົ້າ​ສະ­ເພາະ ແມ່ນ​ການ​ພົວ­ພັນ​ຮ່ວມ​ມື​ກັບ​ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ​ໃຫ້​ແໜ້ນ​ແຟ້ນ​ຍິ່ງ​ຂຶ້ນ.

    ສຳ­ລັບ​ການ­ເຄື່ອນ­ໄຫວ​ຢ້ຽມ­ຢາມ​ລາວ​ຂອງ​ປະ­ທານ FIFA ຄັ້ງ​ນີ້ ທ່ານ​ປະ­ທານ​ພ້ອມ​ດ້ວຍ​ຄະ­ນະ​ໄດ້​ໄປ​ຢ້ຽມ­ຢາມ​ໂຄງ­ການ​ຕ່າງໆ​ທີ່ FIFA ໄດ້​ໃຫ້­ການ​ຊ່ວຍ­ເຫຼືອ​ສະ­ໜັບ­ສະ­ໜູນ​ລາວ​ໃນ​ໄລ­ຍະ​ຜ່ານ​ມາ ເປັນ­ຕົ້ນ​ໂຄງ­ການ​ກໍ່­ສ້າງ​ຫໍ​ພັກ​ນັກ­ກີ­ລາ​ຊາຍ ແລະ ຫ້ອງ​ອາ­ຫານ ໂຄງ­ການ​ອາ­ຄານ​ພະ​ແນກ​ເຕັກ­ນິກ​ວິ­ທະ­ຍາ ແລະ ພັດ­ທະ­ນາ​ເດີ່ນ​ຟຸດ​ຊໍ​ໃນ​ຮົ່ມ ອາ­ຄານ​ຫໍ​ພັກ​ນັກ­ກີ­ລາ​ຍິງ ສະ­ໜາມ​ຫຍ້າ​ທຽມ​ຢູ່​ສູນ​ເຝີກ​ຫ້ວຍ​ຫົງ ອາ­ຄານ​ຫ້ອງ ການ​ບໍ­ລິ­ຫານ​ຫໍ​ພັກ​ນັກ­ກີ­ລາ ແລະ ຄູ​ເຝີກ​ທີ່​ສະ­ໜາມ​ກີ­ລາ​ແຫ່ງ​ຊາດ ນອກ​ນັ້ນ FIFA ຍັງ​ໄດ້​ຊ່ວຍ​ງົບ ປະ­ມານ​ບໍ­ລິ­ຫານ​ສະ­ຫະ­ພັນ​ບານ­ເຕະ​ແຫ່ງ​ຊາດ​ລາວ ກໍ​ຄື ສະ­ຫະ­ພັນ​ບານ­ເຕະ​ປະ­ເທດ​ອື່ນໆ​ທີ່​ເປັນ​ສະ­ມາ­ຊິກ ລວມ​ມູນ​ຄ່າ​ການ​ຊ່ວຍ­ເຫຼືອ​ທັງ​ໝົດ 3 ລ້ານ​ກວ່າ​ໂດ​ລາ​ສະ­ຫະ­ລັດ ຫຼື ປະ­ມານ 27 ຕື້​ກີບ.

ຂ່າວທີ່ກ່ຽວຂ້ອງ