ເປີດງານບຸນມະໂຫລານ ສົ່ງເສີມການອ່ານນະຄອນຫຼວງວຽງຈັນ ຄັ້ງທີ 2

874 22 ຕ.ລ. 2019 ຂ່າວໜ້າ​ໜຶ່ງ
ເປີດງານບຸນມະໂຫລານ ສົ່ງເສີມການອ່ານນະຄອນຫຼວງວຽງຈັນ ຄັ້ງທີ 2

    ງານ​ບຸນ­ມະ­ໂຫ­ລານ​ສົ່ງ­ເສີມ​ການ​ອ່ານ ນະ­ຄອນ­ຫຼວງ​ວຽງ​ຈັນ (ນວ) ຄັ້ງ​ທີ 2 ຈັດ​ຂຶ້ນ​ວັນ​ທີ 21 ຕຸ­ລາ 2019 ຢູ່​ສູນ​ການ​ຄ້າ​ວຽງ​ຈັນ​ເຊັນ​ເຕີ ໂດຍ​ມີ​ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ ນວ ທ່ານ ບົວ​ລານ ສີ​ລິ​ປັນ­ຍາ ຮອງ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ທ່ານ ຊົມ​ພູ ແກ້ວ​ປັນ­ຍາ ຫົວ­ໜ້າ​ພະ​ແນກ ສສກ ນວ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ເພື່ອ​ເປີດ​ກວ້າງ​ສົ່ງ­ເສີມ​ການ​ອ່ານ ໃຫ້​ທົ່ວ​ເຖິງ ເປີດ​ໂອ­ກາດ​ໃຫ້​ທຸກ​ຄົນ​ໄດ້​ສຳ­ຜັດ​ກັບ​ປຶ້ມ​ອ່ານ​ນາໆຊາດ ແລະ ໃຫ້​ຕ່າງ​ຊາດ​ໄດ້​ສຳ­ຜັດ​ກັບ​ປື້ມ​ອ່ານ​ຂອງ​ລາວ ແລະ ເຫັນ​ໄດ້​ຄວາມ​ສຳ­ຄັນ​ຂອງ​ການ​ອ່ານ ເປັນ​ເວ­ທີ​ສະ­ແດງ​ຄວາມ​ສາ­ມາດ​ຂອງ​ໄວ​ໜຸ່ມ ປຸກ­ລະ­ດົມ​ໃຫ້​ທຸກ​ພາກ­ສ່ວນ​ມີ​ສ່ວນ​ຮ່ວມ​ໃນ​ການ​ສົ່ງ­ເສີມ​ການ​ອ່ານ ເປັນ​ບ່ອນ​ແບ່ງ­ປັນ​ຄວາມ​ຮູ້ ສົ່ງ­ເສີມ​ນັກ​ພິມ​ພາຍ​ໃນ​ໃຫ້​ຕື່ນ​ຕົວ ປັບ ປຸງ ແລະ ພັດ­ທະ­ນາ​ການ​ຜະ­ລິດ​ປື້ມ​ອ່ານ ທັງ​ເປັນ​ການ​ສະ­ເຫຼີມ­ສະ­ຫຼອງ​ວັນ​ຄູ​ແຫ່ງ​ຊາດ 7 ຕຸ­ລາ ຄົບ­ຮອບ 25 ປີ ເປີດ​ໂອ­ກາດ​ທຸກ​ຫົວ­ໜ່ວຍ​ຄອບ­ຄົວ ໂຮງ­ຮຽນ ສະ​ຖາ​ບັນ​ການ​ສຶກ​ສາ​ພາກ​ລັດ ແລະ ເອ­ກະ​ຊົນ ຜູ້​ປົກ­ຄອງ ແລະ ປະ­ຊາ­ຊົນ​ທົ່ວ​ໄປ ໄດ້​ມາ​ຊົມ ແລະ ຊື້​ປື້ມ​ອ່ານ​ທີ່​ຫຼາຍ​ແບບ​ໃນ​ລາ­ຄາ​ຖືກ ແຕ່​ໄດ້​ຄວາມ​ຮູ້​ຢ່າງ​ຫຼວງ­ຫຼາຍ ເຊິ່ງ​ງານ​ດັ່ງ ກ່າວ​ຈັດ​ຂຶ້ນ​ຢູ່​ສູນ​ການ​ຄ້າ​ວຽງ​ຈັນ​ເຊັນ​ເຕີ ວັນ​ທີ 19-27 ຕຸ­ລາ 2019 ເລີ່ມ​ແຕ່​ເວ­ລາ 9:00 ໂມງ-20:00 ໂມງ.

    ພາຍ​ໃນ​ງານ​ຄັ້ງ​ນີ້ ຍັງ​ມີ​ການ​ແຂ່ງ­ຂັນ​ໄດ້​ລ້ານ ເພື່ອ​ລະ­ນຶກ​ເຖິງ​ບຸນ­ຄຸນ​ຂອງ​ຄູ ຜູ້​ຊະ­ນະ​ເລີດ​ໄດ້​ຮັບ​ລາ­ງວັນ ໜ່ວຍ​ໂລກ​ອັດ​ສະ​ລິ​ຍະ ມູນ​ຄ່າ 1.500.000 ກີບ ເຊິ່ງ​ມີ 10 ລາຍ­ການ​ແຂ່ງ­ຂັນ ຄື: ການ​ແຂ່ງ­ຂັນ​ບົດ​ຄວາມ: ຄູ​ໃນ​ດວງ​ໃຈ (ເປັນ​ພາ­ສາ​ລາວ ແລະ ພາ­ສາ​ອັງ­ກິດ) ການ​ແຂ່ງ​ເວົ້າ: ຄູ​ຜູ້​ທຳ​ອິດ​ຂອງ​ຂ້ອຍ (ເປັນ​ພາ­ສາ​ລາວ ແລະ ອັງ­ກິດ) ແຂ່ງ­ຂັນ​ຮູບ­ເງົາ​ເລື່ອງ­ສັ້ນ ສຸດ​ຍອດ​ອາ­ຈານ​ໃນ​ດວງ​ໃຈ ການ​ແຂ່ງ­ຂັນ​ຮູບ​ຖ່າຍ ຄູ​ຂອງ​ຂ້ອຍ ການ​ຖາມ-ຕອບ ຫົວ­ຂໍ້: ອາ​ຊຽນ ການ​ເລົ່າ​ນິ­ທານ ແຂ່ງ­ຂັນ​ສິ­ລະ​ປະ ແຂ່ງ­ຂັນ​ຮ້ານ​ວາງ­ສະ­ແດງ​ດີ­ເດັ່ນ ແລະ ກິດ­ຈະ­ກຳ​ທີ່​ໜ້າ​ສົນ­ໃຈ​ອື່ນໆ​ອີກ.

ຂ່າວທີ່ກ່ຽວຂ້ອງ