ເບິ່ງບ້ານເຂົາເອົາບົດຮຽນ 22-10-2019

819 22 ຕ.ລ. 2019 ຫົວຂໍ້ຂ່າວອື່ນໆ

    ໃນ​ບົດ​ນີ້ ທ່ານ​ຈະ​ໄດ້​ຮູ້​ກ່ຽວ​ກັບ “ຄຸກ​ສະ­ຫວັນ” ສຳ­ລັບ​ຜູ້​ມີ​ອຳ­ນາດ​ເງິນ​ຢູ່​ອິນ​ໂດ​ເນ​ເຊຍ ແລະ ເລື່ອງ​ການ​ກຳ­ນົດ​ຊົ່ວ­ໂມງ​ເຮັດ​ວຽກ​ຢູ່ ສ ເກົາ­ຫຼີ.

    ທີ່ ອິນ​ໂດ​ເນ​ເຊຍ: ເລື່ອງ​ເຫຼືອ​ເຊື່ອ​ແຕ່​ເປັນ​ຈິງ​ທີ່​ກາຍ­ເປັນ​ຂ່າວ​ຢູ່​ອິນ​ໂດ​ເນ​ເຊຍ ກາງ​ເດືອນ​ກໍ­ລະ­ກົດ ປີ 2018 ແມ່ນ​ກ່ຽວ​ກັບ “ຄຸກ​ສະ­ຫວັນ” ສຳ­ລັບ​ນັກ­ໂທດ​ຮັ່ງ­ມີ​ທີ່​ໃຊ້​ເງິນ​ຊື້​ຈ້າງ​ເຈົ້າ​ໜ້າ­ທີ່​ຄວບ​ຄຸມ​ຄຸກ ເພື່ອ​ໃຫ້​ໄດ້​ຢູ່​ຫ້ອງ​ສະ­ບາຍ ມີ​ໂທລະ­ທັດ ພັດ​ລົມ ແອ​ເຢັນ ຕູ້­ເຢັນ ຫ້ອງ​ຄາ​ຣະ​ໂອ​ເກະ ແລະ ບາງ​ຄັ້ງ ກໍ​ສາ­ມາດ​ຫຼອຍ​ອອກ​ໄປ​ຫາ​ຄວາມ​ສຳ­ລານ​ພາຍ​ນອກ​ຄຸກ​ໄດ້​ຢ່າງ​ສະ­ບາຍ ເລື່ອງ​ທີ່​ວ່າ​ນີ້​ເກີດ​ຂຶ້ນ​ຢູ່​ຄຸກ​ສຸ​ກາ​ມິ​ລະ​ກິນ (Sukamiskin) ທີ່​ເມືອງ​ບັນ​ດຸງ ໜັງ­ສື­ພິມ​ເດິ​ເນ​ເຊິນ (The Nation) ສະ­ບັບ​ວັນ​ທີ 29 ສິງ­ຫາ 2018 ໄດ້​ໃຫ້​ລາຍ​ລະ­ອຽດ​ກ່ຽວ​ກັບ​ເລື່ອງ​ນີ້​ວ່າ ເຈົ້າ​ໜ້າ­ທີ່​ຈາກ​ຄະ­ນະ​ກຳ­ມະ­ການ​ຕ້ານ​ການ​ສໍ້​ລາດ​ບັງ​ຫຼວງ (KPK) ໄດ້​ຈັບ​ກຸມ​ເຈົ້າ​ໜ້າ­ທີ່ ທີ່​ພົວ­ພັນ​ກັບ​ຄະ­ດີ “ຄຸກ​ສະ­ຫວັນ” ໄດ້ 75 ຄົນ ຊຶ່ງ​ເປັນ​ເຈົ້າ​ໜ້າ­ທີ່​ຄວບ​ຄຸມ​ຄຸກ ພາຍ­ຫຼັງ​ການ​ສອບ​ສວນ​ກໍ​ເລີຍ​ຮູ້​ວ່າ​ເຈົ້າ​ໜ້າ­ທີ່​ເຫຼົ່າ​ນີ້ ໄດ້​ຮັບ​ສິນ​ບົນ​ຈາກ​ນັກ­ໂທດ​ທີ່​ມີ​ອຳ­ນາດ​ເງິນ​ເປັນ​ຈຳ­ນວນ​ລະ­ຫວ່າງ 200 ຫາ 500 ລ້ານ​ຣູ​ເປຍ ເພື່ອ​ອຳ­ນວຍ​ຄວາມ​ສະ­ດວກ​ຕາມ​ຄວາມ​ຕ້ອງ­ການ​ຂອງ​ນັກ­ໂທດ “ພິ­ເສດ” ເຫຼົ່າ​ນີ້​ຢູ່​ໃນ​ບັນ­ດາ​ຫ້ອງ​ຂັງ​ພິ­ເສດ​ໃນ​ຄຸກ ສຸ​ກາ​ມິ​ສະ​ກິນ ນີ້​ເຈົ້າ​ໜ້າ­ທີ່ KPK ຢຶດ​ໄດ້​ໂທລະ­ສັບ​ມື​ຖື ຕູ້­ເຢັນ ໂທລະ­ທັດ​ຈໍ​ແບນ ເຄື່ອງ​ເຮັດ​ກາ­ເຟ ເຕົາ​ໄມ​ໂກຼ​ເວັບ ເຕົາ​ອົບ ເຄື່ອງ​ຂະ­ຫຍາຍ ແລະ ເຄື່ອງ­ໃຊ້​ສອຍ​ອື່ນໆ ລວມ​ທັງ​ຫ້ອງ​ນ້ຳ​ທີ່​ແສນ​ຫຼູ ມີ​ລະ­ບົບ​ນ້ຳ​ຮ້ອນ ນ້ຳ​ເຢັນ ສ່ວນ​ຢູ່​ຫ້ອງ​ຂັງ​ນັກ­ໂທດ​ນັກ­ທຸ­ລະ­ກິດ​ຍິງ​ຄົນ​ໜຶ່ງ​ນັ້ນ ມີ​ຮອດ​ຫ້ອງ​ສຳ­ລັບ​ຟັງ​ດົນ­ຕີ ແລະ ຮ້ອງ­ເພງ​ຄາ​ຣະ​ໂອ​ເກະ ເມື່ອ​ຄວາມ​ຈິງ​ກ່ຽວ​ກັບ “ຄຸກ​ສະ­ຫວັນ” ທີ່​ສ້າງ​ຂຶ້ນ​ດ້ວຍ​ການ​ຊື້​ຈ້າງ​ຂອງ​ນັກ­ໂທດ​ຖົງ​ເງິນ​ຕື່ງ​ໄດ້​ໂປ­ໂລ​ອອກ​ມາ ທ່ານ ປຸ​ກູ​ບູ​ດີ ອຸ​ຕາ​ມິ (Puguh Budi Utami) ຜູ້­ອຳ­ນວຍ­ການ​ໃຫຍ່​ລະ­ບົບ​ຄຸກ​ຂອງ​ອິນ​ໂດ​ເນ​ເຊຍ ກໍ​ຟ້າວ​ອອກ​ມາ​ຂໍ​ໂທດ​ຕໍ່​ສັງ­ຄົມ​ວ່າ “ພວກ​ຂ້າ­ພະ­ເຈົ້າ​ຂໍ​ອະ­ໄພ​ຕໍ່­ໜ້າ​ປະ­ຊາ­ຊົນ​ອິນ​ໂດ​ເນ​ເຊຍ ພວກ​ຂ້າ­ພະ­ເຈົ້າ​ຮູ້­ສຶກ​ເສຍ​ໃຈ​ຢ່າງ​ເລິກ­ເຊິ່ງ ທີ່​ບໍ່​ສາ­ມາດ​ປະ­ຕິ­ບັດ​ບົດ­ບາດ​ຄຸ້ມ​ຄອງ​ລະ­ບົບ (ຄຸກ) ໃຫ້​ໄດ້​ດີ​ທີ່​ສຸດ” ບັນ­ຫາ​ນັກ­ໂທດ​ທີ່​ມີ​ອຳ­ນາດ​ເງິນ​ສາ­ມາດ​ຊື້​ຄວາມ­ສຸກ​ຄວາມ​ຫຼູ​ຫຼາ​ໃນ​ຄຸກ​ນັ້ນ ເປັນ​ເລື່ອງ​ທີ່​ທາງ​ການ​ຂອງ​ອິນ​ໂດ​ເນ​ເຊຍ ຕ້ອງ​ໄດ້​ປະ­ກາດ​ໄມ້​ຕາຍ​ເພື່ອ​ແກ້​ໄຂ​ອອກ​ມາ​ໃນ​ປີ​ກາຍ​ວ່າ ພະ­ນັກ­ງານ​ຄວບ​ຄຸມ ກໍ​ຄື ຜູ້​ເວນ­ຍາມ​ຄຸກ​ຄົນ​ໃດ​ທີ່​ຮັບ​ສິນ​ບົນ ເພື່ອ​ໃຫ້​ນັກ​ໂທ​ໄດ້​ສະ­ເຫວີຍ​ສຸກ​ຈະ​ຖືກ​ຈັບ​ແດກ​ເຂົ້າ​ຄຸກ​ທັງ​ໝົດ.

    ທີ່ ສ ເກົາ­ຫຼີ: ນັບ​ແຕ່​ວັນ​ທີ 1 ເມ­ສາ ປີ​ນີ້ (2019) ເປັນ­ຕົ້ນ​ມາ ບັນ­ດາ​ນາຍ​ຈ້າງ​ທີ່​ໃຊ້​ແຮງ​ງານ​ລູກ­ຈ້າງ​ເກີນ​ກວ່າ 52 ຊົ່ວ­ໂມງ​ຕໍ່​ອາ­ທິດ ຈະ​ຖືກ​ປັບ​ໃໝ​ຕາມ​ລະ­ບຽບ​ກົດ­ໝາຍ ນີ້​ແມ່ນ​ຂໍ້​ບັງ­ຄັບ​ສະ­ເພາະ​ນາຍ​ຈ້າງ​ທີ່​ມີ­ແຮງ​ງານ​ນັບ​ແຕ່ 300 ຄົນ ຂຶ້ນ​ໄປ ນະ­ໂຍ­ບາຍ​ການ​ເຮັດ​ວຽກ​ສູງ​ສຸດ 52 ຊົ່ວ­ໂມງ​ໃນ ສ ເກົາ­ຫຼີ ນັ້ນ ໄດ້​ນຳ​ມາ​ໃຊ້​ນັບ​ແຕ່​ເດືອນ​ກໍ­ລະ­ກົດ ປີ 2018 ພາຍ​ໃຕ້​ກົດ­ໝາຍ​ແຮງ​ງານ​ທີ່​ລະ­ບຸ​ວ່າ ເວ­ລາ​ສຳ­ລັບ​ການ​ເຮັດ​ວຽກ​ຢ່າງ​ເປັນ​ທາງ​ການ​ນັ້ນ​ແມ່ນ 40 ຊົ່ວ­ໂມງ​ຕໍ່​ອາ­ທິດ ແລະ ເວ­ລາ​ເຮັດ​ວຽກ​ເພີ່ມ​ແມ່ນ​ຢູ່​ທີ່ 12 ຊົ່ວ­ໂມງ​ຕໍ່​ອາ­ທິດ ໂຮມ​ກັນ​ເປັນ 52 ຊົ່ວ­ໂມງ ວິ​ສາ​ຫະ​ກິດ​ທີ່​ລະ­ເມີດ​ຂໍ້​ກຳ­ນົດ​ນີ້ ເທື່ອ​ທີ​ໜຶ່ງ​ຈະ​ຖືກ​ກ່າວ​ເຕືອນ ຖ້າ​ລະ­ເມີດ​ເທື່ອ​ທີ​ສອງ​ຈະ​ຖືກ​ປັບ​ໃໝ​ສູງ​ສຸດ 20 ລ້ານ​ວອນ (ເທົ່າ​ກັບ 17.600 ໂດ​ລາ​ສະ­ຫະ­ລັດ) ຫຼື ຈະ​ຖືກ​ຈຳ​ຄຸກ​ສູງ​ສຸດ 2 ປີ ວິ​ສາ​ຫະ​ກິດ​ໃນ ສ ເກົາ­ຫຼີ ທີ່​ມີ­ແຮງ​ງານ​ນັບ​ແຕ່ 300 ຄົນ​ຂຶ້ນ​ໄປ​ນັ້ນ ມີ​ຈຳ­ນວນ 3.600 ແຫ່ງ ຈາກ​ການ​ສຳ​ຫຼວດ​ຂອງ​ກະ­ຊວງ​ຮັບ​ສະ­ໝັກ ແລະ ແຮງ​ງານ ສ ເກົາ­ຫຼີ ໄດ້​ພົບ​ວ່າ ໃນ​ປິ 2018 ມີ 20% ຂອງ​ວິ​ສາ​ຫະ​ກິດ ທີ່​ລະ­ເມີດ​ເວ­ລາ​ການ​ເຮັດ​ວຽກ​ຕາມ​ຂໍ້​ກຳ­ນົດ​ໃໝ່​ນີ້.

ຂ່າວທີ່ກ່ຽວຂ້ອງ