ນັກແລ່ນຫຼາຍກວ່າພັນຄົນ ເຂົ້າຮ່ວມງານຫຼວງພະບາງຮາບມາລາທອນ

530 22 ຕ.ລ. 2019 ວົງຈອນກີລາ
ນັກແລ່ນຫຼາຍກວ່າພັນຄົນ ເຂົ້າຮ່ວມງານຫຼວງພະບາງຮາບມາລາທອນ

    ໂຮງ­ໝໍ​ເພື່ອນ​ລາວ​ສຳ­ລັບ​ເດັກ ແຂວງ​ຫຼວງ​ພະ​ບາງ ຈັດ​ງານ​ແລ່ນ​ຫຼວງ​ພະ​ບາງ​ຮາບ​ມາ­ລາ​ທອນ ຄັ້ງ​ທີ 7 ຂຶ້ນ​ວັນ​ທີ 20 ຕຸ­ລາ 2019 ມີ​ນັກ​ແລ່ນ​ຈາກ​ພາຍ​ໃນ​ປະ­ເທດ ແລະ ຕ່າງ­ປະ­ເທດ​ເຂົ້າ​ຮ່ວມ​ຫຼາຍ​ກວ່າ 1.000 ຄົນ.

    ຈຸດ­ປະ­ສົງ​ເພື່ອ​ປຸກ­ລະ­ດົມ​ທຸກ​ຄົນ​ໃນ​ສັງ­ຄົມ ນັບ​ທັງ​ແຂກ​ພາຍ​ໃນ ແລະ ຕ່າງ­ປະ­ເທດ​ມີ​ສ່ວນ​ຮ່ວມ​ສົມ­ທົບ​ທຶນ​ຈັດ​ຊື້​ອຸ­ປະ­ກອນ​ການ​ແພດ ແລະ ພັດ­ທະ­ນາ​ໂຮງ­ໝໍ​ເພື່ອນ​ລາວ​ສຳ­ລັບ​ເດັກ ແຂວງ​ຫຼວງ​ພະ​ບາງ ແລະ ສົມ­ທົບ​ທຶນ​ຊ່ວຍ​ຜູ້​ປະ­ສົບ​ໄພ​ນ້ຳ​ຖ້ວມ​ຢູ່​ພາກ​ກາງ ແລະ ພາກ​ໃຕ້​ຂອງ​ລາວ ເຊິ່ງ​ລາຍ​ໄດ້​ທັງ​ໝົດ​ຈະ​ມອບ​ເຂົ້າ​ກອງ​ທຶນ​ພັດ­ທະ­ນາ​ຂອງ​ໂຮງ­ໝໍ​ເພື່ອນ​ລາວ​ສຳ­ລັບ​ເດັກ.

    ຫຼວງ​ພະ​ບາງ​ຮາບ​ມາ­ລາ​ທອນ​ປີ​ນີ້ ປະ­ກອບ​ມີ 3 ຮຸ່ນ​ຄື: 7 ກິ­ໂລ­ແມັດ 14 ກິ­ໂລ­ແມັດ ແລະ 21 ກິ­ໂລ­ແມັດ ໂດຍ​ເລີ່ມ​ຈາກ​ໜ້າ​ຫໍ​ພິ​ພິ​ທະ​ພັນ​ແຫ່ງ​ຊາດ ຫຼວງ​ພະ​ບາງ ອ້ອມ​ຮອບ​ເທ­ສະ​ບານ​ນະ­ຄອນ­ຫຼວງ​ພະ​ບາງ ແລ້ວ​ເຂົ້າ​ເສັ້ນ​ໄຊ​ຢູ່​ຈຸດ​ເລີ່ມ​ຕົ້ນ ພິ­ເສດ​ປີ​ນີ້​ໄດ້​ຈັດ​ກິດ­ຈະ­ກຳ​ແລ່ນ​ກ່ອນ​ໜ້າ​ນີ້​ນັບ​ແຕ່​ວັນ​ທີ 15-18 ຕຸ­ລາ 2019 ໂດຍ​ນັກ​ແລ່ນ​ກຸ່ມ​ໜຶ່ງ​ມີ​ຄວາມ​ມຸ່ງ​ໝັ້ນ​ໃນ​ການ​ແລ່ນ ແລະ ເຕັມ​ໃຈ​ທີ່​ຈະ​ຮັບ​ພາ­ລະ­ກິດ ແລ່ນ​ແຕ່​ນະ­ຄອນ­ຫຼວງ​ວຽງ​ຈັນ-ຫຼວງ​ພະ​ບາງ​ໄລ­ຍະ​ທາງ 385 ກິ­ໂລ­ແມັດ ເພື່ອ​ລະ­ດົມ​ທຶນ​ຊ່ວຍ​ໂຮງ­ໝໍ​ເພື່ອ​ລາວ​ສຳ­ລັບ​ເດັກ ແຂວງ​ຫຼວງ​ພະ​ບາງ ແລະ ຊ່ວຍ​ຜູ້​ປະ­ສົບ​ໄພ​ນ້ຳ​ຖ້ວມ​ຢູ່​ແຂວງ​ພາກ​ໃຕ້​ຂອງ​ລາວ ແລະ ຈະ​ສືບ­ຕໍ່​ລະ­ດົມ​ທຶນ​ໄປ​ຈົນ​ຮອດ​ວັນ​ທີ 30 ຕຸ­ລາ 2019.

ຂ່າວທີ່ກ່ຽວຂ້ອງ