ງານຕະຫຼາດນັດພົບແຮງງານ ຄັ້ງທີ 3 ຄາດວ່າຈະມີຜູ້ໄດ້ວຽກ 1.500 ຄົນ

1.405 18 ຕ.ລ. 2019 ຂ່າວໜ້າ​ໜຶ່ງ
ງານຕະຫຼາດນັດພົບແຮງງານ ຄັ້ງທີ 3 ຄາດວ່າຈະມີຜູ້ໄດ້ວຽກ 1.500 ຄົນ

    ງານ​ຕະ­ຫຼາດ­ນັດ​ພົບ​ແຮງ​ງານ ຄັ້ງ​ທີ 3 ຈັດ​ຂຶ້ນ​ວັນ​ທີ 16-20 ຕຸ­ລາ 2019 ຢູ່​ສູນ​ການ​ຄ້າ​ລາວ-ໄອ​ເຕັກ ໂດຍ​ເປັນ​ປະ­ທານ​ຂອງ​ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ (ນວ) ມີ​ທ່ານ ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ (ຮສສ) ບັນ­ດາ​ກົມ ພະ­ແນກ­ການ ບໍ­ລິ­ສັດ​ຈັດ​ຫາ​ງານ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ຈຸດ­ປະ­ສົງ​ເພື່ອ​ສ້າງ​ເງື່ອນ­ໄຂ​ໃຫ້​ຜູ້​ອອກ­ແຮງ​ງານ ທີ່​ຕ້ອງ​ພັດ­ທະ­ນາ​ສີ­ມື​ແຮງ​ງານ​ເຂົ້າ​ເຖິງ​ສະ​ຖາ​ບັນ​ການ​ສຶກ​ສາ​ຕ່າງໆ ໄດ້​ຮັບ​ການ​ຍົກ​ລະ­ດັບ​ສີ­ມື​ແຮງ​ງານ​ແທດ­ເໝາະ​ກັບ​ຄວາມ​ຕ້ອງ­ການ​ຂອງ​ຕະ­ຫຼາດ​ແຮງ​ງານ ທັງ​ເປັນ​ການ​ໂຄ­ສະ­ນາ​ຂໍ້​ມູນ​ຂ່າວ ສານ​ຕະ­ຫຼາດ​ແຮງ​ງານ ເພື່ອ​ເປັນ​ເວ­ທີ​ສົ່ງ­ເສີມ​ການ​ຕະ­ຫຼາດ​ຂອງ​ບັນ­ດາ​ຫົວ­ໜ່ວຍ​ແຮງ​ງານ ໂຄງ­ການ ແລະ ອົງ​ການ­ຈັດ­ຕັ້ງ​ສາ­ກົນ ເພື່ອ​ຫຼຸດ­ຜ່ອນ​ອັດ­ຕາ​ການ​ວ່າງ​ງານ ຫຼຸດ­ຜ່ອນ​ການ​ເຄື່ອນ​ຍ້າຍ​ແຮງ​ງານ​ໄປ​ເຮັດ​ວຽກ​ຢູ່​ຕ່າງ­ປະ­ເທດ​ແບບ​ບໍ່​ຖືກ­ຕ້ອງ ສົ່ງ­ເສີມ​ວຽກ​ເຮັດ​ງານ​ທຳ​ຢູ່​ພາຍ​ໃນ​ປະ­ເທດ ແລະ ເປັນ​ສ່ວນ​ໜຶ່ງ​ທີ່​ປະ­ກອບ­ສ່ວນ​ໃຫ້​ບັນ­ລຸ​ຕົວ​ເລກ​ຄາດ­ໝາຍ​ປີ 2019 ວ່າ​ດ້ວຍ​ການ​ພັດ­ທະ­ນາ​ສີ­ມື​ແຮງ​ງານ​ໃຫ້​ໄດ້ 15.000 ຄົນ ຈັດ​ຫາ​ງານ​ໃນ ນວ ໃຫ້​ໄດ້ 9.000 ຄົນ ເຊິ່ງ​ສາ­ມາດ​ຄວບ​ຄຸມ​ອັດ­ຕາ​ວ່າງ​ງານ​ໃຫ້​ຢູ່​ລະ­ດັບ 2% ຕໍ່​ປີ.

    ງານ​ຕະ­ຫຼາດ­ນັດ​ຄັ້ງ​ນີ້​ມີ 300 ຫ້ອງ​ວາງ­ສະ­ແດງ ໃນ​ນີ້ ຫ້ອງ​ວາງ­ສະ­ແດງ​ຮັບ​ສະ­ໝັກ​ງານ 49 ຫ້ອງ ຫ້ອງ​ວາງ­ສະ­ແດງ ແລະ ໂຄ­ສະ­ນາ​ສິນ­ຄ້າ 31 ຫ້ອງ ຫ້ອງ​ຂາຍ​ສິນ­ຄ້າ​ເຄື່ອງ​ອຸ­ປະ­ໂພກ-ບໍ­ລິ­ໂພກ 220 ຫ້ອງ ປັດ­ຈຸ­ບັນ​ມີ​ຕຳ­ແໜ່ງ​ງານ​ວ່າງ 5.200 ຕຳ­ແໜ່ງ ຄາດ​ວ່າ​ຈະ​ມີ​ນັກ­ຮຽນ-ນັກ​ສຶກ​ສາ ຜູ້​ຊອກ​ວຽກ​ເຮັດ​ງານ​ທຳ ຜູ້​ຕ້ອງ­ການ​ປ່ຽນ​ວຽກ​ໃໝ່​ຫຼາຍ​ກວ່າ 3.000 ຄົນ ມວນ​ຊົນ​ທົ່ວ​ໄປ​ເຂົ້າ​ຮ່ວມ​ຫຼາຍ​ກວ່າ 5.000 ຄົນ ແລະ ຄາດ​ວ່າ​ຜູ້​ຊອກ​ວຽກ​ເຮັດ​ງານ​ທຳ​ຈະ​ຖືກ​ຄັດ​ເລືອກ​ບັນ­ຈຸ​ເຂົ້າ​ໃນ​ຕຳ­ແໜ່ງ​ງານ​ວ່າງ 1.500 ຄົນ ພາຍ​ໃນ​ງານ​ຍັງ​ມີ​ກິດ­ຈະ­ກຳ​ສຳ­ຄັນ ເປັນ­ຕົ້ນ ການ​ໃຫ້​ຂໍ້​ມູນ​ຂ່າວ­ສານ​ຕະ­ຫຼາດ​ແຮງ​ງານ ຂໍ້​ມູນ​ກ່ຽວ​ການ​ເຝິກ​ອົບ ຮົມ​ວິ­ຊາ​ຊີບ ການ​ແນະ­ນຳ​ສາຍ​ການ​ຮຽນ ການ​ເຜີຍ­ແຜ່​ເວບ​ໄຊ ການ​ບໍ­ລິ­ການ​ຈັດ​ຫາ​ງານ​ສາ­ທາ­ລະ­ນະ​ຊົນ ກົດ­ໝາຍ​ແຮງ​ງານ ການ​ສາ­ທິດ​ການ​ເຮັດ​ຕົວ​ຈິງ​ຂອງ​ບາງ​ວິ­ຊາ​ຊີບ ແລະ ກິດ­ຈະ­ກຳ​ອື່ນໆ​ອີກ.

ຂ່າວທີ່ກ່ຽວຂ້ອງ