ກຸ່ມໄຊຍະວົງ ໄດ້ຮັບ 2 ລາງວັນທຸລະກິດດີເດັ່ນອາຊຽນ

1.311 18 ຕ.ລ. 2019 ຂ່າວໜ້າ​ໜຶ່ງ
ກຸ່ມໄຊຍະວົງ ໄດ້ຮັບ 2 ລາງວັນທຸລະກິດດີເດັ່ນອາຊຽນ

    ບໍ­ລິ­ສັດ​ກຸ່ມ​ໄຊ​ຍະ​ວົງ ແລະ ໂຮງ­ງານ​ອຸດ­ສາ­ຫະ­ກຳ​ໂຕ​ໂຢ​ລາວ​ຈຳ­ກັດ​ຜູ້​ດຽວ ເປັນ​ບໍ­ລິ­ສັດ​ສະ­ໜອງ​ດ້ານ​ລະ­ບົບ​ທໍ່​ນ້ຳ ແລະ ອຸ­ປະ­ກອນ​ຄົບ​ວົງ​ຈອນ ເຊິ່ງ​ໃນ​ເດືອນ​ສິງ­ຫາ ຜ່ານ​ມາ ບໍ­ລິ­ສັດ​ໄດ້​ສະ­ໝັກ​ເຂົ້າ​ຊີງ​ລາ­ງວັນ​ທຸ­ລະ​ກິດ​ດີ­ເດັ່ນ​ອາ​ຊຽນ ແຫ່ງ ສປປ ລາວ ໃນ​ນີ້ ໄດ້​ຮັບ​ລາ­ງວັນ​ທຸ­ລະ​ກິດ​ດີ­ເດັ່ນ​ອາ​ຊຽນ​ແຫ່ງ ສປປ ລາວ ມີ 16 ຫົວ­ໜ່ວຍ 18 ລາ­ງວັນ ເຊິ່ງ​ກຸ່ມ​ໄຊ​ຍະ​ວົງ ຊະ­ນະ​ເລີດ 2 ລາ­ງວັນ ຄື: ປະ­ເພດ​ບຸ­ລິ­ມະ­ສິດ​ເຊື່ອມ​ໂຍງ​ຂະ­ແໜງ­ການ​ດີ­ເດັ່ນ ລາ­ງວັນ​ຂະ­ແໜງ­ການ​ຄ້າ­ຂາຍ​ຍົກ-ຂາຍ­ຍ່ອຍ​ດີ­ເດັ່ນ ສ່ວນ​ໂຮງ­ງານ​ອຸດ­ສາ­ຫະ­ກຳ​ໂຕ​ໂຢ​ລາວ​ຈຳ­ກັດ​ຜູ້​ດຽວ ໄດ້​ຮັບ​ລາ­ງວັນ​ພິ­ເສດ​ເພີ່ມ​ມາ​ໃໝ່ ລາ­ງວັນ​ທຸ­ລະ​ກິດ​ລິ​ເລີ່ມ ແລະ ຊຸກ­ຍູ້​ນະ​ວັດ­ຕະ​ກຳ​ດີ­ເດັ່ນ ໂດຍ​ໄດ້​ຈັດ​ພິ­ທີ​ມອບ-ຮັບ ວັນ​ທີ 4 ຕຸ­ລາ ຜ່ານ​ມາ.

    ທ່ານ ລັງ​ກອນ ໄຊ​ຍະ​ວົງ ປະ­ທານ​ໂຮງ­ງານ​ອຸດ­ສາ­ຫະ­ກຳ​ໂຕ​ໂຢ​ລາວ​ຈຳ­ກັດ​ຜູ້​ດຽວ​ໃຫ້​ສຳ­ພາດ​ວ່າ: ບໍ­ລິ­ສັດ​ກຸ່ມ​ໄຊ​ຍະ​ວົງ​ຈຳ­ກັດ​ຜູ້​ດຽວ ເປັນ​ບໍ­ລິ­ສັດ​ແມ່​ທີ່​ໄດ້​ຮັບ​ປະ­ເພດ​ລາ­ງວັນ​ບຸ­ລິ­ມະ­ສິດ​ຂະ­ແໜງ­ການ​ຂາຍ­ຍົກ-ຂາຍ­ຍ່ອຍ​ດີ­ເດັ່ນ ແລະ ໂຮງ­ງານ​ອຸດ­ສາ­ຫະ­ກຳ​ໂຕ​ໂຢ​ລາວ​ຈຳ­ກັດ​ຜູ້​ດຽວ ທີ່​ນອນ​ຢູ່​ໃນ​ເຄືອ​ຂອງ​ບໍ­ລິ­ສັດ​ດັ່ງ­ກ່າວ ໄດ້​ຮັບ​ປະ­ເພດ​ລາ­ງວັນ​ທຸ­ລະ​ກິດ​ລິ​ເລີ່ມ ແລະ ຊຸກ­ຍູ້​ນະ​ວັດ­ຕະ​ກຳ​ດີ­ເດັ່ນ ເຊິ່ງ 2 ລາ­ງວັນ​ທີ່​ໄດ້​ມາ ແມ່ນ​ຍ້ອນ​ການ​ທຸ້ມ​ເຫື່ອ​ເທ​ແຮງ​ຂອງ​ຕົນ ຄອບ­ຄົວ ຕະ­ຫຼອດ​ຮອດ​ພະ ນັກ​ງານ​ພາຍ​ໃນ​ບໍ­ລິ­ສັດ ລາ­ງວັນ​ດັ່ງ­ກ່າວ​ໄດ້​ຢັ້ງ­ຢືນ​ເຖິງ​ຄວາມ​ມຸ່ງ​ໝັ້ນ ແລະ ຄວາມ​ຕັ້ງ­ໃຈ ເປັນ​ໂຕ​ຊີ້​ວັດ​ການ​ພັດ­ທະ­ນາ​ຂອງ​ບໍ­ລິ­ສັດ ຄື ຜະ­ລິດ​ຕະ​ພັນ​ທໍ່​ໂຕ​ໂຢ​ລາວ ບໍ່​ພຽງ​ແຕ່​ໄດ້​ຮັບ​ຄວາມ​ເຊື່ອ​ໝັ້ນ​ຈາກ​ສັງ­ຄົມ​ລາວ ຍັງ​ເປັນ​ຂັ້ນ­ໄດ​ໃຫ້​ກ້າວ​ຂຶ້ນ​ໄປ​ສູ່​ເວ­ທີ​ອາ​ຊຽນ ແລະ ສາ­ກົນ ສ້າງ​ໂອ­ກາດ​ໃຫ້​ມີ​ການ​ສົ່ງ​ສິນ­ຄ້າ​ໄປ​ຂາຍ​ປະ­ເທດ​ອ້ອມ​ຂ້າງ ຫຼື ປະ­ເທດ​ອື່ນໆ​ໃນ​ໂລກ.

ຂ່າວທີ່ກ່ຽວຂ້ອງ