ຈະມີລາຍຮັບຈາກໂຄງການໄຟຟ້າ ພະລັງຄວາມຮ້ອນຫົງສາ 18.348 ຕື້ກວ່າກີບ

1.297 18 ຕ.ລ. 2019 ຂ່າວໜ້າ​ໜຶ່ງ
ຈະມີລາຍຮັບຈາກໂຄງການໄຟຟ້າ ພະລັງຄວາມຮ້ອນຫົງສາ 18.348 ຕື້ກວ່າກີບ

    ໂຄງ­ການ​ໄຟ­ຟ້າ​ພະ­ລັງ​ຄວາມ​ຮ້ອນ​ຫົງ​ສາ ເມືອງ​ຫົງ​ສາ ແຂວງ​ໄຊ​ຍະ​ບູ​ລີ ໄດ້​ລົງ​ນາມ​ສຳ​ປະ­ທານ ວັນ​ທີ 30 ພະ­ຈິກ 2009 ແລະ ໄຂ​ນຳ​ໃຊ້​ເປັນ​ທາງ​ການ (COD) ໜ່ວຍ​ທີ 1 ເດືອນ​ມິ­ຖຸ­ນາ 2015 ໜ່ວຍ​ທີ 2 ເດືອນ​ພະ­ຈິກ 2016 ໜ່ວຍ​ທີ 3 ເດືອນ​ມີ­ນາ 2018 ໂດຍ​ໄລ­ຍະ​ສຳ​ປະ­ທານ 25 ປີ (2016-2041) ມູນ​ຄ່າ 3.710 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 32.736,49 ຕື້.

    ອີງ​ຕາມ​ຂໍ້​ມູນ​ຈາກ​ການ​ລາຍ​ງານ​ໃນ​ກອງ​ປະ­ຊຸມ​ຄະ­ນະ​ກຳ­ມະ­ການ​ຊີ້​ນຳ​ຮ່ວມ​ໂຄງ­ການ​ໄຟ­ຟ້າ​ພະ ລັງ​ຄວາມ​ຮ້ອນ​ຫົງ​ສາ ຄັ້ງ​ທີ XI ໃນ​ວັນ​ທີ 8 ຕຸ­ລາ ຜ່ານ​ມາ ຢູ່​ແຂວງ​ໄຊ​ຍະ​ບູ​ລີ ໃຫ້​ຮູ້​ວ່າ: ໃນ​ໄລ­ຍະ​ການ​ສຳ​ປະ­ທານ​ໂຄງ­ການ​ນີ້ ຄາດ​ວ່າ​ລັດ­ຖະ­ບານ​ລາວ ຈະ​ມີ​ລາຍ​ຮັບ​ປະ­ມານ 2.079 ລ້ານ​ໂດ​ລາ​ສະ ຫະ​ລັດ ຫຼື ປະ­ມານ 18.348 ຕື້​ກີບ ໃນ​ນີ້ ຈາກ​ໂຮງ­ງານ​ໄຟ­ຟ້າ​ປະ­ມານ 1.360 ລ້ານ​ໂດ​ລາ​ສະ­ຫະ­ລັດ (ຄ່າ​ພາກ​ຫຼວງ 269 ລ້ານ​ໂດ​ລາ​ສະ­ຫະ­ລັດ ອາ­ກອນ​ກຳ­ໄລ 319 ລ້ານ​ໂດ​ລາ​ສະ­ຫະ­ລັດ ແລະ ເງິນ​ປັນ​ຜົນ 773 ລ້ານ​ໂດ​ລາ​ສະ­ຫະ­ລັດ ຈາກ​ບໍ່​ຖ່ານ​ຫີນ​ຈະ​ໄດ້​ປະ­ມານ 719 ລ້ານ​ໂດ​ລາ​ສະ­ຫະ­ລັດ ໃນ​ນີ້ ຈາກ​ລາຍ​ຮັບ​ທາງ​ກົງ​ຄ່າ​ພາກ​ຫຼວງ 212 ລ້ານ​ໂດ​ລາ​ສະ­ຫະ­ລັດ ອາ­ກອນ​ກຳ­ໄລ 127 ລ້ານ​ໂດ​ລາ​ສະ­ຫະ­ລັດ ແລະ ເງິນ​ປັນ​ຜົນ 95 ລ້ານ​ໂດ​ລາ​ສະ­ຫະ­ລັດ ແລະ ລາຍ​ໄດ້​ຈາກ​ການ​ຂາຍ​ຂີ້​ເຖົ່າ​ລອຍ​ປະ­ມານ 200 ລ້ານ​ໂດ​ລາ​ສະ­ຫະ­ລັດ ນອກ​ນີ້ ລັດ­ຖະ­ບານ​ຍັງ​ຈະ​ໄດ້​ຮັບ​ອາ­ກອນ​ເງິນ­ເດືອນ​ຈາກ​ພະ­ນັກ­ງານ ແລະ ກຳ­ມະ­ກອນ ທີ່​ເຮັດ​ວຽກ​ຢູ່​ໂຄງ­ການ ເຊິ່ງ​ມີ​ບໍ່​ຕ່ຳ​ກວ່າ 8.000 ຄົນ ໃນ​ໄລ­ຍະ​ການ​ກໍ່­ສ້າງ ສ່ວນ​ໄລ­ຍະ​ການ​ດຳ­ເນີນ​ງານ​ຈະ​ມີ 2.000-4.000 ຄົນ.

    ໂຄງ­ການ​ນີ້ ເປັນ​ໂຮງ​ຈັກ​ໄຟ­ຟ້າ​ທີ່​ນຳ​ໃຊ້​ຊັບ­ພະ­ຍາ­ກອນ​ທຳ​ມະ​ຊາດ ຄື: ຖ່ານ​ຫີນ ແລະ ຫີນ​ປູນ ມີ​ເນື້ອ­ທີ່​ສຳ​ປະ­ທານ 76,4 ກິ​ໂລ​ຕາ​ແມັດ ມີ​ກຳ­ລັງ​ຕິດ​ຕັ້ງ 1.878 ເມ​ກາ​ວັດ ຜະ­ລິດ​ພະ­ລັງ­ງານ​ໄຟ­ຟ້າ​ສະ­ເລ່ຍ 12.582 ຈີ​ກາ​ວັດ​ໂມງ​ຕໍ່​ປີ ມີ​ປະ­ລິ­ມານ​ຖ່ານ​ຫີນ​ສະ​ສົມ​ຕາມ​ການ​ສຳ​ຫຼວດ 436,9 ລ້ານ​ໂຕນ​ແລະ ຈະ​ຖືກ​ນຳ​ໃຊ້​ໃນ​ການ​ຜະ­ລິດ​ໄຟ­ຟ້າ​ຕາມ​ໄລ­ຍະ​ສັນ­ຍາ​ສຳ​ປະ­ທານ 370 ໂຕນ ສະ­ເລ່ຍ 14,5ໂຕນ​ຕໍ່​ປີ ມີ​ລະ­ບົບ​ສາຍ​ສົ່ງ 500 KV ຍາວ 67 ກິ­ໂລ­ແມັດ 115 KV ຍາວ 115 ກິ­ໂລ­ແມັດ.

ຂ່າວທີ່ກ່ຽວຂ້ອງ