ອາຊຽນ ແລກປ່ຽນວັດທະນະທຳເຊິ່ງກັນ ແລະ ກັນ

1.623 18 ຕ.ລ. 2019 ຂ່າວໜ້າ​ໜຶ່ງ

    ມະ­ຫາ­ວິ­ທະ­ຍາ­ໄລ​ແຫ່ງ​ຊາດ (ມຊ) ເປັນ​ເຈົ້າ­ພາບ​ຈັດ​ງານ​ແລກ­ປ່ຽນ​ວັດ­ທະ­ນະ­ທຳ​ອາ​ຊຽນ ຄັ້ງ​ທີ 17 ແລະ ອາ​ຊຽນ+3 ຄັ້ງ​ທີ 7 ຂຶ້ນ​ວັນ​ທີ 14 ຕຸ­ລາ ຜ່ານ​ມາ ຢູ່ ມຊ ໂດຍ​ມີ​ທ່ານ ສົມ​ສີ ຍໍ​ພັນ​ໄຊ ອະ­ທິ­ການ​ບໍ­ດີ ມຊ ທ່ານ ໂຊ​ທິດ ດິ​ຣາດ​ທິ​ຕິ ປະ­ທານ​ຜູ້​ບໍ­ລິ­ຫານ​ເຄື່ອ​ຄ່າຍ​ມະ­ຫາ­ວິ­ທະ­ຍາ­ໄລ​ອາ​ຊຽນ (AUN) ພ້ອມ​ດ້ວຍ​ຜູ້­ຕາງ­ໜ້າ​ອົງ​ການ­ຈັດ­ຕັ້ງ​ມະ­ຫາ­ຊົນ ແລະ ຄະ­ນະ​ຮັບ­ຜິດ­ຊອບ​ນຳ­ພາ​ຊາວ​ໜຸ່ມ​ນັກ ສຶກ​ສາ​ຈາກ 22 ມະ­ຫາ­ວິ­ທະ­ຍາ­ໄລ​ປະ­ເທດ​ສະ­ມາ­ຊິກ​ອາ​ຊຽນ ເຂົ້າ​ຮ່ວມ.

    ຈຸດ­ປະ­ສົງ ເພື່ອ​ເຜີຍ­ແຜ່ ແລະ ແລກ­ປ່ຽນ​ວັດ­ທະ­ນະ­ທຳ​ຂອງ​ຊາວ​ໜຸ່ມ​ນັກ​ສຶກ​ສາ​ໃນ​ປະ­ເທດ​ສະ­ມາ­ຊິກ​ອາ​ຊຽນ ແລະ ອາ​ຊຽນ+3 (ຈີນ ສ ເກົາ­ຫຼີ ແລະ ຍີ່­ປຸ່ນ) ໂດຍ​ຜ່ານ​ສຽງ​ດົນ­ຕີ ບົດ​ຟ້ອນ ແລະ ການ­ສະ­ແດງ​ສິ­ລະ​ປະ​ຮູບ​ແບບ​ຕ່າງໆ​ທີ່​ເປັນ​ມໍ­ລະ­ດົກ​ທາງ​ວັດ­ທະ­ນະ­ທຳ ແລະ ສື່​ເຖິງ​ເອ­ກະ­ລັກ​ສະ­ເພາະ​ຂອງ​ຊາດ​ຕົນ ເພື່ອ​ໃຫ້​ຊາວ​ໜຸ່ມ​ນັກ​ສຶກ​ສາ​ໄດ້​ເຂົ້າ​ເຖິງ​ຄວາມ​ຫຼວງ­ຫຼາຍ​ທາງ​ວັດ­ທະ­ນະ­ທຳ ເສີມ​ສ້າງ​ຄວາມ​ເຂົ້າ­ໃຈ​ເຊິ່ງ​ກັນ ແລະ​ກັນ ທັງ​ເປັນ​ການ​ເພີ່ມ​ທະ­ວີ​ການ​ຮ່ວມ​ມື ລະ­ຫວ່າງ​ຊາວ​ໝຸ່ມ​ດ້ວຍ​ກັນ​ໃນ​ການ​ສົ່ງ­ເສີມ-ແລກ­ປ່ຽນ ແລະ ຮັບ​ຮູ້​ວັດ­ທະ­ນະ­ທຳ​ຂອງ​ກັນ ແລະ ກັນ.

    ງານ​ຄັ້ງ​ນີ້​ດຳ­ເນີນ​ແຕ່​ວັນ​ທີ 13-18 ຕຸ­ລາ 2019 ເຊິ່ງ​ໄດ້​ຮັບ​ຊົມ​ການ­ສະ­ແດງ​ສິ­ລະ​ປະ​ຂອງ​ແຕ່​ລະ​ປະ­ເທດ ຮັບ​ຟັງ​ການ​ບັນ­ຍາຍ​ພິ­ເສດ​ຫົວ­ຂໍ້ “ສະ­ເໜ​ຂອງ​ປະ­ຫວັດ­ສາດ ແລະ ວັດ­ທະ­ນະ­ທຳ​ລາວ” ສຳ​ມະ​ນາ​ກ່ຽວ​ກັບ​ສິ­ລະ​ປະ​ການ­ສະ­ແດງ​ຂອງ​ລາວ​ຫົວ­ຂໍ້ “ເຕັ້ນ​ບັດ​ສະ­ຫຼົບ ຟ້ອນ​ລາວ​ເດີມ” “ສິ­ລະ​ປະ​ດົນ­ຕີ​ລາວ” “ວັດ­ທະ­ນະ­ທຳ​ການ​ຂັບ​ລຳ” ຈັດ​ກອງ​ປະ­ຊຸມ​ປຶກ­ສາ​ຫາ­ລື​ກ່ຽວ​ກັບ​ເຄືອ​ຄ່າຍ​ມະ­ຫາ­ວິ­ທະ­ຍາ­ໄລ​ອາ ຊຽນ-ສິ­ລະ​ປະ ແລະ ວັດ­ທະ­ນະ­ທຳ ສຳ​ມະ​ນາ​ວິ­ຊາ​ການ​ດ້ານ​ສິ­ລະ​ປະ-ວັດ­ທະ­ນະ­ທຳ ສຳ​ມະ​ນາ​ແລກ ປ່ຽນ​ຄຳ​ຄິດ​ເຫັນ​ຕໍ່​ການ­ສະ­ແດງ​ສິ­ລະ​ປະ​ແບບ​ລວມ​ໝູ່​ຂອງ​ນັກ​ສຶກ​ສາ ນອກ​ນີ້ ຍັງ​ໄປ​ທັດ­ສະ­ນະ​ສຶກ​ສາ​ຢູ່ ພະ​ທາດ­ຫຼວງ​ວຽງ​ຈັນ ປະ­ຕູ​ໄຊ ຫໍ­ພະ­ແກ້ວ ແລະ ວັດ​ສີ­ສະ​ເກດ.

ຂ່າວທີ່ກ່ຽວຂ້ອງ