ຮັບຮອງປຶ້ມແບບຮຽນ ແລະ ຄູ່ມືຄູຂັ້ນ ປ2 ສະບັບປັບປຸງໃໝ່

1.511 18 ຕ.ລ. 2019 ຂ່າວໜ້າ​ໜຶ່ງ

    ກອງ​ປະ­ຊຸມ​ຮັບ­ຮອງ​ສື່​ການ​ຮຽນ-ການ​ສອນ​ສຳ­ລັບ​ຂັ້ນ ປ2 ສະ​ປັບ­ປຸງ​ໃໝ່ ຈັດ​ຂຶ້ນ​ວັນ​ທີ 16-18 ຕຸ­ລາ 2019 ຢູ່​ໂຮງ­ແຮມ​ນິວ​ໂຣ​ສ ໂດຍ​ເປັນ​ປະ­ທານ​ຂອງ​ທ່ານ ພຸດ ສິມ​ມາ­ລາ​ວົງ ຮອງ​ລັດ­ຖະ­ມົນ­ຕີ ກະ­ຊວງ​ສຶກ​ສາ​ທິ​ການ ແລະ ກີ­ລາ (ສສກ) ມີ​ທ່ານ​ນາງ ເຈນ ແຊັນ​ເລີ ຮອງ​ເອກ​ອັກ​ຄະ​ລັດ​ຖະ​ທູດ​ອົດ​ສະ​ຕຣາ​ລີ ປະ­ຈຳ​ລາວ ພ້ອມ​ດ້ວຍ​ຜູ້­ຕາງ­ໜ້າ​ຈາກ​ຫ້ອງ­ການ ກົມ ຮອງ​ກົມ ພະ­ແນກ­ການ ອົງ​ການ­ຈັດ­ຕັ້ງ​ສາ­ກົນ​ຜູ້​ໃຫ້​ທຶນ ຄະ­ນະ​ກຳ­ມະ­ການ​ຮັບ­ຮອງ​ຫຼັກ­ສູດ ແລະ ສື່​ການ​ຮຽນ​ການ​ສອນ (ກາ​ຊິມ) ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ທ່ານ​ນາງ ເຈນ ແຊັນ​ເລີ ກ່າວ​ວ່າ: ສະ­ຖານ­ທູດ​ອົດ​ສະ​ຕຣາ​ລີ ພ້ອມ​ດ້ວຍ​ທຶນ​ສົມ­ທົບ​ຈາກ​ສະ­ຫະ­ພາບ​ເອີ​ຣົບ​ແລະ ລັດ­ຖະ­ບານ ສ ອາ​ເມ​ຣິ​ກາ ໄດ້​ສະ­ໜັບ­ສະ­ໜູນ​ກະ­ຊວງ ສສກ ຈັດ​ຕັ້ງ​ປະ­ຕິ­ບັດ​ຫຼັກ­ສູດ​ຊັ້ນ​ປະ­ຖົມ ສະ­ບັບ​ປັບ­ປຸງ​ໃໝ່ ແລະ ສະ­ໜັບ­ສະ­ໜູນ​ສື່​ການ​ຮຽນ ໂດຍ​ຜ່ານ​ແຜນ​ງານ​ບີ​ຄວາ ເປັນ​ສື່​ການ​ຮຽນ-ການ​ສອນ​ໃໝ່​ອີກ​ຂັ້ນ​ໜຶ່ງ ກຳ­ລັງ​ຈະ​ສຳ­ເລັດ ແລະ ນຳ​ໃຊ້​ທົ່ວ​ປະ­ເທດ ເພື່ອ​ຕອບ​ສະ­ໜອງ​ຕໍ່​ການ​ປ່ຽນ­ແປງ​ຢ່າງ​ໄວ­ວາ​ຂອງ​ສະ­ຕະ­ວັດ​ທີ 21 ແລະ ຈະ​ຊ່ວຍ​ປັບ­ປຸງ​ຜົນ​ການ​ຮຽນ​ຂອງ​ນັກ­ຮຽນ​ລາວ ເພື່ອ​ໃຫ້​ສາ­ມາດ​ແຂ່ງ­ຂັນ​ໄດ້​ໃນ​ພາກ​ພື້ນ​ອາ​ຊຽນ.

    ທ່ານ ພຸດ ສິມ​ມາ­ລາ​ວົງ ກ່າວ​ວ່າ: ສື່​ການ​ຮຽນ​ການ​ສອນ​ສະ­ບັບ​ປັບ­ປຸງ​ໃໝ່​ນີ້ ໄດ້​ທົດ​ລອງ​ນຳ​ໃຊ້​ຢູ່​ໂຮງ­ຮຽນ​ທົດ​ລອງ​ໃນ​ປະ­ເທດ ແລະ ໄດ້​ປັບ­ປຸງ​ຄືນ​ຕາມ​ຄຳ​ເຫັນ​ຈາກ​ການ​ທົດ​ລອງ ຈຶ່ງ​ເປີດ​ກອງ​ປະ­ຊຸມ​ປຶກ­ສາ​ຫາ­ລື​ນີ້​ຂຶ້ນ ເພື່ອ​ຮັບ­ຮອງ​ເອົາ ໂດຍ​ມີ​ຫົວ­ໜ້າ​ຄະ­ນະ​ກຳ­ມະ­ການ​ທີ່​ຂຽນ​ຫຼັກ­ສູດ​ຈາກ​ສະ​ຖາ​ບັນ​ຄົ້ນ­ຄວ້າ​ວິ­ທະ­ຍາ­ສາດ​ການ​ສຶກ​ສາ (ສວ​ສ) ຈະ​ນຳ​ສະ­ເໜີ​ວິ­ຊາ​ໃຫ້​ຄະ­ນະ​ກຳ­ມະ­ການ​ຄົ້ນ­ຄວ້າ​ພິ­ຈາ­ລະ­ນາ​ຮັບ­ຮອງ​ຂັ້ນ​ຕອນ​ສຸດ​ທ້າຍ ພາຍ­ຫຼັງ​ສຳ­ເລັດ ນັກ­ຮຽນ​ຂັ້ນ ປ2 ຈະ​ໄດ້​ຮັບ​ຊຸດ​ປຶ້ມ​ແບບ­ຮຽນ ສະ­ບັບ​ປັບ­ປຸງ​ໃໝ່ ເຊັ່ນ: ວິ­ຊາ​ພາ­ສາ​ລາວ ວິ­ທະ­ຍາ­ສາດ ແລະ ສິ່ງ­ແວ­ດລ້ອມ ວິ­ຊາ​ຄຸນ­ສົມ­ບັດ ປຶ້ມ​ແບບ­ຮຽນ​ສະ­ບັບ​ປັບ­ປຸງ​ໃໝ່​ມີ​ສີ­ສັນ ແລະ ຮູບ​ພາບ​ປະ­ຈັກ​ຕາ ເພື່ອ​ຄວາມ​ເຂົ້າ­ໃຈ ເພີ່ມ​ຄວາມ​ສົນ­ໃຈ ຊ່ວຍ​ໃນ​ການ​ຈື່​ຈຳ​ຂອງ​ນັກ­ຮຽນ ພ້ອມ​ນີ້ ຄູ​ສອນ​ກໍ​ຈະ​ໄດ້​ຮັບ​ຊຸດ​ປຶ້ມ​ແບບ­ຮຽນ ແລະ ຄູ່​ມື​ຄູ ສະ­ບັບ​ປັບ­ປຸງ​ໃໝ່​ເຊັ່ນ​ກັນ ໂດຍ​ມີ​ວິ­ຊາ​ພາ­ສາ​ລາວ ວິ­ທະ­ຍາ­ສາດ ແລະ ສິ່ງ­ແວ­ດລ້ອມ ວິ­ຊາ​ຄຸນ­ສົມ­ບັດ ວິ­ຊາ​ຫັດ­ຖະ­ກຳ ແລະ ສິ­ລະ​ປະ­ກຳ ວິ­ຊາ​ພາ­ລະ​ສຶກ​ສາ ແລະ ດົນ­ຕີ ປຶ້ມ​ຄູ່​ມື​ຄູ​ສະ­ບັບ​ປັບ­ປຸງ​ໃໝ່​ຈະ​ມີ​ລາຍ​ລະ­ອຽດ​ຫຼາຍ​ກວ່າ ວິ­ທີ​ການ​ນຳ​ໃຊ້​ສິ່ງ​ທີ່​ມີ​ຢູ່​ໃນ​ທ້ອງ­ຖິ່ນ ໃນ​ການ​ຈັດ​ກິດ­ຈະ­ກຳ​ສຳ­ລັບ​ນັກ­ຮຽນ ໃນ​ຄູ່​ມື​ຍັງ​ປະ­ກອບ​ມີ​ຍຸດ​ທະ​ສາດ ແລະ ກິດ­ຈະ­ກຳ​ຕ່າງໆ ທີ່​ສະ­ໜັບ­ສະ­ໜູນ​ຄູ​ໃນ​ການ​ສອນ​ນັກ­ຮຽນ​ທີ່​ບໍ່​ເວົ້າ​ພາ­ສາ​ລາວ ເປັນ​ພາ­ສາ​ທຳ​ອິດ ແລະ ຄຳ​ແນະ­ນຳ​ວິ­ທີ​ການ​ນຳ​ໃຊ້​ສື່​ການ​ຮຽນ-ການ​ສອນ​ສຳ­ລັບ​ຫ້ອງ​ຮຽນ​ຮ່ວມ​ດ້ວຍ.

ຂ່າວທີ່ກ່ຽວຂ້ອງ