ຂ່າວຫຼ້າສຸດ

ສັດລ້ຽງ ແລະ ສິ່ງກີດຂວາງ

4.853 18 ຕ.ລ. 2019 ນານາສາລະ

    ຫາກ​ເວົ້າ​ເຖິງ​ສັດ­ລ້ຽງ ແລະ ສິ່ງ​ກີດ­ຂວາງ​ຕາມ​ຖະ­ໜົນ ທ່ານ​ຜູ້​ອ່ານ​ອາດ​ຄິດ​ໄດ້​ທັນ­ທີ​ວ່າ: ສັດ­ລ້ຽງ ຄື ໝູ ໝາ ຄວາຍ ງົວ ແລະ​ອື່ນໆ ຍ່ອມ​ສ້າງ​ບັນ­ຫາ ແລະ ອຸ­ປະ­ສັກ​ໃຫ້​ແກ່​ຜູ້​ສັນ­ຈອນ​ໄປ​ມາ​ຕາມ​ຖະ­ໜົນ​ໄດ້ ເຊິ່ງ​ມີ​ທັງ​ຢູ່​ໃນ​ເມືອງ ແລະ ທ້ອງ­ຖິ່ນ​ຕ່າງ​ແຂວງ ເຊິ່ງ​ໃນ​ອະ­ດີດ​ກໍ​ມີ​ກໍ­ລະ­ນີ​ຫຼາຍ​ອັນ​ເກີດ​ຂຶ້ນ ເຊັ່ນ: ລົດ​ຕຳ​ຄວາຍ​ຕາຍ ທີ່​ຢືນ​ຂວາງ​ທາງ ຫຼື ງົວ​ຄວາຍ ທີ່​ນອນ​ຕາມ​ແຄມ​ທາງ ເຊິ່ງ​ຄູ່​ກໍ­ລະ­ນີ​ຕ້ອງ​ໄດ້​ເຈລະ­ຈາ​ກັນ ຕາມ​ເຫດ­ຜົນ​ທີ່​ເໝາະ​ສົມ ເພາະ​ບາງ​ກໍ­ລະ­ນີ​ກໍ​ບໍ່​ແມ່ນ​ຈະ​ອີງ­ໃສ່​ກົດ­ໝາຍ​ທັນ­ທີ​ໂລດ​ວ່າ ເຈົ້າ​ຂອງ​ສັດ­ລ້ຽງ​ຜິດ ຈະ​ຕ້ອງ​ຈ່າຍ...

    ຍົກ​ຕົວ­ຢ່າງ: ມີ​ຄົນ­ຮູ້​ຈັກ​ກັນ​ເລົ່າ​ສູ່​ຜູ້​ຂຽນ​ຟັງ​ວ່າ ມີ​ບໍ­ລິ­ສັດ​ຕ່າງ­ປະ­ເທດ​ແຫ່ງ​ໜຶ່ງ​ເຮັດ​ທຸ­ລະ​ກິດ​ຢູ່​ຕ່າງ​ແຂວງ ມື້­ໜຶ່ງ​ພະ­ນັກ­ງານ​ຂອງ​ບໍ­ລິ­ສັດ​ໄດ້​ຂັບ​ລົດ​ຕຳ​ຄວາຍ​ຂອງ​ພໍ່​ຕູ້​ໜຶ່ງ 3 ໂຕ​ຕາຍ­ຄາ​ທີ່ ເຊິ່ງ​ເມື່ອ​ເວົ້າ​ຄວາມ​ກັນ ພະ­ນັກ­ງານ​ບາງ​ຄົນ​ກໍ​ຢືນ​ກະ­ຕ່າຍ​ຂາ​ດຽວ​ວ່າ ເຈົ້າ​ຂອງ​ຄວາຍ​ຕ້ອງ​ຈ່າຍ ແຕ່​ໃນ​ຄວາມ​ເປັນ​ຈິງ ພໍ່​ຕູ້​ຄົນ​ນັ້ນ​ກໍ​ມີ​ແຕ່​ຄວາຍ 3 ໂຕ ທີ່​ເປັນ​ຊັບ​ສິນ​ໄວ້​ເຮັດ​ນາ​ທຸກ​ປີ ເຫດ­ການ​ແບບ​ນີ້ ສຸດ​ທ້າຍ​ບໍ­ລິ­ສັດ​ເລີຍ​ເສຍ​ຄ່າ​ຊົດ​ເຊີຍ​ໃຫ້​ພໍ່​ຕູ້​ຈຳ­ນວນ​ໜຶ່ງ ນີ້​ກໍ​ແມ່ນ​ທາງ​ອອກ​ທີ່​ດີ​ຂອງ​ສັງ­ຄົມ​ລາວ​ທີ່­ຢູ່​ຮ່ວມ​ກັນ ໂດຍ​ບໍ່​ແມ່ນ​ເອົາ​ກົດ­ໝາຍ​ເປັນ​ທາງ​ອອກ​ສຸດ​ທ້າຍ​ທຸກ​ກໍ­ລະ­ນີ.

    ສັດ­ລ້ຽງ​ອີກ​ປະ­ເພດ​ໜຶ່ງ​ທີ່​ສ້າງ​ຄວາມ​ເສຍ​ຫາຍ ໂດຍ​ກົງ​ແກ່​ຄົນ​ເຮົາ ກໍ​ຄື ແມວ​ບາງ​ຄົນ​ບອກ​ວ່າ​ລ້ຽງ​ໝາ​ໄວ້​ເຫົ່າ​ໂຈນ​ເຝົ້າ​ບ້ານ​ນັ້ນ​ກໍ​ດີ ແຕ່​ຖ້າ­ວ່າ​ຜູ້­ກ່ຽວ​ບໍ່​ຜູກ​ມັດ​ໃຫ້​ດີ ປ່ອຍ​ອອກ​ມາ​ໄລ່​ຂົບ​ຊາວ­ບ້ານ ຂີ່​ລົດ​ຕົກ​ຂຸມ ຕຳ​ເສົາ​ໄຟ...ດ້ວຍ​ຄວາມ​ຢ້ານ​ກົວ​ແບບ​ນີ້ ທ່ານ​ຜູ້​ອ່ານ​ລອງ​ຄິດ​ພິ­ຈາ­ລະ­ນາ​ເບິ່ງ ເຊິ່ງ​ພໍ​ຈະ​ເກີດ​ຄຳ​ຖາມ​ໄດ້​ວ່າ​ຊີ­ວິດ​ນີ້ ໃຜ​ແນ່​ຢາກ​ຖືກ​ໝາ​ຮ້າຍ​ໄລ່​ຂົບ ຫຼື ວ່າ​ລູກ​ຫຼານ​ຖືກ​ໝາ​ຂົບ ເຊິ່ງ​ຄົນ​ລ້ຽງ ຄວນ​ຮູ້​ລະ­ບຽບ ແລະ ຮັບ­ຜິດ­ຊອບ​ສູງ ແລະ ບໍ່​ຫຼົງ ອ້າງ​ວ່າ​ຕົນ​ມີ​ເງິນ​ແລ້ວ​ຈ່າຍ​ກະ​ຈົບ​ໄປ...?

    ກົດ­ໝາຍ​ວ່າ​ດ້ວຍ​ການ​ຈະ­ລາ­ຈອນ​ທາງ­ບົກ ມາດ­ຕາ 11 ໄດ້​ບອກ​ວ່າ: ບໍ່​ອະ­ນຸ­ຍາດ​ໃຫ້​ລ້ຽງ ແລະ ປ່ອຍ​ສັດ​ທຸກ​ຊະ­ນິດ​ຕາມ​ເສັ້ນ­ທາງ​ຫຼວງ ໃນ​ກໍ­ລະ­ນີ​ເກີດ​ອຸ­ບັດ­ເຫດ​ຍ້ອນ​ສັດ­ລ້ຽງ ເຈົ້າ​ຂອງ ຫຼື ຜູ້​ຄອບ​ຄອງ​ສັດ​ຕ້ອງ​ຮັບ­ຜິດ­ຊອບ​ຕໍ່​ຄວາມ​ເສຍ​ຫາຍ ແລະ ຢູ່​ບ່ອນ​ທີ່​ມີ​ການ​ລ້ຽງ­ສັດ ຫຼື ເຄື່ອນ​ຍ້າຍ​ສັດ ຕ້ອງ​ມີ​ປ້າຍ​ເຕືອນ​ໃຫ້​ລະ­ວັງ​ສັດ ເພື່ອ​ໃຫ້​ຜູ້​ຂັບ​ຂີ່​ລະ­ວັງ​ເກີດ​ອຸ­ບັດ­ເຫດ.

    ເຫດ​ນັ້ນ ບັນ­ດາ​ສັດ­ລ້ຽງ​ຕ່າງໆ​ທີ່​ບາງ​ຄົນ​ເປັນ​ເຈົ້າ​ຂອງ ຫຼື ບາງ​ຄົນ​ມັກ​ລ້ຽງ​ໄວ້​ໃນ​ບ້ານ​ເຮືອນ​ບໍ່​ຄວນ​ຖື​ເບົາ ໂດຍ​ສະ­ເພາະ ໝາ​ທີ່​ບໍ່​ມີ​ໃຜ​ດອກ​ຢາກ​ຖືກ​ໝາ​ຂົບ.

ຂ່າວທີ່ກ່ຽວຂ້ອງ