ຫົງສາ ຈັດການແຂ່ງຂັນໄຫຼເຮືອໄຟ ໂອກາດບຸນອອກພັນສາ

1.595 18 ຕ.ລ. 2019 ວົງຈອນກີລາ
ຫົງສາ ຈັດການແຂ່ງຂັນໄຫຼເຮືອໄຟ ໂອກາດບຸນອອກພັນສາ

    ການ​ແຂ່ງ­ຂັນ​ໄຫຼ­ເຮືອ­ໄຟ ແລະ ບັ້ງ­ໄຟ­ດອກ ໂອ­ກາດ​ວັນ​ບຸນ​ອອກ​ພັນ​ສາ​ປະ​ວໍ­ລະ­ນາ ປະ­ຈຳ​ປີ ພສ 2562 ຈັດ​ຂຶ້ນ​ວັນ​ທີ 13 ຕຸ­ລາ​ຜ່ານ​ມາ ຢູ່​ຜາມ­ໄຊ​ທ່າ­ເຮືອ​ເມືອງ​ຫົງ​ສາ ແຂວງ​ໄຊ​ຍະ​ບູ​ລີ ໂດຍ​ມີ​ທ່ານ ຄຳ​ຫຼ້າ ຜິວ​ວັນ­ນາ ວ່າ­ການ​ເຈົ້າ­ເມືອງ​ຫົງ​ສາ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ທ່ານ ຄຳ​ຫຼ້າ ຜິວ​ວັນ­ນາ ກ່າວ​ວ່າ: ເພື່ອ​ເປັນ​ການ​ອະ­ນຸ​ຮັກ​ປົກ​ປັກ​ຮັກ­ສາ ວັດ­ທະ­ນະ­ທຳ ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ ເວົ້າ​ສະ­ເພາະ ເມືອງ​ຫົງ​ສາ ທີ່​ເຄີຍ​ປະ­ຕິ­ບັດ​ສືບ​ທອດ​ກັນ​ມາ​ທຸກໆ​ປີ ເຊິ່ງ​ເປັນ​ງານ​ບຸນ​ໜຶ່ງ​ຂອງ​ເມືອງ​ທີ່​ເກີດ​ຈາກ​ຄວາມ​ສາ­ມັກ­ຄີ​ປອງ​ດອງ ຮ່ວມ​ແຮງ​ຮ່ວມ​ໃຈ​ກັນ​ຂອງ​ທຸກ​ພາກ­ສ່ວນ​ພາຍ​ໃນ​ເມືອງ ທັງ​ຮັກ­ສາ​ໄດ້​ບຸນ​ປະ­ເພ­ນີ​ຮີດ 12 ຄອງ 14 ຂອງ​ຊາດ​ລາວ​ໃຫ້​ຍືນ​ຍົງ ເພື່ອ​ສ້າງ​ບັນ­ຍາ­ກາດ​ເບີກ­ບານ​ມ່ວນ­ຊື່ນ​ໃນ​ວັນ​ບຸນ​ອອກ​ພັນ​ສາ​ປະ​ວໍ­ລະ­ນາ ປະ­ກອບ­ສ່ວນ​ສ້າງ​ຂະ​ບວນ​ການ​ຄຳ­ນັບ​ຮັບ​ຕ້ອນ​ກອງ​ປະ­ຊຸມ​ໃຫຍ່ ຄັ້ງ​ທີ VIII ຂອງ​ອົງ­ຄະ​ນະ​ພັກ​ເມືອງ​ຫົງ​ສາ ທີ່​ຈະ​ໄດ້​ໄຂ​ຂຶ້ນ​ໃນ­ຕໍ່­ໜ້າ​ນີ້.

    ການ​ແຂ່ງ­ຂັນ​ຄັ້ງ​ນີ້ ມີ​ເຮືອ​ໄຟ​ເຂົ້າ​ຮ່ວມ 6 ລຳ ບັ້ງ­ໄຟ­ດອກ 18 ບັ້ງ ຜ່ານ​ການ​ແຂ່ງ­ຂັນ​ເຮືອ​ໄຟ​ງາມ ອັນ​ດັບ 1 ແມ່ນ​ບ້ານ​ສີ​ບຸນ​ເຮືອງ ໄດ້​ເງິນ​ລາ­ງວັນ 800.000 ກີບ ທີ 2 ບ້ານ​ໂພນ​ໄຊ ໄດ້​ຮັບ​ເງິນ​ລາ­ງວັນ 700.000 ກີບ ທີ 3 ບ້ານ​ໂພນ​ສະ­ອາດ ໄດ້​ຮັບ​ເງິນ​ລາ­ງວັນ 600.000 ກີບ ສ່ວນ​ບັ້ງ­ໄຟ­ດອກ​ທີ່​ຈູດ​ຂຶ້ນ​ສູງ ແລະ ສວຍ​ງາມ​ອັນ​ດັບ 1 ບ້ານ​ແທ່ນ​ຄຳ ໄດ້​ຮັບ​ເງິນ​ລາ­ງວັນ 800.000 ກີບ ທີ 2 ບ້ານ​ໂພນ​ຈັນ ໄດ້​ຮັບ​ເງິນ​ລາ­ງວັນ 700.000 ກີບ ທີ 3 ຫ້ອງ​ວ່າ­ການ​ປົກ­ຄອງ​ເມືອງ​ຫົງ​ສາ ໄດ້​ຮັບ​ເງິນ​ລາ­ງວັນ 600.000 ກີບ ນອກ​ນີ້​ຍັງ​ມີ​ການ​ວຽນ­ທຽນ ຈູດ​ທູບ​ທຽນ​ບູ­ຊາ​ເຮືອ​ໄຟ ສະ­ແດງ​ສິ­ລະ​ປະ​ດົນ­ຕີ​ພື້ນ­ເມືອງ ຕື່ມ​ອີກ.

ຂ່າວທີ່ກ່ຽວຂ້ອງ