ລາວ-ໄທ ຫາລືແກ້ໄຂບັນຫາສັນຍານ ແລະ ຄື້ນຄວາມຖີ່ລົບກວນລຽບຊາຍແດນ

1.173 17 ຕ.ລ. 2019 ຂ່າວໜ້າ​ໜຶ່ງ
ລາວ-ໄທ ຫາລືແກ້ໄຂບັນຫາສັນຍານ ແລະ ຄື້ນຄວາມຖີ່ລົບກວນລຽບຊາຍແດນ

    ກະ­ຊວງ​ໄປ­ສະ­ນີ ໂທລະ​ຄົມ­ມະ­ນາ­ຄົມ ແລະ ການ​ສື່­ສານ (ປທສ) ເປັນ​ເຈົ້າ­ພາບ​ຈັດ​ກອງ​ປະ­ຊຸມ​ປະ­ສານ​ງານ​ຄື້ນ​ຄວາມ​ຖີ່​ລຽບ​ຕາມ​ຊາຍ​ແດນ ລະ­ຫວ່າງ ລາວ-ໄທ ຄັ້ງ​ທີ 10 (JTC-10) ຂຶ້ນ​ວັນ​ທີ 16-18 ຕຸ­ລາ 2019 ຢູ່​ໂຮງ­ແຮມ​ເສດ​ຖາ​ປາ​ລາ​ສ ໂດຍ​ເປັນ​ປະ­ທານ​ຂອງ​ທ່ານ ຈະ­ເລີນ ສີ​ບຸນ​ເຮືອງ ຮອງ​ຫົວ­ໜ້າ​ກົມ​ຄື້ນ​ຄວາມ​ຖີ່ ກະ­ຊວງ ປທສ ທ່ານ ພົນ​ອາ­ກາດ​ໂທ ທະ​ນາ​ພັນ ຣ່າຍ​ຈະ​ເຣີນ ຮອງ​ເລ­ຂາ­ທິ­ການ​ຄະ­ນະ​ກຳ­ມະ­ການ​ກິດ­ຈະ­ການ​ກະ­ຈາຍ­ສຽງ ກິດ­ຈະ­ການ​ໂທລະ­ພາບ ກິດ­ຈະ­ການ​ໂທລະ​ຄົມ­ມະ­ນາ­ຄົມ​ແຫ່ງ​ປະ­ເທດ​ໄທ (ກສທຊ) ມີ​ຄະ­ນະ​ຜູ້​ແທນ​ຈາກ​ສອງ​ປະ­ເທດ ຜູ້​ປະ­ກອບ​ການ​ດ້ານ​ໂທລະ​ຄົມ­ມະ­ນາ­ຄົມ ແລະ ພາກ ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ຈຸດ­ປະ­ສົງ ເພື່ອ​ສະ­ຫຼຸບ​ຕີ​ລາ­ຄາ​ຜົນ​ການ­ຈັດ­ຕັ້ງ​ປະ­ຕິ­ບັດ​ຂໍ້​ຕົກ­ລົງ​ໃນ​ກອງ​ປະ­ຊຸມ​ຄັ້ງ​ຜ່ານ​ມາ ເພື່ອ​ປືກ​ສາ​ຫາ­ລື​ວິ­ທີ​ປ້ອງ​ກັນ ແລະ ແກ້​ໄຂ​ບັນ­ຫາ​ສັນ­ຍານ​ຂ້າມ​ແດນ ແລະ ຄື້ນ​ຄວາມ​ຖີ່​ລົບ​ກວນ​ໃນ​ເຂດ​ຊາຍ​ແດນ ທົບ​ທວນ ແລະ ເຈລະ­ຈາ​ການ​ແບ່ງ​ຊ່ອງ​ສັນ­ຍານ ຍົກ​ບັນ­ຫາ ແລະ ປະ­ກົດ​ການ​ຫຍໍ້­ທໍ້​ທີ່​ເກີດ​ຂຶ້ນ​ມາ​ສົນ­ທະ­ນາ ແລກ­ປ່ຽນ​ກ່ຽວ​ກັບ​ການ​ໃຊ້​ຄື້ນ​ຄວາມ​ຖີ່​ລຽບ​ຕາມ​ຊາຍ​ແດນ​ມາ ປຶກ­ສາ​ຫາ­ລື ແລະ ແລກ­ປ່ຽນ​ຂໍ້​ມູນ​ສະ­ພາບ​ການ​ໃໝ່​ໃນ​ວຽກ​ງານ​ວິ­ທະ­ຍຸ​ກະ­ຈາຍ­ສຽງ ໂທລະ­ພາບ ແລະ ວຽກ​ງານ​ໂທລະ​ຄົມ­ມະ­ນາ­ຄົມ ເພື່ອ​ຄຸ້ມ​ຄອງ​ຄື້ນ​ຄວາມ​ຖີ່​ໃນ​ປັດ­ຈຸ­ບັນ ແລະ ແຜນ­ການ​ນຳ​ໃຊ້​ຄື້ນ​ຄວາມ​ຖີ່​ໃນ​ອະ­ນາ­ຄົດ​ໃຫ້​ຖືກ­ຕ້ອງ.

    ນອກ​ນີ້ ຍັງ​ໄດ້​ຮັບ​ຟັງ​ການ​ລາຍ​ງານ​ແຈ້ງ​ສະ­ພາບ​ຂໍ້​ມູນ​ການ​ນຳ​ໃຊ້​ຄື້ນ​ຄວາມ​ຖີ່​ຕາມ​ຊາຍ​ແດນ ແລະ ຕົກ­ລົງ​ສືບ­ຕໍ່​ຮ່ວມ​ກັນ​ວັດ­ແທກ​ສັນ­ຍານ (Joint Drive Test) ເພື່ອ​ໃຫ້​ຖືກ­ຕ້ອງ​ຕາມ​ການ​ຕົກ­ລົງ​ໃນ​ກອງ​ປະ­ຊຸມ ເພື່ອ​ຮ່ວມ​ມື​ກັນ​ແກ້​ໄຂ​ບັນ­ຫາ​ດັ່ງ­ກ່າວ ແລະ ການ​ນຳ​ໃຊ້​ສັນ­ຍານ​ອິນ​ເຕີ​ເນັດ​ຂ້າມ​ແດນ​ໃນ​ບໍ­ລິ­ເວນ​ຊາຍ​ແດນ​ໃຫ້​ຖືກ­ຕ້ອງ​ສອດ­ຄ່ອງ​ຍິ່ງ​ຂຶ້ນ.

ຂ່າວທີ່ກ່ຽວຂ້ອງ