ອິນເດຍ ໃຫ້ທຶນແກ່ລາວຫຼາຍກວ່າ 110 ທຶນ ພາຍໃຕ້ໂຄງການ ITEC ແລະ TCS

1.128 17 ຕ.ລ. 2019 ຂ່າວໜ້າ​ໜຶ່ງ

    ສະ­ຖານ​ເອກ​ອັກ​ຄະ​ລັດ​ຖະ​ທູດ​ອິນ​ເດຍ ປະ­ຈຳ​ລາວ ຈັດ​ງານ​ສະ­ເຫຼີມ­ສະ­ຫຼອງ​ວັນ ITEC ປະ­ຈຳ​ປີ 2019 ຈັດ​ຂຶ້ນ​ໃນ​ວັນ​ທີ 14 ຕຸ­ລາ 2019 ຢູ່​ເຮືອນ​ພັກ​ທູດ​ດັ່ງ­ກ່າວ ໂດຍ​ມີ​ທ່ານ Dinkar Asthana ເອກ​ອັກ​ຄະ​ລັດ​ຖະ​ທູດ​ອິນ​ເດຍ ປະ­ຈຳ​ລາວ ຜູ້­ຕາງ­ໜ້າ​ສະ­ມາ­ຄົມ​ຊາວ​ອິນ​ເດຍ ອະ­ດີດ​ນັກ​ສຶກ​ສາ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ITEC ເປັນ​ໂຄງ­ການ-ການ​ຮ່ວມ​ມື​ດ້ານ​ວິ­ຊາ​ການ ແລະ ເສດ­ຖະ­ກິດ ເປັນ​ໂຄງ­ການ​ທີ່​ພົ້ນ​ເດັ່ນ​ຂອງ​ກະ­ຊວງ​ການ​ຕ່າງ­ປະ­ເທດ​ອິນ​ເດຍ ພາຍ​ໃຕ້​ໂຄງ­ການ​ນີ້​ອິນ​ເດຍ​ສາ­ມາດ​ສະ­ໜອງ​ທຶນ​ການ​ສຶກ​ສາ​ຫຼາຍ​ກວ່າ 10.000 ທຶນ ໃຫ້​ບັນ­ດາ​ປະ­ເທດ​ທົ່ວ​ໂລກ ໂດຍ​ມີ​ຫຼາຍ​ກວ່າ 50 ສະ​ຖາ​ບັນ​ທີ່​ສະ­ໜອງ​ຫຼັກ ສູດ​ການ​ເຝິກ­ອົບ­ຮົມ​ຫຼາຍ​ກວ່າ 300 ຫຼັກ­ສູດ​ໃຫ້​ນັກ​ສຶກ​ສາ​ທຶນ​ຈາກ​ຕ່າງ­ປະ­ເທດ ເປັນ­ຕົ້ນ ວິ­ຊາ​ໄອ​ທີ ພາ­ສາ​ອັງ­ກິດ ການ​ບໍ­ລິ­ຫານ​ລັດ ທຸ­ລະ​ກິດ​ຂະ­ໜາດ​ນ້ອຍ ແລະ ກາງ ການ​ປະ­ກອບ​ການ ການ​ພັດ­ທະ­ນາ​ຊົນ­ນະ­ບົດ ການ​ບໍ​ລິ ຫານ​ວຽກ​ງານ​ລັດ​ຖະ​ສະ­ພາ ພະ­ລັງ­ງານ​ທົດ​ແທນ ແລະ ການ​ບໍ­ລິ­ຫານ​ລົງ​ເລືອກ​ຕັ້ງ ແລະ ອື່ນໆ.

    ນອກ­ຈາກ​ໃຫ້​ທຶນ​ເຝິກ­ອົບ­ຮົມ​ຢູ່​ອິນ​ເດຍ​ແລ້ວ ໂຄງ­ການ​ຍັງ​ສົ່ງ​ຊ່ຽວ­ຊານ​ອິນ​ເດຍ​ໄປ​ຕ່າງ­ປະ­ເທດ ເພື່ອ​ຊ່ວຍ ເຫຼືອ​ຜູ້​ປະ­ສົບ​ໄພ​ທຳ​ມະ​ຊາດ ສະ­ໜອງ​ອຸ­ປະ­ກອນ ສຶກ​ສາ​ບົດ​ວິ­ພາກ ແລະ ສະ­ໜອງ​ການ​ບໍ­ລິ­ການ​ທີ່​ປຶກ­ສາ ແລະ ອື່ນໆ ປັດ­ຈຸ­ບັນ​ຊ່ຽວ­ຊານ​ຈາກ​ກອງ­ທັບ​ອິນ​ເດຍ 2 ທ່ານ ກຳ­ລັງ​ປະ​ຕິດ​ບັດ​ໜ້າ­ທີ່​ສິດ­ສອນ​ພາ­ສາ​ອັງ­ກິດ ແລະ ຄອມ​ພິວ​ເຕີ ຢູ່​ວິ­ທະ­ຍາ­ຄານ​ປ້ອງ​ກັນ​ຊາດ ໄກ­ສອນ ພົມ​ຫານ ອິນ​ເດຍ​ໄດ້​ໃຫ້​ທຶນ​ແກ່​ພະ­ນັກ­ງານ​ລາວ​ຫຼາຍ​ກວ່າ 110 ທຶນ ພາຍ​ໃຕ້​ໂຄງ­ການ ITEC ແລະ TCS ໃນ​ນີ້ ນັກ​ສຶກ​ສາ​ລາວ​ສາ­ມາດ​ຍາດ​ໄດ້ 75%-80% ຂອງ​ທຶນ​ທັງ​ໝົດ ປັດ­ຈຸ­ບັນ​ມີ​ທຶນ​ສຶກ​ສາ​ໃນ​ດ້ານ​ວຽກ​ງານ​ປ້ອງ​ກັນ​ປະ­ເທດ​ແກ່​ລາວ 8 ທຶນ ໃນ​ລະ­ດັບ​ປະ­ລິນ­ຍາ​ຕີ ປະ­ລິນ­ຍາ​ໂທ ແລະ ປະ­ລິນ­ຍາ​ເອກ ຕາມ​ບັນ­ດາ​ໂຮງ­ຮຽນ​ທີ່​ມີ​ຊື່​ສຽງ​ໃນ​ອິນ​ເດຍ ເຊິ່ງ​ມີ​ປະ­ມານ 20 ທຶນ ທີ່​ເປັນ​ທຶນ 100% ພາຍ​ໃຕ້​ໂຄງ­ການ ICCR ແລະ ໂຄງ­ການ​ຮ່ວມ​ມື​ແມ່­ນ້ຳ​ຂອງ​ແກັນ​ກາ ນອກ​ນີ້ ລັດ­ຖະ­ບານ​ອິນ​ເດຍ​ຍັງ​ໄດ້​ໃຫ້​ທຶນ​ການ​ສຶກ​ສາ​ປະ­ລິນ­ຍາ​ໂທ​ແກ່​ນັກ​ສຶກ​ສາ​ລາວ​ຢູ່​ມະ­ຫາ­ວິ­ທະ­ຍາ­ໄລ​ນາ​ແລນ​ດາ ເຊິ່ງ​ປັດ­ຈຸ­ບັນ​ມີ​ນັກ​ສຶກ​ສາ​ລາວ 4 ທ່ານ ກຳ­ລັງ​ສຶກ​ສາ​ລະ­ດັບ​ປະ­ລິນ­ຍາ​ໂທ ຢູ່​ມະ­ຫາ­ວິ­ທະ­ຍາ­ໄລ​ດັ່ງ­ກ່າວ.

ຂ່າວທີ່ກ່ຽວຂ້ອງ