ຜູ້ແທນ 5 ນະຄອນລຸ່ມແມ່ນ້ຳຂອງ ຢ້ຽມຊົມພິພິທະພັນວຽງຈັນສິລະປະຮ່ວມສະໄໝ

923 17 ຕ.ລ. 2019 ຂ່າວໜ້າ​ໜຶ່ງ
ຜູ້ແທນ 5 ນະຄອນລຸ່ມແມ່ນ້ຳຂອງ ຢ້ຽມຊົມພິພິທະພັນວຽງຈັນສິລະປະຮ່ວມສະໄໝ

    ທ່ານ​ນາງ ວິ­ໄລ​ວອນ ຈັນ­ທະ​ລາ­ຕີ ຫົວ­ໜ້າ​ພະ​ແນກ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ນະ­ຄອນ­ຫຼວງ​ວຽງ​ຈັນ (ຖວ​ທ ນວ) ນຳ­ພາ​ຄະ­ນະ​ຜູ້​ແທນ 5 ປະ­ເທດ​ລຸ່ມ​ແມ່­ນ້ຳ​ຂອງ ຄື: ນະ­ຄອນ­ຫຼວງ​ພະ ນົມ​ເປັນ ລາ­ຊະ​ອາ­ນາ­ຈັກ​ກຳ­ປູ­ເຈຍ ນະ­ຄອນ­ຫຼວງ​ວຽງ​ຈັນ ສປປ ລາວ ນະ­ຄອນ­ຫຼວງ​ຢາງ​ກຸ້ງ ສະ­ຫະ­ພາບ ມຽນ​ມາ ນະ­ຄອນ­ຫຼວງ​ບາງ­ກອກ ລາ­ຊະ​ອາ­ນາ­ຈັກ​ໄທ ນະ­ຄອນ​ໂຮ​ຈີ​ມິ່ງ ສສ ຫວຽດ­ນາມ ຢ້ຽມ​ຊົມ​ພິ​ພິ​ທະ​ພັນ​ວຽງ​ຈັນ​ສິ­ລະ​ປະ​ຮ່ວມ​ສະ­ໄໝ ບ້ານ​ຊ້າງ​ຄູ້ ເມືອງ​ໄຊ​ທາ­ນີ ນວ ວັນ​ທີ 14 ຕຸ­ລາ 2019 ໃນ​ໂອ­ກາດ​ທີ່​ຄະ­ນະ​ຜູ້​ແທນ​ດັ່ງ­ກ່າວ ເດີນ­ທາງ​ມາ​ເຂົ້າ​ຮ່ວມ​ກອງ​ປະ­ຊຸມ​ທ່ອງ​ທ່ຽວ​ບັນ­ດາ​ປະ­ເທດ​ລຸ່ມ​ແມ່­ນ້ຳ​ຂອງ ຄັ້ງ​ທີ 5 ຢູ່ ນວ ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ພິ​ຊິດ ໄຊ​ຍະ​ທິດ ຜູ້​ກໍ່­ສ້າງ​ພິ​ພິ​ທະ​ພັນ​ວຽງ​ຈັນ​ສິ­ລະ​ປະ​ຮ່ວມ​ສະ­ໄໝ.

    ຈຸດ­ປະ­ສົງ ເພື່ອ​ເປັນ​ການ​ໂຄ­ສະ­ນາ ກໍ​ຄື ແນະ­ນຳ​ສະ­ຖານ­ທີ່​ທ່ອງ​ທ່ຽວ​ແຫ່ງ​ໃໝ່​ຂອງ ນວ ເຊິ່ງ​ສະ­ຖານ­ທີ່​ດັ່ງ­ກ່າວ ໄດ້​ມີ​ກາ­ນວາງ­ສະ­ແດງ​ຮູບ​ແກະ­ສະ­ຫຼັກ​ໄມ້​ທີ່​ມີ​ຫຼາຍ​ລວ­ດລາຍ ສ່ອງ​ແສງ​ໃຫ້​ເຫັນ​ວັດ­ທະ­ນະ­ທຳ​ອັນ​ເປັນ​ມູນ­ເຊື້ອ​ຂອງ​ປະ­ເທດ​ລາວ ແລະ ປະ­ເທດ​ຕ່າງໆ​ໃນ​ອາ​ຊຽນ ທັງ​ເປັນ​ການ­ສະ­ແດງ​ໃຫ້​ເຫັນ​ຄວາມ​ອຸ­ດົມ­ສົມ­ບູນ​ດ້ານ​ຊັບ­ພະ­ຍາ­ກອນ​ທຳ​ມະ​ຊາດ​ຂອງ ສປປ ລາວ ຕື່ມ​ອີກ.

    ທ່ານ ພິ​ຊິດ ໄຊ​ຍະ​ທິດ ກ່າວ​ວ່າ: ໄມ້​ທີ່​ຕົນ​ເອົາ​ມາ​ແກະ­ສະ­ຫຼັກ​ຢູ່​ພິ​ພິ​ທະ​ພັນ​ແມ່ນ ຊາກ​ໄມ້ ຕູດ​ໄມ້ ຮາກ​ໄມ້ ແລະ ທ່ອນ​ໄມ້​ຢູ່​ຕາມ​ໄຮ່-ນາ​ຂອງ​ປະ­ຊາ­ຊົນ ເຮັດ​ໃຫ້​ເກີດ​ມີ​ຄຸນ­ຄ່າ ໂດຍ​ການ​ແກະ­ສະ­ຫຼັກ​ເປັນ​ລວ­ດລາຍ​ຕ່າງໆ ເຊິ່ງ​ໄດ້​ສະ​ສົມ​ເປັນ​ເວ­ລາ​ຫຼາຍ​ກວ່າ 20 ປີ ຈາກ​ນັ້ນ ພັກ ແລະ ລັດ­ຖະ­ບານ​ໄດ້​ໃຫ້­ການ​ສະ­ໜັບ­ສະ­ໜູນ ໂດຍ​ໃຫ້​ເປີດ​ເປັນ​ພິ​ພິ​ທະ​ພັນ​ວຽງ​ຈັນ​ສິ­ລະ​ປະ​ຮ່ວມ​ສະ­ໄໝ ມີ​ເນື້ອ­ທີ່ 16.000 ຕາ​ແມັດ ໃນ​ເດືອນ​ກຸມ­ພາ 2019 ປັດ­ຈຸ­ບັນ ມີ​ແຂກ​ພາຍ​ໃນ ແລະ ຕ່າງ­ປະ­ເທດ​ເຂົ້າ​ມາ​ທ່ຽວ 30.000 ຄົນ ເຊິ່ງ​ການ​ບໍ­ລິ­ການ​ຍັງ​ບໍ່​ໄດ້​ເກັບ​ຄ່າ​ເຂົ້າ​ຊົມ ເພື່ອ​ແນ­ໃສ່​ສ້າງ​ສະ​ເໜ່​ດຶງ​ດູດ​ໃຫ້​ນັກ​ທ່ອງ​ທ່ຽວ​ມາ​ທ່ຽວ​ຊົມ​ໃຫ້​ຫຼາຍ​ຂຶ້ນ ດ້ວຍ​ການ​ເວົ້າ​ປາກ​ຕໍ່­ປາກ ແລະ ຄາດ​ວ່າ​ໃນ​ປີ 2020 ຈຶ່ງ​ຈະ​ໄດ້​ເລີ່ມ​ເກັບ​ຄ່າ​ເຂົ້າ​ຊົມ.

    ພິ​ພິ​ທະ​ພັນ​ວຽງ​ຈັນ​ສິ­ລະ​ປະ​ຮ່ວມ​ສະ­ໄໝ ເປີດ​ໃຫ້­ການ​ບໍ­ລິ­ການ​ແຕ່ 8:00-18:00 ໂມງ ທຸກໆ​ວັນ ເຊິ່ງ​ການ​ທ່ຽວ​ຊົມ​ຈະ​ມີ​ພະ­ນັກ­ງານ​ອະ­ທິ­ບາຍ​ກ່ຽວ​ກັບ​ຮູບ​ແກະ­ສະ­ຫຼັກ​ໄມ້​ແຕ່​ລະ​ຮູບ​ແບບ ທີ່​ສື່​ເຖິງ​ວັດ­ທະ­ນະ­ທຳ​ຂອງ​ລາວ ແລະ ຂອງ​ອາ​ຊຽນ ໂດຍ​ມີ​ຫຼາຍ​ກວ່າ 30.000 ຜະ­ລິດ​ຕະ​ພັນ.

ຂ່າວທີ່ກ່ຽວຂ້ອງ