ຂະບວນການຍ່າງເພື່ອສຸຂະພາບ ສະເຫຼີມສະຫຼອງວັນສາຍຕາໂລກ

1.248 17 ຕ.ລ. 2019 ວົງຈອນກີລາ

    ຂະ​ບວນ​ການ​ຍ່າງ​ເພື່ອ​ສຸ­ຂະ­ພາບ ເນື່ອງ​ໃນ​ວັນ​ສາຍ­ຕາ​ໂລກ (10 ຕຸ­ລາ) ຈັດ​ຂຶ້ນ​ວັນ​ທີ 14 ຕຸ­ລາ 2019 ຢູ່​ສວນ​ປະ­ຕູ​ໄຊ ໂດຍ​ມີ​ທ່ານ ພູ­ທອນ ເມືອງ​ປາກ ຮອງ​ລັດ­ຖະ­ມົນ­ຕີ​ກະ­ຊວງ​ສາ­ທາ­ລະ­ນະ​ສຸກ ທ່ານ ສີ​ຫຸນ ສິດ­ທິ​ລື​ໄຊ ຮອງ​ເຈົ້າ​ຄອງ ນະ­ຄອນ­ຫຼວງ​ວຽງ​ຈັນ ພ້ອມ​ດ້ວຍ​ການ​ນຳພັກ-ລັດ ຜູ້­ຕາງ­ໜ້າ​ຈາກ​ພາກ­ສ່ວນ​ຕ່າງໆ ແລະ ມວນ​ຊົນ ເຂົ້າ​ຮ່ວມ.

    ພິ­ທີ​ສະ­ເຫຼີມ­ສະ­ຫຼອງ​ວັນ​ສາຍ­ຕາ​ໂລກ ເປັນ​ວັນ​ທີ່​ມີ​ຄວາມ​ໝາຍ​ສຳຄັນ​ສຳ­ລັບ​ຜູ້​ທີ່​ພິ­ການ​ທາງ​ສາຍ­ຕາ ເຊັ່ນ: ຕາ­ມົວ ຕາ​ບໍ່​ເຫັນ­ຮຸ່ງ ຫຼື ຕາບອດ ຍ້ອນ​ພະ­ຍາດ​ແກ່ນ​ຕາ​ຂຸ້ນ ໄດ້​ຮັບ​ການ​ປິ່ນ­ປົວ​ບໍ່​ເສຍ​ຄ່າ ເຊິ່ງໄດ້​ຮັບ​ການ​ສະ­ໜັບ­ສະ­ໜູນ​ຈາກ​ຜູ້​ໃຈ​ບຸນ​ພາຍ​ໃນ ແລະ ຕ່າງ­ປະ­ເທດ ໄດ້​ແບ່ງ​ນ້ຳ​ໄຈ​ຊ່ວຍ­ເຫຼືອ​ຜູ້​ທຸກ​ຍາກ​ຕາ­ບອດ​ໃນ ສປປ ລາວ.

    ພາຍ​ໃຕ້​ວິ­ໄສ​ທັດ​ການ​ເບິ່ງ​ເຫັນ​ແຕ່​ນີ້​ຮອດ​ປີ 2020 ການ​ນຳ​ພັກ-ລັດ​ເຫັນ​ດີ​ເຫັນ​ພ້ອມ​ກັບ​ທ່ານ​ເລ­ຂາ­ທິ­ການ​ໃຫຍ່​ຂອງ​ອົງ­ການ​ອະ­ນາ­ໄມ​ໂລກ ການ​ຮັກ­ສາ​ສຸ­ຂະ­ພາບ​ຕາ ຕ້ອງ​ມີ​ການ​ຈັດ​ລະ­ດັບ​ຄວາມ​ສຳ­ຄັນ ເຊິ່ງ​ມັນ​ບໍ່​ແມ່ນ​ບັນ­ຫາ​ສະ­ເພາະ​ສາ­ທາ­ລະ­ນະ​ສຸກ​ເທົ່າ​ນັ້ນ ແຕ່​ຍັງ​ເປັນບັນ­ຫາ​ຂອງ​ຊຸມ​ຊົນ ຄອບ­ຄົວ ແລະ ສັງ­ຄົມ ການ​ຊ່ວຍ­ເຫຼືອ​ຟື້ນ​ຟູ​ໃຫ້ສາຍ­ຕາ​ໃຫ້​ກັບ​ມາ​ເບິ່ງ​ເຫັນ​ໃໝ່ ເປັນ​ສິ່ງ​ທີ່​ປະ­ເສີດ ເຮັດ​ໃຫ້​ຄົນ​ເຈັບ​ເຫຼົ່ານັ້ນ​ໄດ້​ມີ​ສ່ວນ​ຮ່ວມ​ສ້າງ​ເສດ­ຖະ­ກິດ​ຄອບ­ຄົວ ຊຸມ​ຊົນ ແລະ ການ​ສ້າງ­ສາ​ພັດ­ທະ­ນາ​ປະ­ເທດ​ຊາດ ຢູ່ ສປປ ລາວ ຍັງ​ມີ​ຄົນ​ຕາບອດ​ອີກ​ຫຼາຍ​ພັນ​ຄົນ ​ຍັງ​ບໍ່​ເຂົ້າ​ເຖິງ​ການ​ບໍ­ລິ­ການ​ຮັກ­ສາ​ສຸ­ຂະ­ພາບ​ຕາທີ່​ມີ​ຄຸນ​ນະ​ພາບ ປັດ­ຈຸ­ບັນ ພະ­ຍາດ​ຕາ­ບອດ ສາ­ມາດ​ປ້ອງ​ກັນ ແລະ ຫຼີກ​ລ່ຽງ​ໄດ້ ໃນ​ນີ້​ຈຳ­ນວນ​ຄົນ​ຕາ­ບອດ​ແມ່ນ​ຄົນ​ທຸກ​ກວມ​ເອົາ​ສ່ວນ​ຫຼາຍ ໂດຍ​ສະ­ເພາະ ຢູ່​ປະ­ເທດ​ດ້ອຍ​ພັດ­ທະ­ນາ ແລະ ກຳ­ລັງ​ພັດ­ທະ­ນາ 80% ຂອງ​ກໍ­ລະ­ນີ​ຄົນ​ຕາ­ບອດ ສາ­ມາດ​ປ້ອງ​ກັນ ແລະ ປິ່ນ­ປົວ​ໄດ້ ອີງ​ຕາມ​ການ​ລາຍງານ ວັນ​ທີ 10 ຕຸ­ລາ 2012 ໃຫ້​ຮູ້​ວ່າ: ມີ​ປະ­ມານ 180 ລ້ານ​ຄົນໃນ​ທົ່ວ​ໂລກ ມີ​ບັນ­ຫາ​ກ່ຽວ​ກັບ​ການ​ເບິ່ງ​ເຫັນ ໃນ​ນີ້ 40-45 ລ້ານ​ຄົນເປັນ​ຄົນ​ຕາ­ບອດ ຄົນ​ຕາ­ບອດ​ຈະ​ເພີ່ມ​ຂຶ້ນ​ທຸກ​ປີ ຍ້ອນ​ວ່າ​ປະ­ຊາ­ກອນ​ໂລກ​ເພີ່ມຂຶ້ນ​ທຸກ​ປີ ໃນ 5 ວິ­ນາ­ທີ ຈະ​ມີ​ຄົນ​ຕາ­ບອດ​ເພີ່ມ​ຂຶ້ນ 1 ຄົນ ສຳ­ລັບ​ເດັກ­ນ້ອຍ​ທຸກໆ 1 ນາ­ທີ ຈະ​ມີ​ເດັກ­ນ້ອຍ​ຕາ­ບອດ​ເພີ່ມ​ຂຶ້ນ 1 ຄົນ ຄາດ​ວ່າ​ມີ​ຫຼາຍ​ກວ່າ 7 ລ້ານ​ຄົນ ເປັນ​ຄົນ​ຕາ­ບອດ​ໃນ​ແຕ່​ລະ​ປີ ແລະ ໃນ​ປີ 1999 ໄດ້​ລິ​ເລີ່ມ​ວາງ​ວິ­ໄສ​ທັດ​ໃນ​ການ​ເບິ່ງ​ເຫັນ ເພື່ອ​ລົບ​ລ້າງ​ຕາ­ບອດ​ທີ່​ສາ­ມາດ​ປິ່ນ­ປົວ ແລະ ຫຼີກ​ລ້ຽງ​ໄດ້.

    ສຳ­ລັບ ສປປ ລາວ ສະ­ພາບ​ຕາ­ບອດ​ຍັງ​ເປັນ​ບັນ­ຫາ​ຕໍ່​ຂະ­ແໜງສາ­ທາ­ລະ­ນະ​ສຸກ ເຊິ່ງ​ມີ​ຜົນ​ກະ­ທົບ​ໂດຍ​ກົງ​ຕໍ່​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ກໍ​ຄື ການ​ລົບ​ລ້າງ​ຄວາມ­ທຸກ​ຍາກ ໃນ​ນີ້ ພະ­ຍາດ​ແກ່ນ​ຕາຂຸ້ນ ​ເປັນສາ­ເຫດ​ອັນ​ດັບ​ໜຶ່ງ​ທີ່​ພາ­ໃຫ້​ຕາ­ບອດ ຄົນ​ຕາ­ບອດ 100 ຄົນ​ໃດ ແມ່ນ​ບອດ​ຍ້ອນ​ແກ່ນ​ຕາ​ຂຸ້ນ 65 ຄົນ ໄລ­ຍະ​ຜ່ານ​ມາ ສາ­ມາດ​ຜ່າຕັດ​ແກ່ນ​ຕາ​ຂຸ່ນ​ໂດຍ​ບໍ່​ໄດ້​ເສຍ​ຄ່າ​ໃນ​ທົ່ວ​ປະ­ເທດ ບັນ­ລຸ​ໄດ້​ເກືອບ 6.000 ກໍ­ລະ­ນີ​ຕໍ່​ປີ ແລະ ມາ​ຮອດ​ປີ 2007 ໄດ້​ສຳ​ຫຼວດ​ຄືນ​ເຫັນ​ວ່າ ຈຳ­ນວນ​ຄົນ​ຕາ­ບອດ​ຍ້ອນ​ແກ່ນ​ຕາ​ຂຸ້ນ​ເພີ່ມ​ຂຶ້ນ​ຈາກ 65% ມາ​ເປັນ 75%.

ຂ່າວທີ່ກ່ຽວຂ້ອງ