ໂຮງຮຽນ ມສ ສັນຕິພາບ ຊະນະເລີດການແຂ່ງຂັນເຮືອໄຟງາມ ຢູ່ຫຼວງພະບາງ

1.186 17 ຕ.ລ. 2019 ວົງຈອນກີລາ
ໂຮງຮຽນ ມສ ສັນຕິພາບ ຊະນະເລີດການແຂ່ງຂັນເຮືອໄຟງາມ ຢູ່ຫຼວງພະບາງ

    ງານ​ແຂ່ງ­ຂັນ​ເຮືອ​ໄຟ​ງາມ ໃນ​ໂອ­ກາດ​ບຸນ​ອອກ​ພັນ​ສາ​ປະ​ວໍ­ລະ­ນາ ຈັດ​ຂຶ້ນ​ວັນ​ທີ 14 ຕຸ­ລາ 2019 ຢູ່​ນະ­ຄອນ­ຫຼວງ​ພະ​ບາງ ແຂວງ​ຫຼວງ​ພະ​ບາງ ໂດຍ​ມີ​ທ່ານ ສຸ​ກັນ ບຸນ​ຍົງ ຮອງ​ເຈົ້າ­ແຂວງ​ຫຼວງ​ພະ​ບາງ ທ່ານ ບົວ­ທອງ ແພງ​ສະ­ຫວັນ ປະ­ທານ​ກວດ­ກາ​ພັກ-ລັດ ແຂວງ​ຫຼວງ​ພະ​ບາງ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ທ່ານ ຈັນ​ສຸກ ພັນ​ໂດ​ລັກ ເຈົ້າ​ນະ­ຄອນ­ຫຼວງ​ພະ​ບາງ ປະ­ທານ​ຈັດ​ງານ​ແຂ່ງ­ຂັນ​ເຮືອ​ໄຟ​ງາມ ກ່າວ​ວ່າ: ການ​ແຂ່ງ­ຂັນ​ເຮືອ​ໄຟ ຢູ່​ນະ­ຄອນ­ຫຼວງ​ພະ​ບາງ ໄດ້​ຈັດ​ຂຶ້ນ​ມື້​ແຮມ 1 ຄ່ຳ​ເດືອນ 11 ຂອງ​ທຸກ​ປີ ເປັນ​ປະ­ເພ­ນີ​ທີ່​ຊາວ​ຫຼວງ​ພະ​ບາງ ພ້ອມ​ກັນ​ສືບ​ທອດ​ມາ​ໄດ້​ຫຼາຍ­ເຊັ່ນ­ຄົນ ເປັນ​ຄຸນ­ຄ່າ​ດ້ານ​ວັດ­ທະ­ນະ­ທຳ ຮີດ­ຄອງ​ປະ­ເພ­ນີ​ຂອງ​ຊາວ​ນະ­ຄອນ­ຫຼວງ​ພະ​ບາງ ເພື່ອ​ບູ­ຊາ​ຄຸນ​ພະ​ທຳ-ພະ­ສົງ ແມ່­ນ້ຳ​ຄົງ​ຄາ ທີ່​ໄດ້​ຊຸບ​ລ້ຽງ​ຊີ­ວິດ​ຂອງ​ມວນ​ມະ­ນຸດ​ຕະ­ຫຼອດ​ມາ ພິ­ເສດ​ປີ​ນີ້​ມີ​ເຮືອ​ໄຟ​ຂອງ​ຂະ­ແໜງ​ການ­ທ່ອງ­ທ່ຽວ​ເຂົ້າ​ຮ່ວມ ເພື່ອ​ຊຸກ­ຍູ້​ກິດ­ຈະ­ກຳ​ການ​ສະ­ເຫຼີມ­ສະ­ຫຼອງ​ປີ​ທ່ອງ​ທ່ຽວ ລາວ-ຈີນ 2019 ຢູ່​ແຂວງ​ຫຼວງ​ພະ​ບາງ ຕື່ມ​ອີກ.

    ການ​ແຂ່ງ­ຂັນ​ເຮືອ​ໄຟ​ງາມ​ຄັ້ງ​ນີ້ ເຮືອ​ໄຟ​ເຂົ້າ​ຮ່ວມ 52 ລຳ (ເພີ່ມ​ຂຶ້ນ​ຈາກ​ປີ­ຜ່ານ­ມາ 1 ລຳ) ເຊິ່ງ​ເງື່ອນ­ໄຂ​ການ​ເຂົ້າ​ແຂ່ງ­ຂັນ​ຕ້ອງ​ມາ​ທັນ​ເວ­ລາ ແລະ ຕັ້ງ​ຂະ​ບວນ​ເປັນ​ລະ­ບຽບ ໂຄງ​ສ້າງ ແລະ ສິ­ລະ​ປະ­ການ​ຕົບ­ແຕ່ງ​ເຮັດ​ດ້ວຍ​ວັດ​ສະ​ດຸ​ທຳ​ມະ​ຊາດ ແລະ ຄວາມ​ສວຍ​ງາມ ຮູບ​ຮ່າງ ແລະ ແນວ​ຄິດ​ສ້າງ­ສັນ ຂະ​ບວນ​ແຫ່​ມີ​ຄວາມ​ເປັນ​ລະ­ບຽບ ແລະ ນຸ່ງ​ຖື​ສຸ­ພາບ ແສງ​ໄຟ​ໃຫ້​ຄວາມ​ສະ­ຫວ່າງ​ໃນ​ເວ­ລາ​ແຫ່​ຮຸ່ງ​ແຈ້ງ​ດີ ແສງ​ໄຟ​ໃຫ້​ຄວາມ​ສະ­ຫວ່າງ​ເວ­ລາ​ລົງ​ນ້ຳ​ບໍ່​ມອດ ແລະ ເຮືອ​ໄຟ​ບໍ່​ຈົມ ເຊິ່ງ​ຜ່ານ​ການ​ແຂ່ງ­ຂັນ ອັນ​ດັບ 1 ແມ່ນ​ເຮືອ​ໄຟ​ໂຮງ­ຮຽນ ມສ ສັນ­ຕິ­ພາບ ທີ 2 ເຮືອ​ໄຟ ໂຮງ­ຮຽນ ມ ປາຍ​ພັນ​ຫຼວງ ທີ 3 ເຮືອ​ໄຟ​ວິ­ທະ­ຍາ­ໄລ​ເຕັກ­ນິກ​ວິ­ຊາ​ຊີບ​ຫຼວງ​ພະ​ບາງ.

ຂ່າວທີ່ກ່ຽວຂ້ອງ