ແຂ່ງຂັນ​ແນວ​ຄວາມ​ຄິດ​ສ້າງສັນ​ສິ່ງ​ປະດິດ​ຈາກ​ສິ່ງ​ເສດ​ເຫຼືອ

890 16 ຕ.ລ. 2019 ຂ່າວໜ້າ​ໜຶ່ງ
ແຂ່ງຂັນ​ແນວ​ຄວາມ​ຄິດ​ສ້າງສັນ​ສິ່ງ​ປະດິດ​ຈາກ​ສິ່ງ​ເສດ​ເຫຼືອ

   ກະຊວງ​ວິທະຍາສາດ ແລະ ເຕັກ​ໂນ​ໂລ​ຊີ (ກວ​​ຕ) ຮ່ວມ​ກັບ​ສູນ​ກາງ​ຊາວ​ໜຸ່ມ​ປະຊາຊົນ ປະຕິວັດ​ລາວ ຈັດການ​ແຂ່ງຂັນ​ແນວ​ຄວາມ​ຄິດ​ສ້າງສັນ​ສິ່ງ​ປະດິດ​ຈາກ​ສິ່ງ​ເສດ​ເຫຼືອ ຂຶ້ນ​ວັນ​ທີ 14 ຕຸລາ 2019 ຢູ່​ຫໍ​ປະຊຸມ​ແຫ່ງ​ຊາດ ໂດຍ​ມີ​ທ່ານ ສຸ​ມານະ ຈຸລາມະນີ ຫົວໜ້າ​ກົມ​ເຕັກ​ໂນ​ໂລ​ຊີ ແລະ ນະ​ວັດຕະ​ກຳ ກວ​​ຕ ທ່ານ ບີ​ຢາ ຢາ​ທໍ່​ຕູ້ ຫົວໜ້າ​ກົມ​ພັດທະນາ​ວິຊາ​ຊີບ ສູນ​ກາງ​ຊາວ​ໜຸ່ມ​ປະຊາຊົນ ປະຕິວັດ​ລາວ ມີ​ນັກຮຽນ ນັກ​ສຶກ​ສາ ແລະ ຂະແໜງການ​ກ່ຽວຂ້ອງ ເຂົ້າ​ຮ່ວມ.

    ການ​ແຂ່ງຂັນ​ຄວາມ​ຄິດ​ສ້າງສັນ​ສິ່ງ​ປະດິດ​ຈາກ​ສິ່ງ​ເສດ​ເຫຼືອ​ຄັ້ງ​ນີ້ ເປັນ​ປີ​ທີ 3 ເຊິ່ງ​ຄັ້ງ​ນີ້​ມີ​ຜູ້​ເຂົ້າ​ຮ່ວມ​ຈາກ​ໂຮງຮຽນ​ຕ່າງໆ ນັກຮຽນ​ຮູ້​ປັນຍາ​ຊົນ 17 ທີມ ໂດຍ​ມາ​ຈາກ​ວິທະຍາໄລ ມະຫາວິທະຍາໄລ ສະ​ຖາ​ບັນ ໂຮງຮຽນ ຈຸດປະສົງ​ເພື່ອ​ປູກ​ຈິດ​ສຳນຶກ​ໃນ​ການ​ຮັກສາ​ສິ່ງແວດລ້ອມ ສົ່ງເສີມ​ການ​ນຳ​ໃຊ້​ຫົວຄິດ​ປະດິດ​ສ້າງ​ເພື່ອ​ສ້າງສັນ​ຜົນງານ ຜະລິດ​ຕະ​ພັນ​ທີ່​ນຳ​ໃຊ້​ສິ່ງ​ເສດ​ເຫຼືອ​ມາ​ສ້າງ​ມູນ​ຄ່າ​ເພີ່ມ ແລະ ເພື່ອ​ສົ່ງເສີມ​ການ​ຕໍ່​ຍອດ​ເປັນ​ສິນຄ້າ ສ້າງ​ລາຍ​ຮັບ​ໃຫ້​ສູງ​ຂຶ້ນ​ປະກອບສ່ວນ​ໃນ​ການ​ສົ່ງເສີມ ແລະ ພັດທະນາ​ປະເທດ​ຊາດ​ໃຫ້​ນັບ​ມື້​ສູງ​ຂຶ້ນ.

    ການ​ແຂ່ງຂັນ​ສິ່ງ​ປະດິດ​ດັ່ງກ່າວ ແມ່ນ​ໜຶ່ງ​ໃນ​ແຜນ​ຈັດ​ຕັ້ງ​ປະຕິບັດ​ແຜນ​ພັດທະນາ ເພື່ອ​ສົ່ງເສີມ​ການ​ປູກ​ຈິດ​ສຳນຶກ​ໃຫ້​ກັບ​ໄວ​ໜຸ່ມ ນັກຮຽນ ນັກ​ສຶກ​ສາ ຍົກ​ສູງ​ການ​ສ້າງ​ຄວາມ​ສາມາດ​ດ້ານ​ການ​ປະດິດ​ຄິດ​ແຕ່ງ ການ​ສ້າງສັນ​ສິ່ງ​ປະດິດ ເພື່ອ​ຕໍ່​ຍອດ​ການ​ສ້າງ​ເປັນ​ທຸລະ​ກິດ​ນະ​ວັດຕະ​ກຳ​ໃໝ່ ປະກອບສ່ວນ​ໃນ​ການ​ພັດ ທະ​ນາ​ເສດຖະກິດ ສັງຄົມ​ໃຫ້​ມີ​ປະ​ສິດທິ​ຜົນ​ສູງ ຜ່ານ​ການ​ແຂ່ງຂັນ ອັນ​ດັບ​ທີ 1 ແມ່ນ​ທີມ​ມໍລະດົກ​ໂລກ ຜົນງານ​ປະດິດ​ທົ່ງ​ໄຫ​ຫີນ ໄດ້​ເງິນ​ລາງວັນ 3 ລ້ານ​ກີບ ລາງວັນ​ທີ 2 ທີມ pandorum ຜົນງານ​ປະດິດ​ເຮືອ​ໃບ​ທີ່​ດຽວ​ດາຍ ໄດ້​ຮັບ​ເງິນ​ລາງວັນ 2 ລ້ານ​ກີບ ລາງວັນ​ທີ 3 ທີມ The Doy ຜົນງານ​ປະດິດ​ເບາະ​ນອນ​ລ້ຽງສັດ ໄດ້​ຮັບ​ເງິນ​ລາງວັນ 1 ລ້ານ​ກີບ ລາງວັນ​ຊົມເຊີຍ​ທີມ Lonely ຜົນງານ​ປະດິດ​ສວນ​ນ້ອຍ​ຈາກ​ໝໍ້​ຈຸ່ມ​ເກົ່າ ໄດ້​ຮັບ​ເງິນ​ລາງວັນ 300.000 ກີບ.

ຂ່າວທີ່ກ່ຽວຂ້ອງ