ສອງ​ພາກສ່ວນ ສືບຕໍ່​ມອບ​ເງິນ​ຊ່ວຍເຫຼືອ​ຜູ້​ໄດ້​ຮັບ​ຜົນ​ກະທົບ​ຈາກ​ໄພ​ນ້ຳ​ຖ້ວມ

967 16 ຕ.ລ. 2019 ຂ່າວໜ້າ​ໜຶ່ງ
ສອງ​ພາກສ່ວນ ສືບຕໍ່​ມອບ​ເງິນ​ຊ່ວຍເຫຼືອ​ຜູ້​ໄດ້​ຮັບ​ຜົນ​ກະທົບ​ຈາກ​ໄພ​ນ້ຳ​ຖ້ວມ

     ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ ວ່າການ​ລັດຖະມົນຕີ​ກະຊວງ​ແຜນການ ແລະ ການ​ລົງທຶນ ໄດ້​ຕາງໜ້າ​ໃຫ້​ລັດຖະບານ ຮັບ​ເງິນ 1 ຕື້​ກີບ ຈາກ​ບໍລິສັດ​ສະ​ຕາ​ໂທລະ​ຄົມ ແລະ 1 ລ້ານ​ບາດ ຫຼື ປະມານ 291 ລ້ານ​ກີບ ຈາກ​ບໍລິສັດ​ໄຟຟ້າ​ຫົງ​ສາ​ຈຳກັດ ເພື່ອ​ນຳໄປ​ຊ່ວຍເຫຼືອ​ຜູ້​ໄດ້​ຮັບ​ຜົນ​ກະທົບ​ຈາກ​ໄພ​ນ້ຳ​ຖ້ວມ​ຢູ່​ທ້ອງຖິ່ນ​ຕ່າງໆ​ໃນ​ໄລຍະ​ຜ່ານ​ມາ.

    ພິທີ​ມອບ-ຮັບ​ເງິນ​ດັ່ງກ່າວ ຈັດ​ຂຶ້ນ​ວັນ​ທີ 15 ຕຸລາ 2019 ຢູ່​ສຳນັກງານ​ນາຍົກລັດຖະມົນຕີ ເຊິ່ງ​ມອບ​ໂດຍ​ທ່ານ ພົນ​ຈັດຕະວາ ອຸລະ​ຫາ ທອງ​ວັນ​ທາ ຮອງ​ຜູ້ອຳນວຍການ-ການ​ເງິນ​ບໍລິສັດ​ສະ​ຕາ​ໂທລະ​ຄົມ ແລະ ທ່ານ ຄະທາຢຸດ ຊູພູນ ຜູ້ອຳນວຍການ​ໃຫຍ່​ບໍລິສັດ​ໄຟຟ້າ​ຫົງ​ສາ​ຈຳກັດ ແລະ ຮັບ​ໂດຍ​ທ່ານ ສອນ​ໄຊ ສີ​ພັນ​ດອນ ໂດຍ​ມີ​ພະນັກງານ​ກ່ຽວຂ້ອງ ເຂົ້າ​ຮ່ວມ.                               

    ໂອກາດ​ນີ້ ທ່ານ​ຮອງ​ນາຍົກລັດຖະມົນຕີ ກໍ​ໄດ້​ສະແດງ​ຄວາມ​ຂອບໃຈ ແລະ ຊົມເຊີຍ​ຕໍ່​ສອງ​ພາກສ່ວນ​ດັ່ງກ່າວ ທີ່​ໄດ້​ນຳ​ເອົາ​ເງິນ​ມາ​ມອບ ເພື່ອ​ນຳໄປ​ຊ່ວຍເຫຼືອ​ຜູ້​ປະສົບ​ໄພ​ນ້ຳ​ຖ້ວມ​ຢູ່​ທ້ອງຖິ່ນ​ຕ່າງໆ​ໃນ​ປີ​ນີ້ ເຊິ່ງ​ເປັນ​ການ​ປະກອບສ່ວນ​ສຳຄັນ​ເຮັດ​ໃຫ້​ຜູ້​ໄດ້​ຮັບ​ຜົນ​ກະທົບ​ຈາກ​ໄພ​ນ້ຳ​ຖ້ວມ​ມີ​ກຳລັງ​ໃຈ ໄດ້​ຮັບ​ການ​ແກ້​ໄຂ​ບັນເທົາ​ທຸກ ແລະ ປັບປຸງ​ຊີວິດ​ການ​ເປັນ​ຢູ່​ຂອງ​ເຂົາເຈົ້າ​ໃຫ້​ກັບ​ຄືນ​ສູ່​ສະພາບ​ປົກກະຕິ​ໂດຍ​ໄວ.

ຂ່າວທີ່ກ່ຽວຂ້ອງ