ກອງ​ປະຊຸມ​ສຸດ​ຍອດ​ການທ່ອງທ່ຽວ​ເຈົ້າ​ຄອງ 5 ນະຄອນອັດ​ລົງ​ດ້ວຍ​ຜົນສຳເລັດ​ຢ່າງ​ຈົບງາມ

756 16 ຕ.ລ. 2019 ຂ່າວໜ້າ​ໜຶ່ງ
ກອງ​ປະຊຸມ​ສຸດ​ຍອດ​ການທ່ອງທ່ຽວ​ເຈົ້າ​ຄອງ 5 ນະຄອນອັດ​ລົງ​ດ້ວຍ​ຜົນສຳເລັດ​ຢ່າງ​ຈົບງາມ

    ກອງ​ປະຊຸມ​ສຸດ​ຍອດ​ການທ່ອງທ່ຽວ​ເຈົ້າ​ຄອງ 5 ນະຄອນ ບັນດາ​ປະເທດ​ລຸ່ມ​ແມ່ນ້ຳ​ຂອງ ຄັ້ງ​ທີ 5 ອັດ​ລົງ​ດ້ວຍ​ຜົນສຳເລັດ​ຢ່າງ​ຈົບງາມ ພາຍຫຼັງ​ດຳເນີນ​ມາ​ເປັນ​ເວລາ 2 ວັນ ເຊິ່ງ​ພິທີ​ປິດ​ກອງ​ປະຊຸມ​ດັ່ງກ່າວ ຈັດ​ຂຶ້ນ​ວັນ​ທີ 14 ຕຸລາ 2019 ຢູ່​ໂຮງແຮມ​ແລນ​ມາກ.

    ກອງ​ປະຊຸມ​ຜູ້ນຳ 5 ນະຄອນ ບັນດາ​ປະເທດ​ລຸ່ມ​ແມ່ນ້ຳ​ຂອງ ເປັນ​ໜຶ່ງ​ໃນ​ກອງ​ປະຊຸມ​ທີ່​ມີ​ຄວາມ​ສຳຄັນ​ຂອງ​ພາກ​ພື້ນ ໃນ​ຖານະ​ທີ່​ເປັນ​ເວທີ​ສຳລັບ​ຜູ້ນຳ​ນະຄອນ​ຂອງ​ປະເທດ​ສະມາຊິກ ໄດ້​ຮ່ວມ​ກັນ​ກຳນົດ​ຂອບ​ໃນ​ການ​ສົ່ງເສີມ​ການ​ຮ່ວມ​ມື​ດ້ານ​ການທ່ອງທ່ຽວ ທີ່​ມີ​ຄວາມ​ສຳຄັນ​ລວມ​ເຖິງ​ການ​ແບ່ງປັນ​ປະສົບ​ການ ແລະ ແນວທາງ​ໃນ​ການ​ດຳເນີນ​ໂຄງການ​ຕ່າງໆ​ທີ່​ພົ້ນ​ເດັ່ນ​ເປັນ​ປະໂຫຍດ​ຕໍ່​ສັງຄົມ.

    ປີ 2019 ນະຄອນຫຼວງ​ວຽງ​ຈັນ ໄດ້​ຮັບ​ກຽດ​ເປັນ​ເຈົ້າພາບ​ຈັດ​ກອງ​ປະຊຸມ​ເຈົ້າ​ໜ້າທີ່​ອາວຸໂສ​ການ​ທ່ອງ ທ່ຽວ ແລະ ກອງ​ປະຊຸມ​ສຸດ​ຍອດ​ການທ່ອງທ່ຽວ​ເຈົ້າ​ຄອງ 5 ນະຄອນ ບັນດາ​ປະເທດ​ລຸ່ມ​ແມ່ນ້ຳ​ຂອງ ຄັ້ງ​ທີ 5 ໂດຍ​ມີ​ການ​ນຳ ແລະ ຄະນະ​ຜູ້​ແທນ​ຈາກ​ນະຄອນຫຼວງ ແລະ ນະຄອນ​ຂອງ​ປະເທດ​ສະມາຊິກ​ເຂົ້າ​ຮ່ວມ.

    ນະຄອນຫຼວງ​ວຽງ​ຈັນ ແລະ ບັນດາ​ປະເທດ​ສະມາຊິກ​ໄດ້​ເອົາໃຈໃສ່​ການ​ພັດທະນາ​ເສດຖະກິດ ຕິດ​ພັນ​ການທ່ອງທ່ຽວ​ດ້ານ​ທຳ​ມະ​ຊາດ ປະຫວັດສາດ ແລະ ວັດທະນະທຳ ໂດຍ​ນຳ​ໃຊ້​ທ່າແຮງ​ຂອງ​ແຫຼ່ງ​ທ່ອງ​ທ່ຽວ ແລະ ຮ່ວມ​ມື​ຂອງ​ຫຼາຍ​ພາກສ່ວນ​ເສດຖະກິດ ເພື່ອ​ສ້າງ​ຄວາມ​ເຂັ້ມແຂງ​ໃຫ້​ທຸລະ​ກິດ​ຂະໜາດ​ກາງ ແລະ ຂະໜາດ​ນ້ອຍ ນອກ​ນີ້ ຄະນະ​ຜູ້​ແທນ​ແຕ່​ລະ​ນະຄອນ​ຍັງ​ໄດ້​ຮ່ວມ​ກັນ​ນຳ​ສະເໜີ​ໃນ​ຫົວຂໍ້​ຕ່າງໆ​ທີ່​ເປັນ​ທ່າແຮງ ແລະ ມີ​ຄວາມ​ສຳຄັນ ນະຄອນຫຼວງ​ບາງກອກ​ໄດ້​ນຳ​ສະເໜີ​ກ່ຽວ​ກັບ​ມາດຕະຖານ​ການ​ບໍ​ລິ​ການທ່ອງທ່ຽວ ນະຄອນຫຼວງ​ພະນົມ​ເປັນ​ນຳ​ສະເໜີ​ກ່ຽວ​ກັບ​ການ​ປົກ​ປັກ​ຮັກສາ​ມໍລະດົກ​ດ້ານ​ການທ່ອງທ່ຽວ ນະຄອນ​ຢາງ​ກຸ້ງ​ນຳ​ສະເໜີ​ກ່ຽວ​ກັບ​ການ​ຟື້ນ​ຟູ​ມໍລະດົກ​ດ້ານ​ວັດທະນະທຳ ແລະ ນະຄອນຫຼວງ​ວຽງ​ຈັນ​ນຳ​ສະເໜີ​ກ່ຽວ​ກັບ​ການ​ເຊື່ອມ​ຕໍ່​ດ້ານ​ການທ່ອງທ່ຽວ​ກັບ​ບັນດາ​ນະຄອນ​ປະເທດ​ລຸ່ມ​ແມ່ນ້ຳ​ຂອງ ນອກ​ນີ້ ບັນດາ​ຜູ້ນຳ​ແຕ່​ລະ​ນະຄອນ ຍັງ​ໄດ້​ແລກປ່ຽນ​ຄວາມ​ຄິດ​ເຫັນ ແລະ ເປັນ​ເອກ​ກະ​ພາບ​ໃນ​ການ​ສືບຕໍ່​ສົ່ງເສີມ​ກິດຈະກຳ​ທູດ​ຊາວ​ໜຸ່ມ​ການທ່ອງທ່ຽວ  ຕິດ​ກັບ​ການ​ພັດ​ທະນະ​ການທ່ອງທ່ຽວ​ດ້ານ​ວັດທະນະທຳ ເຊິ່ງ​ເປັນ​ສິ່ງ​ສຳຄັນ​ທີ່​ຈະ​ຊ່ວຍ​ຊຸກຍູ້​ການ​ພັດທະນາ​ບັນດາ​ນະຄອນ​ໃຫ້​ມີ​ຄວາມ​ຍືນ​ຍົງ.

    ບັນດາ​ຜູ້ນຳ​ແຕ່​ລະ​ນະຄອນ​ຂອງ​ປະເທດ​ສະມາຊິກ ໄດ້​ຮ່ວມ​ກັນ​ລົງ​ນາມ​ຖະແຫຼງການ​ວຽງ​ຈັນ ເພື່ອ​ສະ ແດງ​ເຈດ​ຈຳນົງ ແລະ ໃຫ້​ຄຳ​ໝັ້ນ​ຕໍ່​ກັນ​ໃນ​ການ​ສ້າງ​ນະຄອນ​ໃຫ້​ມີ​ຄວາມ​ຜາ​ສຸກ ສີວິໄລ ຍືນ​ຍົງ ແລະ ສີຂຽວ ພ້ອມ​ກັນ​ສ້າງ​ສັງຄົມ​ແຫ່ງ​ການ​ຮຽນ​ຮູ້ ລວມ​ເຖິງ​ການ​ແລກປ່ຽນ​ປະສົບ​ປະການ​ກ່ຽວ​ກັບ​ການ​ສ້າງ​ຄວາມ​ເຂັ້ມແຂງ​ໃຫ້​ຊຸມ​ຊົນ ໂດຍ​ຖື​ເອົາ​ການທ່ອງທ່ຽວ​ເປັນ​ຫຼັກ ຕິດ​ພັນ​ກັບ​ການ​ນຳ​ໃຊ້​ເຕັກ​ໂນ​ໂລ​ຊີ ເຂົ້າ​ມາ​ຮັບ​ໃຊ້​ໃນ​ການ​ບໍລິການ​ໃຫ້​ມີ​ຄວາມ​ສະດວກ ວ່ອງໄວ ແລະ ທັນ​ສະໄໝ.

    ໃນ​ວາລະ​ກອງ​ປະຊຸມ​ຄັ້ງ​ນີ້ ນະຄອນຫຼວງ​ວຽງ​ຈັນ ໄດ້​ສົ່ງ​ມອບ​ການ​ເປັນ​ເຈົ້າພາບ​ຈັດ​ກອງ​ປະຊຸມ​ສຸດ​ຍອດ​ການທ່ອງທ່ຽວ​ເຈົ້າ​ຄອງ 5 ນະຄອນ ບັນດາ​ປະເທດ​ລຸ່ມ​ແມ່ນ້ຳ​ຂອງ ຄັ້ງ​ທີ 6 ໃຫ້​ກັບ​ນະຄອນ​ໂຮ່​ຈີ​ມິງ ​ສສ​ຫວຽດນາມ ເປັນ​ເຈົ້າພາບ ຕາມ​ວາລະ​ຮອບ​ວຽນ​ຂອງ​ປະເທດ​ສະມາຊິກ ໃນ​ປີ 2020.

ຂ່າວທີ່ກ່ຽວຂ້ອງ