ເຂື່ອນ​ດອນ​ສະ​ໂຮງ ທົດ​ລອງ​ການ​ຜະລິດ​ກະແສ​ໄຟຟ້າ

970 15 ຕ.ລ. 2019 ຂ່າວໜ້າ​ໜຶ່ງ
ເຂື່ອນ​ດອນ​ສະ​ໂຮງ ທົດ​ລອງ​ການ​ຜະລິດ​ກະແສ​ໄຟຟ້າ

    ພີ​ທີ​ເປີດ​ທົດ​ລອງ​ການ​ຜະລິດ​ກະແສ​ໄຟຟ້າ​ເຄື່ອງ​ຈັກ​ໜ່ວຍ​ທີ 1 ໂຄງການ​ເຂື່ອນ​ໄຟຟ້າ​ດອນ​ສະ​ໂຮງ ທີ່​ຕັ້ງ​ຢູ່​ເມືອງ​ໂຂງ ແຂວງ​ຈຳປາ​ສັກ ຈັດ​ຂຶ້ນ​ວັນ​ທີ 11 ຕຸລາ 2019 ມີ​ທ່ານ ສົມ​ສະຫວາດ ເລັ່ງ​ສະ​ຫວັດ ທີ່​ປຶກສາ​ຄະນະ​ບໍລິຫານ​ງານ​ສູນ​ກາງ​ພັກ ອະດີດ​ຮອງ​ນາຍົກລັດຖະມົນຕີ ທ່ານ ຄຳ​ມະນີ ອິນ​ທິ​ລາດ ລັດຖະມົນຕີ​ກະຊວງ​ພະລັງ ງານ ແລະ ບໍ່​ແຮ່ ທ່ານ​ຮອງ​ເຈົ້າແຂວງ​ຈຳປາ​ສັກ ທ່ານ​ປະທານ​ບໍລິສັດ​ໄຟຟ້າ​ດອນ​ສະ​ໂຮງ ຈຳກັດ ແລະ ຕົວ​ແທນ​ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

    ທ່ານ ໂກ​ນັນ​ດຽວ ປະທານ​ບໍລິສັດ​ໄຟຟ້າ​ດອນ​ສະ​ໂຮງ ຈຳກັດ ໄດ້​ຂຶ້ນ​ລາຍ​ງານ​ຫຍໍ້​ກ່ຽວ​ກັບ​ຜົນ ສຳເລັດ​ຂອງ​ໂຄງການ ໂດຍ​ສະ​ເພ​​າ​ແມ່ນ​ພາຍຫຼັງ​ທີ່​ໄດ້​ຮັບ​ອະນຸຍາດ​ໃຫ້​ດຳເນີນ​ການ​ກໍ່ສ້າງ​ຈາກ​ລັດຖະບານ​ລາວ ບໍລິສັດ​ໄດ້​ສຸມ​ທຸກ​ກຳລັງ​ເຂົ້າ​ໃສ່​ຕາມ​ແຕ່​ລະ​ໜ້າ​ວຽກ​ໃຫ້​ສຳເລັດ​ຕາມ​ແຜນການ ເປັນຕົ້ນ​ໜ້າ​ວຽກ​ສຳຄັນ​ຂອງ​ໄລຍະ​ທ້າຍ ເລັ່ງ​ຕິດ​ຕັ້ງ​ເຄື່ອງ​ຈັກ​ປັ່ນ​ໄຟ​ຮອດ​ປັດຈຸບັນ​ສຳເລັດ​ໂດຍ​ພື້ນຖານ ເຊິ່ງ​ເຄື່ອງ​ຈັກ​ໜ່ວຍ​ທີ 1 ມີ​ກຳລັງ​ຕິດ​ຕັ້ງ 65 ເມ​ກາ​ວັດ ຄາດ​ວ່າ​ຮອດ​ທ້າຍ​ປີ 2019 ຈະ​ສາມາດ​ເປີດ​ນຳ​ໃຊ້​ໃຫ້​ໄດ້​ທັງ 4 ໜ່ວຍ​ທີ່​ມີ​ກຳລັງ​ຕິດ​ຕັ້ງ​ທັງ​ໝົດ 260 ເມ​ກາ​ວັດ.

    ທ່ານ ຄຳ​ມະນີ ອິນ​ທິ​ລາດ ໄດ້​ກ່າວ​ວ່າ: ໂຄງການ​ເຂື່ອນ​ໄຟຟ້າ​ດອນ​ສະ​ໂຮງ ແມ່ນ​ໂຄງການ​ຍຸດ​ທະ​ສາດ​ຂອງ​ລັດຖະບານ​ໃນ​ການ​ພັດທະນາ​ເຂື່ອນ​ໄຟຟ້າ​ພະລັງ​ນ້ຳ ເຊິ່ງ​ເປັນ​ໂຄງການ​ຂະໜາດ​ໃຫຍ່ 1 ໃນ 2 ເຂື່ອນ​ທີ່​ກຳລັງ​ດຳເນີນ​ການ​ກໍ່ສ້າງ​ຢູ່​ແມ່ນ້ຳ​ຂອງ ເປັນ​ເຂື່ອນ​ທີ່​ມີ​ລັກສະນະ​ພິເສດ ມີ​ຜົນ​ປະໂຫຍດ​ສູງ​ສຸດ ແຕ່​ມີ​ຜົນ​ກະທົບ​ຕໍ່​ທຳ​ມະ​ຊາດ ແລະ ສັງຄົມ​ໜ້ອຍ​ທີ່​ສຸດ​ຖ້າ​ທຽບໃສ່​ເຂື່ອນ​ອື່ນໆ ເຊິ່ງ​ເຂື່ອນ​ດອນ​ສະ​ໂຮງ​ແຫ່ງ​ນີ້​ສ່ວນ​ຫຼາຍ​ແມ່ນ​ສົ່ງ​ຂາຍ​ໃຫ້​ປະເທດ​ກຳປູເຈຍ ພ້ອມ​ນີ້ ທ່ານ​ລັດຖະມົນຕີ​ຍັງ​ໄດ້​ຮຽກຮ້ອງ​ໃຫ້​ບໍລິສັດ​ຈົ່ງ​ໄດ້​ເອົາໃຈໃສ່​ການ​ຄຸ້ມ​ຄອງ​ການ​ຜະລິດ ການ​ບຳລຸງ​ຮັກສາ​ໂຄງການ​ໃຫ້​ມີ​ປະສິດທິພາບ ແລະ ມີ​ຄວາມ​ປອດ​ໄພ ພ້ອມ​ທັງ​ສືບຕໍ່​ດຳເນີນ​ໂຄງການ​ກໍ່ສ້າງŒຕິດ​ຕັ້ງ​ເຄື່ອງ​ຈັກ​ໄຟຟ້າ​ສ່ວນ​ທີ່​ເຫຼືອ​ໃຫ້​ສຳເລັດ​ຕາມ​ແຜນການ ສືບຕໍ່​ປະຕິບັດ​ພັນທະ ແກ້​ໄຂ​ວຽກ​ງານ​ດ້ານ​ສິ່ງແວດລ້ອມ ແລະ ສັງຄົມ​ໃຫ້​ຖືກຕ້ອງ​ຄົບ​ຖ້ວນ​ໄດ້​ດີ ໂດຍ​ປະສານ​ງານ​ກັບ​ພາກສ່ວນ​ກ່ຽວຂ້ອງ​ຢ່າງ​ແໜ້ນ​ແຟ້ນ ແລະ ກົມກຽວ ພ້ອມ​ນີ້ ກໍ​ສະເໜີ​ມາ​ຍັງ​ການ​ນຳ​ແຂວງ ເມືອງ ແລະ ອົງການ​ປົກຄອງ​ທ້ອງຖິ່ນ ເປັນຕົ້ນ ບັນດາ​ບ້ານ ກຸ່ມ​ບ້ານ​ທີ່ຢູ່​ບໍລິເວນ​ໃກ້​ຄຽງ​ໂຄງການ​ເຂື່ອນ​ໄຟຟ້າ​ດອນ​ສະ​ໂຮງ ນັບ​ທັງ​ຂະແໜງການ​ອົງການ ພາກສ່ວນ​ຕ່າງໆ​ທີ່​ກ່ຽວຂ້ອງ​ຈົ່ງ​ໄດ້​ເອົາໃຈໃສ່​ນຳພາ​ສຶກ​ສາ​ອົບຮົມ​ພະນັກງານ ທະຫານ ຕຳຫຼວດ ແລະ ປະຊາຊົນ​ບັນດາເຜົ່າ ເພື່ອ​ພ້ອມ​ກັນ​ປະກອບສ່ວນ​ເຂົ້າ​ໃນ​ການ​ພັດທະນາ​ໂຄງການ​ໃຫ້​ສຳເລັດ​ຢ່າງ​ສົມບູນ​ຕາມ​ແຜນ.

ຂ່າວທີ່ກ່ຽວຂ້ອງ