ຣີ​ສອດ​ປາກ​ນ້ຳ​ຄານ-ບໍລິສັດ ແສງ​ເພັດ​ກໍ່ສ້າງ ຄອງ​ຂັນ​ຊະນະ​ເລີດ​ຊ່ວງ​ເຮືອ​ປະເພນີ​ທ່າ​ວັດ​ຈັນ

670 15 ຕ.ລ. 2019 ຂ່າວໜ້າ​ໜຶ່ງ
ຣີ​ສອດ​ປາກ​ນ້ຳ​ຄານ-ບໍລິສັດ ແສງ​ເພັດ​ກໍ່ສ້າງ ຄອງ​ຂັນ​ຊະນະ​ເລີດ​ຊ່ວງ​ເຮືອ​ປະເພນີ​ທ່າ​ວັດ​ຈັນ

     ບຸນ​ອອກ​ພັນ​ສາ​ປະ​ວໍລະນາ ແລະ ບຸນຊ່ວງເຮືອ​ເວົ້າ​ລວມ ເວົ້າ​ສະເພາະ​ແມ່ນ​ບຸນຊ່ວງເຮືອ​ທ່າ​ວັດ​ຈັນ ເມືອງ​ຈັນທະ​ບູ​ລີ ນະຄອນຫຼວງ​ວຽງ​ຈັນ ແມ່ນ​ຮີດ 12 ຄອງ 14 ແລະ ແມ່ນ​ຮີດຄອງ​ປະເພນີ​ອັນ​ດີງາມ​ຂອງ​ຊາດ​ທີ່​ໄດ້​ສືບ​ທອດ​ກັນ​ມາ​ແຕ່​ບູຮານ ເຊິ່ງ​ການ​ແຂ່ງຂັນ​ຊ່ວງ​ເຮືອ​ໃນ​ມື້ບຸນ​ອອກ​ພັນ​ສາ​ຂອງ​ທຸກໆ​ປີ​ແມ່ນ​ກີລາ​ທາງນ້ຳ​ປະເພດ​ໜຶ່ງ ຈັດ​ຂຶ້ນ​ເພື່ອ​ເປັນ​ການ​ສ້າງ​ໂອກາດ​ໃຫ້​ປະຊາຊົນ​ໄດ້​ມາ​ພົບ​ປະ ນອກຈາກ​ນັ້ນ​ຍັງ​ເປັນ​ການ​ສ້າງ​ໃຫ້​ປະຊາຊົນ​ໄດ້​ເຕົ້າໂຮມ​ຄວາມ​ສາມັກຄີ.

    ການ​ຈັດ​ງານ​ດັ່ງກ່າວ ໃນ​ປີ​ນີ້ ເມືອງ​ຈັນທະ​ບູ​ລີ​ໄດ້​ສົມທົບ​ກັບ​ເມືອງ​ໃກ້​ຄຽງ​ຄື: ເມືອງ ສີ​ສັດຕະ​ນາກ ແລະ ເມືອງ​ສີ​ໂຄດ​ຕະບອງ ກະຊວງ ແລະ ພາກສ່ວນ​ກ່ຽວຂ້ອງ​ຂັ້ນ​ຕ່າງໆ​ໄດ້​ຈັດ​ງານ​ບຸນ​ອອກ​ພັນ​ສາ​ປະ​ວໍລະນາ ແລະ ບຸນຊ່ວງເຮືອ​ປະເພນີ​ທ່າ​ວັດ​ຈັນ ໂດຍ​ໄດ້​ເລີ່ມ​ສະເຫຼີມສະຫຼອງ​ມາ​ແຕ່​ວັນ​ທີ 10 ຕຸລາ​ຜ່ານ​ມາ ດ້ວຍ​ບັນຍາກາດ​ເບີກບານ​ມ່ວນຊື່ນ ສະເພາະ​ການ​ແຂ່ງຂັນ​ເຮືອ​ຊ່ວງ​ປະເພນີ ຍິງ-ຊາຍ ໄດ້​ຈັດ​ຂຶ້ນ​ວັນ​ທີ 14 ຕຸລາ ທີ່​ຟາມ​ກຳມະການ​ຕໍ່ໜ້າ​ໂຮງແຮມ​ແລນ​ມາກ​ລີ​ເວີ​ໄຊ ເປັນ​ກຽດ​ເຂົ້າ​ຮ່ວມ​ຊົມ ແລະ ມອບ​ລາງວັນ​ຂອງ​ທ່ານ ສີ​ຫຸນ ສິດທິ​ລື​ໄຊ ຮອງ​ເຈົ້າ​ຄອງ​ນະຄອນຫຼວງ​ວຽງ​ຈັນ ທ່ານ​ນາງ ບົວ​ລອນ ວົງ​ດາລາ​ແສນ ເຈົ້າເມືອງ​ຈັນທະ​ບູ​ລີ ຄະນະ​ຜູ້​ແທນ 5 ປະເທດ​ລຸ່ມ​ນ້ຳຂອງ ການ​ນຳ​ນະຄອນຫຼວງ ພ້ອມ​ດ້ວຍ ທ່ານ​ຮອງ​ເຈົ້າແຂວງ​ໜອງ​ຄາຍ ທູຕານຸທູດ ແລະ ມວນ​ຊົນ​ຊາວ​ນະຄອນຫຼວງ​ວຽງ​ຈັນ​ເຂົ້າ​ຮ່ວມ.

    ສຳລັບ​ການ​ແຂ່ງຂັນ​ເຮືອ​ຊ່ວງ​ໃນ​ຄັ້ງ​ນີ້​ປະກອບ​ມີ​ເຮືອ​ທັງ​ໝົດ 22 ລຳ ຜ່ານ​ການ​ແຂ່ງຂັນ​ສະເພາະ ເຮືອ​ປະເພນີ​ຊາຍ 55 ສີພາຍ ອັນ​ດັບ 1 ເຮືອ​ຣີ​ສອດ​ປາກ​ນ້ຳ​ຄານ (ແຂວງ​ຫຼວງ​ພະ​ບາງ) ອັນ​ດັບ 2 ທະນາຄານ​ຮ່ວມ​ພັດທະນາ​ລາວ (JDB) ອັນ​ດັບ 3 ເຮືອ​ຄອນ​ສະຫວັນ 99 (1) ອັນ​ດັບ 4 ເຮືອ​ຄອນ​ສະຫວັນ 99 (2) ເຮືອ​ປະເພນີ​ຍິງ 55 ສີພາຍ ອັນ​ດັບ 1 ເຮືອ ບໍລິສັດ ແສງ​ເພັດ​ກໍ່ສ້າງ ອັນ​ດັບ​ທີ 2 ເຮືອ​ຄອນ​ສະຫວັນ 99 (1)  ອັນ​ດັບ 3 ເຮືອ​ຄອນ​ສະຫວັນ 99 (2)  ອັນ​ດັບ 4 ເຮືອ​ທ່າ​ພະ ສຳລັບ​ປະເພດ​ເຮືອ​ສູດ​ຊາຍ ອັນ​ດັບ 1 ເຮືອ​ແສງ​ເພັດ​ກໍ່ສ້າງ ອັນ​ດັບ 2 ເຮືອ​ທະນາຄານ​ຮ່ວມ​ພັດທະນາ​ລາວ (JDB) ອັນ​ດັບ 3 ເຮືອ​ອຸດສາຫະກຳ​ເຫຼັກ ອັນ​ດັບ 4 ເຮືອ​ບໍລິສັດ​ເຊື້ອ​ໄຟ​ເອ​ເຊຍ ສ່ວນ​ເຮືອ 12 ສີພາຍ ອັນ​ດັບ 1 ເຮືອ​ນາວາ​ສັກສິດ ອັນ​ດັບ 2 ເຮືອ​ບ້ານ​ໄຊ​ສະຫວ່າງ ອັນ​ດັບ​ທີ 3 ເຮືອ ບ້ານ​ໄຊ​ສະຖານ ອັນ​ດັບ​ທີ 4 ເຮືອ ສົມ​ຈັນ ມິ​ນິ​ມາກ.

    ສຳລັບ​ການ​ແຂ່ງຂັນ​ເຮືອ​ໄຟ​ງາມ ອັນ​ດັບ 1 ໄດ້ແກ່​ເຮືອ​ໄຟ​ເຂດ 2 ທົ່ງ​ຕູມ ໄດ້​ຮັບ​ລາງວັນ 4 ລ້ານ​ກີບ ອັນ​ດັບ 2 ເຮືອ​ໄຟ​ເຂດ 1 ວັດ​ຈັນ  ໄດ້​ຮັບ​ລາງວັນ 3 ລ້ານ​ກີບ ອັນ​ດັບ​ທີ 3 ເຮືອ​ໄຟ​ເຂດ 4 ໂພນ​ຕ້ອງ ໄດ້​ຮັບ​ລາງວັນ 2 ລ້ານ​ກີບ.    

    ສ່ວນ​ລາງວັນ​ເຮືອ​ປະເພນີ ຍິງ-ຊາຍ ລາງວັນ​ທີ 1 ໄດ້​ຮັບ​ຂັນເງິນ​ໜຶ່ງ​ໜ່ວຍ ໜັກ 1 ກິ​ໂລ ພ້ອມ​ເງິນສົດ 16 ລ້ານ​ກີບ ລາງວັນ​ທີ 2 ຂັນເງິນ​ໜຶ່ງ​ໜ່ວຍ​ໜັກ 0,75 ກິ​ໂລ ເງິນສົດ 12 ລ້ານ​ກີບ ລາງວັນ​ທີ 3 ຂັນ​ໜຶ່ງ​ໜ່ວຍ ໜັກ 0,5 ກິ​ໂລ ເງິນສົດ 8 ລ້ານ​ກີບ ອັນ​ດັບ 4 ໄດ້​ຮັບ​ເງິນສົດ 6 ລ້ານ​ກີບ ລາງວັນ​ເຮືອ​ສູດ​ຊາຍ ລາງວັນ​ທີ 1 ໄດ້​ຮັບ​ລາງວັນ​ຂັນເງິນ​ໜຶ່ງ​ໜ່ວຍ ໜັກ 1 ກິ​ໂລ ເງິນສົດ 12 ລ້ານ​ກີບ ລາງວັນ​ທີ 2 ຂັນເງິນ​ໜຶ່ງ​ໜ່ວຍ ໜັກ 0,75 ກິ​ໂລ ເງິນສົດ 10 ລ້ານ​ກີບ ລາງວັນ​ທີ 3 ຂັນເງິນ​ໜຶ່ງ​ໜ່ວຍ​ໜັກ 0,5 ກິ​ໂລ ເງິນສົດ 8 ລ້ານ​ກີບ ລາງວັນ​ທີ 4 ເງິນສົດ 6 ລ້ານ​ກີບ ສຳລັບ​ເຮືອ 12 ສີພາຍ ໄດ້​ຮັບ​ລາງວັນ​ທີ 1 ຂັນ​ໂລ້ 1 ໜ່ວຍ ເງິນ 5 ລ້ານ​ກີບ ລາງວັນ​ທີ 2 ຂັນ​ໂລ້ 1 ໜ່ວຍ ເງິນສົດ 4 ລ້ານ​ກີບ ລາງວັນ​ທີ 3 ໂລ້​ໜຶ່ງ​ໜ່ວຍ ເງິນສົດ 3 ລ້ານ​ກີບ ລາງວັນ​ທີ 4 ເງິນສົດ 2 ລ້ານ​ກີບ.

ຂ່າວທີ່ກ່ຽວຂ້ອງ