ວາງສະແດງ​ຮູບ​ພາບ​ສະຫຼອງ​ວັນ​ສ້າງຕັ້ງ​ສາຍ​ພົວພັນ​ການ​ທູດ

542 15 ຕ.ລ. 2019 ຂ່າວໜ້າ​ໜຶ່ງ
ວາງສະແດງ​ຮູບ​ພາບ​ສະຫຼອງ​ວັນ​ສ້າງຕັ້ງ​ສາຍ​ພົວພັນ​ການ​ທູດ

     ວັນ​ທີ 11 ຕຸລາ 2019 ທີ່​ຫໍ​ພິ​ພິ​ທະ​ພັນ​ໄກສອນ ພົມວິຫານ ຈັດ​ພີ​ທີ​ເປີດ​ງານ​ວາງສະແດງ​ຮູບ​ພາບ ພາຍ​ໃຕ້​ຫົວຂໍ້ “ສາຍໃຈ​ລາວ-ຫວຽດນາມ”ເພື່ອ​ເປັນ​ການ​ສະເຫຼີມສະຫຼອງ​ວັນ​ສ້າງຕັ້ງ​ສາຍ​ພົວພັນ​ການ​ທູດ​ລາວ-ຫວຽດນາມ ຄົບຮອບ 57 ປີ ແລະ ວັນ​ປະກາດ​ເອກະລາດ​ຂອງ​ລາວ ຄົບຮອບ 74 ປີ ມີ​ທ່ານ ຄຳ​ຜາ ພິມ​ມະ​ສອນ ຮອງ​ຫົວໜ້າ​ຫ້ອງ​ວ່າການ​ສູນ​ກາງ​ພັກ ທ່ານ ສິງ​ທອງ ສິງຫາ​ປັນຍາ ຮັກສາ​ການ​ຫົວໜ້າ​ຄະນະ​ຮັບຜິດຊອບ​ພິ​ພິ​ທະ​ພັນ​ໄກສອນ ພົມວິຫານ ທ່ານ ເຈີນ ເຕີນ ຟ໋ອງ ວ່າການ​ຫົວໜ້າ​ພະ​ແນກ​ວັດທະນະທຳ ກີລາ ແລະ ທ່ອງ​ທ່ຽວ ແຂວງ​ເຊິນ​ລາ ​ສສ ຫວຽດນາມ ພ້ອມ​ດ້ວຍ​ຕາງໜ້າ​ຈາກ​ບັນດາ​ກະຊວງ ອົງການ ແລະ ຂະແໜງການ​ກ່ຽວຂ້ອງ.

   ທ່ານ ສິງ​ທອງ ສິງຫາ​ປັນຍາ ກ່າວ​ວ່າ:  ເພື່ອ​ເປັນ​ການ​ຮ່ວມ​ມື​ລະຫວ່າງ​ຄະນະ​ຮັບຜິດຊອບ​ພິ​ພິ​ທະ​ພັນ ໄກສອນ ພົມວິຫານ ກັບ​ຫໍ​ພິ​ພິ​ທະ​ພັນ​ແຂວງ​ເຊິນ​ລາ ທີ່​ສະແດງ​ໃຫ້​ເຫັນ​ເຖິງ​ມູນເຊື້ອ​ຄວາມ​ສາມັກຄີ​ພິເສດ ແລະ ການ​ຮ່ວມ​ມື​ຮອບດ້ານ​ລະຫວ່າງ ປະຊາຊົນ 2 ຊາດ ລາວ-ຫວຽດນາມ ທີ່​ໄດ້​ສາມັກຄີ​ຊ່ວຍເຫຼືອ​ເຊິ່ງ​ກັນ ແລະ ກັນ ໃນ​ໄລຍະ​ສົງຄາມ​ຕໍ່ສູ້​ກູ້​ຊາດ​ຈົນ​ເຖິງ​ໄລຍະ​ສ້າງສາ​ພັດທະນາ​ປະເທດ​ຊາດ​ໃນ​ປັດຈຸບັນ ພ້ອມ​ນີ້ ຍັງ​ເປັນ​ການ​ໂຄສະນາ​ສຶກ​ສາ​ອົບຮົມ​ໃຫ້​ພະນັກງານ ສະມາຊິກ​ພັກ ຕະຫຼອດ​ເຖິງ​ປະຊາຊົນ​ລາວ​ບັນດາເຜົ່າ​ໃຫ້​ຮັບ​ຮູ້ ແລະ ເຂົ້າໃຈ​ກ່ຽວ​ກັບ​ມູນເຊື້ອ​ແຫ່ງ​ສາຍ​ພົວພັນ​ມິດຕະພາບ​ຄວາມ​ສາມັກຄີ​ພິເສດ ແລະ ການ​ຮ່ວມ​ມື​ຮອບດ້ານ ລະຫວ່າງ 2 ພັກ 2 ລັດ ແລະ ປະຊາຊົນ 2 ຊາດ ລາວ-ຫວຽດນາມ​ໃຫ້​ເລິກເຊິ່ງ ເປັນ​ເຈົ້າ​ການ​ທະນຸ​ຖະໜອມ​ເພີ່ມ​ພູນ​ຄູນ​ສ້າງ​ມູນເຊື້ອ​ດັ່ງກ່າວ​ໃຫ້​ຈະເລີນ​ງອກ​ງາມ​ຍິ່ງ​ຂຶ້ນ ສືບຕໍ່​ເສີມ​ຂະຫຍາຍ​ມູນເຊື້ອ​ໃນ​ເງື່ອນ ໄຂ​ໃໝ່​ສາຍ​ພົວພັນ​ລາວ-ຫວຽດນາມ ແລະ ຫວຽດນາມ-ລາວ ແມ່ນ​ການ​ເຕົ້າໂຮມ​ສິ່ງ​ຍອດ​ຍິ່ງ​ແຫ່ງ​ມານະ​ຈິດ ແລະ ຄວາມ​ມຸ່ງ​ມາດ​ປາດ​ຖະ​ໜາ​ອັນ​ແຮງ​ກ້າ ທັງ​ຜົນ​ປະໂຫຍດ ແລະ ລວມ​ທັງ​ເລືອດ​ເນື້ອ​ເຫື່ອແຮງ​ຂອງ​ຖັນ​ແຖວ​ການ​ນຳ ແລະ ປະຊາຊົນ​ທັງ 2 ປະເທດ​ມາ​ແຕ່​ດົນ​ນານ ທີ່​ປະທານ ໂຮ່​ຈີ​ມິງ ແລະ ປະທານ ໄກສອນ ພົມວິຫານ ເປັນ​ຜູ້​ກໍ່​ຕັ້ງ​ການ​ນຳ​ຮຸ່ນ​ຕ່າງໆ ແລະ ປະຊາຊົນ​ທັງ​ສອງ​ຊາດ​ໄດ້​ເພີ່ມ​ພູນ​ຄູນ​ສ້າງ ເຮັດ​ໃຫ້​ສາຍ​ພົວພັນ​ມິດຕະພາບ​ລາວ-ຫວຽດນາມ ໄດ້​ຕິດ​ພັນ​ຢ່າງ​ສະໜິດ​ແໜ້ນ​ຢ່າງ​ສຸດ​ກົກ​ສຸດ​ປາຍ​ທີ່​ໃສ​ແຈ້ງ ແຫ່ງ​ຂະ​ບວນ​ການ​ຕໍ່ສູ້​ເພື່ອ​ເອກະລາດ ອິດສະຫຼະພາບ ແລະ ຄວາມ​ກ້າວໜ້າ​ຂອງ​ສັງຄົມ​ຕະຫຼອດ​ມາ.

   ວັນ​ປະກາດ​ເອກະລາດ​ຂອງ​ລາວ 12 ຕຸລາ 1945 ແມ່ນ​ວັນ​ທີ່​ມີ​ຄວາມ​ໝາຍ​ສຳຄັນ​ທາງ​ປະຫວັດສາດ​ຂອງ​ຊາດ ຍັງ​ເປັນ​ວັນ​ແຫ່ງ​ການ​ປະກາດ​ເອກະລາດ​ຊາດ​ລາວ​ຕໍ່​ຊາວ​ໂລກ​ໄດ້​ຮັບ​ຮູ້​ວ່າ ຜືນ​ແຜ່ນດິນ​ແຫ່ງ​ນີ້​ແມ່ນ​ປະເທດ​ລາວ ແມ່ນ​ຄົນ​ລາວ​ເປັນ​ເຈົ້າ​ຂອງ​ປະເທດ​ຊາດ ອຳນາດ​ອະທິປະ​ໄຕ ແລະ ຜືນ​ແຜ່ນດິນ​ອັນ​ຄົບ​ຖ້ວນ ໂດຍ​ໄດ້​ສ້າງ​ເງື່ອນໄຂ​ໃຫ້​ແກ່​ການ​ປະກາດ​ເອກະລາດ 12 ຕຸລາ ເຊິ່ງ​ເປັນ​ຂີດ​ໝາຍ​ແຫ່ງ​ໄຊຊະນະ​ຂອງ​ການ​ຕໍ່ສູ້​ອັນ​ພິລະ​ອາດ​ຫານ ຄວາມ​ສາມັກຄີ ແລະ ການ​ເສຍ ສະຫຼະ​ອັນ​ໃຫຍ່​ຫຼວງ​ຂອງ​ກອງທັບ ແລະ ປະຊາຊົນ​ລາວ ຮ່ວມ​ສຳພັນ​ສູ້​ຮົບ​ຄຽງ​ບ່າ​ຄຽງ​ໄຫຼ່​ກັບ​ກອງທັບ ແລະ ປະຊາຊົນ​ອ້າຍ​ນ້ອງ​ຫວຽດນາມ ພາຍ​ໃຕ້​ການ​ນຳພາ​ຂອງ​ພັກ​ກອມ​ມູ​ນິດ​ອິນດູຈີນ ກໍ​ຄື ພັກ​ປະຊາຊົນ​ປະຕິວັດ​ລາວ​ໃນ​ໄລຍະ​ຕໍ່​ມາ ນອກຈາກ​ນີ້ ໃນ​ພິທີ​ຍັງ​ໄດ້​ຮັບ​ຊົມ​ງານ​ວາງສະແດງ​ຮູບ​ພາບ​ອີກ​ດ້ວຍ.

ຂ່າວທີ່ກ່ຽວຂ້ອງ