ມອບ​ຮັບ​ໜ້າທີ່​ລັດຖະມົນຕີ ​ຜທ ຜູ້​ເກົ່າ ແລະ ຜູ້​ໃໝ່

482 15 ຕ.ລ. 2019 ຂ່າວໜ້າ​ໜຶ່ງ
ມອບ​ຮັບ​ໜ້າທີ່​ລັດຖະມົນຕີ ​ຜທ ຜູ້​ເກົ່າ ແລະ ຜູ້​ໃໝ່

    ພິທີ​ມອບ-ຮັບ​ໜ້າທີ່​ເລຂາ​ຄະນະ​ພັກ ລັດຖະມົນຕີ​ກະຊວງ​ແຜນການ ແລະ ການ​ລົງທຶນ (​ຜທ) ລະຫວ່າງ ທ່ານ ສຸພັນ ແກ້ວ​ມີ​ໄຊ ກຳມະການ​ສູນ​ກາງ​ພັກ ລັດຖະມົນຕີ​ກະຊວງ ​ຜທ ຜູ້​ເກົ່າ ແລະ ທ່ານ ສອນ​ໄຊ ສີ​ພັນ​ດອນ ກຳມະການ​ກົມ​ການເມືອງ​ສູນ​ກາງ​ພັກ ຮອງ​ນາຍົກລັດຖະມົນຕີ ເປັນ​ວ່າການ​ລັດຖະມົນຕີ​ກະຊວງ ​ຜທ ຜູ້ ໃໝ່ ຈັດ​ຂຶ້ນ​ວັນ​ທີ 11 ຕຸລາ 2019 ທີ່​ກະຊວງ ​ຜທ ເປັນ​ກຽດ​ເຂົ້າ​ຮ່ວມ​ຂອງ​ທ່ານ ທອງ​ລຸນ ສີ​ສຸ​ລິດ ນາຍົກ ລັດຖະມົນຕີ ຕາງໜ້າ​ຈາກ​ຄະນະ​ຈັດ​ຕັ້ງ​ສູນ​ກາງ​ພັກ ກະຊວງ​ກ່ຽວຂ້ອງ ບັນດາ​ທ່ານ​ລັດຖະມົນຕີ ຮອງ​ລັດ​ຖະ ມົນຕີ ຄະນະ​ນຳ ແລະ ພະນັກງານ​ຫຼັກ​ແຫຼ່ງ​ພາຍ​ໃນ​ກະຊວງ​ເຂົ້າ​ຮ່ວມ.

   ອີງ​ຕາມ​ມະຕິ​ຕົກລົງ​ຂອງ​ກົມ​ການເມືອງ​ສູນ​ກາງ​ພັກ ວ່າ​ດ້ວຍ​ການ​ອະນຸມັດ​ໃຫ້​ພະນັກງານ​ເຂົ້າ​ຮັບ​ອຸດ    ໜູນ​ບຳນານ ອີງ​ຕາມ​ການ​ຕົກລົງ​ເຫັນ​ດີ​ໃນ​ກອງ​ປະຊຸມ​ກົມ​ການເມືອງ​ສູນ​ກາງ​ພັກ ອີງ​ຕາມ​ການ​ສະເໜີ​ຂອງ​ຄະນະ​ຈັດ​ຕັ້ງ​ສູນ​ກາງ​ພັກ ດັ່ງນັ້ນ ກົມ​ການ ເມືອງ​ສູນ​ກາງ​ພັກ ອອກ​ມະຕິ​ຕົກລົງ​ໃຫ້​ທ່ານ ສຸພັນ ແກ້ວ​ມີ​ໄຊ ກຳມະການ​ສູນ​ກາງ​ພັກ ເລຂາ​ຄະນະ​ພັກ ລັດຖະມົນຕີ​ກະຊວງ ​ຜທ ເຂົ້າ​ຮັບ​ເບ້ຍ​ບຳນານ ແລະ ແຕ່ງຕັ້ງ​ທ່ານ ສອນ​ໄຊ ສີ​ພັນ​ດອນ ກຳມະການ​ກົມ​ການເມືອງ​ສູນ​ກາງ​ພັກ ຮອງ​ນາຍົກລັດຖະມົນຕີ ເປັນ​ເລຂາ​ຄະນະ​ພັກ ວ່າການ​ລັດຖະມົນຕີ​ກະຊວງ ​ຜທ ຜູ້​ໃໝ່ ຖື​ວ່າ​ຄວບ​ສອງ​ຕຳແໜ່ງ ທັງ​ເປັນ​ຮອງ​ນາຍົກລັດຖະມົນຕີ ແລະ ທັງ​ເປັນ​ວ່າການ​ລັດຖະມົນຕີ​ກະຊວງ ​ຜທ.

ໂອກາດ​ນີ້ ທ່ານ ສຸພັນ ແກ້ວ​ມີ​ໄຊ ໄດ້​ລາຍ​ງານ​ໂດຍ​ຫຍໍ້​ກ່ຽວ​ກັບ​ສະພາບ​ການ​ນຳພາ​ວຽກ​ງານ​ຂະແໜງ ແຜນການ ແລະ ການ​ລົງທຶນ ໃນ​ໄລຍະ​ເກືອບ 4 ປີຜ່ານມາ ແລະ ບັນດາ​ໜ້າ​ວຽກ​ຈຸດ​ສຸມ​ທີ່​ຍັງ​ຈະ​ຕ້ອງ​ສືບຕໍ່​ຈັດ​ຕັ້ງ​ປະຕິບັດ​ໃນຕໍ່ໜ້າ ຈາກ​ນັ້ນ ທ່ານ ທອງ​ລຸນ ສີ​ສຸ​ລິດ ໄດ້​ໃຫ້​ກຽດ​ມີ​ຄຳ​ເຫັນ ແລະ ໂອ້​ລົມ​ຕໍ່​ລັດຖະມົນຕີ​ກະຊວງ ​ຜທ ຜູ້​ເກົ່າ ແລະ ຜູ້​ໃໝ່ ກໍ​ຄື ພະນັກງານ​ພາຍ​ໃນ​ຂະແໜງ​ແຜນການ ແລະ ການ​ລົງທຶນ ເຊິ່ງ​ໄດ້​ຍົກ​ໃຫ້​ເຫັນ​ບັນດາ​ຜົນງານ​ທີ່​ກະຊວງ ​ຜທ ຍາດ​ມາ​ໄດ້ ແລະ ໃຫ້​ທິດ​ຊີ້​ນຳ​ຕໍ່​ກັບ​ບັນດາ​ໜ້າ​ວຽກ​ຈຸດ​ສຸມ​ທີ່​ຈະ​ຕ້ອງ​ໄດ້​ເອົາໃຈໃສ່​ໃນຕໍ່ໜ້າ.

    ຕອນ​ທ້າຍ ທ່ານ ສອນ​ໄຊ ສີ​ພັນ​ດອນ ໄດ້​ມີ​ຄຳ​ເຫັນ​ກ່າວ​ຮັບ​ໜ້າທີ່ ແລະ ກ່າວ​ຮັບ​ຄຳ​ໂອວາດ ເຊິ່ງ​ໄດ້​ສະແດງ​ຄວາມ​ຮູ້ບຸນຄຸນ​ມາ​ຍັງ​ສູນ​ກາງ​ພັກ​ທີ່​ໄດ້​ໃຫ້​ຄວາມ​ໄວ້​ເນື້ອ​ເຊື່ອ​ໃຈ ແລະ ໄດ້​ມອບ​ໝາຍ​ໜ້າທີ່​ສຳຄັນ​ນີ້​ໃຫ້ ພ້ອມ​ທັງ​ສະແດງ​ຄວາມ​ຂອບໃຈ​ມາ​ຍັງ​ຄະນະ​ບໍລິຫານ​ງານ​ພັກ​ກະຊວງ ​ຜທ ຕະຫຼອດ​ຮອດ​ສະມາຊິກ​ພັກ ແລະ ພະນັກງານ​ທົ່ວ​ຂະແໜງ​ແຜນການ ແລະ ການ​ລົງທຶນ ທີ່​ໄດ້​ສຸມ​ທຸກ​ສະຕິ​ປັນຍາ​ເຂົ້າ​ໃນ​ການຈັດຕັ້ງ​ຜັນ​ຂະຫຍາຍ​ວຽກ​ງານ ຈົນ​ໄດ້​ຮັບ​ຜົນສຳເລັດ​ເປັນ​ກ້າວໆ ແລະ ໄດ້​ໃຫ້​ຄຳ​ໝັ້ນ​ສັນຍາ​ວ່າ​ຈະ​ສືບຕໍ່​ມູນເຊື້ອ​ອັນ​ດີ​ງານ​ຂອງ​ຂະ   ແໜງ​ແຜນການ ແລະ ການ​ລົງທຶນ ແລະ ຈະ​ສຸມ​ທຸກ​ສະຕິ​ປັນຍາ ເພື່ອ​ຕອບ​ສະໜອງ​ກັບ​ຄວາມ​ຮຽກຮ້ອງ​ຕ້ອງການ​ຕໍ່​ການ​ພັດທະນາ​ເສດຖະກິດ-ສັງຄົມ​ຂອງ​ປະເທດ​ໃນ​ໄລຍະ​ໃໝ່.

ຂ່າວທີ່ກ່ຽວຂ້ອງ