ຂ່າວຫຼ້າສຸດ

ນວ ເກັບ​ກຳ​ສະຖິຕິ​ລັດຖະກອນ​ໄດ້​ເກືອບ 10 ພັນ​ຄົນ

1.204 11 ຕ.ລ. 2019 ຂ່າວໜ້າ​ໜຶ່ງ
ນວ ເກັບ​ກຳ​ສະຖິຕິ​ລັດຖະກອນ​ໄດ້​ເກືອບ 10 ພັນ​ຄົນ

   ກອງ​ປະຊຸມ​ສະຫຼຸບ​ວຽກ​ງານ​ຄຸ້ມ​ຄອງ​ພະນັກງານ-ລັດຖະກອນ​ທົ່ວ​ນະຄອນຫຼວງ​ວຽງ​ຈັນ (ນວ) ປະ ຈຳ​ໄຕ​ມາດ​ທີ III ແລະ ມອບ​ລັດຖະກອນ​ໃຫ້​ພະນັກງານ​ພະ​ແນກ​ພາຍ​ໃນ ນວ ຈັດ​ຂຶ້ນ​ວັນ​ທີ 9 ຕຸລາ 2019 ທີ່​ຫ້ອງ​ວ່າການ​ປົກຄອງ ນວ ເປັນ​ປະທານ​ຂອງ​ທ່ານ ບຸນ​ໜາ ຜາ​ທຸມ​ມະ​ວົງ ຫົວໜ້າ​ພະ​ແນກ​ພາຍ​ໃນ ນວ ມີ​ທ່ານ ສຸ​ວັນນີ ລັດຕະນະ​ວົງ ຫົວໜ້າ​ກົມ​ຄຸ້ມ​ຄອງ​ລັດຖະກອນ ກະຊວງ​ພາຍ​ໃນ ພ້ອມ​ດ້ວຍ​ຫົວໜ້າ​ພະ​ແນກ ຮອງ​ພະ​ແນກ ກົມ ແລະ ພະນັກງານ-ລັດຖະກອນ​ກ່ຽວຂ້ອງ ເຂົ້າ​ຮ່ວມ.

    ທ່ານ ກາບ​ແກ້ວ ນາມ​ມະ​ຈັກ ຮອງ​ຫົວໜ້າ​ພະ​ແນກ​ພາຍ​ໃນ ນວ ໄດ້​ຜ່ານ​ບົດ​ສະຫຼຸບ​ວຽກ​ງານ​ຄຸ້ມ​ຄອງ​ພະນັກງານ-ລັດຖະກອນ​ທົ່ວ ນວ ປະຈຳ​ໄຕ​ມາດ​ທີ III ວ່າ: ຕະຫຼອດ​ໄລຍະ​ຜ່ານ​ມາ​ໄດ້​ເອົາໃຈໃສ່​ຈັດ​ຕັ້ງ​ປະຕິບັດ​ວຽກ​ງານ​ຄຸ້ມ​ຄອງ​ລັດຖະກອນ ຂໍ້​ມູນ ຊີວະ​ປະຫວັດ ເກັບ​ກຳ​ສະຖິຕິ​ລັດຖະກອນ ຄົ້ນຄວ້າ​ມີ​ຄຳ​ເຫັນ ແລະ ສະໜອງ​ຂໍ້​ມູນ​ໃຫ້​ແກ່​ພາກສ່ວນ​ກ່ຽວຂ້ອງ​ໃນ​ການ​ແຕ່ງຕັ້ງ​ຍົກຍ້າຍ ການ​ປະຕິບັດ​ວິໄນ ຫຼື ປົດ​ຕຳແໜ່ງ​ບໍລິຫານ​ຂອງ​ລັດຖະກອນ​ໃນ​ທົ່ວ ນວ ແລະ ອື່ນໆ ບົນ​ພື້ນຖານ​ການ​ປະຕິບັດ​ແນວທາງ​ນະໂຍບາຍ​ຂອງ​ພັກ-ລັດ ໃນ 3 ໄຕ​ມາດ​ຜ່ານ​ມາ ສາມາດ​ເກັບ​ກຳ​ສະຖິຕິ​ລັດຖະກອນ​ທົ່ວ ນວ ໄດ້​ທັງ​ໝົດ 9.928 ຄົນ ຍິງ 5.387 ຄົນ ລັດຖະກອນ​ຂັ້ນ ນວ 1.921 ຄົນ ຂັ້ນ​ເມືອງ 2.914 ຄົນ ຄູ (ບໍລິຫານ) 5.093 ຄົນ ຄູ​ຂັ້ນ ນວ 434 ຄົນ ແລະ ຄູ​ຂັ້ນ​ເມືອງ 4.659 ຄົນ ເລື່ອນ​ຊັ້ນ-ເລື່ອນ​ຂັ້ນ​ປົກກະຕິ 27 ພາກສ່ວນ ເລື່ອນ​ຊັ້ນ-ຂັ້ນ​ຕາມ​ອາຍຸ​ການ (ພົ້ນ​ຊັ້ນ) 6 ພາກສ່ວນ ເລື່ອນ​ພະນັກງານ​ເຝິກ​ງານ 95% ເປັນ​ພະນັກງານ​ສົມບູນ 11 ພາກສ່ວນ ດັດແກ້​ຊັ້ນ-ຂັ້ນ​ຕາມ​ໃບ​ປະກາດ​ສະ​ນິ​ຍະ​ບັດ 8 ພາກສ່ວນ ກວດກາ​ຜ່ານ​ບັນຊີ​ຈຳນວນ​ພົນ 32 ພາກສ່ວນ ປະ​ເມີນ​ການ​ປະຕິບັດ​ວຽກ​ງານ​ພະນັກງານ-ລັດຖະກອນ​ສຳເລັດ 6 ເມືອງ 14 ພະແນກການ.

    ສຳລັບ​ແຜນການ​ປະຈຳ​ໄຕ​ມາດ 4 ທຸກ​ພາກສ່ວນ​ຕ້ອງ​ເອົາໃຈໃສ່​ສຶກ​ສາ​ອົບຮົມ​ການເມືອງ-ແນວ​ຄິດ​ໃຫ້​ພະນັກງານ-ລັດຖະກອນ ການ​ຄຸ້ມ​ຄອງ​ພະນັກງານ​ຕ້ອງ​ປະຕິບັດ​ຕາມ​ກົດໝາຍ​ວ່າ​ດ້ວຍ​ການ​ຄຸ້ມ​ຄອງ​ພະນັກງານ-ລັດຖະກອນ​ໃຫ້​ທຸກ​ພາກສ່ວນ​ເປັນ​ເຈົ້າ​ການ​ໃນ​ການຈັດຕັ້ງ​ປະຕິບັດ ການ​ສະເໜີ​ດັດແກ້ ເລື່ອນ​ຊັ້ນ ເລື່ອນ​ຂັ້ນ ເງິນ​ອຸດ​ໜູນ​ຕ່າງໆ​ຂອງ​ພະນັກງານ-ລັດຖະກອນ ປັບປຸງ​ການ​ເກັບ​ກຳ​ຂໍ້​ມູນ​ໃຫ້​ທັນ​ຕາມ​ກຳນົດ​ເວລາ ແລະ ອື່ນໆ.

    ຕອນ​ທ້າຍ​ກອງ​ປະຊຸມ​ຍັງ​ໄດ້​ມອບ​ບັດ​ພະນັກງານ-ລັດຖະກອນ​ໃຫ້​ພະນັກງານ​ພະ​ແນກ​ພາຍ​ໃນ ນວ 37 ຄົນ​ຕື່ມ​ອີກ.

ຂ່າວທີ່ກ່ຽວຂ້ອງ