ຂ່າວຫຼ້າສຸດ

ກຽມ​ເປີດ​ນຳ​ໃຊ້​ໂຄງການ​ພັດທະນາ​ຊົນນະບົດ​ຢູ່​ເມືອງ​ສັງ​ທອງ

1.315 11 ຕ.ລ. 2019 ຂ່າວໜ້າ​ໜຶ່ງ
ກຽມ​ເປີດ​ນຳ​ໃຊ້​ໂຄງການ​ພັດທະນາ​ຊົນນະບົດ​ຢູ່​ເມືອງ​ສັງ​ທອງ

    ເພື່ອ​ເປັນ​ການ​ກວດກາ​ພື້ນຖານ ແລະ ເຕັກນິກ​ໃນ​ການ​ກໍ່ສ້າງ​ໂຄງການ ແລະ ສູນ​ບໍລິການ​ເຕັກນິກ​ກະສິກຳ ບ້ານ​ໃຫຍ່​ນາ​ຈະເລີນ ເມືອງ​ສັງ​ທອງ ນະຄອນຫຼວງ​ວຽງ​ຈັນ ແນໃສ່​ກະກຽມ​ໃຫ້​ແກ່​ການ​ມອບ-ຮັບ​ນຳ​ໃຊ້​ຢ່າງ​ເປັນ​ທາງ​ການ​ໃນ​ເດືອນ​ພະຈິກ​ທີ່​ຈະ​ມາ​ເຖິງ​ນີ້ ທັງ​ເປັນ​ການ​ສືບຕໍ່​ພັດທະນາ​ການ​ບໍລິຫານ​ຈັດການ​ນ້ຳ​ໃຫ້​ມີ​ປະສິດທິພາບ​ໃນ​ການ​ສະໜອງ​ນ້ຳ​ໃຫ້​ແກ່​ການ​ຜະລິດ​ກະສິກຳ​ເປັນ​ສິນຄ້າ ວັນ​ທີ 9 ຕຸລາ 2019 ຄະນະ​ວິຊາ​ການ​ກົມ​ຊົນລະປະທານ ກະຊວງ​ກະສິກຳ ແລະ ປ່າໄມ້ ຮ່ວມ​ກັບ​ຄະນະ​ວິຊາ​ການ​ກະຊວງ​ກະສິກຳ ອາຫານ ແລະ ກິດຈະກຳ​ຊົນນະບົດ ສ ເກົາຫຼີ ໄດ້​ລົງ​ກວດກາ​ສະ​ເຖຍ​ລະ​ພາບ​ຄວາມ​ໝັ້ນຄົງ​ຂອງ​ໂຄງການ​ດັ່ງກ່າວ ມີ​ຜູ້ຕາງໜ້າ​ຈາກ​ຂະແໜງການ​ກ່ຽວຂ້ອງ ເຂົ້າ​ຮ່ວມ.

    ທ່ານ ແສງ​ເມືອງ ສິດທິ​ໂວຫານ ຜູ້​ປະສານ​ງານ​ໂຄງການ​ຂັ້ນ​ນະຄອນຫຼວງ​ວຽງ​ຈັນ​ໃຫ້​ຮູ້​ວ່າ: ໂຄງ ການ​ພັດທະນາ​ຊົນນະບົດ ແລະ ສູນ​ບໍລິການ​ເຕັກນິກ​ກະສິກຳ​ບ້ານ​ໃຫຍ່​ນາ​ຈະເລີນ ໄດ້​ມີ​ແຜນ​ດຳເນີນ​ງານ 3 ປີ ເລີ່ມ​ແຕ່​ຕົ້ນ​ປີ 2016 ຫາ​ເດືອນ​ເມສາ 2019 ໃນ​ນັ້ນ ມີ​ບໍລິສັດ​ທີ່​ປຶກສາ DASAN CONSUL TANTS ຈາກ ສ ເກົາຫຼີ ຕາງໜ້າ​ໃຫ້​ລັດ​ວິ​ສາ​ຫະ​ກິດ​ຊຸມ​ຊົນນະບົດ (KRC) ເປັນ​ຜູ້​ສ້າງ​ແຜນ​ດຳເນີນ​ງານ ແລະ ເຊັນ​ສັນຍາ​ກໍ່ສ້າງ​ລະຫວ່າງ DASAN CONSUL TANTS ແລະ ບໍລິສັດ ລາວ​ຈະເລີນ​ກໍ່ສ້າງ ຈຳກັດ ໂດຍ​ສົມທົບ​ກັບ​ກົມ​ຊົນລະປະທານ ພະ​ແນກ​ກະສິກຳ ແລະ ປ່າໄມ້ ນະຄອນຫຼວງ​ວຽງ​ຈັນ ຫ້ອງ ການ​ກະສິກຳ ແລະ ປ່າໄມ້ ເມືອງ​ສັງ​ທອງ ເພື່ອ​ດຳເນີນ​ການຈັດຕັ້ງ​ປະຕິບັດ​ໂຄງການ ປະກອບ​ມີ​ກິດຈະກຳ​ສຳ​ຫຼວດ-ອອກ​ແບບ ກໍ່ສ້າງ​ຫົວ​ງານ (ເຂື່ອນ​ດິນ) ແລະ ຄອງເໝືອງ​ແມ່ (ທໍ່​ຢາງ​ດຳ ຟີ​ອີ ແລະ ຄອງ     ເໝືອງ​ເບ​ຕົງ) ກໍ່ສ້າງ​ສູນ​ເຕັກນິກ​ກະສິກຳ ແລະ ເຝິກອົບຮົມ​ໃຫ້​ຊາວນາ.

    ໂຄງການ​ດັ່ງກ່າວ​ເປັນ​ໂຄງການ​ຊ່ວຍເຫຼືອ​ລ້າ​ຈາກ​ລັດຖະບານ ສ ເກົາຫຼີ ມູນ​ຄ່າ 4.020.000 ໂດ​ລາ​ສະຫະລັດ ຫຼື ປະມານ 34,5 ຕື້​ກີບ ໃນ​ນັ້ນ ມູນ​ຄ່າ​ການ​ກໍ່ສ້າງ​ໂຄງການ 2.649.000 ໂດ​ລາ ຫຼື ປະມານ 23,3 ຕື້​ກີບ ແລະ ສີດ​ຊີມັງ​ແກນ​ເຂື່ອນ 200.000 ໂດ​ລາ ຫຼື ປະມານ 1,7 ຕື້​ກີບ ສ່ວນ​ທີ່​ເຫຼືອ​ເປັນ​ຄ່າ​ບໍລິຫານ​ຂອງ​ບໍລິສັດ DASAN CONSUL TANTS ແລະ ຈັດ​ເຝິກອົບຮົມ​ໃຫ້​ຊາວນາ ເຊິ່ງ​ໂຄງການ​ມີ​ທີ່​ຕັ້ງ​ຢູ່​ຫ່າງ​ຈາກ​ໃຈກາງ​ນະຄອນຫຼວງ​ວຽງ​ຈັນ​ໄປ​ທາງ​ທິດເໜືອ​ປະມານ 75 ກິ​ໂລ ຫົວ​ງານ​ຕັ້ງ​ຢູ່​ບ້ານ​ໃຫຍ່​ນາ​ຈະເລີນ ໂດຍ​ມີ​ແມ່ນ້ຳ​ສອງ​ສາຍ​ໄຫຼ​ຈອດ​ກັນ ແມ່ນ້ຳ​ເບື້ອງ​ຂວາ​ເອີ້ນ​ຕາມ​ກະແສ​ໄຫຼ​ຂອງ​ນ້ຳ​ແມ່ນ​ຫ້ວຍ​ເຮັ້ຍ ແລະ ແມ່ນ້ຳ​ຢູ່​ເບື້ອງ​ຊ້າຍ​ເອີ້ນ​ວ່າ ນ້ຳ​ພຸກ ໂຄງການ​ເປັນ​ຫົວ​ງານ​ອ່າງເກັບນ້ຳ (ເຂື່ອນ​ດິນ) ເນື້ອທີ່​ອ່າງ​ໂຕ່ງ 450 ເຮັກຕາ ບໍ​ລິ​ມາດ​ເກັບ​ນ້ຳ​ໄດ້​ທັງ​ໝົດ 2.790.000 ແມັດ​ກ້ອນ ປະລິມານ​ນ້ຳ​ທີ່​ສາມາດ​ໃຊ້​ໃນ​ການ​ຜະລິດ​ຕົວ​ຈິງ 2.596.000 ແມັດ​ກ້ອນ ຄວາມ​ສູງ​ຂອງ​ເຂື່ອນ 21,5 ແມັດ ຄວາມ​ຍາວ 260 ແມັດ ຄວາມ​ກວ້າງ​ສັນ​ເຂື່ອນ 5 ແມັດ ຄອງເໝືອງ​ແມ່​ຍາວ 5.200 ແມັດ ສາມາດ​ສະໜອງ​ນ້ຳ​ໄດ້ 250 ເຮັກຕາ​ໃນ​ລະດູແລ້ງ ແລະ ລະດູຝົນ ເຊິ່ງ​ເປັນ​ໂຄງການ​ທີ່​ມີ​ລັກສະນະ​ນ້ຳ​ໄຫຼ​ເອງ ໂດຍ​ບ້ານ​ທີ່​ໄດ້​ຮັບ​ຜົນ​ປະໂຫຍດ ມີ​ບ້ານ​ເຕົາ​ໄຫ ນາ​ໜ້ຽງ ນາ​ທຽມ ແລະ ບ້ານ​ນາ​ລາດ ລວມ​ທັງ​ໝົດ 120 ຄອບຄົວ ປັດຈຸບັນ​ໄດ້​ເຕົ້າໂຮມ​ເປັນ​ບ້ານ​ສາມ​ສ້າງ ຄື: ບ້ານ​ໃຫຍ່​ນາ​ຈະເລີນ ປັດຈຸບັນ​ໂຄງການ​ໄດ້​ສຳເລັດ​ການ​ກໍ່ສ້າງ 100%.

ຂ່າວທີ່ກ່ຽວຂ້ອງ