ຂ່າວຫຼ້າສຸດ

ທົ່ວ​ປະເທດ​ສາມາດ​ຜ່າຕັດ​ພະຍາດ​ແກ່ນ​ຕາ​ຂຸ້ນ ຈຳນວນ 6.000 ຄົນ​ຕໍ່​ປີ

1.172 11 ຕ.ລ. 2019 ຂ່າວໜ້າ​ໜຶ່ງ
ທົ່ວ​ປະເທດ​ສາມາດ​ຜ່າຕັດ​ພະຍາດ​ແກ່ນ​ຕາ​ຂຸ້ນ ຈຳນວນ 6.000 ຄົນ​ຕໍ່​ປີ

     ທ່ານ ຄຳ​ພົ້ວ ສຸດທິ​ສົມບັດ ຫົວໜ້າ​ສູນ​ປິ່ນປົວ ແລະ ຮັກສາ​ສຸຂະພາບ​ຕາ ກ່າວ​ໃນ​ໂອກາດ​ສະເຫຼີມສະຫຼອງ​ວັນ​ສາຍຕາ​ໂລກ ວັນ​ທີ 10 ຕຸລາ 2019 ທີ່​ສູນ​ດັ່ງກ່າວ​ວ່າ: ໃນ​ແຕ່​ລະ​ປີ​ທົ່ວ​ໂລກ​ໄດ້​ມີ​ການ​ສະເຫຼີມສະຫຼອງ​ວັນ​ສາຍຕາ​ໂລກ ໂດຍ​ກຳນົດ​ເອົາ​ວັນ​ທີ 10 ຕຸລາ ຂອງ​ທຸກໆ​ປີ ເຊິ່ງ​ກິດຈະກຳ​ໃນ​ແຕ່​ລະ​ປີ ອົງການ​ອະນາໄມ​ໂລກ​ຮ່ວມ​ກັບ​ພາກສ່ວນ​ກ່ຽວຂ້ອງ​ໄດ້​ກຳນົດ​ຄຳ​ຂວັນ​ຕາມ​ຄວາມ​ເໝາະ​ສົມ​ຂອງ​ແຕ່​ລະ​ປີ ສຳລັບ​ປີ​ນີ້​ຢູ່ ​ສປປ ລາວ ແມ່ນ​ການ​ເບິ່ງ​ເຫັນ​ມີ​ຄວາມ​ສຳຄັນ​ຫຼາຍ ໂດຍ​ຈະ​ປະກອບ​ມີ​ກິດຈະກຳ​ຫຼາຍ​ຢ່າງ ເປັນຕົ້ນ ແມ່ນ​ກວດ​ສຸຂະພາບ​ຕາ ຜ່າຕັດ​ແກ່ນ​ຕາ​ຂຸ້ນ​ບໍ່​ໄດ້​ເສຍ​ຄ່າ ໂດຍ​ໄດ້​ຮັບ​ການ​ສະໜັບສະໜູນ​ຈາກ​ມູນ​ນິທິ NEW vision ຂອງ​ປະເທດ​ສິງກະໂປ ຮ່ວມ​ກັບ​ສະພາ​ການ​ຄ້າ​ນະຄອນຫຼວງ​ວຽງ​ຈັນ ແລະ ໄດ້​ຮັບ​ການ​ຊີ້​ນຳ​ໂດຍ​ກົງ​ຈາກ​ການ​ນຳ​ກະຊວງ​ສາທາລະນະ​ສຸກ ເພື່ອ​ມາ​ຜ່າຕັດ​ພະຍາດ​ແກ່ນ​ຕາ​ຂຸ້ນ​ໃຫ້​ກັບ​ປະຊາຊົນ​ລາວ ຈຳນວນ 500 ຄົນ ແຕ່​ມີ​ປະຊາຊົນ​ທີ່​ເປັນ​ພະຍາດ​ດັ່ງກ່າວ​ມາ​ໃຫ້​ບໍລິການ​ປະມານ 200 ຄົນ​ເທົ່າ​ນັ້ນ ນອກຈາກ​ນີ້ ຍັງ​ມີ​ຂະ​ບວນ​ຍ່າງ​ເພື່ອ​ສຸຂະພາບ ເພື່ອ​ຮັບ​ບໍລິຈາກ​ນ້ຳໃຈ​ຂອງ​ຜູ້​ເຂົ້າ​ຮ່ວມ ເພື່ອ​ເປັນ​ທຶນ​ຊ່ວຍເຫຼືອ​ຄົນ​ຕາບອດ​ທີ່​ທຸກ​ຍາກ.

    ປັດຈຸບັນ​ພະຍາດ​ແກ່ນ​ຕາ​ຂຸ້ນ​ເປັນ​ສາເຫດ​ຫຼັກ​ທີ່​ພາໃຫ້​ຕາບອດ​ໃນ ​ສປປ ລາວ ສະແດງ​ອອກ​ໃນ​ປີ 2007 ມີ​ຄົນ​ຕາບອດ​ທີ່​ເປັນ​ພະຍາດ​ແກ່ນ​ຕາ​ຂຸ້ນ​ຈຳນວນ 65% ຂອງ​ຄົນ​ຕາບອດ ມາ​ຮອດ​ປີ 2017 ມີ​ຄົນ​ເປັນ​ພະຍາດ​ແກ່ນ​ຕາ​ຂຸ້ນ​ເພີ່ມ​ຂຶ້ນ​ມາ​ເປັນ 75% ສາເຫດ​ຂອງ​ການ​ເພີ່ມ​ຂຶ້ນ​ຍ້ອນ​ວ່າ ອາຍຸ​ຍືນ​ສະເລ່ຍ​ຂອງ​ປະຊາກອນ​ເພີ່ມ​ຂຶ້ນ ເພາະວ່າ​ພະຍາດ​ດັ່ງກ່າວ​ແມ່ນ​ເກີດ​ຈາກ​ຜູ້​ສູງ​ອາຍຸ ຈຳນວນ​ຄົນ​ເປັນ​ພະຍາດ​ແກ່ນ​ຕາ​ຂຸ້ນ​ຕົກ​ຄ້າງ​ບໍ່​ອອກ​ມາ​ຮັກສາ ສະ​ສົມ​ມາ​ຫຼາຍ​ປີ ໃນ​ແຕ່​ລະ​ປີ​ໄດ້​ໃຫ້​ບໍ​ລິ​ການຜ່າຕັດ​ຄົນ​ເປັນ​ພະຍາດ​ແກ່ນ​ຕາ​ຂຸ້ນ​ຈຳນວນ 6.000 ຄົນ​ຕໍ່​ປີ​ໃນ​ຂອບ​ເຂດ​ທົ່ວ​ປະເທດ.

    ໃນຕໍ່ໜ້າ​ຕ້ອງ​ໄດ້​ເອົາໃຈໃສ່​ບໍ​ລິ​ການຜ່າຕັດ​ໃຫ້​ຫຼາຍ​ຂຶ້ນ ແຕ່​ກໍ​ຍັງ​ມີ​ສິ່ງ​ທ້າ​ທາຍ​ຫຼາຍ​ດ້ານ ເປັນຕົ້ນ ແມ່ນ​ຄົນ​ເຈັບ​ບໍ່​ມາ​ປິ່ນປົວ ດັ່ງນັ້ນ ຈິ່ງ​ຮຽກຮ້ອງ​ມາ​ຍັງ​ພໍ່​ແມ່​ປະຊາຊົນ​ທີ່​ເປັນ​ພະຍາດ​ດັ່ງກ່າວ​ມາ​ປິ່ນປົວ​ແຕ່​ຫົວທີ ບໍ່​ຄວນ​ປະ​ໃຫ້​ເປັນ​ດົນ ຖ້າ​ເປັນ​ແຮງ​ແລ້ວ​ຈິ່ງ​ມາ​ຮັກສາ​ກໍ​ຈະ​ເຮັດ​ໃຫ້​ຮັກສາ​ໄດ້​ຍາກ ຫຼື ບໍ່​ສາມາດ​ຮັກສາ​ໄດ້ ໃນ​ໂອກາດ​ການ​ສະເຫຼີມສະຫຼອງ​ວັນ​ສາຍຕາ​ໂລກ ສູນ​ປິ່ນປົວ ແລະ ຮັກສາ​ສຸຂະພາບ ໄດ້​ເປີດ​ໃຫ້ການ​ບໍ​ລິ​ການຜ່າຕັດ​ພະຍາດ​ແກ່ນ​ຕາ​ຂຸ້ນ​ບໍ່​ໄດ້​ເສຍ​ຄ່າ ເລີ່ມ​ແຕ່​ວັນ​ທີ 11-13 ຕຸລາ​ນີ້ ຕະຫຼອດ​ໄລຍະ​ຜ່ານ​ມາ ລັດຖະບານ​ກໍ​ໄດ້​ໃຫ້​ຄວາມ​ສຳຄັນ​ຂອງ​ວຽກ​ງານ​ດັ່ງກ່າວ ໃນ​ແຕ່​ລະ​ປີ​ຈະ​ມີ​ທີມ​ງານ​ຜ່າຕັດ​ແກ່ນ​ຕາ​ຂຸ້ນ​ລົງ​ໄປ​ໃຫ້ການ​ບໍລິການ​ກວດ ແລະ ຜ່າຕັດ​ພະຍາດ​ແກ່ນ​ຕາ​ຂຸ້ນ​ຢູ່​ແຕ່​ລະ​ເມືອງ​ໃນ​ຂອບ​ເຂດ​ທົ່ວ​ປະເທດ ປີ​ລະ 2 ຄັ້ງ.

   ໂອກາດ​ນີ້ ບໍລິສັດ​ວຽງ​ທອງ​ການ​ຢາ​ຮ່ວມ​ກັບ​ບໍລິສັດ​ໃສ​ສະອາດ​ການ​ຢາ​ກໍ​ໄດ້​ມອບ​ຢາ​ຈຳນວນ 1.000 ກ່ອງ ມູນ​ຄ່າ 6 ລ້ານ​ກີບ ຕາງໜ້າ​ມອບ​ໂດຍ​ທ່ານ ສຸພາ​ໂຊກ ຂັນ​ຕິ​ວົງ ຮອງ​ອຳນວຍ​ການ​ບໍລິສັດ​ວຽງ​ທອງ​ການ​ຢາ ຮັບ​ໂດຍ​ທ່ານ ຄຳ​ພົ້ວ ສຸດທິ​ສົມບັດ.

ຂ່າວທີ່ກ່ຽວຂ້ອງ