ຂ່າວຫຼ້າສຸດ

ນັກວິທະຍາສາດ ຕ້ອງ​ສືບຕໍ່​ເສີມ​ຂະຫຍາຍ​ມູນເຊື້ອ​ດ້ານ​ຜົນງານ

1.155 11 ຕ.ລ. 2019 ຂ່າວໜ້າ​ໜຶ່ງ
ນັກວິທະຍາສາດ ຕ້ອງ​ສືບຕໍ່​ເສີມ​ຂະຫຍາຍ​ມູນເຊື້ອ​ດ້ານ​ຜົນງານ

    ທ່ານ ບໍ່​ວຽງ​ຄຳ ວົງ​ດາລາ ລັດຖະມົນຕີ​ກະຊວງ​ວິທະຍາສາດ ແລະ ເຕັກ​ໂນ​ໂລ​ຊີ ໄດ້​ຖະແຫຼງ​ຂ່າວ ເນື່ອງ​ໃນ​ໂອກາດ​ວັນ​ວິທະຍາສາດ​ແຫ່ງ​ຊາດ 12 ຕຸລາ ວ່າ: ກອງ​ປະຊຸມ​ສະໄໝ​ສາມັນ​ເທື່ອ​ທີ 5 ຂອງ​ສະພາ​ແຫ່ງ​ຊາດ ຊຸດ​ທີ VII ປີ 2013 ໄດ້​ຮັບຮອງ​ເອົາ​ກົດໝາຍ​ວ່າ​ດ້ວຍ​ວິທະຍາສາດ ແລະ ເຕັກ​ໂນ​ໂລ​ຊີ ໄດ້​ກຳນົດ​ເອົາ​ວັນ​ທີ 12 ຕຸລາ​ເປັນ​ວັນ​ວິທະຍາສາດ​ແຫ່ງ​ຊາດ ເນື່ອງ​ຈາກ​ວັນ​ທີ 12 ຕຸລາ 1987 ປະທານ​ປະເທດ​ລາວ​ເຮົາ ໄດ້​ເຊັນ​ຂໍ້​ຕົກລົງ​ສ້າງຕັ້ງ​ສະພາ​ວິທະຍາສາດ-ເຕັກນິກ​ແຫ່ງ​ລັດ ຄັ້ງ​ທຳ​ອິດ​ຂອງ​ລາວ ສະນັ້ນ ວັນ​ທີ 12 ຕຸລາ​ຈຶ່ງ​ເປັນ​ວັນ​ປະກາດ​ເອກະລາດ​ຂອງ​ປະເທດ​ລາວ ແລະ ທັງ​ເປັນ​ວັນ​ວິທະຍາສາດ​ແຫ່ງ​ຊາດ​ອີກ​ດ້ວຍ.      

    ເນື່ອງ​ໃນ​ໂອກາດ​ສະເຫຼີມສະຫຼອງ​ວັນ​ວິທະຍາສາດ​ແຫ່ງ​ຊາດ​ຂອງ​ປະເທດ​ເຮົາ​ປີ​ນີ້ ກະຊວງ​ວິທະຍາ ສາດ ແລະ ເຕັກ​ໂນ​ໂລ​ຊີ​ໄດ້​ຈັດ​ກອງ​ປະຊຸມ​ວຽກ​ງານ​ວິທະຍາສາດ ແລະ ເຕັກ​ໂນ​ໂລ​ຊີ​ທົ່ວ​ປະເທດ ຄັ້ງ​ທີ 3 ຂຶ້ນ​ວັນ​ທີ 11-12 ຕຸລາ 2019 ທີ່​ຫໍ​ປະຊຸມ​ແຫ່ງ​ຊາດ (ຫຼັກ 6) ນອກ​ນີ້ ພາຍ​ໃນ​ງານ​ຍັງ​ຈະ​ມີ​ງານ​ວາງສະແດງ​ນະ​ວັດຕະ​ກຳ​ຕ່າງໆ ແລະ ຖື​ໂອກາດ​ນີ້​ຂ້າພະເຈົ້າ​ຂໍ​ສະແດງ​ຄວາມ​ຮູ້​ບຸນຄຸນ​ຢ່າງ​ເລິກເຊິ່ງ​ມາ​ຍັງ​ບັນດາ​ທ່ານ​ຜູ້ນຳ​ພັກ-ລັດ ບັນດາ​ນັກ​ປະຕິວັດ​ອາວຸໂສ​ທີ່​ຍາມ​ໃດ​ກໍ​ເອົາໃຈໃສ່​ຊີ້​ນຳ-ນຳພາ ແລະ ຊຸກຍູ້​ສົ່ງເສີມ​ການ​ຄົ້ນຄວ້າ-ພັດທະນາ ແລະ ການ​ນຳ​ໃຊ້​ວິທະຍາສາດ ແລະ ເຕັກ​ໂນ​ໂລ​ຊີ ເພື່ອ​ພັດທະນາ​ປະເທດ​ເຮົາ​ໃຫ້​ມີ​ການ​ຂະຫຍາຍຕົວ​ຢ່າງ​ຕໍ່​ເນື່ອງ​ຕະຫຼອດ​ມາ ແລະ ຂໍ​ຮຽກຮ້ອງ​ມາ​ຍັງ​ບັນດາ​ນັກວິທະຍາສາດ ນັກ​ຄົ້ນຄວ້າ​ນັກຮຽນ​ຮູ້​ປັນຍາ​ຊົນ​ຈົ່ງ​ສືບຕໍ່​ເສີມ​ຂະຫຍາຍ​ມູນເຊື້ອ​ການ​ຄົ້ນຄວ້າ​ປະດິດ​ສ້າງ​ຂອງ​ຕົນ ເພື່ອ​ສູ້​ຊົນ​ປະຕິບັດ​ໜ້າທີ່ ແລະ ຍົກ​ລະດັບ​ຄວາມ​ຮູ້​ຄວາມ​ສາມາດ​ຂອງ​ຕົນ​ໃຫ້​ສູງ​ຂຶ້ນ ເພື່ອ​ປະກອບສ່ວນ​ຢ່າງ​ສົມ​ກຽດ​ເຂົ້າ​ໃນ​ພາລະກິດ​ພັດທະນາ​ວິທະຍາສາດ ແລະ ເຕັກ​ໂນ​ໂລ​ຊີ​ຂອງ​ປະເທດ​ເຮົາ ໂດຍ​ສຸມ​ໃສ່​ການ​ຄົ້ນຄວ້າ​ວິທະຍາສາດ​ທີ່​ເປັນ​ຂົງເຂດ​ບຸລິມະສິດ ພັດທະນາ​ເຕັກ​ໂນ​ໂລ​ຊີ​ທີ່​ສອດຄ່ອງ ແລະ ສ້າງ​ເປັນ​ຜະລິດ​ຕະ​ພັນ​ນະ​ວັດຕະ​ກຳ​ທີ່​ມີ​ຄຸນ​ນະ​ພາບ​ປະກອບສ່ວນ​ເຂົ້າ​ໃນ​ການ​ຫັນ​ເປັນ​ອຸດສາຫະກຳ ແລະ ທັນ​ສະໄໝ​ຂອງ​ປະເທດ​ເຮົາ ບົນ​ຈິດໃຈ​ບຸກ​ທະລຸ​ຕາມ​ມະຕິ​ຂອງ​ກອງ​ປະຊຸມ​ໃຫຍ່ ຄັ້ງ​ທີ X ຂອງ​ພັກ​ວາງ​ອອກ ພ້ອມ​ກັນ​ສືບຕໍ່​ສ້າງ​ຜົນງານ​ວິທະຍາສາດ​ໃນ​ຂະ​ບວນ​ການ​ແຂ່ງຂັນ“ຮັກ​ຊາດ ແລະ ພັດທະນາ” ແລະ ອອກແຮງ​ຄົ້ນຄວ້າ-ພັດທະນາ​ນຳ​ໃຊ້​ວິ ທະ​ຍາ​ສາດ​ເຕັກ​ໂນ​ໂລ​ຊີ ແລະ ນະ​ວັດຕະ​ກຳ ເຂົ້າ​ໃນ​ການ​ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ຊາດ​ທີ່​ແສນ​ຮັກ​ຂອງ​ພວກ​ເຮົາ​ໃຫ້​ມີ​ຄວາມ​ກ້າວໜ້າ​ພັດທະນາ ແລະ ຈະເລີນ​ຮຸ່ງເຮືອງ ເພື່ອ​ໃຫ້​ປະເທດ​ເຮົາ​ຮັບຮອງ ແລະ ກ້າວ​ເດີນ​ຕາມ​ກະແສ​ຟອງ​ແຫ່ງ​ການ​ປະຕິວັດ​ອຸດສາຫະກຳ​ຄັ້ງ​ທີ 4 ຂອງ​ໂລກ ເພື່ອ​ສ້າງ​ປະເທດ​ລາວ​ມັ່ງ​ຄັ່ງ​ເຂັ້ມແຂງ ປະຊາຊົນ​ຮັ່ງມີ​ຜາ​ສຸກ ສັງຄົມ​ມີ​ຄວາມ​ມັກ​ຄີ​ປອງ​ດອງ​ປະຊາທິປະໄຕ​ຍຸຕິ​ທຳ ແລະ ສີວິໄລ.

ຂ່າວທີ່ກ່ຽວຂ້ອງ