ຂ່າວຫຼ້າສຸດ

ສ້າງຕັ້ງ​ບໍລິສັດ​ເພື່ອ​ບໍລິການ​ລິບ ແລະ ຂັ້ນໄດ​ເລື່ອນ​ຢູ່​ລາວ

1.103 11 ຕ.ລ. 2019 ຂ່າວໜ້າ​ໜຶ່ງ
ສ້າງຕັ້ງ​ບໍລິສັດ​ເພື່ອ​ບໍລິການ​ລິບ ແລະ ຂັ້ນໄດ​ເລື່ອນ​ຢູ່​ລາວ

   ພິທີ​ເປີດ​ບໍລິສັດ ຮິ​ຕາ​ຊິ​ເອ​ລີ​ເວ​ເຕີ​ລາວ ຈຳກັດ ຈັດ​ຂຶ້ນ​ວັນ​ທີ 9 ຕຸລາ 2019 ທີ່​ໂຮງແຮມ​ແລນ​ມາກ ນະຄອນ ຫຼວງ​ວຽງ​ຈັນ ມີ​ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ ທ່ານ ສອນ​ໄຊ ສິດ​ພະ​ໄຊ ຜູ້​ວ່າການ ທະ ນາ​ຄານ​ແຫ່ງ ​ສປປ ລາວ ທ່ານ ເຄ​ອິ​ໂຊະ ທາ​ເຄ​ວາ​ກະ ທູດ​ຍີ່ປຸ່ນ ປະຈຳ​ລາວ ທ່ານ ຮິ​ເດ​ອາ​ກິ ເຊ​ກິ ຜູ້​ບໍລິຫານ ລະດັບ​ສູງ ບໍລິສັດ ຮິ​ຕາ​ຊິ ຈຳກັດ ປະເທດ​ຍີ່ປຸ່ນ ທ່ານ ພອນ​ເທບ ພອນ​ປະພາ ກຳມະການ​ຜູ້​ຈັດການ​ໃຫຍ່​ບໍລິສັດ ສະຫຍາມ​ຮິ​ຕາ​ຊິ​ເອ​ລີ​ເວ​ເຕີ ຈຳກັດ ປະເທດ​ໄທ ນັກທຸລະກິດ ແລະ ລູກ​ຄ້າ ເຂົ້າ​ຮ່ວມ.

    ທ່ານ ຮົວ ແສງ​ອາ​ລຸນ ໃນ​ນາມ​ຜູ້​ຖື​ຮຸ້ນ​ບໍລິສັດ ຮິ​ຕາ​ຊິ​ເອ​ລີ​ເວ​ເຕີ​ລາວ ຈຳກັດ ໄດ້​ຂຶ້ນ​ກ່າວ​ວ່າ: ດ້ວຍ​ຈຸດປະສົງ​ໃນ​ການ​ເປັນ​ສ່ວນ​ໜຶ່ງ​ຂອງ​ການ​ພັດທະນາ​ເສດຖະກິດ-ສັງຄົມ​ຂອງ​ລາວ ແລະ ເປັນ​ສ່ວນ​ສຳຄັນ​ໃນ​ການ​ສົ່ງເສີມ​ດ້ານ​ຄວາມ​ປອດ​ໄພ ແລະ ອຳນວຍ​ຄວາມ​ສະດວກ​ຕ່າງໆ​ໃນ​ການ​ໃຊ້​ລິບ ແລະ ຂັ້ນໄດ​ເລື່ອນ​ທີ່​ທັນ​ສະໄໝ ແລະ ໄດ້​ມາດຕະຖານ​ສາກົນ ເຊິ່ງ​ໄດ້​ນຳ​ໃຊ້​ເຂົ້າ​ໃນ​ການ​ປະກອບ​ທຸລະ​ກິດ ແລະ ອຳນວຍ​ຄວາມ​ສະດວກ​ການ​ໃຊ້​ຊີວິດ​ປະຈຳ​ວັນ​ຢ່າງ​ກວ້າງຂວາງ ດັ່ງນັ້ນ ບໍລິສັດ​ຈຶ່ງ​ເຫັນ​ໄດ້​ຄວາມ​ສຳຄັນ​ໃນ​ການ​ພັດທະນາ ຈຶ່ງ​ເກີດ​ມີ​ຄວາມ​ຕັ້ງໃຈ​ສູງ​ໃນ​ການ​ລົງທຶນ​ຮ່ວມ​ມື ແລະ ໄດ້​ຮັບ​ຄວາມ​ໄວ້​ເນື້ອ​ເຊື່ອ​ໃຈ ຈາກ​ທາງ​ບໍລິສັດ ຮິ​ຕາ​ຊິ ຈຳກັດ ປະເທດ​ຍີ່ປຸ່ນ ບໍລິສັດ ສະຫຍາມ​ຮິ​ຕາ​ຊິ​ເວລີ​ເວ​ເຕີ ຈຳກັດ​ປະເທດ​ໄທ ໄດ້​ຮ່ວມ​ກັນ​ກໍ່​ຕັ້ງ​ບໍລິສັດ ຮິ​ຕາ​ຊິ​ເອ​ລີ​ເວ​ລາວ ຈຳກັດ ຂຶ້ນ​ມາ​ເພື່ອ​ເປັນ​ສູນ​ບໍ​ລິ​ການຈຳໜ່າຍ​ລິບ ແລະ ຂັ້ນໄດ​ເລື່ອນ​ຍີ່ຫໍ້​ຮິ​ຕາ​ຊິ ເປັນ​ຜະລິດ​ຕະ​ພັນ​ທີ່​ມີ​ຄຸນ​ນະ​ພາບ​ມາດຕະຖານ​ລະດັບ​ໂລກ ເພື່ອ​ຮັບ​ໃຊ້ ແລະ ບໍລິການ​ໃຫ້​ແກ່​ສຳນັກງານ​ອົງການ​ຕ່າງໆ ໂຮງໝໍ​ຂອງ​ລັດ ແລະ ເອກະ​ຊົນ ໂຮງແຮມ ອາພາດ​ເມັນ ສູນ​ການ​ຄ້າ ແລະ ເຮືອນ​ພັກ ພ້ອມ​ທີ່ຢູ່​ອາໄສ​ຂອງ​ປະຊາຊົນ​ທົ່ວ​ປະເທດ​ລາວ ເພື່ອ​ອຳນວຍ​ຄວາມ​ສະດວກ​ມາ​ໃຫ້​ທຸກ​ພາກ ສ່ວນ​ທຸລະ​ກິດ​ຕ່າງໆ​ໄດ້​ນຳ​ໃຊ້​ຜະລິດ​ຕະ​ພັນ​ທີ່​ມີ​ຄຸນ​ນະ​ພາບ​ມາດຕະຖານ​ສາກົນ ທັນ​ສະໄໝ ສະດວກ ປອດ​ໄພ​ໃນ​ການ​ໃຊ້​ບໍລິການ​ຂອງ​ພວກ​ເຮົາ​ຫຼັງ​ການ​ຂາຍ.

     ນອກ​ນີ້ ບໍລິສັດ​ຍັງ​ມີ​ຄວາມ​ພ້ອມ​ໃນ​ການ​ບໍລິການ​ບຳລຸງ​ຮັກສາ​ຢ່າງ​ສະ​ໝ່ຳ​ສະເໝີ ມີ​ທີມ​ງານ​ວິຊາ​ການ​ທີ່​ຊຳນານ ງານ​ຄອຍ​ບໍລິການ​ໃຫ້​ຄວາມ​ສະດວກ ວ່ອງໄວ ແລະ ທັນໃຈ ສຳນັກງານ​ບໍລິສັດ​ຕັ້ງ​ຢູ່​ອາຄານ ເອ​ເອັນ​ແຊດ ຕໍ່ໜ້າ ຕະຫຼາດ​ເຊົ້າ​ຊອບ​ປິງ​ມໍ ເຊິ່ງ​ການ​ສ້າງຕັ້ງ​ບໍລິສັດ​ໃໝ່​ນີ້​ຂຶ້ນ​ຈະ​ສ້າງ​ໃຫ້​ມີ​ຄວາມ​ເຂັ້ມແຂງ​ທາງ​ດ້ານ​ການ​ຂາຍ ແລະ ການ​ບໍລິການ​ໃນ​ປະເທດ​ລາວ ເຊິ່ງ​ຄາດ​ວ່າ​ຈະ​ໄດ້​ຮັບ​ການ​ພັດທະນາ​ທາງ​ດ້ານ​ເສດຖະກິດ​ສູງ ແນໃສ່​ໃນ​ການ​ບັນລຸ​ເປົ້າ    ໝາຍ​ອັດຕາ​ສ່ວນ​ແບ່ງ​ທາງ​ດ້ານ​ການ​ຕະຫຼາດ​ໃນ​ການຈຳໜ່າຍ​ພາຍ​ໃນ​ປະເທດ​ລາວ​ຫຼາຍ​ກວ່າ 15% ພາຍ​ໃນ​ປີ 2021 ບໍລິສັດ ຊິ​ຕາ​ຊິ​ເອ​ລີ​ເວ​ລາວ​ແມ່ນ​ບໍລິສັດ​ທີ່​ບໍລິສັດ ຮິ​ຕາ​ຊິ ສ້າງ​ຂຶ້ນ​ດ້ວຍ​ການ​ຮ່ວມ​ທຶນ​ລະຫວ່າງ​ບໍລິສັດ ສະຫຍາມ​ຮິ​ຕາ​ຊິ​ເອ​ລີ​ເວ​ເຕີ ເຊິ່ງ​ເປັນ​ບໍລິສັດ​ລູກ​ຂອງ​ຮິ​ຕາ​ຊິ ໃນ​ປະເທດ​ໄທ ທີ່​ອອກ​ແບບ ແລະ ຜະລິດ​ລິບ ແລະ ບໍລິສັດ Tangchareon Construction Sole ເຊິ່ງ​ເປັນ​ວິ​ສາ​ຫະ​ກິດ​ກ່ຽວ​ກັບ​ເບ​ຕົງ​ທີ່​ສັງກັດ​ຢູ່​ໃນ​ກຸ່ມ TCR.

    ບໍລິສັດ ຮິ​ຕາ​ຊິ ຈຳກັດ ໄດ້​ສ້າງຕັ້ງ​ຂຶ້ນ​ປີ 1910 ທີ່​ປະເທດ​ຍີ່ປຸ່ນ ແລະ ສະໜອງ​ການ​ແກ້​ບັນຫາ​ຕ່າງໆ ໂດຍ ນຳ​ໃຊ້​ລະບົບ​ເຕັກ​ໂນ​ໂລ​ຊີ​ທີ່​ມີ​ລະດັບ​ສູງ ສະໜອງ​ຜະລິດ​ຕະ​ພັນ ແລະ ໃຫ້​ບໍລິການ​ທີ່​ສະໜັບສະໜູນ​ພື້ນຖານ​ໂຄງ​ລ່າງ​ທາງ​ສັງຄົມ ແລະ ຖານ​ການ​ຜະລິດ​ທົ່ວ​ໂລກ ຍອດ​ຂາຍ​ທຸລະ​ກິດ​ລະບົບ​ຕຶກ ອາຄານ​ທີ່​ມີ​ວຽກ​ງານ​ກ່ຽວ​ກັບ​ລິບ​ເປັນ​ຫຼັກ​ແມ່ນ​ໄດ້​ສ້າງ​ລາຍ​ຮັບ​ປະມານ 5.600 ລ້ານ​ໂດ​ລາ​ສະຫະລັດ ຫຼື ປະມານ 45.000 ຕື້​ກີບ.

ຂ່າວທີ່ກ່ຽວຂ້ອງ