ຂ່າວຫຼ້າສຸດ

ສ ​ເກົາຫຼີ ​ອອກ​ຂໍ້​ກຳນົດ​ເພື່ອ​ສະກັດ​ກັ້ນ​ຄົນ​ຕ່າງ​ປະ​ເທດ​ທີ່​ກະທຳ​ຜິດ​ແລ້​ວ​ໜີ​ໄປ

1.635 10 ຕ.ລ. 2019 ຂ່າວຕ່າງປະເທດ
ສ ​ເກົາຫຼີ ​ອອກ​ຂໍ້​ກຳນົດ​ເພື່ອ​ສະກັດ​ກັ້ນ​ຄົນ​ຕ່າງ​ປະ​ເທດ​ທີ່​ກະທຳ​ຜິດ​ແລ້​ວ​ໜີ​ໄປ

   ເພື່ອ​ສະກັດ​ກັ້ນ​ສະພາບ​ທີ່ “ກະທຳ​ຜິດ​ແລ້ວ​ໜີ​ກັບ​ຄືນ​ປະເທດ” ນັ້ນ ກະຊວງ​ຍຸຕິ​ທຳ​ຂອງ ສ ເກົາຫຼີ ໄດ້​ປະກາດ​ໃຊ້​ຂໍ້​ກຳນົດ “ແຈ້ງ​ກ່ອນ​ເວລາ​ທີ່​ກັບ​ຄືນ​ປະເທດ​ດ້ວຍ​ຄວາມ​ສະໝັກ​ໃຈ” ສຳລັບ​ຄົນ​ຕ່າງປະເທດ ທີ່​ດຳລົງ​ຊີວິດ ແລະ ເຮັດ​ວຽກ​ຢ່າງ​ຜິດ​ກົດໝາຍ​ຢູ່​ໃນ ສ ເກົາຫຼີ. ຂໍ້​ກຳນົດ​ດັ່ງກ່າວ ຈະ​ໄດ້​ນຳ​ໃຊ້​ຢ່າງ​ເປັນ​ທາງ​ການ ນັບ​ແຕ່​ວັນ​ທີ 21 ຕຸລາ​ນີ້​ເປັນຕົ້ນ​ໄປ.

    ຂໍ້​ກຳນົດ​ໃນ​ເມື່ອ​ກ່ອນ ລະບຸ​ວ່າ ຄົນ​ຕ່າງປະເທດ​ຊຶ່ງ​ອາ​ໃສ​ຢ່າງ​ຜິດ​ກົດໝາຍ​ຢູ່​ໃນ ສ ເກົາຫຼີ  ທີ່​ກັບ​ຄືນ​ປະເທດ​ດ້ວຍ​ຄວາມ​ສະໝັກ​ໃຈ ສາມາດ​ແຈ້ງ​ກ່ຽວ​ກັບ​ການ​ກັບ​ຄືນ​ປະເທດ​ດ້ວຍ​ຄວາມ​ສະໝັກ​ໃຈ​ໃນ​ມື້​ທີ່​ແຈ້ງ​ອອກ​ເມືອງ ຢູ່​ໃນ​ສະໜາມ​ບິນ ຫຼື​ທ່າ​ກຳປັ່ນ. ເຖິງ​ຢ່າງໃດ​ກໍ​ຕາມ ເມື່ອ​ບໍ່​ດົນ​ມາ​ນີ້ ມີ​ກໍລະນີ​ຊາວ​ຕ່າງປະເທດ​ຜູ້​ໜຶ່ງ ທີ່​ອາ​ໃສ​ຢູ່​ໃນ ສ ເກົາຫຼີ​ຢ່າງ​ຜິດ​ກົດໝາຍ ໄດ້​ເຮັດ​ໃຫ້​ເກີດ​ອຸບັດເຫດ​ການ​ຄົມມະນາຄົມ​ແລ້ວ​ໜີ​ໄປ ແລະ ໄດ້​ແຈ້ງ​ອອກ​ເມືອງ​ທັນທີ​ຫຼັງ​ຈາກ​ມື້​ທີ່​ເກີດ​ອຸບັດເຫດ.

    ນັບ​ແຕ່​ວັນ​ທີ 21 ຕຸລາ​ນີ້​ເປັນຕົ້ນ​ໄປ ຂໍ້​ກົດ​ນົດ​ໃໝ່ ໄດ້​ສະເໜີ​ໃຫ້​ຄົນ​ຕ່າງປະເທດ​ທີ່​ອາ​ໃສ​ຢູ່​ໃນ ສ ເກົາຫຼີ​ຢ່າງ​ຜິດ​ກົດໝາຍ ແລະ ສະໝັກ​ໃຈ​ກັບ​ຄືນ​ປະເທດ​ຕົນ ຕ້ອງ​ໄດ້​ໄປ​ຍັງ​ອົງການ​ຄຸ້ມ​ຄອງ​ການ​ເຂົ້າ-ອອກ​ເມືອງ​ໃນ​ເຂດ​ທີ່​ອາ​ໃສ​ຢູ່ ເພື່ອ​ແຈ້ງ​ເຖິງ​ການ​ກັບ​ຄືນ​ປະເທດ​ດ້ວຍ​ຄວາມ​ສະໝັກ​ໃຈ ແຕ່ 3 - 15 ວັນ ກ່ອນ​ການ​ອອກ​ຈາກ​ເມືອງ (ບໍ່​ຄິດໄລ່​ວັນ​ພັກ). ບັນດາ​ອົງການ​ຄຸ້ມ​ຄອງ​ການ​ເຂົ້າ-ອອກ​ເມືອງ​ໃນ​ທົ່ວ ສ ເກົາຫຼີ ເລີ່ມ​ຮັບ​ເອກະສານ​ການ​ແຈ້ງ​ກັບ​ຄືນ​ປະເທດ​ດ້ວຍ​ຄວາມ​ສະໝັກ​ໃຈ​ຂອງ​ຄົນ​ຄ່າງ​ປະເທດ ນັບ​ແຕ່​ວັນ​ທີ 14 ຕຸລາ​ນີ້​ເປັນຕົ້ນ​ໄປ.

    ເອກະສານ​ທີ່​ນຳໄປ​ແຈ້ງ​ນັ້ນ ປະກອບ​ມີ ໜັງສືຜ່ານແດນ ປີ້​ເຮືອບິນ ຫຼື​ປີ້​ກຳປັ່ນ​ເດີນ​ທະເລ (ຈອງ​ປີ້​ມື້​ເດີນທາງ​ກັບ​ຄືນ​ປະເທດ​ໃຫ້​ພໍ​ແຕ່ 3-15 ວັນ ນັບ​ແຕ່​ມື້​ແຈ້ງ​ກັບ​ຄືນ​ປະເທດ​ດ້ວຍ​ຄວາມ​ສະໝັກ​ໃຈ) ແລະ ຄຳ​ຮ້ອງ​ລົງທະບຽນ​ກັບ​ຄືນ​ປະເທດ​ດ້ວຍ​ຄວາມ​ສະໝັກ​ໃຈ ແມ່ນ​ຕາມ​ແບບ​ຟອມ​ຂອງ​ກະຊວງ​ຍຸຕິ​ທຳ ສ ເກົາຫຼີ.

    ກົມ​ຄຸ້ມ​ຄອງ​ການ​ເຂົ້າ-ອອກ​ເມືອງ​ຂອງ ສ ເກົາຫຼີ ໃຫ້​ຮູ້​ວ່າ ປັດຈຸບັນ​ນີ້ ມີ​ຄົນ​ຕ່າງປະເທດ​ຈຳນວນ​ຫຼາຍ ພວມ​ດຳລົງ​ຊີວິດ ແລະ ເຮັດ​ວຽກ​ຢ່າງ​ຜິດ​ກົດໝາຍ​ຢູ່​ໃນ ສ ເກົາຫຼີ. ຄົນ​ເຫຼົ່ານັ້ນ​ມັກ​ຈະ​ເປັນ​ຜູ້​ທີ່​ເປັນ​ແຮງ​ງານ​ທີ່​ໄດ້​ໝົດ​ສັນຍາ ແຕ່​ກໍ​ຍັງ​ຢູ່​ຕໍ່​ໃນ ສ ເກົາຫຼີ​ເພື່ອ​ເຮັດ​ວຽກ ຫຼື​ບໍ່​ກໍ​ແມ່ນ​ພວກ​ນັກ​ສຶກ​ສາ ທີ່​ປະການ​ຮຽນ​ເພື່ອ​ໄປ​ອອກແຮງ​ງານ.

ຂ່າວທີ່ກ່ຽວຂ້ອງ