ຂ່າວຫຼ້າສຸດ

ກອງທັບ​ຕວກ​ກີ ​ເລີ່​​ມ​ປະຕິບັດ​ການ​ໂຈມ​ຕີ​ຢູ່​ໃນ​ເຂດ​ຊາຍ​ແດນ ຊີ​ຣີ-ອີ​ຣັກ

779 10 ຕ.ລ. 2019 ຂ່າວຕ່າງປະເທດ
ກອງທັບ​ຕວກ​ກີ ​ເລີ່​​ມ​ປະຕິບັດ​ການ​ໂຈມ​ຕີ​ຢູ່​ໃນ​ເຂດ​ຊາຍ​ແດນ ຊີ​ຣີ-ອີ​ຣັກ

    ວັນ​ທີ 8 ຕຸລາ​ນີ້ ກອງທັບ​ຕວກ​ກີ ໄດ້​ເລີ່ມ​ປະຕິບັດ​ການ​ໂຈມ​ຕີ​ຢູ່​ໃນ​ເຂດ​ຊາຍ​ແດນ ຊີ​ຣີ-ອີ​ຣັກ ເພື່ອ​ສະກັດ​ກັ້ນ​ກອງ​ກຳລັງ​ຊາວ​ເຄີດ ທີ່​ໃຊ້​ເສັ້ນທາງ​ນີ້ ເພື່ອ​ປັບປຸງ​ເຂດ​ທາງ​ທິດຕາເວັນອອກ​ສ່ຽງ​ເໜືອ​ຊີ​ຣີ ກ່ອນ​ທີ່​ຕວກ​ກີ​ຈະ​ກະກຽມ​ດຳເນີນ​ການ​ໂຈມ​ຕີ​ຂະໜາດ​ໃຫຍ່ ເຂົ້າ​ໃສ່​ເຂດ​ຂອງ​ຊາວ​ເຄີດ ຫຼັງ​ຈາກ​ທີ່ ສ ອາ​ເມ​ຣິ​ກາ ຖອນ​ທະຫານ​ອອກ​ໄປ​ຢ່າງ​ບໍ່​ຄາດ​ຝັນ.

    ຕວກ​ກີ ໃຫ້​ຮູ້​ວ່າ ກອງທັບ​ຂອງ​ຕົນ​ມີ​ຄວາມ​ພ້ອມ​ແລ້ວ ໃນ​ການ​ໂຈມ​ຕີ​ເຂົ້າ​ເຂດ​ທິດຕາເວັນອອກ​ສ່ຽງ​ເໜືອ​ຊີ​ຣີ ຫຼັງ​ຈາກ​ທີ່ ສ ອາ​ເມ​ຣິ​ກາ ເລີ່ມ​ຖອນ​ທະຫານ​ອອກ​ຈາກ​ເຂດ​ຊາຍ​ແດນ ຕວກ​ກີ-ຊີ​ຣີ. ການ​ຕົກລົງ​ຖອນ​ທະຫານ​ຂອງ ສ ອາ​ເມ​ຣິ​ກາ​ນັ້ນ ຖື​ວ່າ​ເປັນ​ການ​ປ່ອຍປະ​ພັນທະ​ມິດ ແລະ ເຮັດ​ໃຫ້​ປະທານາທິບໍດີ ສ ອາ​ເມ​ຣິ​ກາ ໂດ​ນາ​​ລ ທຣຳ ຖືກ​ຕິຕຽນ​ຈາກ​ຫຼາຍ​ຝ່າຍ.

    ໃນ​ຂະນະ​ດຽວ​ກັນ ສື່ສານ​ໃນ​ເຂດ​ຕາເວັນ​ອອກ​ກາງ ລາຍ​ງານ​ອ້າງ​ຕາມ​ຄຳ​ຖະແຫຼງ​ຂອງ​ທ່ານ ບາດ​ຣັນ ເຈຍ ເຄີດ ຊຶ່ງ​ເປັນ​ເຈົ້າ​ໜ້າທີ່​ອາວຸໂສ​ຂອງ​ຊາວ​ເຄີດ ໃຫ້​ຮູ້​ວ່າ ບັນດາ​ກອງ​ກຳລັງ​ຂອງ​ຊາວ ເຄີດ ທີ່​ພວມ​ຄວບ​ຄຸມ​ເຂດ​ພາກ​ເໜືອ​ຊີ​ຣີ ອາດ​ຈະ​ດຳເນີນ​ການ​ເຈລະຈາ​ກັບ​ທາງ​ການ​ຊີ​ຣີ ແລະ ຣັດ​ເຊຍ ຫຼັງ​ຈາກ​ທີ່ ສ ອາ​ເມ​ຣິ​ກາ ປະກາດ​ຖອນ​ທະຫານ​ອອກ​ໄປ​ຈາກ​ເຂດ​ທີ່​ຕວກ​ກີ ອາດ​ຈະ​ເປີດ​ບັ້ນ​ຮົບ​ແນໃສ່​ບັນດາ​ນັກຮົບ​ຊາວ​ເຄີດ ທີ່​ຂຶ້ນ​ກັບ​ບັນດາ​ກົມ​ກອງ ປ້ອງ​ກັນ​ປະຊາຊົນ (YPG).

ຂ່າວທີ່ກ່ຽວຂ້ອງ