ປະທານສະພາລົງ ຊຸກຍູ້ການຜະລິດກະສິກຳຢູ່ເມືອງພູຄູນ

1.004 10 ຕ.ລ. 2019 ຂ່າວໜ້າ​ໜຶ່ງ
ປະທານສະພາລົງ ຊຸກຍູ້ການຜະລິດກະສິກຳຢູ່ເມືອງພູຄູນ

    ວັນ​ທີ 3 ຕຸ­ລາ 2019 ທ່ານ​ນາງ ປາ­ນີ ຢາ​ທໍ່​ຕູ້ ປະ­ທານ​ສະ­ພາ​ແຫ່ງ​ຊາດ ສະ­ມາ­ຊິກ​ສະ­ພາ​ແຫ່ງ​ຊາດ ປະຈຳ​ເຂດ​ເລືອກ​ຕັ້ງ​ທີ 6 ແຂວງ​ຫຼວງ​ພະ​ບາງ ໄດ້​ລົງ​ເຄື່ອນ​ໄຫວ​ຢ້ຽມ­ຢາມ ແລະ ເຮັດ​ວຽກ​ຢູ່​ເມືອງ​ພູ​ຄູນ ແຂວງ​ຫຼວງ​ພະ​ບາງ ມີ​ທ່ານ ວຽງ​ທອງ ຫັດ​ສະ​ຈັນ ເຈົ້າ­ເມືອງ​ພູ​ຄູນ ແລະ ທ່ານ ສິງ​ຕັນ ໄຊ​ລື​ຊົງ ສະ­ມາ­ຊິກ​ສະ­ພາ​ແຫ່ງ​ຊາດ ຮອງ​ປະ­ທານ​ສະ­ພາ​ປະ­ຊາ­ຊົນ ແຂວງ​ຫຼວງ​ພະ​ບາງ ອຳ­ນາດ​ການ​ປົກ­ຄອງ ແລະ ປະ­ຊາ­ຊົນ​ພາຍ​ເມືອງ​ພູ​ຄູນ​ໃຫ້ ການ​ຕ້ອນ­ຮັບ.

    ໂອ­ກາດ​ນີ້ ໄດ້​ຮັບ​ຟັງ​ລາຍ​ງານ​ໂດຍ​ຫຍໍ້​ກ່ຽວ​ກັບ​ການ­ຈັດ­ຕັ້ງ​ປະ­ຕິ­ບັດ ແຜນ​ພັດ­ທະ­ນາ​ເສດ­ຖະ­ກິດ?ສັງ­ຄົມ​ຂອງ​ເມືອງ ຈາກ​ທ່ານ ວຽງ​ທອງ ຫັດ​ສະ​ຈັນ ໂດຍ​ລວມ​ເມືອງ​ພູ​ຄູນ​ມີ​ຄວາມ​ເປັນ​ລະ­ບຽບ​ຮຽບ​ຮ້ອຍ ມີ​ສະ­ຖຽນ​ລະ​ພາບ​ທາງ​ດ້ານ​ການ­ເມືອງ ມີ​ຄວາມ​ສະ­ຫງົບ​ໂດຍ​ພື້ນ­ຖານ ເສດ­ຖະ­ກິດ​ມີ​ການ​ສືບ­ຕໍ່​ຂະ­ຫຍາຍ­ຕົວ​ຢ່າງ​ຕໍ່​ເນື່ອງ​ໃນ​ລະ­ດັບ 9,2% ສະ­ເລ່ຍ​ໃສ່​ຫົວ​ຄົນ​ໜຶ່ງ​ໄດ້ 12,62 ລ້ານ​ກີບ ທຽບ­ໃສ່​ແຜນ­ການ 5 ປີ ຄັ້ງ​ທີ 3 ຂອງ​ເມືອງ ປີ 2020 ປະ­ຕິ ບັດ 81,68% ທົ່ວ​ເມືອງ​ມີ 40 ບ້ານ ແບ່ງ​ອອກ​ເປັນ 7 ກຸ່ມ​ບ້ານ ມີ 4.354 ຄອບ­ຄົວ ພົນ­ລະ­ເມືອງ​ທັງ​ໝົດ 25.957 ຄົນ ຍິງ 12.643 ຄົນ.

    ຈາກ​ນັ້ນ ທ່ານ​ປະ­ທານ​ສະ­ພາ​ແຫ່ງ​ຊາດ​ໄດ້​ເນັ້ນ​ໃຫ້​ຄະ­ນະ​ພັກ ຄະ­ນະ​ນຳ​ທຸກ​ຂັ້ນ​ຈົ່ງ​ສືບ­ຕໍ່​ເອົາ­ໃຈ­ໃສ່​ຕໍ່​ວຽກ​ງານ​ປ້ອງ​ກັນ​ຊາດ ປ້ອງ​ກັນ​ຄວາມ​ສະ­ຫງົບ ຕ້ານ​ປາ­ກົດ­ການ​ຫຍໍ້­ທໍ້​ໃນ​ສັງ­ຄົມ ໂດຍ​ສຸມ​ໃສ່​ສົ່ງ​ພະ­ນັກ­ງານ​ລົງ​ກໍ່­ສ້າງ​ຮາກ​ຖານ​ການ­ເມືອງ ປັບ­ປຸງ​ອົງ­ການ​ປົກ­ຄອງ​ບ້ານ ໂດຍ​ສຸມ​ໃສ່ 4 ເນື້ອ​ໃນ 4 ຄາດ­ໝາຍ ຕິດ​ພັນ​ກັບ​ວຽກ​ງານ​ສາມ​ສ້າງ ແນ­ໃສ່​ສ້າງ​ພື້ນ­ຖານ​ໂຄງ​ລ່າງ​ໃນ​ຊົນ­ນະ­ບົດ​ໄດ້​ຮັບ​ການ​ພັດ­ທະ­ນາ ສ້າງ​ອາ­ຊີບ​ທີ່​ໝັ້ນ​ທ່ຽງ​ຕາມ​ທ່າ­ແຮງ ເພື່ອ​ປັບ­ປຸງ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ໃຫ້​ດີ​ຂຶ້ນ ການ​ຄຸ້ມ​ຄອງ​ລັດ ປັບ­ປຸງ​ກົງ­ຈັກ?ການ­ຈັດ­ຕັ້ງ​ລັດ​ໃຫ້​ມີ​ຄວາມ​ເຂັ້ມ ແຂງ ດ້ານ​ກະ­ສິ­ກຳ​ໃຫ້​ພາກ­ສ່ວນ​ທີ່​ກ່ຽວ­ຂ້ອງ​ລົງ​ຊຸກ­ຍູ້​ນຳ​ເອົາ​ແນວ​ພັນ​ ເຕັກ­ນິກ​ວິ­ຊາ​ການ​ລົງ​ນຳ­ພາ​ປະ­ຊາ­ຊົນ ແລະ ກຳ­ນົດ​ຈຸດ​ສຸມ ສ້າງ​ເປັນ​ກຸ່ມ​ຜະ­ລິດ ອີງ­ໃສ່​ທ່າ­ແຮງ​ຂອງ​ແຕ່​ລະ​ເຂດ ໂດຍ​ເນັ້ນ​ກະ­ສິ­ກຳ​ສະ­ອາດ ພ້ອມ​ນີ້ ການ​ກໍ່­ສ້າງ​ພັກ?ພະ­ນັກ­ງານ​ສືບ​ທອດ​ປ່ຽນ​ແທນ​ຕ້ອງ​ສ້າງ​ຄົນ​ທີ່​ມີ​ຄຸນ​ນະ​ພາບ ມີ​ຄວາມ​ຈົງ​ຮັກ​ພັກ­ດີ​ຕໍ່​ພັກ ຕໍ່​ປະ­ຊາ­ຊົນ ມີ​ຄຸນ​ສົມ ບັດ​ສິນ​ທຳ​ປະ­ຕິ­ວັດ ແລະ ມີ​ຄວາມ​ຮູ້​ຄວາມ​ສາ­ມາດ ເພື່ອ​ກະ­ກຽມ​ບຸ​ຄະ­ລາ​ກອນ​ ໃຫ້​ແກ່​ການ​ດຳ­ເນີນ​ກອງ​ປະ­ຊຸມ​ໃຫຍ່​ຂອງ​ອົງ­ຄະ​ນະ​ພັກ​ເມືອງ​ ທີ່​ຈະ​ໄດ້​ຈັດ​ຂຶ້ນ​ໃນ­ຕໍ່­ໜ້າ.

    ໂອ­ກາດ​ທີ່​ປະ­ທານ​ສະ­ພາ​ແຫ່ງ​ຊາດ ​ພ້ອມ​ດ້ວຍ​ຄະ­ນະ ​ໄດ້​ລົງ​ຢ້ຽມ­ຢາມ ແລະ ເຮັດ​ວຽກ​ຢູ່​ເມືອງ​ພູ​ຄູນ​ຄັ້ງ​ນີ້ ທ່ານ​ໄດ້​ລົງ­ພື້ນ​ທີ່​ເພື່ອ​ຕິດ­ຕາມ​ຄວາມ​ຄືບ​ໜ້າ ໂຄງ­ການ​ບຸກ­ເບີກ​ສະ­ຖານ­ທີ່​ຈັດ​ສັນ​ທີ່­ຢູ່​ອາ­ໄສ ໃຫ້​ຄອບ­ຄົວ​ປະ­ຊາ­ຊົນ​ທີ່​ຖືກ​ຜົນ​ກະ­ທົບ​ຈາກ​ໄພ­ພິ­ບັດ​ທຳ​ມະ​ຊາດ ປີ 2018 ເຊິ່ງ​ໂຄງ­ການ​ດັ່ງ­ກ່າວ​ໄດ້​ເລີ່ມ​ຈັດ​ຕັ້ງ​ປະ­ຕິ­ບັດ​ໃນ​ເດືອນ​ມິ­ຖຸ­ນາ 2019 ເປັນ­ຕົ້ນ​ມາ ມີ​ເນື້ອ­ທີ່​ທັງ​ໝົດ 54.960 ຕາ​ແມັດ ມູນ​ຄ່າ 3,6 ຕື້​ກີບ ເປັນ​ທຶນ​ຂອງ​ລັດ­ຖະ­ບານ ໂດຍ​ແມ່ນ​ບໍ­ລິ­ສັດ ລີ​ຊື້​ຄຳ​ມ່ວນ​ກໍ່­ສ້າງ​ຈຳ­ກັດ ເປັນ​ຜູ້​ຮັບ​ເໝົາ​ກໍ່­ສ້າງ ປັດ­ຈຸ­ບັນ​ການ​ບຸກ­ເບີກ​ສຳ­ເລັດ 60% ຈາກ​ນັ້ນ ຍັງ​ໄດ້​ລົງ​ຢ້ຽມ​ຊົມ​ສວນ​ຜັກ​ກະ​ລ່ຳ​ປີ​ຂອງ​ປະ­ຊາ­ຊົນ​ບ້ານ​ລ້ອງ​ໝ້ຽງ ແລະ ສວນ​ຈຳ­ໜ່າຍ​ເບ້ຍ​ສະ​ຕໍ​ເບີ​ຣີ​ຂອງ​ປະ­ຊາ­ຊົນ​ບ້ານ​ພູ​ສູງ ເຊິ່ງ​ເປັນ​ພືດ​ເສດ­ຖະ­ກິດ​ທີ່​ສາ­ມາດ​ສ້າງ​ລາຍ​ຮັບ​ໃຫ້​ປະ­ຊາ­ຊົນ.

ຂ່າວທີ່ກ່ຽວຂ້ອງ