ປະເມີນຄວາມບອບບາງ ແລະ ການສ້າງພູມຄຸ້ມກັນ

769 10 ຕ.ລ. 2019 ຂ່າວໜ້າ​ໜຶ່ງ
ປະເມີນຄວາມບອບບາງ ແລະ ການສ້າງພູມຄຸ້ມກັນ

    ກະ­ຊວງ​ແຜນ­ການ ແລະ ການ​ລົງ­ທຶນ ຮ່ວມ​ກັບ ອົງ­ການ  UNCTAD ໄດ້​ຈັດ​ກອງ​ປະ­ຊຸມ​ວິ­ຊາ​ການ​ຂຶ້ນ ພາຍ​ໃຕ້​ຫົວ­ຂໍ້ “ການ​ປະ​ເມີນ​ຄວາມ​ບອບ​ບາງ ແລະ ການ​ສ້າງ​ພູມ​ຄຸ້ມ​ກັນ​ຂອງ​ລາວ ເພື່ອ​ຊຸກ­ຍູ້​ການ​ສ້າງ​ຄວາມ​ສາ­ມາດ​ດ້ານ​ການ​ຜະ­ລິດ ແລະ ການ​ຫັນ­ປ່ຽນ​ໂຄງ​ປະ­ກອບ​ເສດ­ຖະ­ກິດ” ຈັດ​ຂຶ້ນ​ວັນ​ທີ 8-9 ຕຸ­ລາ 2019 ທີ່​ໂຮງ­ແຮມ ຄຣາວ​ພລາ​ຊາ ນະ­ຄອນ­ຫຼວງ​ວຽງ​ຈັນ ເປັນ​ປະ­ທານ​ຮ່ວມ​ຂອງ​ທ່ານ ກິ​ແກ້ວ ຈັນ­ທະ​ບູ​ຣີ ຮອງ​ລັດ­ຖະ­ມົນ­ຕີ ກະ­ຊວງ​ແຜນ­ການ ແລະ ການ​ລົງ­ທຶນ ທ່ານ ນາງ sarasekkenes ຜູ້​ປະ­ສານ​ງານ​ອົງ­ການ​ສະ­ຫະ​ປະ­ຊາ​ຊາດ ປະ­ຈຳ​ລາວ ແລະ ທ່ານ Patrick Osakwe ຫົວ­ໜ້າ​ຂະ­ແໜງ­ການ​ຄ້າ ແລະ ຄວາມ­ທຸກ​ຍາກ ອົງ­ການ (UNCTAD) ມີ​ຕາງ­ໜ້າ​ຈາກ​ກົມ ສູນ ຂະ­ແໜງ­ການ ອົງ­ການ​ກ່ຽວ­ຂ້ອງ​ເຂົ້າ​ຮ່ວມ.

    ກອງ​ປະ­ຊຸມ​ໄດ້​ທົບ​ທວນ­ຄືນ​ກ່ຽວ​ກັບ​ບັນ­ດາ​ຄວາມ​ບອບ​ບາງ ແລະ ສິ່ງ​ທ້າ​ທາຍ​ຕ່າງໆ​ທີ່​ລາວ​ເຮົາ​ກຳ­ລັງ​ປະ​ເຊີນ​ຢູ່​ໃນ​ຂະ​ບວນ​ການ​ພັດ­ທະ­ນາ​ປະ­ເທດ​ຊາດ ແລະ ພາຍ­ຫຼັງ​ການ​ຫຼຸດ​ພົ້ນ​ອອກ​ຈາກ​ປະ­ເທດ​ດ້ອຍ​ພັດ­ທະ­ນາ ນອກ​ນັ້ນ ຍັງ​ລົງ​ເລິກ​ສົນ­ທະ­ນາ​ກ່ຽວ​ກັບ​ບັນ­ດາ​ຍຸດ​ທະ​ສາດ ແລະ ນະ­ໂຍ­ບາຍ​ຕ່າງໆ​ທີ່​ລັດ­ຖະ­ບານ​ຕ້ອງ​ໄດ້​ເອົາ­ໃຈ­ໃສ່ ເພື່ອ​ຫຼຸດ­ຜ່ອນ​ບັນ­ດາ​ຄວາມ​ບອບ​ບາງ​ຂອງ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ປະ­ເທດ​ໃນ­ຕໍ່­ໜ້າ​ນີ້ ໂດຍ​ສະ­ເພາະ ບັນ­ຫາ​ທີ່​ຕິດ​ພັນ​ໃນ​ການ​ຊຸກ­ຍູ້​ຄວາມ​ອາດ​ສາ­ມາດ​ໃນ​ການ​ຜະ­ລິດ​ຂອງ​ເສດ­ຖະ­ກິດ ແລະ ການ​ຫັນ­ປ່ຽນ​ໂຄງ​ປະ­ກອບ​ເສດ­ຖະ­ກິດ​ໄປ​ສູ່​ທິດ​ທາງ​ທີ່​ມີ​ຄຸນ​ນະ​ພາບ ແລະ ຍືນ​ຍົງ.

    ທ່ານ ກິ​ແກ້ວ ຈັນ­ທະ​ບູ​ຣີ ກ່າວ​ວ່າ: ປັດ­ຈຸ­ບັນ​ລາວ​ເຮົາ​ກຳ­ລັງ​ກະ­ກຽມ​ການ​ສະ­ຫຼຸບ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ຄັ້ງ​ທີ VIII (2016-2020) ແລະ ກະ­ກຽມ​ສ້າງ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ຄັ້ງ​ທີ IX (2021-2025) ເຊິ່ງ​ເປັນ​ໄລ­ຍະ​ທີ່​ລັດ­ຖະ­ບານ​ມີ​ຄວາມ​ພະ­ຍາ­ຍາມ​ຢ່າງ​ສູງ​ໃນ​ການ​ນຳ­ພາ​ປະ­ເທດ​ຫຼຸດ​ພົ້ນ​ອອກ​ຈາກ​ສະ­ຖາ­ນະ​ພາບ​ປະ­ເທດ​ດ້ອຍ​ພັດ­ທະ­ນາ ແລະ ກໍ​ແມ່ນ​ໄລ­ຍະ​ທີ່​ພວກ​ເຮົາ​ກຳ­ລັງ​ຈັດ​ຕັ້ງ​ປະ­ຕິ­ບັດ​ເປົ້າ​ໝາຍ​ການ​ພັດ­ທະ­ນາ​ແບບ​ຍືນ​ຍົງ (SDG) ດັ່ງ​ທີ່​ໄດ້​ຮັບ​ຮູ້​ແລ້ວ​ວ່າ​ລາວ​ໄດ້​ບັນ­ລຸ 2 ໃນ 3 ເງື່ອນ­ໄຂ​ມາດ­ຖານ (GNI ແລະ HAI ສ່ວນ EVI ພວກ ເຮົາ​ຍັງ​ບໍ່​ທັນ​ສາ­ມາດ​ບັນ­ລຸ​ໄດ້) ໃນ​ການ​ປະ​ເມີນ​ຂອງ​ອົງ­ການ CDP ປີ 2018 ແລະ ຄາດ​ວ່າ​ລາວ​ຈະ​ສາ­ມາດ​ບັນ­ລຸ​ການ​ປະ​ເມີນ​ປີ 2021 ໄດ້​ຕື່ມ​ອີກ ພ້ອມ​ກັນ​ນັ້ນ ລັດ­ຖະ­ບານ​ມີ​ຈຸດ​ມຸ່ງ​ໝາຍ​ຊຸກ­ຍູ້​ການ​ເຕີບ​ໂຕ​ເສດ­ຖະ­ກິດ​ໃຫ້​ມີ​ສະ­ຖຽນ​ລະ​ພາບ ຄຸນ​ນະ​ພາບ ແລະ ຍືນ​ຍົງ ໂດຍ​ສຸມ​ໃສ່​ການ​ຫັນ­ປ່ຽນ​ໂຄງ​ປະ­ກອບ​ເສດ­ຖະ­ກິດ​ໄປ​ສູ່​ການ​ຜະ­ລິດ​ທີ່​ມີ​ມູນ​ຄ່າ​ສູງ ແລະ ມີ​ການ​ຈ້າງ​ງານ​ຢ່າງ​ເຕັມ​ສ່ວນ ເຖິງ​ຢ່າງ­ໃດ​ກໍ​ຕາມ ລາວ​ເຮົາ​ຍັງ​ປະ​ເຊີນ​ກັບ​ສິ່ງ​ທ້າ​ທາຍ​ໃນ​ການ​ພັດ­ທະ­ນາ​ໃນ​ຫຼາຍ​ດ້ານ ເປັນ­ຕົ້ນ ການ​ເຕີບ​ໂຕ​ເສດ­ຖະ­ກິດ​ຍັງ​ອາ­ໄສ​ຂະ­ແໜງ­ການ​ຊັບ­ພະ­ຍາ­ກອນ​ເປັນ­ຕົ້ນ​ຕໍ ແລະ ມີ​ການ​ຈ້າງ​ງານ​ບໍ່​ເຕັມ​ສ່ວນ ການ​ສ້າງ​ລາຍ​ຮັບ​ໃຫ້​ປະ­ຊາ­ຊົນ​ເຫັນ​ວ່າ​ຍັງ​ບໍ່​ທັນ​ມີ​ຄວາມ​ທົ່ວ​ເຖິງ ແລະ ກ້າວ​ກະ­ໂດດ ນອກ​ນັ້ນ ພາກ​ການ​ຜະ­ລິດ​ເອ­ກະ​ຊົນ​ຍັງ​ອ່ອນ​ນ້ອຍ ບວກ​ກັບ​ສະ­ພາບ​ແວດ​ລ້ອມ​ການ​ດຳ­ເນີນ​ທຸ­ລະ​ກິດ​ທີ່​ຍັງ​ບໍ່​ເອື້ອ​ອຳ­ນວຍ ອີກ​ປະ­ການ​ໜຶ່ງ​ໃນ​ແຕ່​ລະ​ປີ​ປະ­ເທດ​ຂອງ​ພວກ​ເຮົາ​ຍັງ​ໄດ້​ປະ​ເຊີນ​ກັບ​ບັນ­ຫາ​ໄພ​ຂົ່ມ­ຂູ່​ຈາກ​ສິ່ງ­ແວ­ດລ້ອມ ແລະ ໄພ­ພິ­ບັດ ທາງ​ທຳ​ມະ​ຊາດ ເຊິ່ງ​ສົ່ງ​ຜົນ​ກະ­ທົບ​ໂດຍ​ກົງ​ຕໍ່​ກັບ​ຂະ​ບວນ​ການ​ພັດ­ທະ­ນາ​ຂອງ​ປະ­ເທດ​ຊາດ ບັນ­ດາ​ຄວາມ​ບອບ​ບາງ ແລະ ສິ່ງ​ທ້າ​ທາຍ​ດັ່ງ­ກ່າວ​ນີ້​ກຳ­ລັງ​ເປັນ​ໄພ​ຂົ່ມ­ຂູ່​ຕໍ່​ຂະ​ບວນ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ປະ­ເທດ ກໍ​ຄື ຂະ​ບວນ​ການ​ນຳ­ພາ​ປະ­ເທດ​ຫຼຸດ​ພົ້ນ​ອອກ​ຈາກ​ປະ­ເທດ​ດ້ອຍ​ພັດ­ທະ­ນາ.

ຂ່າວທີ່ກ່ຽວຂ້ອງ