ມວຍປໍ້າລາວ ຍາດໄດ້ຫຼຽນຄໍາຊີງແຊັມອາຊຽນ

1.716 10 ຕ.ລ. 2019 ວົງຈອນກີລາ
ມວຍປໍ້າລາວ ຍາດໄດ້ຫຼຽນຄໍາຊີງແຊັມອາຊຽນ

    ທ່ານ ມະ­ໂນ​ລົມ ພິ­ນິດ ຫົວ­ໜ້າ ຄູ​ເຝິກ​ທັບ​ນັກ­ກີ­ລາ​ມວຍ​ປ້ຳ​ທີມ​ຊາດ​ລາວ ແຈ້ງ​ໃຫ້​ຊາບ​ວ່າ: ສະ­ຫະ­ພັນ​ມວຍ​ປ້ຳ​ແຫ່ງ​ຊາດ​ໄດ້​ສົ່ງ​ນັກ­ກີ­ລາ​ມວຍ​ປ້ຳ​ທີມ​ຊາດ​ລາວ ປະ­ກອບ​ມີ​ຄະ­ນະ​ນຳ­ພາ 1 ທ່ານ ຄູ​ເຝິກ 2 ທ່ານ ແລະ ນັກ­ກີ­ລາ 8 ຄົນ ຍິງ 2 ຄົນ ເຂົ້າ​ຮ່ວມ​ແຂ່ງ­ຂັນ​ມວຍ​ປ້ຳ​ລາຍ­ການ​ຊູ​ອາດ ອາ​ຊຽນ​ແຊັມ​ປ້ຽນ​ຊິບ 2019 ຈັດ​ຂຶ້ນ​ທີ່​ແຂວງ​ສີ­ສະ​ເກດ ປະ­ເທດ​ໄທ ວັນ​ທີ 27 ກັນ­ຍາ ຫາ 2 ຕຸ­ລາ 2019 ມີ​ນັກ­ກີ­ລາ​ເຂົ້າ​ຮ່ວມ 7 ຊາດ ປະ­ກອບ​ມີ ໄທ ເຈົ້າ­ພາບ ຫວຽດ­ນາມ ຟິ​ລິບ​ປິນ ອິນ​ໂດ​ເນ​ເຊຍ ສິງ­ກະ­ໂປ ໃຕ້​ຫວັນ ແລະ ລາວ.

    ຜ່ານ​ການ​ແຂ່ງ­ຂັນ​ນັກ­ກີ­ລາ​ລາວ ສາ­ມາດ​ຍາດ​ໄດ້ 1 ຫຼຽນ​ຄຳ 1 ຫຼຽນ ເງິນ ແລະ 2 ຫຼຽນ​ທອງ ຕໍ່​ຜົນ­ງານ​ດັ່ງ­ກ່າວ ສາ­ມາດ​ປະ​ເມີນ​ຕີ​ລາ­ຄາ​ໄດ້​ຢ່າງ​ສູງ ພວກ​ເຮົາ​ສາ­ມາດ​ສ້າງ​ຜົນ­ງານ​ໄດ້​ຕາມ​ຄາດ­ໝາຍ​ທີ່​ວາງ​ໄວ້ ແລະ ເຊື່ອ​ໝັ້ນ​ວ່າ​ນັກ­ກີ­ລາ​ຊຸດ​ນີ້ ເຊິ່ງ​ໄດ້​ມີ​ການ​ກຽມ​ຕົວ​ມາ​ດີ ຈະ​ສາ­ມາດ​ກອບ​ກູ້​ຊື່​ສຽງ​ໃນ​ຊີ­ເກມ ຄັ້ງ​ທີ 30 ທີ່​ປະ­ເທດ​ຟິ​ລິບ​ປິນ ເປັນ​ເຈົ້າ­ພາບ.

    ສຳ­ລັບ​ຜົນ­ງານ 1 ຫຼຽນ​ຄຳ ໄດ້​ມາ​ຈາກ​ທ້າວ ໄຊ​ສົມ­ບູນ ເພດ​ສຸ­ພັນ ໃນ​ຮຸ່ນ​ນ້ຳ­ໜັກ 125 ກິ​ໂລ ໃນ​ນັ້ນ​ແມ່ນ​ສາ­ມາດ​ເອົາ​ຊະ­ນະ​ນັກ­ກີ­ລາ​ຫວຽດ­ນາມ A ຊະ­ນະ​ນັກ­ກີ­ລາ​ໄທ B ແລະ ຊະ­ນະ​ຫວຽດ­ນາມ B ສ່ວນ 1 ຫຼຽນ​ເງິນ​ໄດ້​ຈາກ​ນາງ ຂັນ​ທະ​ລີ ຮຸ່ນ​ນ້ຳ­ໜັກ 68 ກິ​ໂລ ປະ­ເພດ​ຟຣີ​ສະ​ຕາຍ ຜົນ­ງານ​ຊະ­ນະ ໄທ A ແລະ ຊະ­ນະ ໄທ E ແລະ 2 ຫຼຽນ​ທອງ ໄດ້​ຈາກ​ທ້າວ ບຸນ​ທຽນ ກົມ​ມາ­ລາ ຮຸ່ນ​ນ້ຳ­ໜັກ 53 ກິ​ໂລ ຊະ­ນະ ໄທ D ແລະ ໄທ E ແລະ ນາງ ມະ­ນີ​ຈັນ ອິນ​ແພງ ຮຸ່ນ​ນ້ຳ­ໜັກ 53 ກິ​ໂລ ເຊັ່ນ​ກັນ ຜົນ­ງານ​ເອົາ​ຊະ­ນະ ໄທ C ແລະ ໄທ A.

    ທ່ານ​ຍັງ​ໃຫ້​ຊາບ​ຕື່ມ​ວ່າ: ຕອນ​ແລງ​ວັນ​ທີ 8 ຕຸ­ລາ 2019 ນັກ­ກີ­ລາ​ມວຍ​ປ້ຳ​ທີມ​ຊາດ​ລາວ 11 ຄົນ ໃນ​ນັ້ນ ຄະ­ນະ​ນຳ 1 ທ່ານ ຄູ​ເຝິກ 2 ທ່ານ ແລະ ນັກ­ກີ­ລາ​ຊາຍ 6 ຄົນ ນັກ­ກີ­ລາ​ຍິງ 2 ຄົນ ໄດ້​ອອກ​ເດີນ­ທາງ​ຈາກ​ສະ­ໜາມ​ບິນ​ສາ­ກົນ​ວັດ​ໄຕ​ນະ­ຄອນ­ຫຼວງ​ວຽງ​ຈັນ ເພື່ອ​ໄປ​ເກັບ​ຕົວ​ເຝິກ­ຊ້ອມ​ໃນ​ໄລ­ຍະ 45 ວັນ ຢູ່​ນະ­ຄອນ­ຫຼວງ​ຮ່າ​ໂນ້ຍ ສສ ຫວຽດ­ນາມ ກ່ອນ​ຈະ​ເຂົ້າ​ຮ່ວມ​ງານ​ກີ­ລາ​ຊີ­ເກມ​ທີ່​ປະ­ເທດ​ຟິ​ລິບ​ປິນ.

ຂ່າວທີ່ກ່ຽວຂ້ອງ