ຂ່າວຫຼ້າສຸດ

ແຂ່ງຂັນກີລາແບ່ງປັນນ້ຳໃຈ ຊ່ວຍເຫຼືອຜູ້ປະສົບໄພນ້ຳຖ້ວມ

627 10 ຕ.ລ. 2019 ວົງຈອນກີລາ

    ວັນ​ທີ 21-22 ກັນ­ຍາ 2019 ຜ່ານ​ມາ ເມືອງ​ຫົງ​ສາ ແຂວງ​ໄຊ​ຍະ​ບູ​ລີ ຈັດ­ການ​ແຂ່ງ­ຂັນ​ກີ­ລາ​ການ​ກຸ­ສົນ​ແບ່ງ­ປັນ​ນ້ຳ­ໃຈ​ຊ່ວຍ­ເຫຼືອ​ຜູ້​ປະ­ສົບ​ໄພ​ນ້ຳ​ຖ້ວມ ຢູ່​ແຂວງ​ພາກ​ກາງ ແລະ ພາກ​ໃຕ້ ຂຶ້ນ​ທີ່​ເດີ່ນ​ກີ­ລາ​ເຕະ­ບານ​ເມືອງ​ຫົງ​ສາ ແລະ ເດີ່ນ​ກີ­ລາ​ເຕະ­ບານ​ກັນ­ຍາ ເປັນ​ປະ­ທານ​ຂອງ​ທ່ານ ຄຳ​ຫຼ້າ ຜິວ​ວັນ­ນາ ວ່າ­ການ​ເຈົ້າ­ເມືອງ​ຫົງ​ສາ ມີ​ການ​ນຳ​ເມືອງ ຄະ­ນະ​ຮັບ­ຜິດ­ຊອບ​ຈັດ​ງານ ພ້ອມ​ດ້ວຍ​ນັກ­ກີ­ລາ​ເຂົ້າ​ຮ່ວມ.

    ເພື່ອ​ເປັນ​ການ​ລະ­ດົມ​ທຶນ​ປະ­ກອບ­ສ່ວນ​ຊ່ວຍ­ເຫຼືອ​ຜູ້​ປະ­ສົບ​ເຄາະ​ຮ້າຍ​ຈາກ​ໄພ­ພິ­ບັດ​ນ້ຳ​ຖ້ວມ​ຢູ່ 2 ແຂວງ​ພາກ​ກາງ ແລະ 4 ແຂວງ​ພາກ​ໃຕ້ ຄະ­ນະ​ພັກ ອົງ­ການ​ປົກ­ຄອງ​ເມືອງ​ຫົງ​ສາ ສົມ­ທົບ​ກັບ​ບໍ­ລິ­ສັດ ນັກ­ທຸ­ລະ­ກິດ​ສ່ວນ​ບຸກ­ຄົນ ລວມ​ທັງ​ຊາວ​ຄ້າ­ຂາຍ ແລະ ປະ­ຊາ­ຊົນ​ບັນ­ດາ­ເຜົ່າ​ພາຍ​ໃນ​ເມືອງ ພ້ອມ​ກັນ​ສ້າງ​ກິດ­ຈະ­ກຳ​ປະ­ເພດ​ກີ­ລາ​ເຕະ­ບານ​ຟຸດ​ຊໍ​ຂຶ້ນ ມີ​ນັກ­ກີ­ລາ​ເຂົ້າ​ຮ່ວມ 26 ທີມ ຍິງ 4 ທີມ ຜ່ານ​ການ​ແຂ່ງ­ຂັນ ທີມ​ຊະ­ນະ​ເລີດ​ອັນ​ດັບ 1 ເພດ​ຊາຍ ທີມ​ບ້ານ​ໂພນ​ໄຊ ອັນ​ດັບ 2 ບໍ­ລິ­ສັດ​ໄຟ­ຟ້າ​ຫົງ​ສາ ອັນ​ດັບ 3 ທີມ​ຮ່ວມ​ຫ້ອງ​ວ່າ​ການ­ເມືອງ ແລະ ບໍ­ລິ­ສັດ​ພົງ­ພັນ ສ່ວນ​ອັນ​ດັບ 1 ເພດ​ຍິງ ທີມ​ຮ້ານ​ຂາຍ​ລົດ ຊັນ​ເດີ ບ້ານ​ສີ​ມຸງ​ຄູນ ອັນ​ດັບ 2 ທີມ​ບ້ານ FC ແລະ ອັນ​ດັບ 3 ທີມ​ຫ້ອງ­ການ ສຶກ​ສາ​ທິ​ການ ແລະ ກີ­ລາ ແລະ ຫ້ອງ­ການ​ສາ­ທາ­ລະ­ນະ​ສຸກ ໃຫ້​ກຽດ​ມອບ​ລາ­ງວັນ ໂດຍ​ທ່ານ​ນາງ ດາວ​ວິນ ລາດ​ຊະ​ກິດ ຮອງ​ເຈົ້າ­ເມືອງ​ຫົງ​ສາ.

    ນອກ​ນັ້ນ ຍັງ​ໄດ້​ປຸກ­ລະ­ດົມ​ທຸກ​ພາກ­ສ່ວນ​ໃນ​ສັງ­ຄົມ​ຮ່ວມ​ບໍ­ລິ­ຈາກ​ວັດ­ຖຸ​ປັດ​ໄຈ​ເຄື່ອງ­ນຸ່ງ ເຂົ້າ­ສານ ອາ­ຫານ​ແຫ້ງ ຢາ​ປົວ​ພະ­ຍາດ ແລະ ອື່ນໆ ເພື່ອ​ນຳ­ໄປ​ມອບ​ໃຫ້​ຜູ້​ປະ­ສົບ​ໄພ­ພິ­ບັດ​ຄັ້ງ​ນີ້ ພ້ອມ​ທັງ​ເປັນ​ການ​ສ້າງ​ຂະ​ບວນ​ການ​ຄຳ­ນັບ​ຮັບ​ຕ້ອນ​ກອງ​ປະ­ຊຸມ​ໃຫຍ່ ຄັ້ງ​ທີ VIII ຂອງ​ອົງ­ຄະ​ນະ​ພັກ​ເມືອງ​ຕື່ມ​ອີກ.

ຂ່າວທີ່ກ່ຽວຂ້ອງ