ເຂື່ອນໄຟຟ້ານ້ຳຂອງໄຊຍະບູລີ ຈະເປີດນຳໃຊ້ທ້າຍປີນີ້

1.176 09 ຕ.ລ. 2019 ຂ່າວໜ້າ​ໜຶ່ງ
ເຂື່ອນໄຟຟ້ານ້ຳຂອງໄຊຍະບູລີ ຈະເປີດນຳໃຊ້ທ້າຍປີນີ້

    ກອງ​ປະ­ຊຸມ​ຄະ­ນະ​ກຳ­ມະ­ການ​ຊີ້​ນຳ​ຮ່ວມ ຂອງ​ໂຄງ­ການ​ເຂື່ອນ​ໄຟ­ຟ້າ​ນ້ຳ­ຂອງ​ໄຊ​ຍະ​ບູ​ລີ ຄັ້ງ​ທີ VIII ຈັດ​ຂຶ້ນ​ວັນ​ທີ 8 ຕຸ­ລາ 2019 ຢູ່​ຫ້ອງ​ວ່າ­ການ​ປົກ­ຄອງ ແຂວງ​ໄຊ​ຍະ​ບູ​ລີ ໂດຍ​ເປັນ​ປະ­ທານ​ຂອງ​ທ່ານ  ຄຳ​ມະ­ນີ ອິນ​ທິ​ລາດ ລັດ­ຖະ­ມົນ­ຕີ​ກະ­ຊວງ​ພະ­ລັງ­ງານ ແລະ ບໍ່​ແຮ່ ມີ​ທ່ານ ບຸນ​ປອນ ສີ​ສຸ​ລາດ ປະ­ທານ​ກຳ­ມາ​ທິ​ການ​ເສດ­ຖະ­ກິດ ເຕັກ​ໂນ​ໂລ​ຊີ ແລະ ສິ່ງ­ແວ­ດລ້ອມ ສະ­ພາ​ແຫ່ງ​ຊາດ ພ້ອມ​ດ້ວຍ​ຮອງ​ເຈົ້າ­ແຂວງ​ໄຊ​ຍະ​ບູ​ລີ ແຂວງ​ຫຼວງ​ພະ​ບາງ ກະ­ຊວງ ພະ­ແນກ­ການ​ທີ່​ກ່ຽວ­ຂ້ອງ ແລະ ຕາງ­ໜ້າ​ໂຄງ­ການ ເຂົ້າ​ຮ່ວມ.

    ກອງ​ປະ­ຊຸມ​ໄດ້​ຮັບ​ຟັງ​ລາຍ​ງານ​ສະ­ພາບ​ການ­ຈັດ­ຕັ້ງ​ປະ­ຕິ­ບັດ​ໂຄງ­ການ​ໃນ​ດ້ານ​ຕ່າງໆ​ລວມ​ເຖິງ​ຂໍ້​ສະ­ດວກ ແລະ ຂໍ້​ຫຍຸ້ງ­ຍາກ​ທີ່​ຕິດ​ພັນ​ກັບ​ການ​ດຳ­ເນີນ​ໂຄງ­ການ ເພື່ອ​ພ້ອມ​ກັນ​ພິ­ຈາ­ລະ­ນາ​ໃຫ້​ທິດ​ຊີ້​ນຳ ເພື່ອ​ເຮັດ​ໃຫ້​ບັນ­ຫາ​ຕ່າງໆ​ໄດ້​ຮັບ​ການ​ແກ້​ໄຂ ແລະ ມີ​ຜົນ­ສຳ­ເລັດ ພ້ອມ​ເປີດ​ນຳ​ໃຊ້​ຢ່າງ​ເປັນ​ທາງ​ການ​ໃນ​ທ້າຍ​ປີ 2019 ເຊິ່ງ​ໂຄງ­ການ​ເຂື່ອນ​ໄຟ­ຟ້າ​ນ້ຳ­ຂອງ​ໄຊ​ຍະ​ບູ​ລີ  ໄດ້​ເຊັນ​ສັນ­ຍາ​ສຳ​ປະ­ທານ (CA) ລະ­ຫວ່າງ​ບໍ­ລິ­ສັດ ໄຊ​ຍະ​ບູ​ລີ​ພາວ​ເວີ ກັບ​ລັດ­ຖະ­ບານ​ລາວ​ໃນ​ເດືອນ​ຕຸ­ລາ 2010 ແລະ  ດຳ­ເນີນ​ການ​ກໍ່­ສ້າງ​ເດືອນ​ພະ­ຈິກ 2012 ໃຊ້​ເວ­ລາ​ການ​ກໍ່­ສ້າງ​ທັງ​ໝົດ 8 ປີ ອາ­ຍຸ​ສຳ​ປະ­ທານ​ໂຄງ­ການ 29 ປີ (2019-2046) ເຂື່ອນ​ໄຟ­ຟ້າ​ມີ​ກຳ­ລັງ​ຕິດ​ຕັ້ງ​ທັງ​ໝົດ 1.285 ເມ​ກາ​ວັດ (MW) ການ​ຜະ­ລິດ​ກະ­ແສ​ໄຟ­ຟ້າ​ສະ­ເລ່ຍ 7.370 ຈີ​ກະ​ວັດ​ໂມງ​ຕໍ່​ປີ ລວມ​ມູນ​ຄ່າ​ຂອງ​ໂຄງ­ການ 3.800 ລ້ານ​ໂດ​ລາ​ສະ­ຫະ­ລັດ ຫຼື ປະ­ມານ 33.497 ຕື້​ກີບ ໂຄງ­ການ​ນີ້​ມີ​ເປົ້າ​ໝາຍ​ເພື່ອ​ການ​ຜະ­ລິດ​ພະ­ລັງ­ງານ​ໄຟ­ຟ້າ​ສົ່ງ​ຂາຍ​ໃຫ້­ການ​ໄຟ­ຟ້າ​ຝ່າຍ​ຜະ­ລິດ​ແຫ່ງ​ປະ­ເທດ​ໄທ ແລະ ລັດ​ວິ​ສາ​ຫະ​ກິດ​ໄຟ­ຟ້າ​ລາວ.

    ສຳ­ລັບ​ຄວາມ​ຄືບ​ໜ້າ​ຂອງ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ໂຄງ­ການ ມາ​ຮອດ​ປັດ­ຈຸ­ບັນ​ວຽກ​ກໍ່­ສ້າງ​ທົ່ວ​ໄປ ວຽກ​ກົນ​ຈັກ​ພະ­ລັງ​ນ້ຳ ວຽກ​ກົນ​ຈັກ​ໄຟ­ຟ້າ ແລະ ວຽກ​ລະ­ບົບ​ສາຍ​ສົ່ງ ໜ້າ​ວຽກ​ທັງ​ໝົດ 100%  ແລະ ການ​ຈັດ​ສັນ​ຍົກ­ຍ້າຍ​ບ້ານ​ປະ­ຊາ­ຊົນ​ທີ່​ໄດ້​ຮັບ​ຜົນ​ກະ­ທົບ​ມີ​ທັງ​ໝົດ 15 ບ້ານ (ແຂວງ​ໄຊ​ຍະ​ບູ​ລີ 6 ບ້ານ ແຂວງ​ຫຼວງ​ພະ​ບາງ 9 ບ້ານ) ໃນ​ນີ້ ມີ​ບ້ານ​ຖືກ​ຍົກ­ຍ້າຍ​ທັງ​ໝົດ 8 ບ້ານ ບ້ານ​ຍົກ­ຍ້າຍ 7 ບ້ານ ລວມ​ທັງ​ໝົດ 626 ຄອບ­ຄົວ ມີ​ເຮືອນ​ທີ່​ໄດ້​ຮັບ​ການ​ຈັດ​ສັນ​ໃຫ້ 663 ຫຼັງ ປະ­ຊາ­ຊົນ​ທີ່​ໄດ້​ຮັບ​ຜົນ​ກະ­ທົບ 2.974 ຄົນ.

    ນັບ​ແຕ່​ມື້​ເລີ່ມ​ຂາຍ​ໄຟ­ຟ້າ​ຢ່າງ​ເປັນ​ທາງ​ການ​ປີ 2019 ຮອດ​ປີ 2048 ລາຍ​ໄດ້​ທີ່​ລັດ­ຖະ­ບານ​ລາວ ຈະ​ໄດ້​ຮັບ​ທັງ​ໝົດ 3.913 ລ້ານ​ໂດ​ລາ ຫຼື ປະ­ມານ 34.494 ຕື້​ກີບ ສະ­ເລ່ຍ​ປີ​ລະ 135 ລ້ານ​ໂດ​ລາ ຫຼື ປະ­ມານ 1.190 ຕື້​ກີບ.

    ໂອ­ກາດ​ນີ້ ຄະ­ນະ​ຜູ້​ແທນ​ເຂົ້າ​ຮ່ວມ​ກອງ​ປະ­ຊຸມ​ຍັງ​ໄດ້​ລົງ​ຢ້ຽມ­ຢາມ​ພາກ​ສະ­ໜາມ​ຂອງ​ໂຄງ­ການ​ກໍ່­ສ້າງ ເພື່ອ​ຕິດ­ຕາມ​ສະ­ພາບ​ການ​ແກ້​ໄຂ​ບັນ­ຫາ​ດ້ານ​ສິ່ງ­ແວ­ດລ້ອມ ໂດຍ​ສະ­ເພາະ ວຽກ​ງານ​ອະ­ນາ­ໄມ ເກັບ​ກູ້​ຊີ­ວະ​ມວນ​ອອກ​ຈາກ​ອ່າງ­ເກັບ­ນ້ຳ ການ​ຍົກ­ຍ້າຍ​ຈັດ​ສັນ​ປະ­ຊາ­ຊົນ​ທີ່​ໄດ້​ຮັບ​ຜົນ​ກະ­ທົບ​ຈາກ​ໂຄງ­ການ ແລະ ອື່ນໆ​ຕື່ມ​ອີກ.

ຂ່າວທີ່ກ່ຽວຂ້ອງ