ລາວໂທລະຄົມ ເປີດທົດລອງນຳໃຊ້ລະບົບ 5G

549 09 ຕ.ລ. 2019 ຂ່າວໜ້າ​ໜຶ່ງ
ລາວໂທລະຄົມ ເປີດທົດລອງນຳໃຊ້ລະບົບ 5G

    ບໍ­ລິ­ສັດ​ລາວ​ໂທລະ​ຄົມ­ມະ­ນາ­ຄົມ​ມະ­ຫາ­ຊົນ ເປີດ​ທົດ​ລອງ​ນຳ​ໃຊ້​ລະ­ບົບ 5G ເປັນ​ຄັ້ງ​ທຳ​ອິດ​ໃນ ສປປ ລາວ ເຊິ່ງ​ໄດ້​ພັດ­ທະ­ນາ​ຂຶ້ນ​ໃຫ້​ມີ​ປະ​ສິດ­ທິ​ຜົນ​ສູງ​ກວ່າ​ລະ­ບົບ 4G ໂດຍ​ສະ­ເພາະ ຄວາມ​ໄວ​ໃນ​ການ​ຮັບ-ສົ່ງ​ແລະ ການ​ອັບ​ໂຫຼດ​ຂໍ້​ມູນ​ຕ່າງໆ ຄວາມ​ສາ­ມາດ​ຮອງ​ຮັບ​ການ​ເຊື່ອມ​ຕໍ່​ອຸ­ປະ­ກອນ​ຕ່າງໆ​ທີ່​ຫຼາຍ​ຂຶ້ນ ໄລ­ຍະ​ເວ­ລາ​ໃນ​ການ​ຕອບ​ສະ­ໜອງ/ຕອບ​ໂຕ້​ທີ່​ສັ້ນ​ລົງ ແລະ ຄວາມ​ສາ­ມາດ​ອື່ນໆ​ອີກ ເພື່ອ​ຕອບ​ສະ­ໜອງ​ຄວາມ​ຕ້ອງ­ການ​ຂອງ​ຜູ້​ຊົມ­ໃຊ້​ທີ່​ມີ​ການ​ປ່ຽນ­ແປງ​ໄປ​ເລື້ອຍໆ.

    ພິ­ທີ​ເປີດ​ທົດ​ລອງ​ນຳ​ໃຊ້​ລະ­ບົບ 5G ດັ່ງ­ກ່າວ ຈັດ​ຂຶ້ນ​ວັນ​ທີ 8 ຕຸ­ລາ 2019 ຢູ່​ສຳ­ນັກ­ງານ​ໃຫຍ່​ບໍ­ລິ­ສັດ​ລາວ​ໂທລະ​ຄົມ­ມະ­ນາ­ຄົມ​ມະ­ຫາ­ຊົນ ໂດຍ​ມີ​ທ່ານ ສຸ​ພົນ ຈັນ­ທະ​ວີ​ໄຊ ຮອງ​ຜູ້­ອຳ­ນວຍ­ການ​ໃຫຍ່​ບໍ­ລິ­ສັດ​ລາວ​ໂທ ລະ​ຄົມ­ມະ­ນາ­ຄົມ​ມະ­ຫາ­ຊົນ ພ້ອມ​ດ້ວຍ​ຜູ້­ຕາງ­ໜ້າ​ຈາກ​ບັນ­ດາ​ກົມ ກະ­ຊວງ​ໄປ­ສະ­ນີ ໂທລະ​ຄົມ­ມະ­ນາ­ຄົມ ແລະ ການ​ສື່­ສານ ບັນ­ດາ​ລູກ​ຄ້າ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ທ່ານ ສຸ​ພົນ ຈັນ­ທະ​ວີ​ໄຊ ກ່າວ​ວ່າ: ລາວ​ໂທລະ​ຄົມ ເປັນ​ໜຶ່ງ​ໃນ​ຜູ້​ໃຫ້​ບໍ­ລິ­ການ​ດ້ານ​ການ​ສື່­ສານ​ໂທລະ​ຄົມ ມະ​ນາ​ຄົມ ບໍ່​ໄດ້​ລົດ​ລະ​ໃນ​ການ​ພັດ­ທະ­ນາ​ຕົນ​ເອງ ເພື່ອ​ນຳ​ເອົາ​ເຕັກ​ໂນ​ໂລ​ຊີ​ໃໝ່ໆ ທັນ​ສະ­ໄໝ ແລະ ກ້າວ­ໜ້າ ມາ​ໃຫ້​ບໍ­ລິ­ການ​ແກ່​ສັງ­ຄົມ ການ​ເປີດ​ທົດ​ລອງ​ນຳ​ໃຊ້​ລະ­ບົບ 5G ຄັ້ງ​ນີ້ ເປັນ​ຂີດ​ໝາຍ​ສຳ­ຄັນ​ຂອງ​ວຽກ​ງານ​ການ​ສື່­ສານ​ໂທລະ​ຄົມ­ມະ­ນາ­ຄົມ​ຂອງ​ລາວ ເວົ້າ​ສະ­ເພາະ ລາວ​ໂທລະ​ຄົມ ແລະ ຜູ້​ຊົມ­ໃຊ້​ໃນ​ລາວ ຈະ​ໄດ້​ສຳ­ຜັດ​ປະ ສົບ​ການ​ໃໝ່​ດ້ານ​ການ​ສື່­ສານ​ລະ­ດັບ​ໂລກ ແລະ ໃນ​ໄວໆ​ນີ້​ລາວ​ໂທລະ​ຄົມ ຈະ​ເປີດ​ໃຫ້​ບໍ­ລິ­ການ​ລະ­ບົບ 5G ຢ່າງ​ເຕັມ​ຮູບ​ແບບ ເຊິ່ງ​ເປັນ­ຄວາມ​ພະ­ຍາ­ຍາມ​ຂອງ​ລາວ​ໂທລະ​ຄົມ​ໃນ​ການ​ນຳ​ເອົາ​ເຕັກ­ນິກ​ວິ­ທະ­ຍາ­ສາດ ເຕັກ​ໂນ​ໂລ​ຊີ​ທີ່​ກ້າວ­ໜ້າ ແລະ ທັນ​ສະ­ໄໝ​ທຽບ​ເທົ່າ​ກັບ​ສາ­ກົນ ເພື່ອ​ຕອບ​ສະ­ໜອງ​ຄວາມ​ຕ້ອງ­ການ​ຂອງ​ສັງ­ຄົມ ເປັນ­ຕົ້ນ ການ​ນຳ​ໃຊ້​ໃນ​ຊີ­ວິດ​ປະ­ຈຳ​ວັນ ໝູນ​ໃຊ້​ເຂົ້າ​ໃນ​ຂົງ­ເຂດ​ເສດ­ຖະ­ກິດ ເພື່ອ​ເຮັດ​ໃຫ້​ສັງ­ຄົມ​ລາວ ກ້າວ​ໄປ​ສູ່​ຍຸກ​ດິ​ຈິ​ຕອນ ທັງ​ເປັນ​ການ​ສົ່ງ­ເສີມ​ການ​ພັດ­ທະ­ນາ​ທຸ­ລະ​ກິດ​ໂທລະ​ຄົມ­ມະ­ນາ­ຄົມ​ໃຫ້​ທຽບ​ທັນ ແລະ ສາ­ມາດ​ເຊື່ອມ​ໂຍງ​ກັບ​ບັນ­ດາ​ປະ­ເທດ​ໃນ​ພາກ​ພື້ນ ແລະ ສາ­ກົນ.

ຂ່າວທີ່ກ່ຽວຂ້ອງ