ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 09-10-2019

623 09 ຕ.ລ. 2019 ຫົວຂໍ້ຂ່າວອື່ນໆ

    ມື້­ນີ້ ມີ​ຂ່າວ​ກ່ຽວ​ກັບ​ຣັດ​ເຊຍ​ມີ​ແຜນ​ນຳ​ໃຊ້​ວີ​ຊາ​ເອ​ເລັກ​ໂຕຼ​ນິກ ການ​ຈຳ­ກັດ​ຢາ­ສູບ​ໄຟ­ຟ້າ​ທີ່ ອິນ​ໂດ​ເນ​ເຊຍ ແລະ ເລື່ອງ​ການ​ຮ່ວມ​ມື​ກຳ­ຈັດ​ຂີ້​ເຫ​ຍື້​ອປຼັສ​ຕິກ​ທີ່ ນະ­ຄອນ­ຫຼວງ​ພະ­ນົມ​ເປັນ ລະ­ຫວ່າງ​ກຳ­ປູ­ເຈຍ​ກັບ​ອົງ­ການ​ອຸຍ​ເນັດ​ສະ​ໂກ.

    ທີ່ ສະ­ຫະ­ພັນ​ຣັດ​ເຊຍ: ຂ່າວ​ຈາກ​ສະ­ຫະ­ພັນ​ຣັດ​ເຊຍ ໃນ​ທ້າຍ​ເດືອນ​ສິງ­ຫາ​ປີ​ນີ້ ໃຫ້​ຮູ້​ວ່າ ທ່ານ​ປະ­ທາ­ນາ­ທິ­ບໍ­ດີ ວະ​ລາ​ດີ​ເມຍ ປູ​ຕິນ ໄດ້​ລົງ​ນາມ​ໃສ່​ລັດ​ຖະ​ດຳ­ລັດ​ເປີດ​ກວ້າງ​ນະ­ໂຍ­ບາຍ​ອອກ​ວີ​ຊາ​ເອ​ເລັກ​ໂຕຼ​ນິກ​ໃນ 2 ເຂດ​ພາຍ​ໃນ​ປະ­ເທດ ໃນ​ນັ້ນ ລວມ​ມີ​ເຂດ​ນະ­ຄອນ​ແຊງ​ເປ​ແຕກ​ບວກ (ເມືອງ​ເລ​ນິນ​ກຼາດ ໃນ​ຍຸກ​ສະ­ຫະ­ພາບ​ໂຊ​ວຽດ) ຂ່າວ​ໃຫ້​ຮູ້​ຕື່ມ​ວ່າ ທາງ​ການ​ຣັດ​ເຊຍ​ຈະ​ປະ­ຕິ­ບັດ​ນະ­ໂຍ­ບາຍ​ວີ​ຊາ​ເອ​ເລັກ​ໂຕຼ​ນິກ ສຳ­ລັບ​ພົນ­ລະ­ເມືອງ​ຂອງ​ບາງ​ປະ­ເທດ​ໃນ​ສະ­ຫະ­ພາບ​ເອີ​ຣົບ ເຊິ່ງ​ຈະ​ມີ​ຜົນ​ບັງ­ຄັບ​ໃຊ້​ນັບ​ແຕ່​ວັນ​ທີ 1 ເດືອນ​ຕຸ­ລາ​ປີ​ນີ້ ເປັນ­ຕົ້ນ​ໄປ.

    ທີ່ ອິນ​ໂດ​ເນ​ເຊຍ: ມາດ​ຕະ­ການ​ຈຳ­ກັດ​ຢາ­ສູບ​ເອ​ເລັກ​ໂຕຼ​ນິກ​ໃນ​ປະ­ເທດ​ອິນ​ໂດ​ເນ​ເຊຍ ໄດ້​ເລີ່ມ​ປະ­ຕິ­ບັດ​ກັນ​ມາ​ແຕ່​ຕົ້ນ​ປີ 2018 ພາຍ​ໃຕ້​ກົດ​ລະ­ບຽບ​ສະ­ບັບ​ໃໝ່​ຂອງ​ກະ­ຊວງ​ການ​ຄ້າ​ອິນ​ໂດ​ເນ​ເຊຍ (Vientiane Timls 23/11/2017) ກົດ​ລະ­ບຽບ​ສະ­ບັບ​ດັ່ງ­ກ່າວ ໄດ້​ກຳ­ນົດ​ວ່າ ຢາ­ສູບ​ໄຟ­ຟ້າ​ສາ­ມາດ​ຈຳ­ໜ່າຍ​ໄດ້​ທົ່ວ​ໄປ ແຕ່​ຜູ້​ປະ­ກອບ​ການ​ຕ້ອງ​ໄດ້​ຮັບ​ໜັງ­ສື​ແນະ­ນຳ​ຢ່າງ​ເປັນ​ທາງ​ການ​ຈາກ​ກະ­ຊວງ​ສາ­ທາ­ລະ­ນະ​ສຸກ ແລະ ສິນ­ຄ້າ (ຢາ­ສູບ) ຕ້ອງ​ໄດ້​ຖືກ​ຮັບ­ຮອງ​ໂດຍ​ຫ້ອງ­ການ​ມາດ­ຕະ­ຖານ​ແຫ່ງ​ຊາດ​ກ່ອນ ທ່ານ​ລັດ­ຖະ­ມົນ­ຕີ​ການ​ຄ້າ​ອິນ​ໂດ​ເນ​ເຊຍ ໄດ້​ໃຫ້​ຮູ້​ກ່ຽວ​ກັບ​ບັນ­ຫາ​ນີ້​ວ່າ ທາງ​ການ​ຈະ​ຕິດ­ຕາມ​ກວດ­ກາ​ປະ­ຕິ­ບັດ​ກົດ​ລະ­ບຽບ​ສະ­ບັບ​ນີ້ ແລະ ຈະ​ໃຊ້​ມາດ​ຕະ­ການ​ເດັດ­ຂາດ​ຕໍ່​ຜູ້​ລະ­ເມີດ.

    ທີ່ ກຳ­ປູ­ເຈຍ: ມີ​ຂ່າວ​ເກົ່າໆ​ແຕ່​ເປັນ​ໜ້າ​ສົນ­ໃຈ​ຈາກ​ກຳ­ປູ­ເຈຍ ທີ່​ເວົ້າ​ເຖິງ​ການ​ຮ່ວມ​ມື​ລະ­ຫວ່າງ​ກະ­ຊວງ​ສິ່ງ­ແວ­ດລ້ອມ ກະ­ຊວງ​ທ່ອງ​ທ່ຽວ​ກຳ­ປູ­ເຈຍ ກັບ​ອົງ­ການ​ຢູ​ເນັດ​ສະ​ໂກ (UNESCO) ເພື່ອ​ຫຼຸດ­ຜ່ອນ​ການ​ໃຊ້​ຖົງ​ຢາງ (ປຼັສ​ຕິກ) ໃນ​ນະ­ຄອນ­ຫຼວງ​ພະ­ນົມ​ເປັນ ແລະ ເພື່ອ​ປູກ​ຈິດ​ສຳ­ນຶກ​ກ່ຽວ​ກັບ​ຄວາມ​ອັນ­ຕະ­ລາຍ ຈາກ​ການ​ຖີ້ມ​ຂີ້​ເຫ​ຍື້​ອປຼັສ​ຕິກ​ຊະ­ຊາຍ ໂຄງ­ການ​ຮ່ວມ​ມື​ເພື່ອ​ຫຼຸດ­ຜ່ອນ​ການ​ໃຊ້​ຖົງ​ປຼັສ​ຕິກ​ດັ່ງ­ກ່າວ ໄດ້​ເລີ່ມ​ເຄື່ອນ​ໄຫວ​ຕົວ​ຈິງ​ນັບ​ແຕ່​ທ້າຍ​ປີ 2015 ເປັນ­ຕົ້ນ​ມາ ໂດຍ​ເລີ່ມ​ຈາກ​ເຂດ​ທີ່­ຢູ່​ລຽບ​ຕາມ​ແຄມ​ແມ່­ນ້ຳ​ເຊັ່ນ: ບໍ­ລິ­ເວນ​ໃກ້ໆ​ກັບ​ສຳ­ນັກ​ລາ­ຊະ​ວັງ ບ່ອນ​ທີ່​ມີ​ນັກ​ທ່ອງ​ທ່ຽວ​ຕ່າງ­ປະ­ເທດ ແລະ ຊາວ​ນະ­ຄອນ­ຫຼວງ​ພະ­ນົມ​ເປັນ​ທ່ຽວ​ຊົມ​ຢ່າງ​ໜາ​ແໜ້ນ ໃນ​ໄລ­ຍະ​ຜ່ານ​ມາ​ຄວາມ​ສວຍ​ງາມ​ຂອງ​ເຂດ​ດັ່ງ­ກ່າວ​ຖືກ​ທຳ­ລາຍ​ໂດຍ​ຖົງ​ຢາງ ແລະ ສິ່ງ​ເສດ​ເຫຼືອ​ທີ່​ຖີ້ມ​ຊະ­ຊາຍ​ຈາກ​ຜູ້​ທີ່​ຂາດ​ຄວາມ​ຮັບ­ຜິດ­ຊອບ ຂ່າວ​ໃຫ້​ຮູ້​ວ່າ ທາງ​ການ​ນະ­ຄອນ­ຫຼວງ​ພະ­ນົມ​ເປັນ ໄດ້​ແນະ­ນຳ​ໃຫ້​ຊາວ​ນະ­ຄອນ​ຮູ້​ແຍກ​ຂີ້​ເຫຍື້ອ​ທີ່​ຈະ​ມີ​ຜົນ​ກະ­ທົບ​ຕໍ່​ສິ່ງ­ແວ­ດລ້ອມ ແຕ່​ການ​ປະ­ຕິ­ບັດ​ນັ້ນ​ຍັງ​ເປັນ​ສິ່ງ​ທ້າ​ທາຍ ຮ້ານ​ສັບ­ພະ​ສິນ­ຄ້າ​ສາ­ກົນ ຢູ່​ນະ­ຄອນ­ຫຼວງ ໄດ້​ເລີ່ມ​ເກັບ​ຄ່າ​ຖົງ​ຢາງ​ໃນ​ອັດ­ຕາ​ຕ່ຳໆ ແຕ່​ສ່ວນ​ບັນ­ດາ​ຫ້າງ​ຮ້ານ​ຂະ­ໜາດ​ນ້ອຍ ຜັດ​ຍັງ​ໃຫ້​ບໍ­ລິ­ການ​ຖົງ​ຢາງ​ໂດຍ​ບໍ່​ເສຍ​ຄ່າ​ແກ່​ລູກ​ທີ່​ຊື້​ເຄື່ອງ​ຢູ່​ຮ້ານ​ຂອງ​ພວກ​ຕົນ ໃນ​ປີ 2010 ນະ­ຄອນ­ຫຼວງ​ພະ­ນົມ​ເປັນ ປະ​ເຊີນ​ກັບ​ບັນ­ຫາ​ນ້ຳ​ຖ້ວມ​ຂັງ ເຊິ່ງ​ເຊື່ອ​ກັນ​ທົ່ວ​ໄປ​ວ່າ ຕົ້ນ­ຕໍ​ແມ່ນ​ເກີດ​ມາ​ຈາກ​ຂີ້​ເຫຍື້ອ ຖົງ​ປຼັສ​ຕິກ​ໄປ​ອຸດ​ຕັນ​ທໍ່​ລະ­ບາຍ​ນ້ຳ.

ຂ່າວທີ່ກ່ຽວຂ້ອງ