ຂ່າວຫຼ້າສຸດ

ລາງວັນ​ໂນ​ແບນ​ຂະ​ແໜງ​ແພດສາດ​ປີ 2019 ​ເປັນ​ຂອງ​ນັກວິທະຍາສາດ 3 ຄົນ

837 09 ຕ.ລ. 2019 ຂ່າວຕ່າງປະເທດ
ລາງວັນ​ໂນ​ແບນ​ຂະ​ແໜງ​ແພດສາດ​ປີ 2019 ​ເປັນ​ຂອງ​ນັກວິທະຍາສາດ 3 ຄົນ

    ນັກວິທະຍາສາດ​ຊາວ​ອາ​ເມ​ຣິ​ກັນ 2 ຄົນ ໄດ້ແກ່ ວິນ​ລຽມ ເຄລິນ ແລະ  ປີ​ເຕີ ແຣດ​ກລີ​​ຟ ພ້ອມ​ດ້ວຍ​ນັກວິທະຍາສາດ​ຊາວ​ອັງກິດ ເກຣັກ ເຊ​ແມນ​ຊາ ໄດ້​ຮັບ​ການ​ປະກາດ​ວ່າ​ເປັນ​ຜູ້​ໄດ້​ຮັບ​ລາງວັນ​ໂນ​ແບນ​ຂະແໜງ​ແພດສາດ ປະຈຳ​ປີ 2019 ຍ້ອນ​ການ​ຄົ້ນຄວ້າ​ຂອງ​ເຂົາເຈົ້າ ສຳລັບ​ການ​ຄົ້ນ​ພົບ​ວິທີ​ທີ່​ເມັດ​ແຊລ​ຕ່າງໆ ຮັບ​ຮູ້ ແລະ  ປັບ​ຕົວ​ເຂົ້າ​ກັບ​ອົກ​ຊີ​ເຈນ (oxygen) ທີ່​ມີ​ຢູ່.

   ໃນ​ແຈ້ງ​ການ​ທີ່​ມີ​ອອກ​ມາ​ເມື່ອ​ວັນ​ທີ 7 ຕຸລາ​ນີ້ ສະພາ​ລາງວັນ​ໂນ​ແບນ ທີ່​ຂຶ້ນ​ກັບ​ສະ​ຖາ​ບັນ Karolinska ຂອງ​ຊູ​ແອດ ໃຫ້​ຮູ້​ວ່າ ລາງວັນ​ດັ່ງກ່າວ​ແມ່ນ​ໄດ້​ຮັບ​ຮ່ວມ​ກັນ​ໂດຍ​ນັກວິທະຍາສາດ​ສາມ​ຄົນ​ດັ່ງກ່າວ ໂດຍ​ແຕ່ລະຄົນ​ຈະ​ໄດ້​ຮັບ​ເງິນ​ແບ່ງປັນ​ຢ່າງ​ເທົ່າ​ທຽມ​ກັນ ຈາກ​ລາງວັນ​ເງິນສົດ​ລວມ 9 ລ້ານ ໂກຣ​ໂນ​ຊູ​ແອດ ຫຼື​ເທົ່າ​ກັບ  918.000 ໂດ​ລາ​ສະຫະລັດ.

    ຄະນະ​ກຳມະການ​ດັ່ງກ່າວ ໃຫ້​ຮູ້​ວ່າ ນັກວິທະຍາສາດ​ທັງ​ສາມ​ຄົນ “ໄດ້​ສ້າງ​ພື້ນຖານ​ເພື່ອ​ການ​ເຂົ້າໃຈ​ຂອງ​ພວກ​ເຮົາ ກ່ຽວ​ກັບ​ລະດັບ​ອົກ​ຊີ​ເຈນ ມີ​ຜົນ​ກະທົບ​ແນວໃດ​ຕໍ່​ແຊລ ຂະ​ບວນ​ການ​ເຜົາ​ຜານ ອາຫານ ແລະ  ການ​ເຮັດ​ວຽກ​ຂອງ​ຮ່າງກາຍ.” ຄວາມ​ກ້າວໜ້າ​ດັ່ງກ່າວ ຈະ​ຊ່ວຍ​ນຳ​ທາງ​ໄປ​ສູ່​ການ​ຫາ​ວິທີ​ໃໝ່ ເພື່ອ​ຕໍ່ສູ້​ກັບ​ພະຍາດ​ເລືອດ​ຈາງ ພະຍາດ​ມະ​ເຮັງ ແລະ  ພະຍາດ​ອື່ນໆ.

    ຫຼັງ​ຈາກ​ການ​ປະກາດ​ລາງວັນ​ໂນ​ແບນ​ຂະແໜງ​ແພດສາດ 2019 ແລ້ວ ຕໍ່​ໄປ​ກໍ​ຈະ​ປະກາດ​ລາງວັນ​ໂນ​ແບນ​ຂະແໜງ​ຟີ​ຊິກ​ສາດ ໃນ​ວັນ​ທີ 8 ຕຸລາ ລາງວັນ​ໂນ​ແບນ​ຂະແໜງ​ເຄ​ມີ​ສາດ ໃນ​ວັນ​ທີ 9 ຕຸລາ ລາງວັນ​ໂນ​ແບນ​ຂະແໜງ​ວັນນະກຳ ໃນ​ວັນ​ທີ 10 ຕຸລາ ລາງວັນ​ໂນ​ແບນ​ຂະແໜງ​ສັນຕິພາບ  ໃນ​ວັນ​ທີ 11 ຕຸລາ ແລະ ລາງວັນ​ໂນ​ແບນ​ຂະແໜງ​ເສດຖະສາດ ໃນ​ວັນ​ທີ 14 ຕຸລາ. ພິທີ​ມອບ​ລາງວັນ​ໂນ​ແບນ​ໃນ​ປີ​ນີ້ ຈະ​ໄດ້​ຈັດ​ຂຶ້ນ​ໃນ​ວັນ​ທີ 10 ທັນວາ​ໜ້າ​ນີ້ ທີ່​ນະຄອນຫຼວງ​ສະ​ຕົກ​ໂຮມ ຂອງ​ຊູ​ແອດ ແລະ ນະຄອນຫຼວງ ​ອົສ​ໂລ ຂອງ​ນອກ​ແວ.

ຂ່າວທີ່ກ່ຽວຂ້ອງ