ຂ່າວຫຼ້າສຸດ

ສ ​ເກົາຫຼີ ​ໃຊ້​ເຮືອບິນ​ພົ່ນ​ຢາ​ຂ້າ​ເຊື້ອ​ເພື່ອ​ປ້ອງ​ກັນ​ພະຍາດ​ ASF

701 09 ຕ.ລ. 2019 ຂ່າວຕ່າງປະເທດ
ສ ​ເກົາຫຼີ ​ໃຊ້​ເຮືອບິນ​ພົ່ນ​ຢາ​ຂ້າ​ເຊື້ອ​ເພື່ອ​ປ້ອງ​ກັນ​ພະຍາດ​ ASF

   ກະຊວງ​ປ້ອງ​ກັນ​ປະເທດ​ຂອງ ສ ເກົາຫຼີ ແຈ້ງ​ໃຫ້​ຮູ້ເມື່ອ​ວັນ​ທີ 4 ຕຸລາ​ທີ່​ຜ່ານ​ມາ​ວ່າ ໄດ້​ໃຊ້​ເຮືອບິນ​ເອ​ລີ​ກອບ​ແຕ​ຈຳນວນ​ໜຶ່ງ ເພື່ອ​ພົ່ນ​ຢາ​ຂ້າ​ເຊື້ອ​ພະຍາດ ຢູ່​ໃນ​ເຂດ​ປອດ​ການ​ທະຫານ (DMZ) ໃນ​ເຂດ​ຊາຍ​ແດນ ລະຫວ່າງ ສ ເກົາຫຼີ ກັບ ​ສປປ ເກົາຫຼີ ທັງ​ນີ້​ກໍ​ເພື່ອ​ເປັນ​ການ​ປ້ອງ​ກັນ​ການ​ແຜ່​ລາມ​ຂອງ​ພະຍາດ​ອະຫິ​ວາ​ໝູ ສາຍ​ພັນ​ອາ​ຟະ​ຣິກ​ກາ (ASF).

    ການເຄື່ອນໄຫວ​ຂ້າ​ເຊື້ອ​ພະຍາດ​ດັ່ງກ່າວ ໄດ້​ຮັບ​ການ​ຜັນ​ຂະຫຍາຍ​ຢູ່​ໃກ້​ກັບ​ແຂວງ ເຢີນ​ເຈີນ (ທາງ​ທິດເໜືອ​ນະຄອນຫຼວງ​ເຊ​ອູນ) ໃນ​ຕອນ​ເຊົ້າ​ຂອງ​ວັນ​ທີ 4 ຕຸລາ ຊຶ່ງ​ເປັນ​ເວລາ​ເກືອບ​ໜຶ່ງ​ມື້ ຫຼັງ​ຈາກ​ທີ່ ສ ເກົາຫຼີ ກວດ​ພົບ​ຮ່ອງຮອຍ​ຂອງ​ໄວ​​ຣັສ ASF ຢູ່​ໃນ​ຊາກ​ໝູ​ປ່າ​ໂຕ​ໜຶ່ງ ຢູ່​ໃນ DMZ.

     ໃນ​ຂະນະ​ດຽວ​ກັນ ກອງທັບ​ຂອງ ສ ເກົາຫຼີ ກໍ​ໄດ້​ຊີ້​ນຳໄປ​ຍັງ​ພົນທະຫານ​ຢູ່​ໃນ​ເຂດ​ຊາຍ​ແດນ ໃຫ້​ຈັບ​ຕາຍ​ກັບ​ທີ່ ຖ້າ​ຫາກ​ພົບ​ເຫັນ​ໝູ​ປ່າ​ໂຕ​ໃດ​ຂ້າມ DMZ.  ທາງ​ການ ສ ເກົາຫຼີ ກໍ​ໄດ້​ແຈ້ງ​ໄປ​ຍັງ ​ສປປ ເກົາຫຼີ ກ່ຽວ​ກັບ​ການ​ຕົກລົງ​ດັ່ງກ່າວ ເພື່ອ​ຫຼີກເວັ້ນ​ເຫດການ​ທີ່​ອາດ​ເກີດ​ຂຶ້ນ.

    ກະຊວງ​ກະສິກຳ ອາຫານ ແລະ ຊົນນະບົດ​ຂອງ ສ ເກົາຫຼີ ແຈ້ງ​ໃຫ້​ຮູ້​ວ່າ ໃນ​ເວລາ​ບໍ່​ເຖິງ 3 ອາທິດ​ທີ່​ຜ່ານ​ມາ ນັບ​ແຕ່​ກວດ​ພົບ​ການ​ລະບາດ​ເປັນ​ຈຸດ​ທຳ​ອິດ​ເປັນຕົ້ນ​ມາ ສ ເກົາຫຼີ ໄດ້​ຢັ້ງຢືນ​ການ​ລະບາດ​ໃໝ່​ຂອງ​ພະຍາດ​ດັ່ງກ່າວ ຢູ່​ໃນ 13 ຈຸດ. ໄລ່​ມາ​ຮອດ​ວັນ​ທີ 4 ຕຸລາ​ທີ່​ຜ່ານ​ມາ ສ ເກົາຫຼີ ໄດ້​ຂ້າ​ທຳລາຍ​ໝູ​ໄປ​ແລ້ວ 100.000 ກວ່າ​ໂຕ ແລະ ຄາດ​ວ່າ​ຍອດ​ຈຳນວນ​ໝູ​ທີ່​ຂ້າ​ທຳລາຍ ຈະ​ມີ 150.000 ກວ່າ​ໂຕ ໃນ​ເມື່ອ​ວ່າ​ມີ​ໝູ​ທີ່​ນຳໄປ​ຫາ​ຈຸດ​ຂ້າ​ທຳລາຍ​ນັ້ນ​ຍັງ​ເຫຼືອ​ຢູ່.

ຂ່າວທີ່ກ່ຽວຂ້ອງ