ເບິ່ງບ້ານເຂົາເອົາບົດຮຽນ 08-10-2019

1.623 08 ຕ.ລ. 2019 ຫົວຂໍ້ຂ່າວອື່ນໆ

    ມື້­ນີ້ ມີ​ຂ່າວ​ກ່ຽວ​ກັບ​ນະ­ໂຍ­ບາຍ​ຟັກ​ຟື້ນ​ຜູ້​ຕິດ​ຢາ​ເສບ​ຕິດ ທີ່ ອິນ​ໂດ​ເນ​ເຊຍ ຕໍ່​ໃສ່​ເລື່ອງ​ຈີນ​ອອກ​ກົດໝາຍ​ເກັບ​ພາ­ສີ​ສິ່ງ­ແວ­ດລ້ອມ ແລະ ເລື່ອງ​ມາດ​ຕະ­ການ​ຕ້ານ​ຂ່າວ​ປອມ ທີ່ ເຢຍ​ລະ​ມັນ.

    ທີ່ ອິນ​ໂດ​ເນ​ເຊຍ: ສະ­ຖິ­ຕິ​ກ່ອນ​ໜ້າ​ນີ້ ປະ­ມານ 5 ປີ (2014) ສະ­ແດງ​ໃຫ້​ເຫັນ​ຄວາມ​ກັງ­ວົນ​ໃຈ​ຂອງ​ທາງ​ການ​ປະ­ເທດ​ອິນ​ໂດ​ເນ​ເຊຍ ກ່ຽວ​ກັບ​ບັນ­ຫາ​ຢາ​ເສບ​ຕິດ​ທີ່​ພຸ່ງ​ສູງ​ຂຶ້ນ ໃນ​ລະ­ດັບ​ອັນ­ຕະ­ລາຍ ຕົວ­ຢ່າງ ໃນ​ປີ 2008 ຜູ້​ເສບ​ຢາ​ເສບ​ຕິດ​ທີ່​ມີ​ອາ­ຍຸ​ລະ­ຫວ່າງ 10 ຫາ 59 ປີ​ນັ້ນ ມີ​ຈຳ­ນວນ 3,7 ລ້ານ​ຄົນ​ໃນ​ທົ່ວ​ປະ­ເທດ ແຕ່​ໃນ​ປີ 2016 ຜັດ​ໄດ້​ເພີ່ມ​ຂຶ້ນ​ເປັນ 4,7 ລ້ານ​ຄົນ ຫຼື ເທົ່າ​ກັບ 2,2% ຂອງ​ພົນ­ລະ­ເມືອງ​ອິນ​ໂດ​ເນ​ເຊຍ (Vientiane Times 13/3/2014) ເພື່ອ​ແກ້​ໄຂ​ບັນ­ຫາ​ນີ້​ໃຫ້​ເກີດ​ດອກ​ອອກ​ຜົນ​ທາງ​ການ​ຂອງ​ປະ­ເທດ​ນີ້ ຈຶ່ງ​ໄດ້​ຊອກ​ທາງ​ອອກ​ໃໝ່​ເພື່ອ​ຟື້ນ​ຟູ​ພວກ​ຕິດ​ຢາ​ເສບ​ຕິດ ໂດຍ​ໄດ້​ຮັບ­ຮອງ​ເອົາ​ນະ­ໂຍ­ບາຍ​ຜູ້​ເສບ​ຕິດ​ເຂົ້າ​ສູນ​ຟັກ​ຟື້ນ ແທນ​ທີ່​ຈະ​ສົ່ງ​ເຂົ້າ​ຄຸກ​ຄື​ແຕ່​ກ່ອນ ທ່ານ ອາ​ມີ ຊຽມ​ສຸດ​ດິນ (Amir Syamsuddain) ລັດ­ຖະ­ມົນ­ຕີ​ກະ­ຊວງ​ກົດ­ໝາຍ ແລະ ສິດ­ທິ​ມະ­ນຸດ ມີ​ຄຳ​ເຫັນ​ກ່ຽວ​ກັບ​ເລື່ອງ​ນີ້​ວ່າ.... ພວກ​ຕິດ​ຢາ​ເສບ​ຕິດ​ຄວນ​ຖືກ​ສົ່ງ​ເຂົ້າ​ສູນ​ຟື້ນ​ຟູ ເພາະ​ພວກ​ເຂົາ​ແມ່ນ​ຜູ້​ທີ່​ໄດ້​ຮັບ​ຄວາມ​ທໍ­ລະ­ມານ​ຈາກ​ການ​ເສບ​ຕິດ ແລະ ຕ້ອງ­ການ​ການ​ປິ່ນ­ປົວ ດັ່ງ­ນັ້ນ ຈຶ່ງ​ບໍ່​ຄວນ​ສົ່ງ​ພວກ​ເຂົາ​ເຂົ້າ​ຄຸກ ສ່ວນ​ທ່ານ ອາ­ລີ ກຸ​ຟຼົນ ມຸກ​ຕີ (Ali GufronMukti) ຮອງ​ລັດ­ຖະ­ມົນ­ຕີ​ສາ­ທາ­ລະ­ນະ​ສຸກ​ນັ້ນ ເຄີຍ​ມີ​ຄຳ​ເຫັນ​ວ່າ ການ​ແກ້​ໄຂ​ບັນ­ຫາ​ຜູ້​ເສບ​ຕິດ​ນັ້ນ​ຍັງ​ພົບ​ກັບ​ຫຼາຍ​ບັນ­ຫາ ຍ້ອນ​ຂໍ້​ກຳ­ນົດ​ໃນ​ກົດ­ໝາຍ​ກ່ຽວ​ກັບ​ບັນ­ຫາ​ນີ້​ຍັງ​ບໍ່​ຈະ­ແຈ້ງ ບໍ່​ຈຳ­ແນກ​ໂທດ​ລະ­ອຽດ​ລະ­ຫວ່າງ​ຜູ້​ຄ້າ​ຢາ​ເສບ​ຕິດ​ກັບ​ຜູ້​ເສບ​ຕິດ ຂ່າວ​ບອກ​ວ່າ​ລະ­ບຽບ​ການ​ໃໝ່​ກ່ຽວ​ກັບ​ການ​ສົ່ງ​ຜູ້​ເສບ​ຕິດ​ເຂົ້າ​ສູນ​ຟັກ​ຟື້ນ​ນີ້​ຖືກ​ເຊັນ​ຮັບ­ຮອງ​ເອົາ ໂດຍ​ລັດ­ຖະ­ມົນ­ຕີ​ກົດ­ໝາຍ ແລະ ສິດ­ທິ​ມະ­ນຸດ ລັດ­ຖະ­ມົນ­ຕີ​ສັງ­ຄົມ ຫົວ­ໜ້າ​ໜ່ວຍ​ງານ​ຕຳ­ຫຼວດ​ຝ່າຍ​ສືບ­ສວນ​ອາ​ຊະ​ຍາ​ກຳ ແລະ ຫົວ­ໜ້າ​ຄະ­ນະ​ປາບ​ປາມ​ຢາ​ເສບ​ຕິດ (BNN).

    ທີ່ ສປ ຈີນ: ໃນ​ສະ­ໜາມ­ຮົບ ເພື່ອ​ຄວບ​ຄຸມ​ບັນ­ຫາ​ມົນ​ລະ​ພິດ​ນັ້ນ ສປ ຈີນ ໄດ້​ນຳ​ໃຊ້​ມາດ​ຕະ­ການ​ທາງ​ກົດ­ໝາຍ​ທີ່​ມີ​ປະ­ສິດ­ທິ­ພາບ​ຫຼາຍ​ລະ­ດັບ ຕົວ­ຢ່າງ​ໜຶ່ງ ກໍ​ຄື ກົດ­ໝາຍ​ພາ­ສີ​ສິ່ງ­ແວ­ດລ້ອມ ທີ່​ຄະ­ນະ​ປະ­ຈຳ​ສະ­ພາ​ປະ­ຊາ­ຊົນ​ແຫ່ງ​ຊາດ​ຈີນ ໄດ້​ຮັບ­ຮອງ​ເອົາ​ໃນ​ທ້າຍ​ເດືອນ​ທັນ­ວາ 2016 ແລະ ເລີ່ມ​ມີ​ຜົນ​ສັກ­ສິດ​ນັບ​ແຕ່​ວັນ​ທີ 1 ເດືອນ​ມັງ­ກອນ ປີ 2018 ເປັນ­ຕົ້ນ​ມາ ກົດ­ໝາຍ​ສະ­ບັບ​ນີ້ ເຮັດ​ໜ້າ­ທີ່​ເປັນ​ຂໍ​ກະ­ແຈ​ໃນ​ການ​ຕ້ານ​ມົນ​ລະ​ພິດ​ນີ້​ຄຳ​ເຫັນ​ຂອງ​ທ່ານ ຫວາງ​ຈຽນ​ຟານ (Wang Jianfam) ຫົວ­ໜ້າ​ນະ­ໂຍ­ບາຍ​ພາ­ສີ​ກະ­ຊວງ​ການ​ເງິນ​ຈີນ ໃນ​ຄວາມ​ເປັນ​ຈິງ ທາງ​ການ​ຈີນ​ໄດ້​ເກັບ​ຄ່າ​ປ່ອຍ​ມົນ​ລະ​ພິດ ນັບ​ແຕ່​ປີ 1979 ພຸ້ນ​ມາ ໃນ​ປີ 2015 ມູນ​ຄ່າ​ທີ່​ເກັບ​ໄດ້​ນັ້ນ​ສູງ​ເຖິງ 173 ຕື້​ຢວນ (ເທົ່າ​ກັບ 2,5 ຕື້​ໂດ​ລາ​ສະ­ຫະ­ລັດ) ຈາກ​ບັນ­ດາ​ຫົວ­ໜ່ວຍ​ທຸ­ລະ​ກິດ ແນວ­ໃດ​ກໍ​ດີ​ອົງ­ການ​ປົກ­ຄອງ​ທ້ອງ­ຖິ່ນ​ຈຳ­ນວນ​ໜຶ່ງ ໄດ້​ສວຍ​ໃຊ້​ຊ່ອງ​ຫວ່າງ​ຂອງ​ລະ­ບຽບ​ການ​ວ່າ​ດ້ວຍ​ການ​ເກັບ​ຄ່າ​ປ່ອຍ​ມົນ​ລະ​ພິດ ເພື່ອ​ຍົກ­ເວັ້ນ​ພາ­ສີ​ໃຫ້​ຫຼາຍ​ບໍ­ລິ­ສັດ ຍ້ອນ​ແນວ​ນີ້​ເອງ​ຈຶ່ງ​ຈຳ­ເປັນ​ຕ້ອງ​ໄດ້​ມີ​ກົດ­ໝາຍ​ສະ­ເພາະ ເອີ້ນ​ວ່າ ກົດ­ໝາຍ​ພາ­ສີ​ສິ່ງ­ແວ­ດລ້ອມ ຈຸດ​ດີ​ຂອງ​ການ​ມີ​ກົດ­ໝາຍ​ສະ­ເພາະ ກໍ​ຄື​ມັນ​ບໍ່​ພຽງ​ແຕ່​ໃຊ້​ເພື່ອ​ເກັບ​ພາ­ສີ ແຕ່​ຍັງ​ສ້າງ​ຈິດ​ສຳ­ນຶກ​ທີ່​ຖືກ­ຕ້ອງ​ໃຫ້​ຜູ້​ປະ­ກອບ​ການ ຊຸກ­ຍູ້​ໃຫ້​ພວກ​ເຂົາ­ເຈົ້າ​ນຳ​ໃຊ້​ເຕັກ​ໂນ​ໂລ​ຊີ​ຄຸນ​ນະ​ພາບ ແລະ ມີ​ຜະ­ລິດ​ຕະ​ພັນ​ທີ່​ສະ­ອາດ​ຂຶ້ນ.

    ທີ່ ເຢຍ​ລະ​ມັນ: ໃນ​ເດືອນ​ມີ​ຖຸ​ນາ ປີ 2017 ລັດ­ຖະ­ບານ​ເຢຍ​ລະ​ມັນ ໄດ້​ຮັບ​ຜ່ານ​ກົດ­ໝາຍ​ເອົາ​ໂທດ​ຕໍ່​ບໍ­ລິ­ສັດ​ສື່­ສານ​ສັງ­ຄົມ​ທີ່​ແຜ່​ຂ່າວ​ປອມ-ຂ່າວ​ທີ່​ຜິດ​ກົດ­ໝາຍ ດ້ວຍ​ວິ­ທີ​ການ​ປັບ​ໃໝ​ໃນ​ມູນ​ຄ່າ​ສູງ​ເຖິງ 50 ລ້ານ​ເອີ​ໂຣ ຖ້າ​ບໍ­ລິ­ສັດ​ກ່ຽວ­ຂ້ອງ​ບໍ່​ຍອມ​ລຶບ​ເນື້ອ​ໃນ​ທີ່​ຜິດ​ກົດ­ໝາຍ ເນື້ອ​ໃນ​ຈຳ­ແນກ​ເຊື້ອ​ຊາດ ເຜົ່າ​ພັນ ແລະ ຄຳ​ເຫັນ​ທີ່​ເປັນ​ອັນ­ຕະ­ລາຍ​ຮ້າຍ​ແຮງ​ພາຍ​ໃນ 24 ໂມງ ພາຍ­ຫຼັງ​ທາງ​ການ​ໄດ້​ອອກ​ຄຳ​ສັ່ງ​ກົດ­ໝາຍ​ສະ­ບັບ​ດັ່ງ­ກ່າວ ມີ​ຜົນ​ສັກ­ສິດ​ນັບ​ແຕ່​ເດືອນ​ຕຸ­ລາ​ປີ 2017 ເປັນ­ຕົ້ນ​ມາ (The Nation 30 ຕຸ­ລາ 2017).

ຂ່າວທີ່ກ່ຽວຂ້ອງ